Канон преподобному Кирилу, Новоезерскому чудотворцу


Канон, глас 2.

Тропарь, глас 8. Божиим Духом подвизаемь, слез твоих тучами, иссохшее напоил еси и бесплотное в пустыни житие показал еси. И еже из глубины сердца бодреными молитвами и постом, благодеяния труды уплодоносил еси. И вселенную всю просветил еси, сиянием чюдес твоих, отче Кириле. Моли Христа Бога спастися душам нашим.

 

Песнь 1. Ирмос.

Во глубине потопи древле фараонистская вся воинства преоружену силу, воплощьжеся Слово преспеющия грехи потребил есть. Преславныи Господь, яко прославися.

Запев с поклоном: Преподобне отче Кириле, моли Бога о нас.

Слуга Божии быв отче Кириле, сохранил еси яко священник спасеная повеления. Мирское смущение оставил еси. И крест си взем, и Живоносным Стопам всеблаженне последовал еси.

Запев. Спасению Ходатая сведыи разум Богодохновенныи, и все Писание благочестно прошел еси, отче преподобне Кириле, священства от онуду прием сановное.

Слава. От юности своея отче ум к Богу вперив, и тленными нетленная, яко добрыи купец искупил еси. Темже ныне сшедшеся память твою почитаем.

И ныне. Восияв яко Солнце ис Тебе Мати Приснодевая, иже от Отца прежде век Невидимыи. Им же преславно телом описуемь, благочестия зарею человеки просветил есть.

Катавасия: Избави от бед рабы своя, преподобне отче Кириле, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

На камени мя веры утверди, разшири уста моя на враги моя. Возвеселибося дух мой воспевати Ти, несть свят яко же Бог наш, и несть праведен, паче Тебе Господи.

Запев. От нас ныне слово похваления плетомо приемля, богоносе веселися твоими болезньми наслаждаяся, зовы преподобне, Ты еси Бог наш.

Запев. Словеса услышав Владычния, оставил еси мира, и яже в нем. Приведе семя свое Господеви, зовы Ты еси Бог наш.

Слава. Райскую жизнь, и тамо святых веселие, всегда во уме своем поминая преподобне, темже и во слезах и в воздыханиих, всю свою жизнь отче Кириле прошел еси. И сего ради и по смерти от Христа чюдесы прославися.

И ныне. Ты Едина паче всех иже от века великих сподобися, и выше естества. Бога бо Невместимаго всею тварию во утробе Своей понесе, и воплотила еси. Тем Тя Богородицу вси величаем. Катавасия.

Седален, глас 1. Иночествовав Богоугодне, и добродетелно пожил еси, и благодать исцеления прият, блаженне Кириле. Знамения совершив страшна. Обитель же совокупив священную, и привел еси множество спасаемых Господеви пребогате. Слава Богу просветившему тя, слава Венчавшему тя, слава святую твою память Прославльшему.

 

Песнь 4. Ирмос.

Пришествовав от Девы, не ходатай ни ангел, но Ты Сам Господи воплощься, и спасе всего мя человека. Тем вопию Ти, слава Силе Твоей.

Запев. Отверзл еси Кириле двери своя, Аврааму уподоблься, всем требующим преподобне Кириле. Тем Христос отверзает ти Небесная врата преблаженне.

Запев. Во всечестныи и во священническии сан украсился еси Кириле блаженне, и иноческому тризнищу радуяся притекл еси. Всем домом преблаженне приводимь.

Слава. Постом и молитвами тело свое отче Кириле изнурил еси. И сего ради сподобися видети Неизреченная Благая, яже святым уготованная, с ними же отче Кириле о нас моли.

И ныне. Исцеляя Еввино древнее преступление, в Тебе Пренепорочную и Пресвятую вселися. И всего мя человека вообразив падшаго, Пребожественыи. Катавасия.

Песнь 5. Ирмос.

Просвещение во тме лежащим, и Спасение неначаемым Христе Спасе мой, к Тебе утренюю Царю мирныи, просвети мя сиянием Си, иного бо разве Тебе Бога не знаем.

Запев. Христокрасному одержася житию Кириле блаженне, всем честен явися. Весть бо воистину добродетель славне, совершати сию имущих. Явил бо ся еси священник Христов достоприятен.

Запев. Силою Божественою укрепляемь блаженне Кириле, мирскую любовь крепко отвергл еси, и Владыце радуяся прииде, вольным ти нравом. И сохранив веру невредиму, и венец славы богомудре приял еси.

Слава. Днесь воспеваема священная память твоя преподобне Кириле, веселит ученики твоя. И честное твое успение славяще глаголют, молитвами своими отче соблюди воспевающих тя.

И ныне. Едину нам во двою существу видиму Ипостась, Едина Благословеная раждаеши неизреченно, Божие Слово воплотившееся за милость неизреченную. Того моли сохранитися поющим Тя. Катавасия.

 

Песнь 6. Ирмос.

В бездне греховней одержимь, неизследную милосердия Твоего призываю бездну, от тля Боже мой возведи мя.

Запев. Житейских вещей отче Кириле, настоящее сведыи, сие оставил еси, и к воздаянию потщася Горняго жребия пребогате.

Запев. Благочестно инок множество питати не оставил еси, отче блаженне Кириле. Тем пищи большей во обителех Небесных сподобися.

Слава. Место иже сподобися прияти честныя мощи твоя преподобне освятися. И по многим странам прославляемо есть, яко в себе мощи твоя имущи.

И ныне. Неискусомужная Пречистая родила еси и пребываеши Девою, являющи Божества истиннаго Сына и Бога Твоего образы. Катавасия.

Кондак, глас 8. Взбранному и крепкому адаманту, прогонителю бесом, новому чудотворцу, победительная, страстей злых свободившеся, благодарьственая восписуем ти отче наш Кириле. Но яко имея дерзновение у престола Христова, верою чтущих тя град же и люди, молитвою своею сохраняй. Ты бо еси царю крестоносному, и стаду твоему похвала и утвержение.

Икос. Услышав Христов глагол, и оставив плотьская мудрования, богатьство и славу яко прах вменив, и на страсти яко бесплотен подвизався, и бесплотным ликостояниям чистоте уподобися. Разума дарования приял еси, иже в песнех сице ти рекуще. Радуися Кириле преподобне и Богоносе, Небесныи человече, земныи ангеле. Радуися кроме мира суетнаго пустыню соделавыи, в Краснем острове, и в нем обитель составив. Радуися в ней инок множество собрал еси, и от них слышиши сице рекущих. Радуися инокующим о спасении ходатай. Радуися унывающим образ утешения, радуися иноком от навет вражиих избавителю, радуися скорбем губителю нашего естества, яко отгоняя помыслы злобныя. Радуися скорбящим душею, сладкое утешение и радости Божественыя подателю. Радуися наш предстателю и избавителю, радуися преподобне отче Кириле иноком удобрение.

 

Песнь 7. Ирмос.

Богопротивное веление, беззаконнующа мучителя, высок пламень вознесло есть. Христос же простре богочестивым детем, хлад духовныи, Сыи Благословен и Препрославлен.

Запев. Избранием суда украсился еси, священник быв Кириле отче преподобне. Тем вшел еси внутрь вышняго храма, не заходимыя зари, своего священнотворения плод наслаждаяся поя, благословен Бог отец наших.

Запев. Отеческая возлюбил еси ликостояния, и в лицех отец радостно прославися. И Христу предстоя всеблаженне преподобне Кириле, приемлеши своего служения всего воздаяния, воспевая, благословен Бог отец наших.

Слава. Источает чюдеса честная рака твоя преподобне, преизобилующи благодатию и верою приходящим здравие подает иже Христу от души вопиющим, благословен Бог отец наших.

И ныне. Из утробы Ты Дево Праведное Солнце породи, Девою пребывши, толстоты плотныя приобщившася человека бываема Христа. Ис Тебе воспеваем, благословен Пречистая Плод Твоего чрева. Катавасия.

 

Песнь 8. Ирмос.

В пещь огнену, к детем еврейским сошедшаго, и пламень на хлад преложьшаго Бога, пойте вся дела Господа, и превозносите Его во веки.

Запев. Совершеною чистотою, и любовию Христа возжелел еси, священнотаинниче отче, и непрестанными гласы вопияше, пойте Господа вся дела, и превозносите Его во веки.

Запев. Мирскую красоту оставив волею, Христови блаженне пришел еси, благолепие Того желая зрети, и во обители святыя вселился еси. Пойте Господа вопия вся дела, и превозносите Его во веки.

Слава. Ныне пустыня веселием отче красуется, имея мощи твоя Кириле преподобне. Ученицы же твоему житию ревнующе и о твоей памяти радующеся, Творцу вопиют, Господа воспевайте дела, и превозносите Его во веки.

И ныне. Священными Тя гласы Божии пророцы Чистая бывающю Матерь провозгласиша ясно, всеми Владеющаго, Пречистая. Егоже превозносим Господа во веки. Катавасия.

 

Песнь 9. Ирмос.

Иже от Бога Бога Слова, не изреченною мудростию пришедшаго обновити Адама, ядию тления падшаго зле, от святыя же Девицы, неизреченно Воплощаема нас ради, вернии единомудрено песньми величаем.

Запев с поклоном. Духом отче обнищав, Небесное Царство восприял еси со всеми избранными, Славы неизреченныя исполняемь. Болезнем почесть приемля блаженне Кириле воздаяния. Сего ради тя верою и любовию ублажаем.

Запев. Мощей твоих рака, верно приступающим источает исцелением реки. Страсти душам потопляющи, и телесем болезни отъемлющи, блаженне Кириле, молитвениче верою присно блажащим тя.

Слава. Совокупляяся с преподобными светлыми стады, Сиянием Невечерним, мыслено отче Кириле озаряемь, иже божественую ти память творящих, просвети верныя, и улучити спасение молитвами си сподоби.

И ныне. Облистаеши всех чюдес зарями Твоими Богоблагодатная Чистая, страстей и скорбей отъемля мглу, и Свет веселия мысленыи простирая. Матерь Богу Тя величаем. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля