Канон преподобному Евфимию Суздальскому


Канон иже во святых отцу нашему Евфимию, Суздальскому чудотворцу, глас 2.

Тропарь, глас 3. Яко светозарная звезда, пришед от востока на запад. Оставль отечество свое Нижнии Новград. И дошед Богом спасаемаго града Суждаля. И прием чюдес дар от Бога отче Евфимие. И бысть о Христе собеседник, и спостник преподобному Сергию. С ним же у Христа Бога испроси, людям нашим здравие и спасение, и на поганыя победы. И душам нашим велию милость.

Песнь 1. Ирмос.

Грядите людие, поем песнь Христу Богу, раздельшему море, и проведшему люди, яже испусти из работы египетския, яко прославися.

Запев с поклоном: Преподобне отче Евфимие, моли Бога о нас.

Радуися источниче кипящии струю спасеную. От нея же почерпаем целебную благодать, прегрешении избавляемся, любовию приходящии к тебе приснопамятне.

Запев. Святыню прием от Христа Бога, от утробы славне. И явился еси избранныи сосуд, духовную благодать всю приемыи.

Слава. Да животу причастник нетленныи явишися. Временных отче премудре небрегл еси. И Богу приступль, непрестанно молиши спастися всем нам.

И ныне. Словесем премудрым, Твоих устен последующе, радующеся, Пренепорочная, Тя ублажаем. Бывшую нам вину, Неизреченнаго Блаженьства.

Катавасия: Избави от бед рабы своя, преподобне отче Евфимие, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

На камени мя веры утверди, разшири уста моя на враги моя. Возвеселибося дух мой воспевати. Несть свят яко же Бог наш, и несть праведен паче Тебе Господи.

Запев. Всесветлыи богомудре показася столп, наставляя чины инок. Облак же осеняющь жребии Божии, и лица невидимых враг помрачающь, благодатию всех Царя.

Запев. Стоиши пред Лицем своего Владыки, неослабным мановением. Моляся избавитися стаду твоему, от работы тмы преподобне, и мучительства страстей. Ибо твоих молитв послушает Бог.

Слава. Плоти своея двизания умертвив, крепким пощением богоглагольниче. И бысть обителище Владычне. Его же умоли избавитися скорбей, и страстей смущения, к тебе прибегающим.

И ныне. Свиток Тя провиде Исаия, в нем же плотьски Слово знаменася. Раздрав начертание первозданнаго, иже преступлением подписа. И пода оставление работы нам. Катавасия.

Седален, глас 8. Подобен. Премудрости.

Отрекся плоти Христа ради, и духовныи явися людем водитель. Услышал еси словеса тайных учении. Иноком же явися правило правости. И страсти вся крепко попрал еси. Тем и бесом коварьства до конца потребил еси. К Нему зря всегда богоносне Евфимие. Моли Христа Бога, грехов оставление подати, чтущим любовию святую память твою.

Слава и ныне. Богородичен. Солнца облаче светлыи, Божественаго Света свещниче златокованныи. Нескверная, Непорочная Пречистая Владычице. Омраченую душу мою слепотою страстей, безстрастия зарею просвети молюся. И оскверненое сердце мое омыи, умилением покаяния. Плачем же от скверных мя очисти дел моих. Да любовию зову Ти, Богородице Приснодево, молися Христу Богу, согрешением оставление дати ми. Тебе бо надежду имею раб Твой.

 

Песнь 4. Ирмос.

Пою Тя, слухом бо Господи услышах и убояхся. До мене бо прииде, мене ища заблуждьшаго. Тем же многое Твое смотрение, еже на мя прославляю обновление.

Запев. Желание божественое распали, разгреяв ти сердце. Желанная постигл еси до конца богомудре отче, оставль земленых пристрастие. Единоселник вышним быв служителем.

Запев. Ласкания сверстник преподобне попрал еси всеобразно. Вниде бо рачение Содетеля в тя богомудре тепле. Изданных мрачная желания до конца отрину.

Слава. На пажить чисту возгнал еси воздержания, стадо твое отче, ко Источнику приведе немутному Безстрастия. Разумныя звери побеждая. Еже ныне молитвами си спасай.

И ныне. Се Тебе роди славят родов, якоже прорекла еси Отроковице. Создателя бо бысть Полата, и Божественыи Храм. В нем же вселися Вышнии, плотию обложься, да спасет нас. Катавасия.

 

Песнь 5. Ирмос.

Просвещение во тме лежащим, и спасение неначаемым Христе Спасе мой, к Тебе утренюю Царю мирныи, просвети мя сиянием Си. Иного бо разве Тебе Бога не знаем.

Запев. Весь Богови прилежа отче, в пустынях мраз зимнии терпел еси доблествено, и летныи нося вар. И бысть дом Премудрости Божия, и добродетелным сиянием, многообразно украшаем.

Запев. Юношьски наступи на пощение, чревобесию змия неприем советника отче. Но алчбою и молитвами непрестанными, и чистотою соединися Богови. Причастник бысть Пища Болшия.

Слава. Добродетелей вшед во облак, скрижали прият блаженне, написаныя рукою Божиею. Иночествующих множества научил еси, от вещественых всех огребатися. Возводя на гору Божественаго разума.

И ныне. Явися Чистая праотцу лествица, небес высочае, имущи твердаго водрузения. Из Тебе бо Бог воплощься показася, и совокупи разстоящаяся прежде. Тем Тя Богородицу вернии славим. Катавасия.

 

Песнь 6. Ирмос.

Ко Господу от кита Иона вопияше, Ты мя возведи из глубины ада Владыко, да яко Избавителю во гласе хваления, истинным Духом пожру Ти.

Запев. Пострекаем Владычнею любовию, оставил еси вся чювьственая, и Тому последовал еси. На рамо иго легкое взем мужески, благодушия тезоимените.

Запев. Наказан неизреченных разуму блаженне, научил еси твое стадо Небесная разумевати. И страстей нашествия отгоняти, твоими поученьми.

Слава. Житие твое подобно, вышних сил отче бысть. Дерзновение тебе даст, иже Держаи вся Господь. Страстей избавити твое стадо Христа умоли.

И ныне. Разумев Твое неизреченное Чистая таиньство, гору присенную Аввакум Тя провозвести. Из Тебе бо Содетель за милосердие воплощься, древняя отъят изречения. Катавасия.

Кондак, глас 2. Подобен. Вышних ища. Волнении множество невлажно преходя, безплотныя враги струями слез твоих крепко погрузил еси, богомудре Евфимие преподобне. И чюдес дар прием. Моли непрестанно о всех нас.

Икос. Отверзи ми устне преблаженне, богоприятными ти молитвами, предстоя Богови всеславне Евфимие. Да воспою божественое твое житие, и возглаголю достойно добродетели твоя, яже на земли Христа Бога ради свершил еси подобно. Столп бо явися и правило иноком светло. Равно ангелом стяжа житие, в Незаходимая воистину вселився. Моли непрестанно о всех нас.

 

Песнь 7. Ирмос.

Купина в горе огнем палящи, обросима пещь халдейская, яве о тебе прописа Тя Богоневестная, Божественныи бо Безплотныи, в плотяне чреве Огнь неопально прият. Тем из Тебе Рождьшагося поем, благословен Бог отец наших.

Запев. Авраамскии стяжа нрав премудре, от земля изведыи тя Нижняго Новаграда. Пришельник быв Суждалю, и Бога узрел еси обещевающа ти воздаяние богатно. Тем веселяся усердно пояше. Благословен Бог отец наших.

Запев. Распалаем духом преподобне. Козни вражия разорил еси, оружием ограждься, нас ради Пригвождьшагося на Кресте. Тем веселяся усердно пояше. Благословен Бог отец наших.

Слава. К горе молитвы приступил еси, и вшед во облак Духа, Божия задняя видел еси. И славу прием разсуждения, бысть отче столп непоколебим. Тем прилежно моли, избавитися искушения вражия поющим тя.

И ныне. Закону Исполнителя прижила еси, прежде век Господа всяческих Сына, Премудрость же и Силу напоследок Пречистая, паче естества на обновление земленым. Тем благочестно Чистая, из Тебе Рождьшемуся зовем. Благословен Бог отец наших. Катавасия.

 

Песнь 8. Ирмос.

В пещь огнену к детем еврейским сошедшаго, и пламень на хлад преложьшаго Бога, пойте вся дела Господа, и превозносите Его во веки.

Запев. Слезными ти течении, огнепалныя страсти пожегл еси. Гееньскаго пламени страх отгна отче мудре. Совершеною любовию Создателя своего, примесився страхом во вся веки.

Запев. Якоже Енох к Богу преставлься, от Него прият бысть отче. И с вышними ликостоянии водворяешися, и поеши. Вся дела Господня Господа пойте, и превозносите Его во веки.

Слава. Ныне нетленных даров наслаждаяся, и Трисолнечьныя Светлости исполняяся блаженне. Певца своя страстей тмы молитвами ти избави. Да достойно Христа славословим.

И ныне. Клятву разрушила еси древнюю Пречистая земленых, Неизреченным Словом Бога Заченшия, воплощена из Тебе за милосердие, Пренепорочная Владычице. Его же превозносим во веки. Катавасия.

 

Песнь 9. Ирмос.

Иже от Бога Бога Слова, не изреченною мудростию, пришедшаго обнови Адама, ядию тления падшаго зле, от Святыя же Девицы, неизреченно воплощаема нас ради, вернии единомудрено, песньми величаем.

Запев с поклоном. Просвещен добротою постническою отче. И одеян ризою нетления Евфимие, и венцем даров паче ума. Владыце всех предстоиши радуяся.

Запев. В пребывалища присно живущая вселился еси блаженне. Идеже апостол собор, и множество мученик, преподобных собрание, пророческая ликования. Воздаяния болезней от Бога приим достойно, богомудре достославне.

Слава. Всесветел богоглаголниче бысть. Зарями Света Трисолнечьнаго светло озаряем. Испроси прегрешением разрешение, и лютых избавление, и злых отчюждение, всем любовию к тебе притекающим.

И ныне. Воплотився неизреченно Владыка всех, из тебе Богородителнице Марие, совершен бысть человек. Порождься, яко прежде рожества Девою сохрани Тя Чисту. Его же моли, спасти от бед душа наша. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля