Канон преподобному Ефрему Перекопскому


Канон преподобному отцу нашему Ефрему Перекопскому монастыря игумену, над Ильменем езером, на Перекопе острове. Глас 4.

Тропарь. Глас 4.

От юности своея весь Богови поработился еси блаженне. И Того ради любве отечество и род оставил еси, в пустыню вселився. В ней же и жестокое житие показав. И чюдес дарования от Бога приял еси, Ефреме преподобне. Моли Христа Бога, да спасет душа наша.

 

Песнь 1. Ирмос.

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Запев с поклоном: Преподобне отче Ефреме, моли Бога о нас.

Смирился еси Христа ради отче, и крест взем, от отечества и сродник яко от змия бегал еси. Отнюду же в пустыню вшед. В ней же трудолюбно подвизался еси преподобне.

Запев. От юности своея отче Ефреме, ум к Богу вперив, и тленными нетленная, яко добрыи купец искупил еси. Тем же ныне сошедшеся, память твою почитаем.

Слава. Христовым наречением отче Ефреме, паче огня распалаемь, настоящая, яко ничто же сущая презрел еси. Сего в покоища вселися, идеже праведных души веселятся.

И ныне. Боляща исцели душею же и телом, Владычице раба Твоего. Блаженнаго Ефрема молением. Тебе бо Предстателницу вси сущии в печали стяжахом, яко рождьшую Спасение наше. 

Катавасия: Избави от бед рабы своя, преподобне отче Ефреме, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

Твоя певцы Богородице, живыи нетления Источниче, лик Себе совокупльши духовен утверди. И в Божественей Ти славе, венцем славы сподоби.

Запев. Сна своима очима недал еси блаженне Ефреме, ни веждома дремания, дондеже сподобися праведных селения, еже уготова Бог преподобне любящим Его.

Запев. Бодреными си молитвами отче Ефреме, и жестоким воздержанием Господу на земли добре угодил еси. Сего ради страшен врагом, и славен человеком был еси.

Слава. Райскую жизнь, и тамо святых веселие, всегда во уме своем поминая преподобне, в слезах и воздыханиих, всю свою жизнь отче Ефреме прошел еси. Сего ради и посмерти от Христа чюдесы прославися.

И ныне. Источаеши исцелением струи, болящим Дево всюду. Тя бо источник показа милосердия Владычице. Иже милости Господь, из Тебе рождеися паче ума. Катавасия.

Седален. Глас 4.

Юность свою преподобне, воздержанием своим увядил еси. Страсти телесныя, яко пленника худа связав, духови повинул еси. И сего ради отче Ефреме, Христос чюдесы преславно тебе венчает, Един прославляя святых Своих.

Слава, и ныне. Богородичен. Умертвися вся крепость моя, от множества безмерных зол моих. И многими скорбьми одержимь, уже отчаяхся. Но помози ми Владычице, Ефрема блаженнаго предстательством. Яко Радость рождьшая, плачущим Утешение.

 

Песнь 4. Ирмос.

Седяи во славе на Престоле Божественем, на облаце легце, прииде Исус Пребожественыи, от Пречистыя Девы, и спасе вопиющия, слава Христе Силе твоей.

Запев. Житие свое отче Ефреме чюдно на земли показал еси, велико пощение и смирение. Сего ради тамо величество наследовал еси. Моли спастися от бед поющим тя.

Запев. Сергия великаго житию последуя преподобне. Тем же того елико мощно именование, от жития стяжал еси, Ефреме пребогате.
Слава. Постом и молитвами тело свое изнурил еси. И сего ради сподобися видети не изреченная благая, яже святым уготована. С ними же отче Ефреме о нас молися.

И ныне. Кров и заступление и прибежище буди ми, Дево рабу Твоему. И исцели мя от безмерных зол, воспевати Ти Пречистая, слава Рожеству Твоему. Катавасия.

 

Песнь 5. Ирмос.

Удивишася всяческая, о Божественней славе Твоей. Ты бо браконеискусимая Девице, прият во утробе надо всеми Бога. И родила еси безлетнаго Сына, всем воспевающим Тя мир подавающа.

Запев. Чисто житие свое, от юности потщался еси преподобне сохранити. Тем же чистоту твою видев Пресвятыи Дух, в тя вселися.

Запев. Яко преобидев тленная, и вечная отче сподобился еси прияти, по неложному словеси, просите и приимете. И еже яко просил еси, сия по достоиньству приял еси.

Слава. Место еже сподобися прияти честныя мощи твоя, преподобне освятися. И по многим странам прославляемо есть, яко в себе мощи твоя имея.

И ныне. Не престай молящи, Его же роди Богоневесто, яко Спаса и Владыку, разрешение подати скорбем и болезнем. К радости нетленней мя возведи, прощая ми согрешения. Катавасия.

 

Песнь 6. Ирмос.

Божественое се и всечестное совершающе празднество, Богомудрении Божия Матере, приидете руками восплещем, от Нея рождьшагося верою славяще.

Запев. Твое великое житие и чистоту, к сим же безмерное смирение, провидев Пресвятыи Дух, славна тя отче всем показа. Тем же от сего жития к вышнему веку прешед, получил еси с праведными иже тамо веселия.

Запев. Днесь начинаема священная память твоя, преподобне Ефреме, веселит ученики твоя, воспевающыя любовию подвиги твоя. И честное успение славяще торжествуют. Их же молитвами твоими отче соблюди.

Слава. Разбойницы первие пришедше тебе оскорбити преподобне, но ты тех разумев лукавьство, воздвигнути тем древо рекл еси. Немогущим же многим, тебе единому противитися, тем же яко посрамлени прочее страхом отбежаща. Паче побеждени бывше, нежели победиша.

И ныне. Твою подаждь ми помощь, и избави мя Владычице от бед и скорбей, и прегрешении моих, яже всех рождьши Избавление. Катавасия.

Кондак. глас 8. Подобен. Взбранной.

Ангельскому житию поревновав преподобне, вся земная оставив, ко Христу притекл еси. И Того заповедьми ограждаяся, явися столп непоколебим от вражиих нападании. Тем зовем ти, радуися Ефреме светило пресветлое.

Икос. Иже в мертвенем теле, ангельскому уподоблься житию паче естества. И с теми на Небесех ликуя. Приидете вси вернии воспоем преподобнаго Ефрема. Той бо яко уметы вмени мирская вся красная, яко да небесных получит. Вшед на гору, яко же древле Моисей и великии Илия, постом очищься, сподобися видети Троическую Светлость, не во мраце, ни в вихре, но во свете Благодати Божия. Тем и чюдес луча испущая светло, и реки исцеления источая верным от гроба, яко недугом исцелитель. Радуися отче Ефреме светило пресветлое.

 

Песнь 7. Ирмос.

Непослужиша твари богомудрении, паче Зиждителя. Но огненое прещение мужески попраша, радовахуся поюще, препетыи иже отцем Господь и Бог благословен еси.

Запев. Источает чюдеса честная рака твоя преподобне, преизобилующи благодатию, верою приходящым здравие дарует, иже Христу от души вопиющым, благословен еси Господи Боже отец наших.

Запев. Древним онем великим отцем, иже в посте провосиявшим, житию подобяся преподобне, в пустыню вселися. И тамо в пощениих многа лета пребыл еси.

Слава. Яко истиннаго и кроткаго пастыреначалника Христа, незлобивое овча, отче Ефреме был еси. Тем же незлобив, к хотящим тебе озлобити был еси, Христови вопия, Боже благословен еси.

И ныне. Обощрены болезни ранам моим, от безмерных ми прегрешении Владычице, ведут в смерть душевную и телесную. Но исхити яко сильна, всяких скорбей и недуг. Катавасия.

 

Песнь 8. Ирмос.

Отроки блачестивыя в пещи, Рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Из детска преподобне отче, потщался еси свою совесть, и сердце с душею чистою Господеви представити. Тем же и Христос чюдесы тебе прославляет, Тому вопиюща, Господа воспевайте дела, и превозносите Его во веки.

Запев. Ныне пустыни веселием отче красуется, имущи мощи твоя в себе. Ефреме преподобне. Ученицы же твои твоему житию ревнующе. О твоей памяти радующеся, Творцу вопиют, Господа воспевайте дела, и превозносите Его во веки.

Слава. В пустыни преподобне, идеже селение имел еси, тамо пречестен храм во славу Христову воздвигл еси. В нем прославлятися Пречистому Того Имени, и всем вопити, Господа воспевайте дела, и превозносите Его во веки.

И ныне. Свещниче Света Трисолнечнаго сущи, зарею благоутробия Твоего тму отими прегрешении моих Богородителице. Избавление нужным болезнем подающи, верою поющему, и превозносящему пречистое Твое Рожество. Катавасия.

 

Песнь 9. Ирмос.

Всяк земен да взыграется Духом просвещаемь. Да ликовствует же безплотных умов естество, почитая святое торжество Божия Матере. И да поют, радуися Преблаженная Богородице Чистая Приснодево.

Запев с поклоном. От пустыннаго жития, к премирному и вечному житию яко прешед блаженне. Непрестай моля Избавителя, от различных напастей и бед избавити, иже любовию честное твое успение ныне песньми славящих.

Запев. Певцев иже искренною любовию поющих, и верою тебе пение хваления приносящих, преблаженне Ефреме, от всяких бед и скорбей избавляй. Да тя вси любовию величаем.

Слава. От рук моих недостойных малое сие песненое хваление, приносящаго ти с любовию приими блаженне Ефреме. Не бо возмогох противу твоего величества украсити, но малое сие, яко велико приими, да тебе всегда величаем в песнех.

И ныне. Пение с песнию, и хваление и сплетение, от болезненыя души приношю с любовию Тебе рождьшей Христа естеством Бога. Его же благоприятно приимши, прошения моя Богородице исполни, и молитвами Твоими соблюди. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля