Канон преподобному Антонию Новгородскому

Канон преподобному отцу нашему Антонию Римлянину, иже в Великом Нове Граде. Глас 2.

 

Тропарь, глас 4.

Ветхаго Рима отечество си оставль, на камень яко на легкии корабль возшел еси. И на нем паче естества, аки безплотен по водам шествие творя, промышлением Божественаго разума направляем. Великаго Нова Града достигл еси, и обитель в нем сотворил еси. И в ней тело свое предложи, яко дар освящен. Тем молим тя отче Антоние. Моли Христа Бога, да спасет душа наша.

 

Песнь 1. Ирмос.

Грядите людие, поем песнь Христу Богу, раздельшему море, и проведшему люди, яже испусти из работы египетския, яко прославися.

Запев с поклоном: Преподобне отче Антоние, моли Бога о нас.

Агньче Незлобивыи, отверзи ми устне недостойнии, язык мой уясни, и сердце мое просвети. И ум мой озари, светом Твоего Богоразумия. Да возмогу воспевати память преподобнаго Антония, его же на земли удивил еси.

Запев. Многим милосердием и щедротами, Содетелю твари, и веком Творче, молебное пение приими. И прощение нашим согрешением даруй, Твоего угодника преподобнаго Антония молением, и тишину сердцу моему.

Слава. Светлое и богоугодное житие твое, яко свет воистину на земли показася. Божественную видети Светлость, Антоние сподобися. Тем же и видимая вся оставил еси, и Непостижимаго зрети сподобися.

И ныне. Моих прегрешении Владычице пленицу расторгни, Своего Сына и Господа молящи. И томящии мя грех Приснодево низложи. Яко да воспеваю Тя всегда Всенепорочная, Тобою спасаем.

Катавасия: Избави от бед рабы своя, преподобне отче Антоние, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

На камени мя веры утверди, разшири уста моя на враги моя. Возвеселибося дух мой воспевати, несть свят яко же Бог наш. И несть праведен паче Тебе Господи.

Запев. Жезлом добродетелей, страстное море пресек. И гордаго врага якоже другаго фараона, молитвами си погрузив. И избранное твое стадо новаго Израиля, невредно соблюди Антоние преподобне.

Запев. Возлюбив блаженне всенощное бдение, и молитву непрестанну, и любовь нелицемерну. Сими очищая ум свой, душу же просвещая, и тело свое смиряя, и ко дневным трудом благопокорно устрояя.

Слава. Храм тя вси вернии Духу Пресвятому свемы. Храм боголепен Божии Матере воздвигл еси. И ограду велию устроил еси. Инок множества совокупил еси. В нем же ныне всяк недуг, молитвами твоими отгоняется.

И ныне. Во иных женах мати дондеже дева непознася, ни мати по рожестве девьствовати сподобися. На Тебе же Дево Мати обое сбысться. Тем веселием Духа воспеваю, несть непорочны паче Тебе Владычице. Катавасия.

Седален, глас 8. Подобен. Премудрости. Ангельски на земли пожив богомудре Антоние, ликом постническим причтеся. Крест бо на рамо свое взем, последова Владыце Христу. И страсти душетленныя воздержанием преподобне увядил еси. И бысть духовно приятелище, и сосуд чист Господеви. Тем же вопием ти, моли Христа Бога, грехов оставление даровати, празднующим любовию пречестную и святую память твою.

Слава и ныне. Богородичен. Яко Всенепорочная Невесто Творцу, яко Неискусомужная Мати Избавителя. Яко Приятелище сущи Утешителя Всепетая. Беззаконию мя суща скверно жилище, и бесом игралище в разуме бывша. Потщися, и сих злодействия мя избавити. Светло жилище добродетельми соделавши, Светодателная и Нетленная, отжени облак страстей, и Вышняго Причастия сподоби, и Свету Невечернему молитвами Си.

 

Песнь 4. Ирмос.

Пришествовав от Девы, не ходатай ни ангел, но Ты Сам Господи воплощься, и спасе всего мя человека. Тем вопию Ти: слава Силе Твоей.

Запев. Умертвив себе мирови, жизнь равноангельну на земли пожил еси преславне. И яко дар освящен Владыце Антоние, свою душу чисту представил еси. И Божественаго Царствия достойно отче получил еси.

Запев. Ветрилом отче воздержания окрыляем, страстныя тмы отбежав. И ко безстрастию путем наставляем, к Свету Невечернему возтече. И от Сего озарився, нетления богатьство наследовал еси Антоние преподобне.

Слава. Великии Нов Град, ныне веселием отче красуется, имея мощи твоя в себе преподобне Антоние. Ученицы же твои, твоему житию ревнующе, о твоей памяти радующеся, Господеви поют. Слава Силе Твоей Господи.

И ныне. Истинную Тя Сень свидетельствоваша, многоразличными образы. И яве показующе Воплощеннаго из Тебе, Единаго от Тройца Пречистая, неизменно, Богомати Чистая, и мира обновльша. Катавасия.

 

Песнь 5. Ирмос.

Света Подателю, и веком Творче Господи, во свете Твоих повелении настави нас. Разве бо Тебе иного Бога не знаем.

Запев. Возшед на высоту добродетелей, долу влекущая страсти оплевал еси. Сладость показася спасения, отче преподобне Антоние. Стаду твоему проси грехов прощения.

Запев. Место прошения отче со тщанием исполняя, храм боголепен Божии Матере воздвиже. В нем же ныне праздничною радостию, инок множества веселятся, память твою прославляюще.

Слава. Не забуди стадо твое, еже мудре собрал еси. И в жизни сей упасе благочестно. И ныне потщися отче Антоние, да привлечеши во ограду Небесную.

И ныне. Управи ум мой Владычице, тружающиися в пучине скорбей, и потопляемыи нашествием тлетворных страстей. Спаси к Тебе прибегающаго. Иныя бо помощи Чистая разве Тебе не знаем. Катавасия.

 

Песнь 6. Ирмос.

В бездне греховней одержим, неизследную милосердия Твоего призываю бездну. От тля Боже мой возведи мя.

Запев. От земных к Небесным обителем преславно вшел еси, богомудре Антоние, и тамо зрети неизреченных сподобися, их же око невиде, и ухо неслыша, и на сердце человеку не взыде. Яже уготова Бог любящим Его.

Запев. Дремания очима своима отнюд не дал еси, к Богу все свое желание вперив, и Тому невозвратно от душа последовав, нощи жития непреткновенно преминул еси. Видении Божествеными окормляем, блаженне Антоние. И в Божественую жизнь вселился еси.

Слава. Великаго святителя Никиты, блаженне Антоние благословения сподобився, и духовнаго наказания поучение от него восприял еси. Бурею бо греха непогрузися, и в тихо пристанище достигл еси Небеснаго Царствия. И тамо ясне наслажаешися, Божественаго видения.

И ныне. Обетшавшая ны горким древа преже вкушением, и падшаяся поползением, Пречистая обновила еси. Зиждителя рождьши, Слово Составное, Дево Мати Владычице. Катавасия.

Кондак, глас 8. Подобен. Взбранной. Римское воспитание, Великому же Нову Граду благодатное процветение. Многими бо труды и подвиги в нем Богови угодил еси. Сего ради чюдес даровании от Него сподобися. И тело твое многими леты соблюде нетленно. Мы же сие лобызающе, радостно от душа вопием ти. Радуися отче Антоние.

Икос. Како возмогу изчести премногая твоя чюдеса, или како изрещи жестокое твое житие. Не имам бо сердце чисто, яко сие срамными деянми оскверних, и душу мою лукавыми помыслы осмрадих. Но обаче дерзаю воспевати, аще ты ми подаси слово недостойному своему рабу. Ты бо земныи ангел, и Небесныи человек, во плоти обретеся преподобне. На земли бо о тленных небрегл еси, и Христу от душа последовал еси, болезньми и труды, и зелным воздержанием и злостраданием. И еже на земли леганием. Постом и бдением, и молитвами образ был еси своим учеником. И сего ради сосуд чист, и обитель Духу Пресвятому явися. Тем тя чтем, радуися отче Антоние.

 

Песнь 7. Ирмос.

О теле злате, на поли Деире служимем, трие отроцы не радиша, о безбожнем велении, но посреди пламене ввержени, прохлаждаеми пояху: благословен Бог отец наших.

Запев. От града и отечества своего преселник был еси. К Богу руце простирая, спасение обрете. Водам же послужившим тебе Божиим мановением, великаго Нова Града достигл еси, идеже бяше угодно Владыце, Ему же радостно ныне поеши. Благословен Бог отец наших.

Запев. Великаго Нова Града архиерея, и христолюбивых людей, и инок множества радости исполнил еси, и духовнаго веселия, твоим дивным и чрезестественым прехождением, на камени бо, яко на корабли пришел еси. Спутника отче Христа обрел еси, к Нему же ныне радостно зовеши. Благословен Бог отец наших.

Слава. Ликуют собрания иночествующих, и веселятся народов множества, великаго Нова Града. В честнем преставлении, Антония преблаженнаго. Молебныи совершающе праздник, радостно от душа вопиют. Благословен Бог отец наших.

И ныне. Пещь прообразоваше Твое Рожество, Всенепорочная. Отроки бо не опали, яко же ложесна Твоя Огнь Непостоянныи, тем же молим Тя, огня вечнаго избави рабы Своя. Катавасия.

 

Песнь 8. Ирмос.

В пещь огненую, к детем еврейским сошедшаго, и пламень на хлад преложьшаго Бога, пойте вся дела Господа, и превозносите Его во веки.

Запев. Авраамскии стяжав нрав премудре, от страны Римския преселник быв Великому Нову Граду. И тамо Бога узрел еси, обещавающа ти воздание богатно. Тем веселяся усердно Христови вопиеши. Благословите вся дела Господа, и превозносите Его во веки.

Запев. На земли пожив яко ангел, с плотию яко безплотен, безплотныя враги под ногама покори. Чистоту стяжал еси, постом и бдением и молитвами. Тем же со ангелы на небесех светло ликуя Христови вопиеши. Благословите вся дела Господа, и превозносите Его во веки.

Слава. Рим отечество твое проповедует преподобне, Великии Нов Град хвалится тобою, приим от Господа сокровище некрадомо. Помощника бо велика блаженнаго Антония восприят. И с ликом мнишеским ныне веселишися. Тем память твою празднующе радостно вопием. Благословите вся дела Господа, и превозносите Его во веки.

И ныне. Великому таиньству Рожества Твоего, кто не удивится Богородице. Или кии язык земныи, или ум безплотных изрещи возможет. Паче бо естества и смысла Богородице Зиждителя родила еси. Катавасия.

 

Песнь 9. Ирмос.

Иже от Бога Бога Слова, неизреченною мудростию пришедшаго обновити Адама, ядию тления падшаго зле, и от Святыя же Девица неизреченно воплощаема нас ради, вернии единомудрено песньми величаем.

Запев с поклоном. Иже всегда к раце мощей твоих приступающе, любезно целуем. И от душа вопием, отче преподобне Антоние, молися прилежно за град и люди. Скорбь нашу на радость премени, и грехов прощение испроси. Да тя непрестанно величаем.

Запев. Великому Антонию тезоименит был еси блаженне Антоние, и того житию подражал еси. Равноангельно во обители Пресвятыя Богородица пожил еси. Тем же и равну почесть от Бога сподобился еси прияти, с ним же ныне на Небесех веселишися. И нас поминай празднующих память твою, да тя непрестанно величаем.

Слава. Ныне на тебе чюдо велие видится, и ужаса исполнено. Како погребено воистину много лет соблюдеся невредимо, преподобне Антоние, твое многотрудное тело. Во гробе лежаше Божиим мановением. Яко же сам весть, славящая Его прославляет.

И ныне. Исцелила еси сокрушение Всенепорочная, и ветхое страдание земным. Бога рождьши Царя Христа понесшаго плотию недуги наша. Тем же Тя вси роди Дево Владычице ублажающе, Богоневесто величаем. Катавасия.

+

Авторизация

* *
*

Регистрация

*
*
*
*

Проверочный код Time limit exceeded. Please complete the captcha once again.


Восстановление пароля