Канон мученику Меркурию Смоленскому


Канон святому мученику Меркурию Смоленскому, новому чудотворцу. Велехвально поем воина тверда, святаго добляго Меркурия. Глас 8.

Тропарь, глас 4. Мученик твой Господи Меркурии, во страдании своем венец прият нетленныи, от Тебе Бога нашего. Имея бо крепость Твою непобедимую, мучащих упраздни, и разруши бесом немощная шатания. Того молитвами Христе Боже спаси душа наша.

 

Песнь 1. Ирмос.

Посеченыи несекомаго пресече, и виде Солнце землю, си же несть видело, лютаго врага вода потопила есть. И непроходимо пройде Израиль. Песнь же воспевашеся, Господеви поем, славно бо прославися.

Запев с поклоном: Святый мучениче Меркурие, моли Бога о нас.

От вышних повелении святе воинствуеши, с Вышними лики предстоиши Благих Источнику. И радости божественаго наслаждения, приснопамятне наслаждаешися. Сохраняй тверде град, в нем же совершают славне память твою, Господеви поюще, славно бо прославися.

Подвиг ти ревности свидетельствова мудре, силою укрепляемь Христовою, и противу ратник исходиши, и радуяся претерпе главе своей отсечение, и вопияше славно повелением ея.

Слава. Стражь граду явился еси. И мучителя яве укорил еси. И болезненое от них видение веселяся претерпел еси Меркурие, вопия и моляся к Пославшей тя. Господеви поем, славно бо прославися.

И ныне. Якоже и в Кесарии, равно именованное тебе приемлеши суще звание. Тако же и зде изволи благочестия Царица, посылает тя Меркурие Богородица мучениче. К Той помолися о мне окаяннем. Милостива обрести на страшнем суде Сына Ея.

Катавасия: Избави от бед рабы своя, святый мучениче Меркурие, яко вси по Бозе к тебе прибегаем, ты бо молиши о нас, Христа, Бога нашего.

 

Песнь 3. Ирмос.

Утвержеи небеса в начатце разумом, и землю на водах основав, на камени мя Христе Церковнем утверди. Яко несть Свят, паче Тебе Человеколюбче.

Запев. От младенства ввоинися Христу. Род и богатьство отечества оставль, и весь разжизаемь Божественою любовию. И от Того Рождьшия славне, стражь граду Ея послался еси.

Запев. Воспоем Господа и с рождьшею Его Богоматерию. Подавшаго стража тверда граду нашему, воина добляго Меркурия, и чюдес исполненаго.

Слава. Десницею укрепляем Владычнею, вражие пагубное нашествие победил еси яко добр страдалец богомудре, по церкви Богородичине и по благоверии.

И ныне. О Господа Мати, Ты Надежда отчаянным, и Помощь всем грешником. Не презри милостивая Царице мене окаяннаго, люте и пребезмерно согрешившаго паче человеческаго естества. Катавасия.

Седален, глас 4. Подобен. Скоро предвари.

Римлянин родом сыи, но верою благоверною огражден, а не полуверием боляи. Но угодник Богу бысть, и Того Рождьшей. Льстиваго ратника посрами, исполина с сыном порази. И венечник Христовых явися, и славы радостныя причастися. Сего ради священную его память празднуем ныне.

Слава и ныне. Даниил же Тя Гору велию нарече. А ин Жезл и Катапетазму. Давыд же Дверь, Ею же пройде Христос Бог. Богородице не презри Милостивая. Но приими моих скверных окаянных устен моление, и туне покажи Госпоже Свою милость на мне многогрешнем.

 

Песнь 4. Ирмос.

Услышах Господи слух Твой, и убояхся, яко неизреченным светом Бог Сыи Присносущен, от Девы пройде воплощься. Слава Славе Твоей Христе, слава Силе Твоей.

Запев. Якоже и во своем отечестве присвоися любезне Зиждителю. И светлыи венец от Него восприят, и воинствова по благоверии яко непобедим, святе Меркурие помолися. От Него же получил еси дерзновение о мне окаяннем, да получю милость.

Запев. Истка себе порфиру благочестия паче отец своих. В нюже оболкся, и воин крепок показася. И мертвости совлече ризу неверия. И пояше, слава Силе Твоей Господи.

Слава. Даже до крове ста и подвизався, побеждая сопротивных ратник. Победоносец показася, и Вышней славе сподобися Меркурие.

И ныне. Якоже дождь на руно сниде, такоже в Твою Пречистую утробу, Слово спасеное сниде Приснодево, Ты же Богородице яко туча, изсуши многих моих зол бремя. Катавасия.

 

Песнь 5. Ирмос.

Вскую мя отрину от Лица Твоего, Свете Незаходяи, покрыла мя есть чюжа тма окаяннаго. Но обратив мя к свету заповедей Ти, пути моя направи молютися.

Запев. Распростер руце протяг злыи варварин, хотя внезапу наити на град и церковь Богородицы. Ты же неослабно простер свои со оружием святеи руце изшел еси, и победи противника. И оттуду венчася.

Запев. Иже Солнцу и огневи служа прииде. Ты же святе Христу и Того Матери служа изшел еси, и того силу пресече. И град свободи, и сам от Христа прославися.

Слава. Причастник страстем Владычним явися. И славе Того приобщник быв, и Того Божественей светлости.

И ныне. Умертви о Дево живущии во мне грех, иже Живот рождьшая, и Умертвившаго смерть. Катавасия.

 

Песнь 6. Ирмос.

Молитву пролию ко Господу, и Тому возвещу печаль мою, яко зол душа моя наполнися, и живот мой аду приближися. Но молюся яко Иона, от тли Боже мой возведи мя.

Запев. Вжиляше тя присносущное от высоты Меркурие, звание всевидение. И слуга церковныи мудре увери тя якоже ангел, повелеваше ти дерзати, и никакоже устрашитися, варварска нашествия.

Запев. Умерщвлен бысть змий вселукавыи, и незбысться злохитрие его. Но ногама попрася красныма от добляго воина, и оружника Христова Меркурия. Вшед бо победи поганянина.

Слава. Всесовершено Владыце принесе сердечное изволение мучениче. И Того ради изыде против рати поганских сил, и победитель велии показася. И ныне на Небеси предстоиши Меркурие.

И ныне. Зачатие неизреченно, Рожество неизглаголанно Отроковице, яко Бога раждаеши плотию. Умилостивися о мне окаяннем, да улучю и аз лишеныи, заступление Твое. Катавасия.

Кондак, глас 4. Явися во бранех непобедим воин, от римлян родом, сыновьство име града Смоленьска. Яко бо сих радма наречеся, яко от Богородицы стражь крепок послася граду песньми Меркурия ублажим, празднующе весело память его. Яко да избавит град наш от беды ратник.

Икос. Гордыню низложь льстиваго мучителя, иже на православие возносящагося. Нечестиваго до конца сего лютаго змия главу отсекл еси святе Меркурие. И пуста его сотворь, и память его с шумом бысть. Ты бо исходиши на предградие един, братися с тысящами безбожных варвар. Яко бо от высоты имыи повеление, надежду и упование от Самыя Госпожи и Богородицы, заступающи и помогающи ти. Тоя же пособием непобедимым, и ратника злокознаго крепко удавил еси. И множество сил его победи, и самого мучителя посрами. Тем же крепкии Христов воине зовем ти радостно, и весело празднуем память твою. Яко да избавиши град наш от беды ратник.

 

Песнь 7. Ирмос.

Дети еврейския в пещь дерзнувше, и пламень попраша, и в росу огнь преложьше вопияху, благословен еси Господи Боже во веки.

Запев. Светом Вышняго просвещен озаряемь доблии воине, воспевающих ныне память твою просвети, поющыя, благословен Бог отец наших.

Запев. Воспеваше всех Благодателя распаляся. И исшед на побеждение ратник, огня ревностию блаженне жегом. И поя, благословен еси Господи Боже отец наших.

Запев. В крови противу стал еси беззаконных ополчения святе, иже каменеви и огню кланяющихся. Ты же к Камени — Христу вопия, сих победил еси. Поя, благословен еси Господи Боже отец наших.

Слава. Землю обагрив блаженне Меркурие кровию своею, Владыки Человеколюбца желая общник Того быти. Поя, благословен еси Господи Боже отец наших.

И ныне. Чини ангельстии удивляются, таиньства Твоего глубине Богородице. Бог бо ис Тебе воплощен явися. Его же похвалим, Боже благословен Еси. Катавасия.

 

Песнь 8. Ирмос.

Седмь седмицею пещь халдейскии мучитель богочестивым люте разжже. Силою же лучшею спасеных видев, Творцу и Избавителю вопияше, дети благословите, священнии воспойте людие, и превозносите Его во веки.

Запев. Благочестно и мудрено подвиг свой славне свершил еси. И добле мудре враги своя победил еси. Яко бо даровася тебе святче победа небесная. Тем же воспел еси, священнии пойте, людие превозносите Господа во веки.

Слава. Скончався святе от исполина Меркурие, мечем усече главу твою. И оттуду получил еси желаемаго тобою венца. И землю кровию своих удов истечением напоил еси. Пояше, священнии пойте, людие превозносите Господа во веки.

И ныне. Яко нашего существа поновление Пречистая, вси виновно вернии поем Тя. Бога бо паче слова родила еси, едина паче земнородных. Своим благоутробием и нас озари поющих Тя. Катавасия.

 

Песнь 9. Ирмос.

Устрашися всяк слух, неизреченна Божия схождения. Яко Вышнии волею сниде и воплотися от девическаго чрева быв убо Человек. Тем же Пречистую Богородицу вернии величаем.

Запев с поклоном. Гноеве мученичестии, благоухание ныне испущают благодатное, смрадныя наша страсти исцелеваху. Источают бо святыя их мощи целебныя воды. И напояют душя поющих тех чюдодеяние.

Запев. Яко велика столпа, и твердо забрало дарова тя Христос Меркурие граду сему, идеже ныне точиши чюдес струю, и помогаеши победою на поганых.

Слава. Спомощника имеяху вси граждане, страстотерпче Христов доблественыи. Копие и щит твой выну велико пособие имуще тя величают, Христа Бога славяще венчавшаго тя.

И ныне. Просвети, двери Света, омраченую душю мою страстьми, и лукавыми помыслы очерневшую и бедствующю. И избави искушений и бед и скорбей, да славлю Тя, Упование верным и Утверждение. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля