Канон святителю Иякову Ростовскому


Канон иже во святых отцу нашему Иякову, епископу Ростовскому чудотворцу. Глас 6.

Тропарь, глас 4. Избран от юности Богови быв, святителю Иякове. Сего ради архиерейства саном почтен бысть, упасл еси люди, иже тебе Богом врученныя. Темже и по преставлении чюдесем дарования от Бога приял еси, исцеляти различныя недуги. Моли о нас совершающих честную память твою, да тебе непрестанно величаем.

 

Песнь 1 ирмос.

Яко по суху ходив Израиль, по бездне стопами, гонителя фараона видя потопляема. Богу победную песнь, поя вопияше.

Запев с поклоном: Святителю Христов Иякове, моли Бога о нас.

Божествеными зарями, и священными светосиянии присно мою душу озари, святительскии праздник отче славяща.

Запев. Всесветлую тя звезду, мысленое показа Солнце, светлость твоих добродетелей, просвети землю святителю Христов мудре Иякове.

Слава. Житие присно очищено и чисто, и скверне не смешено явив, Христов священ сосуд премудре сказася на земли Иякове блаженне.

И ныне. Со Отцем Сущим Единочадыи, земныя обожив Чистая за многия щедроты яко Бог Преблагии.

Катавасия: Избави от бед рабы своя, святителю Христов Иякове, яко вси по Бозе к тебе прибегаем, ты бо молиши о нас, Христа, Бога нашего.

 

Песнь 3. Ирмос.

Несть свята, яко же Ты Господи Боже мой, вознесыи рог верных Си Блаже. И утверждь их на камени исповедания Ти.

Запев. Днесь Дне Света, ты святителю труды божествеными вселився. Ясно во светлостех ныне святых сияя благодатию.

Запев. Проповедая ныне Едино благочестивно, Троицы едино Божество. Многобожную лесть искоренил еси от земли, яко честныи святитель, и яко Слову истинныи служитель.

Слава. Путь показал еси мудре, всем прельщеным нечестиваго искушения. И привел еси к Слову пастырем Началнику, яко пастырь словесныи, и спасеныи.

И ныне. Пристанище буди и страх бедному, страстьми неослабно погибающу. Пристанище в мори житейстем, едина Чистая Приснодевая. Катавасия.

Седален, глас 8. Подобен. Премудрости.

Украшаяся премудростию разума, гордыню низложь плотския тягости. И бысть обителище Духу Пресвятому, непременно простираяся разумом к Любящему тя. Тем ревностию Божественою разгараяся славне, сирым и убогим утвержение, явися ангелом собеседник Иякове, моли Христа Бога грехом оставление подати, чтущим любовию святую память твою.

Ин седален, глас 4. Подобен. Явися днесь.

Правоверно преподобне Церковь Христову упасл еси, и еретическия отгнал еси плевелы. И в Вышних Селех водворяешися преблаженне.

Слава и ныне. Богородичен. Яко Всенепорочная Невеста Творцу, яко Неискусомужная Мати Избавителя, Приятелище, яко сущи Утешителя Всепетая, беззаконию мя суща скверно жилище, и бесом игралище в разуме бывша, потщися сих злодейства мя избавити, Свету жилище добродетелми управивши, Светоприемнице Нетленная. Отжени облак страстей, и Вышняго Причастия сподоби, и Свету Невечернему, молитвами Си.

 

Песнь 4. Ирмос.

Христос мне Сила Бог и Господь, честная Церкви боголепно зовет вопиющи. От совести чисты о Господе празднующи.

Запев. Прежде сведыи Бог блаженне твоея души красоту, и разума чистоту, священно проповедника мудра, и учителя показа тя.

Запев. Духом просвещенным, сущыя во тме прелестне просвещаеши, и крещением сыны дни совершаеши, святителю пресловущии.

Слава. От тмы зверей избавил еси стадо свое растерзати ищущих, и отступити веры непорочныя, святителем доброта, и пастырем старейшинство.

И ныне. Разумно в купине Тя Моисей видев священновоображену огнену, Рожеству, хотящу родитися тайно Богородице Приснодевая. Катавасия.

 

Песнь 5. Ирмос.

Божиим Светом Ти Блаже, утренюющих Ти душа любовию просвети молюся, Тя ведети Слово Божие, Истиннаго Бога, от мрака греховнаго изимающа.

Запев. Святительскую си одежду священную носив священно, нечестивыя просветил еси, честныи святителю. Единьство Несозданно в Триех Лицех, Иякове премудре проповедал еси.

Запев. От уст волка мысленаго восхитил еси люди учением, богогласе. Уста еретическая велеречивая, твоими богословии заградил еси отче.

Слава. Мерзскии низложен бысть твоими священными словесы Маркиан, и изгнан бысть ради всякого безместия отрыгаяи скверны смрадныя, Иякове преславныи.

И ныне. Законы естества Пресущныи Бог, обновляет Непорочная, от Твоея утробы ражается, Един усвоив всяческая волею. Катавасия.

 

Песнь 6. Ирмос.

Житейскаго моря, воздвизаема зря напастей бурею, в тихое пристанище притек вопию Ти, возведи от тля живот мой, Многомилостиве.

Запев. Возвышено смирение чистотою ума, и любовь нелицемерну, веру и надежду имея истину, Иякове всеславныи, Троице явися жилище.

Запев. Ныне от созвания Твоего Духом премудре, иже по Тебе благодатию словесных овец, наставника приводиши ко олтареви, добродетели писанием облистаема.

Слава. Велми украсившася Ростовскаго священия, седалищу тя учит прехвалне Дух Святыи, и тебе пастыря рукою святительскою, Иякове совершает.

И ныне. Дверь Богоблагодатная отверзши двери Небесныя, двери Света отверзи ми Владычице. И от врат смертных свободи мя Чистая. Катавасия.

Кондак, глас 8. Яко архиереом сопрестолник, и святителем изрядныи поборник был еси святителю Иякове, непрестанно сохраняй отечество свое, град же и люди иже тебе верою почитающих, и честным мощем твоим кланяющихся. Да велегласно тебе вопием, радуися Иякове богомудре.

Икос. Из чрева матерня, освященнаго святителя Господня, хвалит ныне вся страна Русская, преподобнаго Иякова, Ростову граду утвержение. Благодатныя дары приемшаго, Божественныя славы, к нему же притекающе вси верою теплою, к раце мощей его, любезно целующе. Тем и аз недостойныи и грешныи, надеяся на молитвы твоя святителю яже ко Владыце и Пречистей Его Матери, желаю аки пси от крупиц падающих от трапезы господеи своих насыщение прияти, еже в День Судныи содеянных мною зол, молитвами твоими святе прощение улучити. Да велегласно тебе вопию, радуися Иякове богомудре.

 

Песнь 7. Ирмос.

Божия схождения, огнь устыдеся в Вавилоне древле. Сего ради отроцы, в пещи радованною ногою, яко во свете ликоваху. Поюще: благословен Бог отец наших.

Запев. Вразумляя неразумныя, устрашаше прельщеныя, совершающыся отче спасл еси, и Богови приведе чисты, Тому поющыя благочестно, благословен еси Господи Боже отец наших.

Запев. Украсишася божествении твои подвизи, Воплощение проповедающе неизреченным милосердием, Восиявшаго нам. Емуже вопием прилежно, благословен Бог отец наших.

Слава. Обладав страстьми телесными, пощением славным, необладаемь житейскими напастьми явися. Ныне поеши присно, благословен Бог отец наших.

И ныне. Избавляеши древняго преступления, Рожеством Ти Пречистая хвалим Тя спасении Тобою Дево, поюще и вопиюще, благословен Бог отец наших. Катавасия.

 

Песнь 8. Ирмос.

Из пламене святым росу источи, а праведнаго жертву и воду попали. Вся бо твориши Христе, елико хощеши. Тем Тя превозносим Господа во веки.

Запев. Процвете яко финик во дворех Божиих. Должным сном преподобным уснул еси. Присно же наслаждение пребожественныи гроб твой, и чюдо видящим Иякове проповедниче.

Запев. Божие бо Слово Существеное, священно тя и святителя воставляет помазающия люди, священно святителю, и престолниче Ростовскии, и светилниче вселенныя.

Слава. Воплощьшагося Слова богословил еси много. Безсловесия бо люди избавив. Божествен бысть ученик, Восиявшаго Иякове богогласе.

И ныне. Священно научься Твоим тайнам, пророчески божественыи лик Богородице издалеча увидев, и яко положив богопроповедно Божественаго проповедания Рожества Твоего. Катавасия.

 

Песнь 9. Ирмос.

Бога человеком неудобь видети, Нань же не смеют чини ангельстии зрети. Тобою бо Пречистая явися нам, Слово воплощенно. Его же величающе, с Небесными вои Тя величаем.

Запев с поклоном. Яко свет, яко свещник, яко великое Солнце. Яко молния Христове Церкве восиял еси, и верных разум просветил еси, и в Невечерняя Места вселися поя трисвятыми гласы Троицу Несозданную.

Запев. Плотию мира кроме быв святителю, в прекрасныя чины обитав, рода нашего обожаеши творением светлым. Тем же память твою верою совершаем на земли, Иякове премудре.

Слава. Земля тело твое блаженное скрывает, яко исцеления точиши верным. Небо же дух со избранными от века носит Божествеными сиянии. Озарен воистину яко всеславныи.

И ныне. Глас архангела Гавриила приемши Великаго Совета Чистая, Христа Еммануила родила еси, со ангелы земныя вся Сочтавшаго. Едина виновна нашего Дево блаженьства. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля