Канон блаженному Иакову Боровицкому


Глас 5.

Тропарь, глас 1. Божественою благодатию просветився, и посмерти даруеши исцеление, притекающим к раце мощей твоих мудре Иякове. Тем же и мы ныне чтем честных мощей твоих принесение, веселяще вкупе душа и телеса, тем вси вопием, слава Давшему ти крепость. Слава Венчавшему тя. Слава Дающему нам тобою всем исцеление.

 

Песнь 1. Ирмос.

Спасителю Богу в мори люди не мокрыми стопами наставльшу, и фараона с вои потопльшу, Тому единому воспоем, яко прославися.

Запев с поклоном: Преподобне отче Иякове, моли Бога о нас.

Агньче Божии Слове, даждь ми слово недостойному своему рабу, да возмогу воспети в память принесения мощей блаженнаго Иякова торжество. Взывая, Того единаго воспоем яко прославися.

Запев. Безвестная и тайная последнему роду явлены быша, честныя мощи твоя премудре Иякове. К ним же прикасающеся, освящение приемлюще. Господеви поюще, Того единаго воспоем, яко прославися.

Слава. Всесвятая твоя память восия мирови, яко Солнце просвещает душа благочестно поющих тя. В ней же молися блаженне подати очищение грехов, Господеви зовущим. Того единаго воспоем, яко прославися.

И ныне. Господородителнице Чистая, Небесныи Входе, Горо несекомая, Дверь непроходимая, апостолом Слава, мучеником Веселие, преподобным Красота приими моление наше. Еже Ти приносим в память блаженнаго Иякова. Господеви поюще, Того единаго воспоем, яко прославися.

Катавасия: Избави от бед рабы своя, преподобне отче Иякове, яко вси по Бозе к тебе прибегаем, ты бо молиши за нас, Христа, Бога нашего.

 

Песнь 3. Ирмос.

Утвержеи ни на чем же землю повелением Си, и распространи неодержимую тяготу. На недвижимем Христе камени заповедей Твоих Церковь Свою утверди, единыи Блаже и Человеколюбче.

Запев. День празднественыи, днесь празднуют народи Великаго Нова Града. Обретоша бо мощи блаженнаго Иякова, яко некое сокровище богатно. Непрестанно Христу зовуще, Церковь Свою утверди, едине Блаже и Человеколюбче.

Запев. Естество тленное ни во что же вменив, житие чисто на земли пожил еси. И сего ради наследовал еси Небесное Селение. Моли и нам получити тамошнее блаженьство, празднующим твое принесение. Да непрестанно Христу зовем, Церковь Свою утверди, едине Блаже и Человеколюбче.

Слава. Житие твое яко Солнце, в сердца верных восия заря чюдес испущая. Тем же и нас Невечерним Светом озари, всечестное твое принесение почитающих. Да непрестанно Христу зовем, Церковь Свою утверди, едине Блаже и Человеколюбче.

И ныне. Зело люте погружаемую душу мою в пучине житейских страстей, и бурею одержимую безмерных согрешении, спасения ми простри руку Пречистая, и изведи из глубины зол моих. Да радуяся славлю Тя Всенепорочную. Катавасия.

Седален, глас 5. Пресветлая и светоносная отче богомудре Иякове приспе твоя память, созывающи верных множество, прославити и пети твое честное принесение. Просим от Христа прияти велию милость.

Слава и ныне. Богородичен. Явилася еси вышши небесных сил, Владыку и Господа рождьши Богородице. Земных естество возвела еси Богоневестная. Тем же Тя воистину Богородительнице, сердцем и душею вернии славим.

 

Песнь 4. Ирмос.

Дела смотрения Твоего Господи, удивиша пророка Аввакума. Изыде бо на спасение людем Си, спасти благии Своя пришел еси.

Запев. Землени бо есмы, и перстнии человецы верно припадаем, к пречестным мощем твоим блаженне Иякове, просяще отпущения грехов, молися о верно празднующих, твое честное принесение.

Запев. Иже крест взем блаженне, и желаемаго ти отечества достиг Горняго Иеросалима. И в нем со ангелы ликуеши, Иякове премудре. Молися о чтущих твое честное принесение.

Слава. Ныне на Небесех с праведными веселишися преблаженне Иякове. С ними же молися Христови предстоя, мир мирови даровати, и благочестивым людям здравие, и на враги побеждение, и всем скорбящим утешение.

И ныне. Кто не удивится, или кто не почюдится человеколюбию Божию, сшед бо с Небесе, и воплотися нас ради ис Тебе без отца, едина Препетая. Его же моли избавитися рабом Ти от всякия скорьби. Катавасия.

 

Песнь 5. Ирмос.

Окаянную душу мою в нощи борющуюся со тмою страстей варив ущедри. И восияй мысленое Солнце дне светящия лучи во мне, да озарит мя в нощи свет.

Запев. Любовию чтуще твое принесение, прилежно тя молим премудре Иякове, непрестай моляся Христу Богу, да приимем грехов простыню, и да озарит нас в нощи свет.

Запев. Множество народа Великаго Нова Града, сошедшеся днесь в твое принесение, блаженне Иякове, прикасающеся честным мощем твоим, и от них исцеления почерпаем. Непрестанно зовуще, да озарит нас в нощи Свет.

Слава. Не токмо в житии сыи, но и по смерти многа чюдеса от честныя ти раки содеваются, приходящим  с верою всеблаженне Иякове. Недуги прогоняеши, и от бед избавляеши силою Христовою. К Нему же непрестанно зовем, да озарит нас в нощи Свет.

И ныне. Он вселукавыи по вся дни к горшим влечет мя. И в ров погибели влагает, и во отчаяние мя влечет. Но того мя ловления Чистая исхити. И творити волю Божественую, Сына Твоего и Бога нашего настави. И в час страшнаго пришествия Его, избави мя всякого осуждения. Катавасия.

 

Песнь 6. Ирмос.

Обыде мя бездна, гроб же ми кит бысть. Аз же возопих к Тебе Человеколюбче, и спасе мя десница Твоя Господи.

Запев. Приидите соберитеся Великаго Нова Града народи, светло празднуем принесение мощей блаженнаго Иякова. Молит бо ся ко Владыце и Богу нашему, да избавит нас от всякаго озлобления. К Нему же воспевающе глаголем, спасе нас десница Твоя Господи.

Запев. Рака мощей твоих премудре Иякове, дражайши сапфира показася. Чюдотворива бо бе, исцеления источающи. Ея же облобызающе вернии, радостно от души Христу зовем, спасе нас десница Твоя Господи.

Слава. Светлыми сиянии обретошася на кре честныя твоя мощи, Иякове пречюдне. Ныне аки заря пресветлая просвещают, чтущих тя верно, и радостно от души Христу зовущих. Спасе нас десница Твоя Господи.

И ныне. Тебе Чистую Деву Нескверную, едину имам Стену непреобориму. Прибежище и Покров крепок, и Оружие спасения. Да мя непрезриши окаяннаго, Надежде ненадежным, скорбящим Радость и Заступление. Катавасия.

Кондак, глас 8. Подобен. Взбранной.

Верою и любовию, твоего честнаго телесе принесение празднующих блаженне, сохрани и соблюди от всякия злобы, и соблазна змиина. Имаши бо дерзновение ко Владыце всех Христу Богу. Его же моли спасти державу нашу, и люди молящиятися. Да вси вопием ти, радуися отче Иякове, всея русския земли удобрение.

Икос. Ангел на земли житием показася. Ангелы удивил еси, бесы же устрашил еси. И человеки просветил еси зарями чюдес твоих, богоносе и преблаженне отче наш Иякове. И ныне нас вразуми, воспевати песнь к твоему хвалению, радостным гласом сице глаголющих. Радуися оставивыи тленное мудрование и приемыи нетленныи венец, радуися терпеливыи душею, иже злокозненаго врага под ногама стерл еси. Радуися нижнее мудрование оставль, и вышняго Царствия достиг. Радуися целителю болезнем, и отгонителю страстем. Радуися отче Иякове всея Русския земли удобрение.

 

Песнь 7. Ирмос.

Огня гашение отрок молитва, прохлаждающи пещь вестник чюдеси. Не опалящи же ни обжегши, песнословящя Бога отец наших.

Запев. Устави нынешнюю бурю, обдержащую нас блаженне, и укроти молитвами си. И варварское нахождение низложи. И нас раб своих на супостаты укрепи. Верным же людям нашим на противныя победы даруй, да радующеся поем Боже благословен еси.

Запев. Фарисейски не лицемеруем, но со смирением и радостию прикасающеся к честней раце твоей премудре Иякове, просим прощения грехов, Христови от души вопиюще, Боже благословен еси.

Слава. Хранитель буди Великия Русии, христолюбивым людям нашим, богомудре Иякове. Сохраняяи от поганых нашествия и межусобныя брани, глада же и пагубы. Да молитвами твоими избавльшеся, радостно от души Христу зовем, Боже благословен еси.

И ныне. Отчаявшимся еси велие Прибежище, обуреваемым тихое Пристанище еси Богородице. Тем же и мы припадающии, да не постыдимся, Мати Истиннаго Живота Тебе благодаряще и поюще. Благословена Ты в женах Всенепорочная Владычице. Катавасия.

 

Песнь 8. Ирмос.

Орошьшаго пещь и дети сохраньша, посреде горящаго пламене, дети благословите, священнии воспойте, людие превозносите Его во веки.

Запев. Людям благочестивым молитвеника тя тепла стяжавше, и скораго помощника, и яко стену тверду и забрало недвижимо и не обуреваемо. Не забуди молитвеник своих, избавляй нас от всякия нужи и печали. Да радующеся Христу зовем, людие превозносите Его во веки.

Запев. Чюдесем источник рака твоя явися, Иякове преблаженне. От нея же обильно вси притекающии приемлют телесем здравие, и душам спасение твоими молитвами. Да радующеся Христу зовем, людие превозносите Его во веки.

Слава. Шествие свое добре скончал еси, и мирскии мятежь, аки безбурное пристанище преплыл еси. И ангельски на земли пожил еси. Плоть свою духови повинул еси. И ныне на небесех предстоя всех Царю Христу, поминай нас чтущих твое принесение. Ему же зовем, людие превозносите Его во веки.

И ныне. Щедраго и человеколюбиваго Спаса порождьши Чистая. Того моли ущедрити раба твоего, и к покаянию пути настави. Лукаваго соблазны от сердца моего отжени и того избави ловления. И огня вечнаго исхити. Яко да непрестанно пою Тя Чистую во вся веки. Катавасия.

 

Песнь 9. Ирмос.

Исаие ликуй, Девая бо име во чреве, породи сына Еммануила Бога же и Человека, Восток имя Ему. Его же величающе, Тебе Дево ублажаем.

Запев с поклоном. Источник исцеления испущая. Врачевание же безмездно, и ковчег священия твоих мощей рака явися. Из нея же почерпаем здравие присно животное, притекающии верно блаженне Иякове. И иже тебе Даровавшаго, в песнех величаем.

Запев. Возвеличил еси на земли своего Владыку. Тем и в твое принесение глубину чюдес показа, и струю не оскудеваему раку мощей твоих Иякове премудре. Слепым еже видети даровася, прокаженным очищение. И одержимыя нечистыми духи целомудрены твориши. Тем же тя величаем.

Слава. Недостойною моею рукою принесох ти таковое слова извитие, богомудрыи Иякове непрезри. Но приими сие с любовию, и моли за мя Творца своего Владыку и Господа, тамошняго мя избавити мучения. И милость обрести в день страшнаго испытания.

И ныне. Владычице миру Богородице, иже во глубине зол погибели, мене погруженаго злоумно сластьми плотьскими, и пристрастием вещьми жития, изведи Пресвятая Дево Своим милосердием. Ибо не имам надежди. Весь бо есмь Чистая во отчаянии. Да Тя непрестанно величаю. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля