Канон преподобному Димитрию Прилуцкому


Канон преподобному отцу нашему игумену Димитрию Вологодскому чудотворцу, иже на Прилуце. Глас 2.

Тропарь, глас 1. Свыше от Бога преподобне благодать приял еси духовную, от Господа бо познан бысть блаженне. Того ради и ты духом познал еси лучшее Его, будущаго века пребывание. И постнически испытався в своих обителех. И ныне со ангелы ликоствуя, Спасу всех за ны молися святе Димитрие. Да вси вопием, слава давшему ти крепость. Слава венчавшему тя. Слава дающему тобою всем исцеления.

 

Песнь 1. Ирмос.

Во глубине потопи древле, фараонистская вся воинства, преоружена сила, воплощьжеся Слово, преспеющия грехи потребило есть. Прехвалныи Господь, яко прославися.

Запев с поклоном: Преподобне отче Димитрие, моли Бога о нас.

Тебе твоего блаженне учения, долг приносяще воздаяния простираем, венец похвалами плетуще. Ты же милостив явися пребогате, твоими мольбами благодать нам подаждь духовную.

Запев. Всегубителное стремление страстей, отче увядил еси, словесным объят богомудрием. Благопребытен бо был еси и благогласен, кроток же и смирен. Словом премудрости Димитрие, и разума венчан.

Запев. Священно украсил еси себе отче разумом, и детелным видением благодати, богоглаголиве Димитрие. Желая венца славы Христовы, и свою надежду изрядно преблаженне непогрешил еси.

Слава. Целомудрие удержал еси яве, крайнюю же кротость, и высокое богоносе смирение. Ими же возвышаемы, трудов твоих действом и видением радуяся принесеся, венец неувядаемыи прием.

И ныне. Тварей явилася еси Чистая, всех видимых и невидимых превышьши Всенепорочная. Зиждителя бо родила еси, якоже изволи воплотитися во утробе Твоей. Его же со дерзновением моли, спасти поющыя Тя.

Катавасия: Избави от бед рабы своя, преподобне отче Димитрие, яко вси по Бозе к тебе прибегаем, ты бо молиши за нас, Христа, Бога нашего.

 

Песнь 3. Ирмос.

Процвела есть пустыня яко крин, Господи, язычная неплодящая церкви, пришествием Ти, о ней же утвердися сердце мое.

Запев. Просия в житии своем богоносе Димитрие, якоже всесветлое Солнце в мире. И просвети иже к тебе верою и любовию приходящая, и поющая тя.

Запев. Просвещаются концы учении твоими преподобне. Якоже бо светилник просветил еси богоносе Церковь Христову. О ней же утвердися мое сердце.

Слава. Непорабощену соблюл еси душю свою страстьми, и сластьми телесными, богоносе Димитрие всечестне. Тем же ныне по достоянию восхваляем тя.

И ныне. Сказа иногда сокровенное таиньство, Отроковице Тебе древле Гавриил зовяше, радуися Божия Полато, в Ню же вселися, вся человеки обожи яко Милосерд. Катавасия.

Седален, глас 3. Подобен. Красоте Девьства.

Исправление жития твоего всем просвещает стопы, Димитрие отче, воистину верою подобящимтися. Тем же иже любовию блажащих тя всегда, спасай молитвами си от всякия тесноты, Христа Преблагаго моля, преподобне блаженне досточюдне.

Слава, и ныне. Богородичен. Яко неделанен Дево Виноград, прекрасныи Грозд возрастила еси, источающ нам вино спасительное, всем веселящо душа и телеса. Тем же вину Тя добрым ублажающе, присно со ангелом вопием Ти, радуися Обрадованная.

 

Песнь 4. Ирмос.

Пришествовав от Девы не ходатай ни ангел, но Ты Сам Господи воплощься, и спасе всего мя человека. Тем же зову Ти, слава силе Твоей.

Запев. Ты Димитрие инокующим бысть венец, не камением многоценным украшен, но добродетелию обложен. Явился еси блаженне, богорадованное воистину украшение.

Запев. Божественую богомудре почел еси Премудрость тем же даровании тя Сия одари, славу вечную тебе ходатайствовавшу, отче Димитрие всечестне.

Слава. Светлостию нрав твоих, и образы благости преподобне Димитрие, подобне пожил еси. Тем же приступен ты всем бысть, всеблаженне и пречюдне.

И ныне. Умерщвение плодом ми Евва принесе, ты же Жизнь рождьши Составную Пречистую, абие исправила еси. Тем же зову Ти, слава силе Твоей. Катавасия.

 

Песнь 5. Ирмос.

Ходатай Богу и человеком бысть Христе Боже, Тобою бо Владыко, к Светоначалнику Отцу Твоему, от нощи неведения, приведение обретохом.

Запев. Стремление страстей безстрастием удержал еси, богоносе Димитрие. Видении и деянии, просветил еси отче душевное устроение.

Запев. Умом чистым и писании духовными беседовал еси, богоглаголиве Димитрие. И видения и деяния собрав богатьство отче преподобне.

Слава. Премудрости глубину испытав Димитрие, достигл еси обрести елико благопотребно. И Бисер многоценныи, болезньми стяжал еси преблаженне Разума.

И ныне. Се во чреве Богородице Пречистая, Христа Бога паче слова имела еси, якоже Исаия провозгласи. Выше естества, Сего Богородительнице родила еси. Катавасия.

 

Песнь 6. Ирмос.

В бездне греховней одержим, неизследную милосердия Твоего призываю бездну, от тли Боже мя возведи.

Запев. Вселенней светило пресветлое, отче явился еси Димитрие, словес светлостию просвещая, иже верою и любовию к тебе притекающая.

Запев. Блаженное житие прошел еси, наздав убо чювьства, вне бысть мирскаго мятежа, и Богови приближился еси Димитрие.

Слава. Яко добр яко красен венец, им же ныне венчася премудре Димитрие, добродетельми венчаем. И над страстьми царствовав преизрядне.

И ныне. Выше естества родила еси Девою, и вечнуеши Девою, явльши истиннаго Божества, Сына и Бога Твоего образы. Катавасия.

Кондак, глас 8. Подобен. Взбранной воеводе.

От юности преподобне крест свой взем, Христови последовал еси. В молитвах и пощениих, во бдениих же и злостраданиих, плоть свою изнуряя. Тем же и Всевидящее Око, твои труды видев, чюдесы тя прославляет. И всех звати тебе научает, радуися преподобне отче Димитрие, постником удобрение.

Икос. Божествеными добродетельми твоими себе мудре украсил еси, Спасу Христу жилище содела отче мужествене. Яко же злато искусися верою к Богу, и надежею и любовию обеты полагая. Воздержанием постився яко бесплотен, в целомудрии и во смирении вознесеся. Тем же и мы молитвами твоими просвещьшеся, преподобне Димитрие вопием ти, радуися яко из млада Богу послужил еси, радуися притекающим к тебе, спасению ходатай, радуися крестоносному царю похвала и утвержение, радуися яко твоими молитвами сопротивнии побеждаются. Радуися яко всем просящим даеши дар, от Господа дарованныи ти исцелений. Радуися яко и чюдесы тя Бог прославляет, и всех звати тебе научает. Радуися преподобне отче Димитрие, постником удобрение.

 

Песнь 7. Ирмос.

Богопротивное веление беззаконнующа мучителя, высок пламень вознесло есть. Христос же простер богочестивым детем, хлад духовныи. Сыи Благословен и Препрославлен.

Запев. Благоухают преподобне твоих учении словеса, благодатию Духа сияюще, Божество бо Едино чтущи в Трех Лицех, Слова же воплощение поющи, благоухаеши нас пребогате.

Запев. Ума чистотою и помысла, благоразумия светлостию житие прешел еси. Чистотою же телесе, и девьства сиянием, изрядно возложение явлься, Всевидцу и Вседержителю.

Слава. Слово твое солию растворено, и житие твое благодатию преблаженне сияя явися пречюдне. Тем же в вышния обители радуяся вселился еси, Христови со дерзновением ныне предстоя.

И ныне. Управляющи Пречистая мое житие, к Твоему всетихому пристанищу направи. Бога рождьши благим Источника, всем подающа верным нетления благодати. Катавасия.

 

Песнь 8. Ирмос.

Пещь огненая иногда в Вавилоне, действия разделяше Божественым велением, халдея опаляющи, верныя же прохлаждающи поющих, благословите вся дела Господня Господа.

Запев. Венец благолепен, Христос Живодавец на верх, твой положи, тезоимените Димитрие, ибо деяньми просиял еси, и видении явился еси, зовыи благословите вся дела Господня Господа.

Запев. Все прешед чювьство преблаженне, Уму Первому приближился еси души своея чистотою, жития же светлостию. Венценосче Димитрие зовыи, благословите вся дела Господня Господа.

Слава. Желанием зелным преблаженне, изследил еси богоноснаго Сергия великаго житие божественое. Жизни светлостию поревнова прехвалне. Быв убо и собеседник сего изряден воистину.

И ныне. Ум Безстрастен, во утробе Твоей соединяется, человеческому уму Пречистая. Плоти же дебельством под летом быв, лет Превышьший. Тем Тя Богородице верою и любовию славим. Катавасия.

 

Песнь 9. Ирмос.

Безначална родителя Сын, Бог и Господь воплощься от Девицы нам явися, омраченыя просветити, и собрати расточеныя. Тем же Всепетую Богородицу величаем.

Запев с поклоном. Пречестныи Димитрие, ныне чисто услаждаяся, и Пищю приемля паче умныя, идеже собори святых окрест Господа ликуют блаженне. Иже тя ныне чтущыя, ходатайствуя к себе привлецы.

Запев. Прейде радуяся желанием к раеви, к Единому воистину Блаженьству. К Пребольшей Доброте, и к  Жизни воистину Нестареющейся, и Свету Невечернему богоносе отче Димитрие.

Слава. Яко Солнце просиял еси, во иноческих соборех, от младых ногтей освящен был еси. Якоже зарю испущая добродетели своего жития, пресладкии Димитрие богоносне отче преподобне.

И ныне. Разумевше издалеча прозорливыма очима пророцы, Тя яве провозвестиша, хотящую Матерь быти Вседетелю Владыце всех, тем Тя Всепетая, Богородицу исповедаем. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля