Канон блаженному Лаврентию калужскому

Глас 1.

Данный канон предназначен для совершения келейной, т.е. домашней молитвы без священника.

 

Песнь 1. Ирмос.

Моря чермнаго пучину, немокрыми стопами древле шествовав Израиль. Крестообразно Моисеовыма рукама, Амаликову силу в пустыни победил есть.

Запев с поклоном: Святыи праведныи Лаврентие, моли Бога о нас.

Причастием иже к Богу преподобне был еси свет, и к Нему отлучися, Лаврентие, блаженне. Желанием крайним, благим надеждам своим исполнение, отче, приял еси.

Запев. Желанием иже к Богу, распалаемь, мир оставил еси. И наставника обрете Христа, отче Лаврентие, славне. О нем же стезю спасеную произшел еси радуяся.

Слава. Обогатися, ими же никако же истощаемыми, возжелев богатство Небесное. Славу же временную, мудре, и пищю мимотекущую, и мирское достояние доблемудрено отринул еси.

И ныне. Красную и Избранную и Всечестную, разумев Тя Божии Сын, Всенепорочная, Твой Сын и Бог бысть. Сыны сотвори благодати, Богородицу чтущыя тя.

Катавасия: Избави от бед рабы своя, святыи праведныи Лаврентие, яко вси по Бозе к тебе прибегаем, ты бо молиши о нас Христа Бога нашего (поклон).

 

Песнь 3. Ирмос.

Веселится о Тебе, Церкви Твоя, Христе, зовущи. Ты ми Крепость Господи, и Прибежище и Утвержение.

Запев. Усердно к мысленным совлечеся деянием, побеждая вражия полки, пособием Божественнаго Духа.

Запев. Ранами молитвеными и воздержанием, и биением, преподобне, страсти мирския, отче Лаврентие, уязвил еси.

Слава. Уморив врага, блаженныи твой, Исусе, Лаврентии, умерщвение Твое, Владыко, живоносное, радостно возжелев.

И ныне. Избавляющаго человеки, от преслушания и лютаго падения, иже всем благим Виновнаго, Чистая и Всенепорочная родила еси. Катавасия.

Седален, глас 5. Подобен. Собезначальное.

Согласием Божественным озаряемь, в пути, ведущыя к жизни, Божественным сиянием ходив верно, вражиих отбег прилог. И сын свету и дни явился еси, отче Лаврентие, Богоблаженне.

Слава и ныне. Богородичен. Мати Божия Пречистая, Граде християнскии, избави люди своя от бед, прилежно зовущих. И противися врагом гордым мысленым. Да вопием ти, радуися, Благословенная.

Крестобогородичен. Крестом Сына Твоего, Богорадованная, идольская прелесть упразднися, и бесовская крепость попрася.. сего ради вернии подолгу Тя присно поем и благословим и Богородицу истинную исповедающе, Тя величаем.

 

Песнь 4. Ирмос.

Воздвижена Тя видевши Церкви, на Кресте Солнца Праведнаго. Ста в чину своем, достойно взывающи. Слава Силе Твоей, Господи.

Запев. Соединився в стези правды, богоносне, в Божественыи град вниде, блаженне, Лаврентие, спасенным сиянием обогатився.

Запев. Единообразен преподобне, Лаврентие, в смысл богоносных мужей, блаженне, вниде, Божественными повестьми, Божественною одежею одеявся.

Слава. Сердце твое скрижаль очищену, Духа Святаго благодать обретши, отче Лаврентие, и написа совершено безстрастие, веру и любовь не лицемерну.

И ныне. Седяи на престоле превознесенне херувимстем, яко Престол Тя имея, Марие, Богоневесто, на руку Твоею почив, препрославленыи Бог наш. Катавасия.

 

Песнь 5. Ирмос.

Ты Господи ми Свет, в мир пришел еси, Свет Святыи. Обращая из мрачна неведения, верою воспевающыя Тя.

Запев. Пресветлую зарю, Лаврентие блаженне, приим, яко солнце явился еси, бесовскую тму отгнав, достославне.

Запев. Твоим желанием, Христе, окрилився блаженныи Лаврентии, желание телесное, якоже изгребие мерзкое, мудре отрясе.

Слава. Силою Божественою укрепився, в мир вселися, опустевая страсти, отче богомудре, Лаврентие.

И ныне. Течение преста тленное, Девая бо нетленно роди Бога Слова, выше естества и слова, пребывши Девою. Катавасия.

 

Песнь 6. Ирмос.

Пожру Ти со гласом хваления Господи, Церкви вопиет Ти. От бесовския крови очищьшися, милостию от ребр истекшею Ти кровию.

Запев. Ум свой весь к Богу простирая, непрестанными поученьми. Плотьскую любовь не пощаде, благим ходатайством, Лаврентие, присвояемь.

Запев. Ни скверны, ни враски прият, блаженне, посреди мира тебе живущу. Частыми же мольбами си очищаеши души от скверны, притекающих к раце мощей твоих.

Слава. Ты плотьских мудровании избег, вышним помыслом уязвися, посреди жен обнажаемь. Безстрастия бо одежею, Лаврентие, облечеся.

И ныне. Усты и помыслом и сердцем, Пречистая, Тя Богородицу проповедуем. Тобою бо Богови примирихомся, отриновеннии первее, преступлением праотца. Катавасия.

Кондак, глас 2. Вышния красоты желая, и нижния сласти телесныя тощно оставил еси. Нестяжанием суетнаго мира, ангельское житие проходя, скончався, Лаврентие, блаженне. С ними же Христа Бога моли непрестанно о всех нас.

Икос. Како возмогу, грешныи аз и скверныи душею вкупе и телом, исписати еже воплоти сыи, равноангельное житие твое, и преславная чудеса. Аще убо мнози премудрии не достигнут исповедати, многаго твоего терпения и смирения, и теплыя, еже ко Христу любве, но обаче надеяся на твое беззлобие, о! блаженне, сице вопию ти. Радуися, пресветлая звездо, от востока добродетелей воссиявшая, и вселенную чудесы озарившая. Радуися, возненавидевыи родительскую любовь, Христа же единаго над всеми сущаго Бога всем сердцем возлюбивыи, и тому не возвратным желанием последовал еси. Радуися, яко буйственно и юродьственно по апостолу жительство избравыи. Радуися, пременивыи тленная и нестоящая, надеждею будущих благ. Радуися, иже древнему Иову уподобивыися терпением. Радуися, страстотерпче Христов непобедимыи, но присно побеждаяи диавола своим смирением. Радуися, иже яко древнии он Лазарь нищии, ныне почивая в лоне Авраамли. Радуися,иже по отшествии от мира сего, сущим в бедах и искушениих готов обретаешися предстатель и заступник. Радуися, иже везде призывающих тя, быстро предваряяи. Радуися, богомудре, Лаврентие.

 

Песнь 7. Ирмос.

В пещи Авраамския си дети персстей, любовию благоверия паче, нежели пламенем опаляеми взываху. Благословен еси в Церкви Славы Твоея Господи.

Запев. Одержимь христоподобною, отче Лаврентие, благоуродне, божественною любовию других спасти. Радостно вопия Спасу, зовыи: благословен Бог отец наших.

Запев. С небесе поданную тебе, отче Лаврентие, прием пищю, и сею препитав вся, иже благопокорно приемлющыя твоя повеления, и долу влекущии грех оставляющих, блаженне.

Слава. Последовав отеческим преданием, отче Лаврентие, мудре, пагубы Оригеновы бегати заповеда, зовыи: благословен Бог отец наших.

И ныне. Вышняго освященно Божие селение, радуися, Тобою бо дастся радость, Богородице, вопиющим Ти, благословенна Ты в женах, всенепорочная Владычице. Катавасия.

 

Песнь 8. Ирмос.

Руце распростер Даниил, львов зияния в рове затче. Огненную же силу угасиша, добродетелию поясавшеся, иже благочестия любители отроцы взывающе. Благословите вся дела Господня Господа.

Запев. Всесветлая звезда сущих в тине страстей приводя к животу, твориши бо жены нечистыя, целомудрено жити. И отгониши духи лукавыя и недуги лютыя, вопия: благословите вся дела Господня Господа.

Запев. Ты цел умом в крове чюдных мудре, многи уловил еси уродствовати Господа ради. Ведыи наругаем быти, вопия чистейшею душею, Лаврентие блаженне, благословите вся дела Господня Господа.

Слава. Совершен един Господь, иже Своих Си славяи по достоянию. Износима и гробу посылаема, блаженне, ангельскими светлословеньми почитает, зовуща: благословите вся дела Господня Господа.

И ныне. Избавляяи нас, воссия из Тебе Господь, Дево Чистая. Егоже моли, Владычице, спасти поющыя Тя, и от обстояния избавити нас, вопиющыя: благословите вся дела Господня Господа. Катавасия.

 

Песнь 9. Ирмос.

Камень нерукосечныя горы, от несекомыя Тя Девицы, краеугольныи отсечеся Христос, совокупив разстоящаяся естества.. тем, веселящеся, Тя, Богородице, величаем.

Запев с поклоном. Всем сердцем, Лаврентие, Троицы усердно предложився. И от Нея луча богоделно прием, световиден быв, и со ангелы ликуеши.

Запев. Желанием Божественным приединився, и воздержанием просвещаемь, будущих благ в причастии уже быв, Лаврентие богоблаженне, и в наслаждении.

Слава. Твоя болезни и поты прият, веселие никако же конца имущее. В нем же питаяся, Лаврентие преблаженне, и нас непрестанно поминай.

И ныне. Спаси мя, Рождьшая всех Избавителя и Благодателя, разори души моея мрачныи облак, Свету Облаче, святая Владычице, и сильна соделай на страсти, борющия мя. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля