Преподобный Роман-певец жил в V веке. Сначала он служил чтецом и певцом в Константинопольском храме в честь Святой Софии. Во время служения он подвергался насмешкам от молящихся за то, что не имел дара к церковному пению и чтению. Однажды он долго и слезно молился Пресвятой Богородице, прося Ее помощи в этом. Во сне ему явилась Небесная Владычица и подала свиток, который повелела съесть. Проснувшись, преподобный Роман получил дар церковного пения, чтения и сочинения церковных песнопений. Им было написано около тысячи церковных песнопений. Многие из них сохранены в церковном богослужении до наших дней. Преподобный Роман имел прилежание к храму и совершаемому в нем богослужению и за это был рукоположен в сан диакона. Преподобному Роману молятся, прося его помощи в разумении церковного пения и чтения. Память преподобному Роману-певцу 1 октября (14 октября по гражданскому стилю).
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 8-й
О тебе отче Романе испытно спасеся еже по образу. Приим бо крест, последовал еси Христу. Творя научаваше еже презирати плоть, преходит бо. Прилежати же о души вещи безсмертней. Тем же и со ангелы радуется преподобне дух твой. (Дважды).
Слава, и ныне. Богородичен. Иже нас ради рождеися от Девы, и распятие претерпев Благии, испровергии смертию смерть, и воскресение явлеи яко Бог. Не презри их же созда рукою Своею, яви человеколюбие Свое Милостиве. Приими рождьшую Тя Богородицу молящуюся за ны, и спаси Спасе наш люди согрешьшыя.
КАНОН, глас 6-й
Песнь 1. Ирмос
Яко по суху ходив Израиль по бездне стопами, гонителя фараона видя потопляема, Богу победную песнь поя вопияше.
Запев: Преподобне отче Романе, моли Бога о нас (поклон).
Световидныя лучи, от небес нам низпосли, молитвами ти мудре Романе богогласе, твою похвалити священную память песньми.
Запев. От юности весь ты Христови сам ся предложив, последова Ему. Светозарными сияньми ума, с небесе Романе просвещаемь.
Слава. Украшен Добротою вседетелнаго и Святаго Духа, яко звезда светосиянная, добродетелей светлостию мудре, явися Романе мирским концем.
И ныне. Богородичен. Из Тебе пройде неизреченно Божие Слово собезначалное в последняя времена. И перваго человека в тлю падшаго, Тобою понови.
Катавасия: Избави от бед рабы своя, преподобне отче Романе, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 3. Ирмос
Несть свят яко же Ты Господи Боже мой, вознесыи рог верных си Блаже, и утверждь их на камени исповедания Ти.
Запев. Ум твой Романе мудре, бысть обителище Троице Святей, исполняем благочестно разума истины. Источая божественая проповедания.
Запев. Струя искипе теченей честныи твой язык, поя божественая. И уясняя разумное Христово к нам от Девы рожество неизреченное.
Слава. Се питаеши обилно, мудрыми ученьми и красными песньми, помыслы наша. И исполняеши сладости божественыя, Романе богогласе.
И ныне. Богородичен. Всех си воиньств вышши Дево, тех бо Содетеля Сына Божия зачала еси во утробе и рождьши, и пребываеши присно Девая. Катавасия.
Седален, глас 5-й. Насажден яко древо отче блаженне, при исходищих вод постнических. Божественым действом, плоды болезней твоих во время явствено насадителю и Творцу отдал еси. Сего ради святую ти поем память, чтуще тя Романе преподобне.
Слава, и ныне. Богородичен. Теплая заступнице и нератная, надежде твердая и непостыдная, стено и покрове и пристанище прибегающим к Тебе присно Дево чистая. Сына Своего и Бога моли со ангелы, мир даровати мирови, и спасение и велию милость.
Песнь 4. Ирмос
Христос мне сила, Бог и Господь, честная церкви боголепно зовет вопиющи, от совести чисты о Господе празднующи.
Запев. Приятелище быв Божественаго Духа, и огнедохновенная уста, возглашая божественая пения, и наслаждая душа Романе притекающым ти.
Запев. Цевница был еси небесная, гусли всеразумнии, к себе влекущи споведаньми твоими, и сладким ти пением.
Слава. Благодать вдохнувши и вселися в светоносную ти душу вседетелнаго и Пресвятаго Духа прехвалне, и мудра благовещателя соверши.
И ныне. Богородичен. Яд изблева в праматерня убо слуха змий. Но Чистая сего истрясла есть, архангеловым гласом заченьши и рождьши Христа. Катавасия.
Песнь 5. Ирмос
Божиим светом Ти Блаже, утренюющых Ти душа любовию, просвети молюся, Тя ведети Слово Божие истиннаго Бога, от мрака греховнаго изимающа.
Запев. Яко благолепна священна сосуда чиста, Утешителева благодать обретши тя Романе богомудре, храм содея светом украшен, и вселилася есть.
Запев. Воплощена Сына Божия, порождьшая Отроковица, твою душу просвети, и ум божественаго разума исполни, нощию пришедши присно Девая.
Слава. Написания твоих священных словес приснопамятне, явишася воистину всем сладка, всех веселяща, всех просвещающа смыслы, и вся научающа разуму спасеному.
И ныне. Богородичен. Света порождьшая, Отчее Слово присносущее, светозарными ныне сиянии, молитвами Ти просвети ум мой, и отжени тму души моея пречистая Владычице. Катавасия.
Песнь 6. Ирмос
Житейскаго моря, воздвизаема зря, напастей бурею. В тихо пристанище притек, вопию Ти, возведи от тля живот мой Многомилостиве.
Запев. Светом исполняемь, и к высоте добродетелей божествено восходя, не брегл еси о всех земных. И столп небесныи и светилник благочестия был еси.
Запев. Плоти увядил еси желания, и душу свою украсил еси светлейшими чистоты озаренми. И доброты рачительныя, добродетельным благолепием обложил еси.
Слава. Возненавидев временное и суетное гнилое и текущее наслаждение, в церкви Девыя прилежа, разум освятил еси, и душу и тело достославне.
И ныне. Богородичен. Вси предзряще пророцы светло, будущее последи от Девы Христе мой, Твое на земли пренепорочное рожество. Явьствено боговидцы произвестоваша. Катавасия.
Слава, и ныне. Кондак, глас 8-й. Божествеными Духа добродетелми, измлада украсився Романе премудре, церкви Христове пречестное украшение бысть. Пением бо прекрасным украсив ю блаженне. Молим тя, подаждь желающым божественаго дарования твоего. Яко да вопием ти, радуися отче преблаженне, красото церковная.
Песнь 7. Ирмос
Отроцы в Вавилоне, пещи пламенны не убояшася. Но посреде огня ввержени, прохлаждаеми взываху, благословен еси Господи Боже отец наших.
Запев. Богородицу Марию богомудре имел еси учителя, вразумляющу тя и научающу. И пети повелевающу, благословен Бог отец наших.
Запев. Восиял еси в мире, яко светлое солнце Романе богомудре, просвещая верою зовущих, благословен Бог отец наших.
Слава. Твоих глагол вещаниа вселенную исполни, и красно пети человеки научи, зовущи, благословен Бог отец наших.
И ныне. Богородичен. Ныне блажат Тя вси роди человечестии, Богородице чистая, яко же прорекла еси. И верою славят, благословен Пречистая Плод утробы Твоея. Катавасия.
Песнь 8. Ирмос
По законе Отчи преблажении в Вавилоне юнии беду приемлюще, царюющаго небрегше безумнаго повеления. И совокуплени в нем же не изваришася огни. Держащему достойно возсылаху песнь, Господа воспевайте дела, и превозносите Его во веки.
Запев. Всю мирскую красоту и пищу и славу отверг, душу свою вперил еси к вышним ликостоянием, к славе тех и светлостем мудре. К добротам неизреченным, к пребыванию тамошнему, к свету Богоначалия. Зовыи, Тя превозносим Христе во веки.
Запев. Божественым желанием распаляемь восхождения положь в сердцы си, и безплотно во плоти житие стяжа, ангельским чином подобяся мудре, тех возлюбил еси в мире пения. Верою Романе взывая, Тя превозносим Христе во веки.
Слава. Высоким вещанием божественых ти и сладких словес блаженне Романе, вся помыслы веселиши человеком. И услаждаеши яко же питатель богатодателен, и просвещаеши светло, и научаеши вопити, Господа пойте дела, и превозносите Его во веки.
И ныне. Богородичен. Равнобожием прелстив мя, человекоубийца змий лукавый, яко пленника исхити пищи райския. Но яко Владыка родом Сын Божий, воплощься прииде от Девы Марии, и взят мя на высоту обожив. Его же превозносим во веки. Катавасия.
Песнь 9. Ирмос
Безсеменно зачатие, и рожество несказанно, и без тля прижитие. Божие бо рожество обновляет естество. Тем Тя вси роди богоневестную Матерь правоверно величаем.
Запев с поклоном. Вышним славно ликом совокупися безплотным. Идеже неизреченная пребывает радость, и всегдашнее наслаждение. Идеже Богоначалия свет есть и веселие, и идеже неизглаголанная слава, блаженне.
Запев. С праведными внутрь Божия, божественыя славы вселився, зриши доброты небесныя, воистину желанныя мудре. Видиши патриархом ликостояния, преблаженне.
Слава. Твою светоносную память верно совершающых, от бед избави, молитвами си богомудре. И от всякия напасти Романе и скорби чюжаго. И небесныя славы получити сподоби, и Царствия оного блаженне.
И ныне. Богородичен. От древняго падения человеческии род первозданным, бысть пленен Богородице, и порабощен страстьми греховными. Но иже из Тебе рождеися преблагии Бог сыи, Своим благосердием воздвиже. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и преподобнаго отца нашего Романа Певца, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.