В церковном календаре много праздников в честь богородичных икон: Казанской, Владимирской, Тихвинской и других. В честь иконы Казанской Божьей Матери установлены два праздника: 21 июля (8 июля по старому стилю) — в честь обретения, и 4 ноября (22 октября по старому стилю) — в честь избавления Москвы от поляков. 4 ноября Церковь и граждане России отмечают осеннюю (зимнюю) Казанскую — праздник в честь Казанской иконы Богородицы «избавления ради царствующаго града Москвы».
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 4-й
Заступнице усердная, Мати Бога Вышняго, за всех молиши Сына Своего Христа Бога нашего, и всем твориши спастися, в державныи Ти покров прибегающим, всех нас заступи Госпоже Царице, иже в напастех и скорбех, и в болезнех обремененых грехи многими, предстоящыя и молящиятися умиленною душею, и сокрушенным сердцем, пречистому Твоему образу, и чудотворней иконе, со слезами невозвратно надежду имущих на Тя, избавитися от всех зол, всем полезная даруй, и вся спаси Богородице Дево, Ты бо еси божественыи покров рабом Твоим.
Канон, глас 4-й
Песнь 1. Ирмос
Отверзу уста моя и наполнятся Духа, и слово отрыгну Царице Матери, и явлюся светло торжествуя, и воспою радуяся тоя чудеса.
Запев: Пресвятая Госпоже Богородице, услыши молитву раб Своих, молящихся Тебе (поклон).
Благоговеют Ти Богородице Ангелом начальницы, и святых чины честно служат, праведнии красуются, небесных ходатаицу блажат Тя: купно же и земля и небо в веселии светло восхваляют Тя. И мы грешнии милости просим, озари наша сердца Владычице, воспети песнь святыя Ти иконы явлению.
Запев. Приидите соберитеся христоименитии людие, умы тайно очистившеся, во святую церковь Матере Христа Бога нашего: источает бо нам неоскудно, от святыя иконы источник духовен, целебен душам и телом, песнь вопиющим, благословен из Тебе рождеися Бог наш.
Слава. Дивит Пренепорочная, и ужасает всяк слух, странно чудо божественаго Ти рожества: како херувимскаго Творца зачала еси; како Огнь нестерпимыи во утробе носила еси; како сущую жизнь плотию облекла еси, и Живот всему миру породила еси, Бога купно и человека.
И ныне. Под кров Твой Дево Госпоже прибегаем, вси роди человечестии: просвети нас светом рожества Твоего, грешныя рабы Твоя молящияся прилежно, и кланяющияся (поклон) пречистей Ти иконе, просяще от Тебе прияти великия милости.
Катавасия: Спаси от бед рабы Своя, Богородице Дево, яко вси по Бозе к Тебе прибегаем, яко к нерушимей стене и заступлению (поклон). Господи помилуй (3 раза с поклонами).
Песнь 3. Ирмос
Твоя певцы Богородице, живыи нетления источниче, лик себе совокупльши духовен утверди. И в божественей Ти славе, венцем славы сподоби.
Запев. Кую Ти достойную похвалу наше принесет конечное неможение; яко явлением пречистыя Ти божественыя иконы, независтныя источники целебныя источаеши, верно прибегающим к Тебе рабом Твоим.
Запев. Божественыя Ти иконы, святое явление Богородице Дево, яко светозарное возсия нам Солнце, преславных чудес лучи пущающи, тмы лютых обстояния отгоня, священными Твоими Владычице предстательствы.
Слава. Исполнила еси благодати иногда, первописанную Ти икону Госпоже Дево Богородице: и ныне таже благодать истинствует, сиянием веры чудес, яко Тоя ради первописанныя, ко спасению верно к Тебе по Бозе прибегающым.
И ныне. Покланяемся (поклон) Богородице Твоему пречистому образу, и пресладкому Ти Младенцу, превечному и незаходимому Свету Христу, Им же спасла еси от лютых зол, и тления смертнаго, все человеческое естество. Катавасия.
Слава, и ныне. Седален, глас 8-й. Божествении слова апостоли, Евангелия Христова велегласнии вселенней благовестницы, божественую церковь создавше, в пресвятое Твое имя Богородице, и к Тебе Госпоже приходят, моляще Тя приити на тоя освящение: Ты же, о, Богомати рекла еси, идите с миром, и Аз тамо с вами есмь. Они же шедше обретают тамо на стене церкви, Твоего Владычице образа подобие, божественою писано силою, шаровными подобии, и видевше поклонишатися, и прославиша Бога. С ними же и мы, божественей Ти покланяемся (поклон) иконе, просяще от Тебе великия милости, даруй согрешением оставление рабом Твоим, Едина Благословенная.
Песнь 4. Ирмос
Седяи во славе на Престоле Божественем, на облаце легце, прииде Исус Пребожественыи от пречистыя Девы, и спасе вопиющыя, слава Христе силе твоей.
Запев. Почтем людие Чистую в чистоте, икону Девыя Богородицы, и Тоя божественаго Младенца Христа Бога нашего, и прикасаемся темены, и лобызаем и прославляем со страхом и трепетом: почитаем бо икону благочестно, почитаем и сообразное Тоя первосущее.
Запев. Давыд божественыи и чудныи пророк, издалеча провиде глаголя, лицу Твоему помолятся богатии людие: мы же вернии покланяемся (поклон) и лобызаем честную икону, душами купно и телесы освящаемся.
Слава. Евангелия Христова богогласныи списатель Лука, Божиим мановением, всенепорочныи Твой написует образ Богородице, и Младенец Ти превечныи на руку вообразив. К Нему же притекающия, напастей и бед избавлявши, и вся покрываеши, и спасаеши Твоею милостию.
И ныне. Ты еси похвало и венец святым всем о, Царице, Ты упование наше и помощнице по Бозе, и на Тя надежду спасения нашего возложихом вси: Тебе молимся яко Божии Матери, одожди грешным рабом Твоим, богатыя си душеспасительныя милости. Катавасия.
Песнь 5. Ирмос
Удивишася всяческая о божественей славе Твоей. Ты бо браконеискусимая Девице, прият во утробе надо всеми сущаго Бога, и родила еси безлетнаго Сына, всем воспевающим Тя мир подавающа.
Запев. Всяко Пречистая воспетое Тебе хваление, всегда величеством славы Твоея побеждается, ибо паче горних умов превозвысися, рождьши неприступнаго и страшнаго всех Царя и Бога. Но яко милостива, и скорая человеком помощница, воньми молению раб Своих, и даруй Твоя помощи.
Запев. Идеже осенит благодать Твоя Богородице, страхом исчезают демони, и разрушается злокозненное тех мечтание, бегают роди чернии, радуетжеся верных все множество, Тебе песнь хвальну от сердца вопиюще: радуися божественыи покрове душам нашим.
Слава. Безочивым сладко видети дается, глухим слышание, немым благоглаголание, хромым хождение, прокаженным очищение, беснующимся целомудрие, и иже в болезнех различных исцеление, осенением пречистыя Ти Богородице иконы.
И ныне. Не умолчим николи же Богородице, псалмы и песньми воспевати величия Ти Обрадованная, Бога бо воистину воплотившагося родила еси, на спасение наше, и всемирное избавление. Катавасия.
Песнь 6. Ирмос
Божественое се и всечестное совершающе празднество, богомудрении Божия Матере. Приидите руками восплещем, от Нея Рождьшагося верою славяще.
Запев. Божественаго Ти рожества Дево Госпоже, пребогатая благодать, юже древле изглашением предала еси, пречистаго Ти образа иконе, неоскудне действует, великая же и преславная, во спасение иже на Тя надеющимся.
Запев. Идеже прославится святое имя обрадованныя Богородицы, ту всяческих благих источницы проливаются: приидите в чистоте человецы, се бо явлением божественыя Девы иконы, сказует Царицыно пришествие, на спасение всем верным.
Слава. Целение болезнем, отгнание же страстем, и душепитательное спасение, грехов прощение, и вечное избавление, из пречистыя Ти иконы Владычице, верно приходяще приемлем, Богомати Всенепорочная.
И ныне. К Тебе Госпоже прибегают роди правоверных, просят великия милости, и приемлют неоскудно, иже в недузех исцеление, в страстех пременение, в печалех утешение: источи и мне Владычице каплю душеспасительную, да со всеми и аз пою Твое величие. Катавасия.
Слава, и ныне. Кондак, глас 8-й. Притецем людие к тихому сему, и доброму пристанищу, скорой помощнице, готовому и теплому спасению, покрову Девыя, ускорим на молитву, и потщимся на покаяние: источает бо нам неоскудныя милости, пречистая Богородица, варяет на помощь, и избавляет от великих бед и зол, благонравныя и богобоящыяся рабы Своя.
Икос. Смысл очистивше и ум, притецем к Богородице, светло песньми ублажающе, пречистаго Ея образа богоносную икону, и прославляем Ту и чтем, и припадающе покланяемся, яко самой сущи оной, а не яко иной. Не бо терпит учужатися иконное имя своего первообразнаго, почитаетбося первообразное иконою, сице благочестно божествении отцы предаша нам и научиша. И аще кто не поклоняется Богородицыне иконе, анафема да будет: посрамляет бо и погубляет нечтущия ю, избавляет же от великих бед и зол, благонравныя и богобоящияся рабы Своя. (Поклон земной).
Песнь 7. Ирмос
Непослужиша твари, богомудрении паче Зиждителя, но огненое прещение мужески поправше, радовахуся поюще. Препетыи иже отцем Господь и Бог благословен еси.
Запев. Приидите почерпем отпущение, от неистощимаго источника, точащаго святыню, пречистыя иконы Девыя, и Тоя пречистаго Младенца Божия слова, нас ради вочеловечьшагося. К Нему же возопием, Творче Избавителю препрославленыи, со Отцем и Духом Боже благословен еси.
Запев. Неусыпную Чистая, и богоприятную имущи молитву, и непреодолеемую державу крепости, врагов наших шатание еже на ны разори, и выи их под нозе верным людям нашим низложи, да возвеселимся о Тебе раби Твои, Сыну Твоему вопиюще, отец наших Боже благословен еси.
Слава. Радуемся и веселимся вернии людие, чудному явлению иконы Пречистыя Владычицы Богородицы: река бо явися неизчерпаема, целебную воду точащи, слепым бо видети дает, и глухим слышание, хромым хождение, и всем иже в недузех безмездно исцеление.
И ныне. Неиспытанна глубина, недоведомо таинство, непостижим образ Дево зачатия Твоего, зачатие без семене, без мужа рожество, Безплотныи воплотися, Превечныи младенствует, Сын Божии, Сын Тебе Девыя бывает, Ему же вопием, Боже благословен еси. Катавасия.
Песнь 8. Ирмос
Отроки благочестивыя в пещи, рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела и превозносите Его во веки.
Запев. Ум Ангельскии и человеческии ужасается Богородице, како Бога Небеснаго ложеснами объемши воплотила еси; како Младенца рождьши, яко Сына на руку носиши; Его же ужасается тварь, и трепещут горнии престоли, вопиюще непрестанно, Свят, Свят, Свят еси Боже, препетыи и превозносимыи во веки.
Запев. Радуися сущая радосте всего мира, со Архангелом Гавриилом вопием Ти Богородице, радуися вместилище Невместимаго, радуися Благодатная, носило Божества всего. Радуися Адамово возвание, с Тобою Господь, и Тебе ради с нами, спасая нас, Его же поем и превозносим во веки.
Слава. Корень Иессеов освященныи, корень греха нашего исторгнула еси, жезл Ааронов процветшии, Жизнодателя цвета израстивши Христа, ручко манноприемная, смерти всю силу сокрушила еси, и в породу жизни возвела еси род человеческии. Тем же Тя поем, добрых виновную.
И ныне. Ты похвала Христианом еси Владычице, Ты оружие на враги, и стена к Тебе прибегающим, Тя и ныне на помощь призываем Госпоже: не даждь врагом вознестися на люди Твоя, иже Тебе не хвалят, ни Сына Твоего Богородице, и Твоей иконе не кланяются, сих победи, и душа наша спаси. Катавасия.
Песнь 9. Ирмос
Всяк земен да взыграется, Духом просвещаемь. Да ликовствует же безплотных умов естество. Почитая святое торжество Божия Матере, и да поют, радуися Преблаженная Богородице чистая присно Дево.
Запев с поклоном. Тебе твердую помощницу роду человеческому Богородице Марие, лик пророческии многообразно провозвести: сень святую небес пространнее, скрижаль богописанную, и купину неопалимую, дверь богопроходную, гору же и лествицу и мост, и жезл процветшии. Мы же воистину Богородицу Тя величаем.
Запев. Тайна глубины рожества Твоего, ум Ангельскии ужасает Дево, и пречистая икона бесы прогонит, и лица нечестивых омрачает, и в студ поревает, не терпят бо взирати на силу ея, бегают же и исчезают. Мы же любезно покланяемся и лобызаем, и Тя Богородице величаем. (Поклон).
Слава. Предстатель сыи не отступим к Вышнему Царю, яко имущи Матерне дерзновение непостыдно, в мире глубоце православных житие утверди, и благоверных людей наших возвыси, и вся полезная даруй всегда рабом Твоим, да Тя Богородице величаем.
И ныне. О, всемилостивая християном помощнице, не может Тя воспети достойно ум человеческии и Ангельскии, яко всея твари честнейши, небесных и земных славнейши, всех бо родила еси Творца и Бога. Но о, Владычице, приими милостивно, яже Тебе от сердца возложихом песнь, спасай нас всегда, на Тя бо надеемся. Катавасия.
Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.
Отпуст: Господи Исусе Христе Сыне Божии, молитв ради пречистыя Ти Матере, честнаго и славнаго явления чудотворныя иконы Ея, во граде Казани, и всех святых, помилуй и спаси нас, яко Благ и Человеколюбец. Аминь.