Св. Архангел Гавриил — служитель Божественного всемогущества. Св. Архистратиг Гавриил благовествовал Пресвятой Деве о воплощении Сына Божия. Он явился во сне Иосифу Обручнику и открыл ему тайну рождения Христа, предупредил о замыслах Ирода и повелел бежать в Египет с Младенцем и Богородицею. На страницах Священного Писания указаны и другие явления св. Архангела Гавриила и его ревностное исполнение Божественной воли.
Будем с великим усердием прибегать в своих молитвах к Архистратигу Гавриилу, прося его ходатайства перед Господом нашим о земном благополучии и вечном спасении. Память св. Архангелу Гавриилу 26 марта (8 апреля по гражданскому стилю).
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 4-й
Небесных воинств архистратиже, молим тя ныне мы недостойнии. Яко да твоими молитвами покрыеши нас кровом крилу, невещественыя ти славы. Сохраняющи нас молящихся прилежно, и вопиющих, от бед избави нас, яко чиноначалник вышним силам. (Дважды).
Слава, и ныне. Богородичен. Иже от века утаенное, и ангелом несведомое таиньство, Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.
КАНОН, глас 4-й
Песнь 1. Ирмос
Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чюдеса.
Запев: Святыи архангеле Гаврииле, моли Бога о нас (поклон).
Яко света суща, к свету крайнему невеществеными причащении, божественаго и невещественаго, молю тя архангеле Господень, ум мой просвети молитвами си, яко да воспеваю тя.
Запев. Составим днесь лик божественыи веселящеся, перваго почитающе безплотных умов, иже неизреченную радость возвестившаго, в мир пришедшую за благость.
Слава. Предстателя тя велика, и к Богу заступника, и стену и утвержение, Гаврииле имуще. Любящии тя избавляемся от бед, и вреда змиина, восхваляющии тя.
И ныне. Богородичен. Чисту Тя и всенепорочну Гавриил яко узре, радуися Тебе Владычице светло возопи. Браконеискусная человеком спасение, ангелом похвало, и честнословие.
Катавасия: Избави от бед рабы своя, святыи архангеле Гаврииле, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 3. Ирмос
Твоя певцы Богородице, живыи нетления источниче, лик Себе совокупльши духовен утверди. И в божественей Ти славе, венцем славы сподоби.
Запев. Причастием света невещественаго, яко невеществен воистину Гаврииле, невеществено просвещаемь, свет виден бысть вторыи. Вещественыя всегда человеки просвещаеши поющыя тя.
Запев. Велицей славе сподобился еси, великое таиньство нам открыв, великии ангелом, им же взяти быхом от земли, к велицей высоте, вельми чтущии тя.
Слава. Явися всем с небесе, иже любовию притекающим ти присно. И устави бурю юже на ны движимую, напастей же и скорбей, о Гаврииле архистратиже.
И ныне. Богородичен. Сказуя еже древле сокровенное таиньство. Отроковице Тебе иногда, Гавриил взывааше радуися Божия Полато, в Ню же вселився, вся человеки обожил есть, яко Милосерд. Катавасия.
Слава, и ныне. Седален, глас 4-й. Безплотным служителем ты первеньствуяи, первовечное повеленное страшное таиньство, тебе единому Гаврииле славне вверяется, рожество не изреченное Святыя Девы. Радуися провозглашая Ей Обрадованная. Тем же тя должно вернии, с веселием присно ублажаем.
Песнь 4. Ирмос
Неизследному Божию совету, еже от Девы воплощение Тебе Вышняго, пророк Аввакум дивяся вопияше, слава силе Твоей Господи.
Запев. Стояше причастием богоначалным, древле Гаврииле досточюдне, просвещая пророка Даниила, и вложь явление невидимым Духом.
Запев. Усты бренными тя радостно, огненаго естества суща восхваляем, изми нас огня всегда палящаго, божествеными Гаврииле ходатайствы твоими.
Слава. Иже паче солнца в божественую одежду, славою неприступною блистающюся одеваемь, воевода служителем, Царю предстоиши Небесному веселяся.
И ныне. Богородичен. Всю Тя Духом Гавриил, преочищену Всенепорочная разумев, вопиет Ти явствено, радуися клятвы избавление, и праотцем возвание. Катавасия.
Песнь 5. Ирмос
Удивишася всяческая, о божественей славе Твоей. Ты бо браконеискусимая Девице прият во утробе надо всеми сущаго Бога, и родила еси безлетнаго Сына, всем воспевающим Тя мир подавающа.
Запев. Ума причастием перваго просвещаемь, вторыи виден бысть свет. Зовыи со безчислеными ангел чинми, Свят Отец Вседержитель, Сын собезначален, и Дух сопрестолен.
Запев. Видение твое огнено, и доброта чюдесна, всяку мысль удивляя. Велия слава Гаврииле великии божественым безплотным началниче, всех удобрение, иже верно воспевающих тя.
Слава. Божественыи яко видев тя во время кажения, древле стояща Захария, бывает нем. Не убо верова твоей вести страшней, юже возгласил еси, Гаврииле архистратиже.
И ныне. Богородичен. Храм священия сущи Пренепорочная, гласом Гавриила архангела, иже во святых почивающаго родила еси Пресвятаго Бога, всех освящающаго, и лютых изимающаго. Катавасия.
Песнь 6. Ирмос
Божественное се и всечестное совершающе празднество, богомудрении Божия Матере, приидите руками восплещем, от Нея Рождьшагося верою славяще.
Запев. Землении языцы почести тя, ума светозарнаго и небеснаго невозмогут, богатно просвещаема, паче ума и слова, божествеными светлостьми.
Запев. Заря солнца многосветлая, огненых слуг начальниче, светоносными ти ко Владыце мольбами, поющыя Тя тмы страстей исхити.
Слава. Советы языком разори, веру православную утверди. Устави раздирания церковная архангеле, иже ко всех Творцу твоими умолении.
И ныне. Богородичен. Глаголом божественым, послушлива Чистая Гаврииловым бывши и пребезначалнаго слова, плотию родила еси. Иже безсловесия мир избавльшаго. Катавасия.
Слава, и ныне. Кондак, глас 8-й. Пресветлыя и честныя, и вседетельныя пренеисчетныя и страшныя Троицы, ты еси архистратиже славныи, служителю и молитвениче, ныне непрестанно моли, избавитися нам от всяких бед и мук. Да зовем ти, радуися покрове рабом твоим.
Песнь 7. Ирмос
Непослужиша твари, богомудрении паче Зиждителя, но огненое прещение мужески поправше, радовахуся поюще, препетыи иже отцем Господь и Бог благословен еси.
Запев. Иоанново рожество славне возвестил еси, Захарии иногда внутрь божественаго храма, предстоящу и поющу Избавителю всех. Препетыи иже отцем Господь и Бог благословен еси.
Запев. Преславно храма твоего благолепие, богатно Гавриил освящает душа верным, и бедит велегласно вопити ти, препетыи иже отцем Господь и Бог благословен еси.
Слава. Просвещаемь причастием архистратиже, перваго света тайно. Вторыи свет воистину виден бысть, поющыя просвещаеши всегда, препетыи иже отцем Господь и Бог благословен еси.
И ныне. Богородичен. Послан бысть Гавриил архистратиг, радость возвещая Ти Дево Мати чистая. Ея же ради печаль преста, и клятва воистину неплодна бысть, и благословение процвете верным во веки вся. Катавасия.
Песнь 8. Ирмос
Отроки благочестивыя в пещи, рожество Богородиче спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.
Запев. Священнословии священными, тя людие священнии поют веселящеся. Ты бо всему виновное слово воплощаемо, еже по нас архангеле, и еже от нас провозглашаеши Девице, паче ума же и слова. Тем же тя почитаем во вся веки.
Запев. Уму великому же и первому, невеществено архангеле примешаяся. Усты огнеными твоими, поеши пение страшное, еже поют вси ангельстии лицы. Господа воспевайте дела, и превозносите Его во веки.
Запев. Благолепием яве испещрен божественым, проходиши небесная, таже и земленая. Совершая священная хотения, Христа всех Бога. Ангелом началниче Гаврииле, красота иже верою присно тя хвалящим.
Слава. Плотию по составу слово, человеком примеситися хотя, имея Тя предтекуща, и проуготовающа священную полату, о священныи Гаврииле. Господа пойте вопиюща, и превозносите Его во веки.
И ныне. Богородичен. Яко престол красен царев, яко всех тварей превышьшю и преимущю. Яко пресущнаго Едину существовавшю, земленыя обожившаго, соединением лучшим, рожества не изреченна и странна, благословеную воспоем Девицу чистую. Катавасия.
Песнь 9. Ирмос
Всяк земен да взыграется, Духом просвещаемь, да ликовствует же безплотных умов естество, почитая святое торжество Божия Матере, и да поет, радуися преблаженная Богородице чистая присно Дево.
Запев с поклоном. Предстоиши страшно престолу благодати служа. И облистаемь светолитии еже паче ума, и священно обожаемь. И свет зримь, и просвещаеши верою поющыя тя, священне Гаврииле архистратиже.
Запев. Яко же небо зришися звездами украшено, божествеными светлостьми. И яко же воевода, рукама держиши скипетро пресветло. И преходиши всю землю, волю Владычню всегда свершая, и от лютых верныя вся изимая.
Запев. Утиши лютую варварскую бурю, воздвижемую всегда на рабы Твоя. Церковныя устави раздоры, поющим тя подаждь прегрешением избавление. Церкви же даруй победителная, Гаврииле теплым си предстательством.
Слава. Предобрая двоице и преславная, Михаиле и Гаврииле, престолу предстояще божественыя славы. Всем просите грехов разрешения, и злых пременение, яко предстателие, и яко благости Владычней во всем подобящеся.
И ныне. Богородичен. Свет благодати рожеством Ти восия, и просвети всю подсолнечную, и предстателя тме погуби. Богородителнице пречистая, ангелом похвало, и человеком всем спасение, иже не престанными гласы восхваляющим Тя. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и заступлением святаго великаго чиноначальника архистратига Гавриила, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.