Преподобный Алексий, человек Божий, был римский гражданин, сын богатых родителей. Рано он захотел посвятить себя служению Богу. Родители же решили его женить. В день своего браковенчания он тайно покинул родительский дом и восемнадцать лет провел в подвижнических трудах в Едессе. Затем он по Промыслу Божию возвратился в Рим. Неузнанный, он смиренно просил у своего отца разрешения поселиться в каком-нибудь уголке его двора, и был помещен как бесприютный нищий в специально устроенном помещении при входе в дом. Питался он подаянием со стола своего отца, строго постился, дни и ночи проводил в молитве, смиренно переносил многие оскорбления и обиды от слуг своего отца. Здесь он прожил семнадцать лет и опознан был после смерти по свитку, в котором было описано его житие. Будем усердно молить святого Алексия, чтобы по его молитвам Господь укрепил нас в терпении, смирении, кротости, без стяжания которых невозможно получить вечное блаженство. Память преподобному Алексию, человеку Божию 17 марта (30 марта по гражданскому стилю).
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 4-й
Яко чистоты светилник пресветел показася, дивныи Алексие, ибо тленныи чертог, на нетленное Божие Царствие пременив, яко целомудрия делатель преизряден. Сего ради предстоиши Господеви всех Царю, Его же моли, даровати нам мир и велию милость. (Дважды).
Слава, и ныне. Богородичен. Иже от века утаенное, и ангелом несведомое таиньство. Тобою Богородице земным явися, Бог в неразмесне снятии воплощаемь, и крест волею нас ради восприим. Им же воскресив первозданнаго, и спасе от смерти душа наша.
КАНОН, глас 2-й
Песнь 1. Ирмос
Во глубине потопи древле, фараонитская вся воинства преоружену силу воплощьжеся Слово, преспеющия грехи потребил есть. Преславныи Господь, яко прославися.
Запев: Преподобне отче Алексие, моли Бога о нас (поклон).
Тесным шествовав путем, непорочным и преподобным житием мудре, проходя от юности. Тем же ми тесноту разшири умную, восхвалити тя в райстей ширине водворяющася, Алексие.
Запев. Сам ся отнюд Богови возложь блаженне, вне плоти и мира был еси. Богатьству текущу, небесное предпочел еси пребывающее, и обещанныи град Сион вечнующии.
Слава. Ложесн ты матерьских неплодие разрешил еси, рождься яко же Самуил пребогате. Во чреве же сердца чистыи зачен страх. Родил еси дух спасения, божественных добродетелей верою.
И ныне. Богородичен. Божии собезначалныи Сын, име яко виновну Тя, еже к нашему Дево подобию, Едину паче всея твари Чистая, чисту Тя обрет. Тем же Тя поюще вси роди ублажаем.
Катавасия: Избави от бед рабы своя, преподобне отче Алексие, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 3. Ирмос
Процвела есть пустыня яко крин Господи, язычная неплодящая церкви, пришествием Ти о ней же утвердися сердце мое.
Запев. Побеждаемь желанием чистоты, чертогом иже на земли, небесныи премени, и женьскою любовию, сладкое ангельское подобие.
Запев. Молвы житейския, и множество богатства оставил еси, и преселник быв Отечества, отче Алексие, Христове нищете блаженне подобяся.
Слава. Слезами и болезньми, и воздержанием премудре, благаго взыскал еси. Когда приидет свет разума, безстрастие дая сердцу твоему.
И ныне. Богородичен. Иже горе невидимыи ангелом Чистая, доле ис Тебе раждаемь, зрится свершен человек, погибающаго мира обновляя. Катавасия.
Седален, глас 3-й. Мирскую красоту, преподобне оставил еси, пременив богатством текущим, непроходимое яве и пребывающее Алексие. Тем же со всеми тя святыми славим, и торжествуем светло в память твою, просяще обрести молитвами твоими, блаженне велию милость.
Слава, и ныне. Богородичен. Недоведомо, и непостижимо есть Владычице Богоблагодатная, соделанное в Тебе страшное Божие таинство; непостижимаго бо заченьши родила еси, плотию обложена, от чистых кровей Твоих. Его же всегда Чистая, яко Сына Своего моли спасти душа наша.
Песнь 4. Ирмос
Пришествовав от Девы не ходатай ни ангел, но Ты Сам Господи воплощься, и спасе всего мя человека. Тем вопию Ти, слава силе Твоей.
Запев. Претерпел еси нищету, проситель быв, нищь яко же Лазарь: желание бо божественое, утешаше блаженне сердце твое, вжелевшее богатьства небеснаго.
Запев. Безпечално и тихо житие возжелел еси, единою ядыи в недели Алексие. Желанием чающаго тя, немимотекущаго преблаженне наслаждения.
Слава. Церковь Богови сердце искии соделати, в храме возлюбил еси Божия Матере славне всегда седети, и небесныя доброты взирати.
И ныне. Богородичен. Воздоивши Дателя Дево млеку, алчущее и утешняемое ныне сердце мое, насыти всякого разума, и умиления божественаго, молю Тя. Катавасия.
Песнь 5. Ирмос
Ходатай Богу и человеком бысть Христе Боже, Тобою бо Владыко, к светоначалнику Отцу Твоему, от нощи неведения, приведение обретохом.
Запев. Токи священными, напояя всегда слезными свою душу, соделал еси клас воистину сторичествующь, Делателю безсмертному, добре соблюдаемь.
Запев. Виден бысть на земли, житию безплотных подобяся, премногим твоим отче воздержанием досточюдне, и молитвеным пожданием. Им же яко светом просветился еси.
Слава. Огнем молитв, греха попалил еси вещь мудре. Бденными же стояньми, всяко сладострастие успил еси. Усоп же к сиянию преставился еси невечернему.
И ныне. Богородичен. Иже во свете живыи, во святое чрево Твое вселися Чистая, мира погибшаго тмою неразумия назидая. Его же моли, вся просветити поющыя Тя. Катавасия.
Песнь 6. Ирмос
В бездне греховней одержим, неизследную милосердия Твоего призываю бездну, от тли Боже мя возведи.
Запев. Церковь жива Богу тя бывша, Христово селение, неискусобрачная, проявляет крыющася, и прославляет, утаитися тщаща.
Запев. Молитвы твоя Богови, яко кадило блаженне прияти быша. Тем же житием твоим, верных разумы благоухал еси Духа благодатию.
Слава. Священным житием украшаемь, паки Христос не хотяща славне, тя Отечеству дает, отбегающа славы временныя.
И ныне. Богородичен. Законы естественыя чистая Владычице, Зиждитель ново соделав естество, ис Тебе неизреченно раждается, и обожает мя безмерною милостию. Катавасия.
Слава, и ныне. Кондак, глас 2-й. Дом своих родителей, яко чужь имея, водворибося идеже венец приял еси свыше, человече Божии Алексие, дивен на земли явлься ангелом и человеком светило.
Икос. Житием и словесы украсился еси. И Христову Церковь возвеличил еси, своим житием. Отца и матерь, царя и люди торжествовати устроил еси. Делы почтил еси, иже по образу Божию Алексие преподобне. Восияв бо в мире, и еже в тебе целомудрие, и благодать молчании твоих блистающи всем, иже верою празднуют отче память твою, явился еси ангелом и человеком светило.
Песнь 7. Ирмос
Богопротивное веление беззаконнующа мучителя, высок пламень вознесло есть. Христос же простер богочтивым детем хлад духовныи. Сыи благословен и препрославлен.
Запев. Претерпел еси преподобне, пред родителными враты седя, и весма непознаваемь. И от отрок ругания подъемля, и наругаемь люте, и нищетою многою оскорбляемь.
Запев. Плоти твоея мудрование умертвив, зря родителя, и сими непознаваемь, естества покрываше нужду преподобне, и презрение твоих неискусных отрок, оскорбляющих тя.
Слава. О чюдо, како пребысть присно нищетуя, в богатстве Алексие безмернаго смирения; како претерпел еси ругание и уничижение, от отрок премудре твоих, не домышляющихся житию твоему.
И ныне. Богородичен. Великаго служение Ты таиньства, бысть Пренепорочная. Бога бо воплотила еси, великих зол нас избавльшаго, Тя величающих Чистая, благословенная и Богорадованная. Катавасия.
Песнь 8. Ирмос
Пещь огнена, иногда в Вавилоне детели разделяше. Божиим велением халдеи опаляющи, верныя же прохлаждающи поюща. Благословите вся дела Господня Господа.
Запев. Неведом прежде родителем си, во время отшествия твоего, сим тайну открываеши являемь. В славу Богу нашему славне, иже вельми тя достойно прославльшему.
Запев. Господь гласом велиим являет тя всему Риму, сокровенное сокровище пребогате, в нищетне образе лежаща. И дары целебными, вся верою к тебе приходящия обогащающа.
Слава. Князи людьстии, и царие снидошася, и священницы блаженне погрести тя, Божиим мановением. И видяще велие видение, дивишася чюдесем преподобне, их же творяше, божественою силою Духа.
И ныне. Богородичен. Истлевшия ны древле преступлением, обновляя Человеколюбец. Нетленно воплотися, от нетленныя Ти пренепорочныя утробы, и избави всех, греховныя тли Богоневестная. Катавасия.
Песнь 9. Ирмос
Безначална родителя Сын Бог и Господь, воплощься от Девицы нам явися, омраченыя просветити, и собрати расточеныя. Тем всехвалную Богородицу величаем.
Запев с поклоном. Исцеления источил еси ко гробу несом, Богу тя блаженне вельми славящу. Свет бо невидящии видеша, и глаголание прияша, прежде суще немии, всеславне Алексие.
Запев. Виден бысть предлежащь, и к погребению несом, яко солнце отче испущая исцелении заря преславно, и темныя страсти отгоня, и опаляя бесы, и просвещая богомудрыя.
Запев. Прииде погребсти тя, патриархом лучшии. Царь иже вельми христолюбив. Князи, старцы и юнии, и иночестии лицы, божественым мановением, освящающеся прикосновением ти блаженне.
Слава. Восхищен бысть на колеснице добродетелей несом. И почиваеши идеже преподобных чинове, соборы апостол, и мученик, патриарх, и всех праведных, с ними же ны помяни, почитающих тя Алексие.
И ныне. Богородичен. Глас Ти приносим Гавриилов радующеся. Радуися глаголюще село неделанное, радуися клятве разрешение, радуися источниче воды животныя, преподобным похвало, Богородице присно Дево. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и преподобнаго отца нашего Алексия, человека Божия, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.