Канон преподобным Зосиме и Саватию

Русская вера, 2017

Преподобные Зосима и Саватий — основатели Соловецкого монастыря в Белом море — после своего преставления от земной жизни чудесным образом неоднократно являлись гибнущим в морской пучине рыбакам и спасали их. Преподобный Зосима также является небесным покровителем пчеловодства и хранителем пчел. К нему прибегают с молитвами в болезнях, и по молитвам святого Господь совершает исцеления. Память преподобным Зосиме и Саватию 8 августа (21 августа по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 8-й

Яко светильницы явистеся всесветлии во отоце окияна моря, преподобнии отцы Зосимо и Саватие: вы бо крест Христов на рамо вземше, и усердно Тому последовасте, чистотою Богови приближившася, отнюду же и силами чюдес обогатистеся. Тем и мы любезно притекаем к ракам честных мощей ваших, и умильно глаголем, о преподобнии, молите Христа Бога спастися душам нашим. (Дважды).

Слава, и ныне. Богородичен. Иже нас ради рождеися от Девы, и распятие претерпев Благии, испровергии смертию смерть, и воскресение явлеи яко Бог. Не презри их же созда рукою Своею, яви человеколюбие Свое Милостиве. Приими рождьшую Тя Богородицу молящуюся за ны, и спаси Спасе наш люди согрешьшыя.
 

КАНОН, глас 2-й
 

Песнь 1. Ирмос

Грядите людие, поем песнь Христу Богу, раздельшему море, и проведшу люди, яже испусти из работы египетския, яко прославися.

Запев: Преподобнии отцы Зосимо и Саватие, молите Бога о нас (поклон).

Просвещением трисолнечнаго Божества озарившеся, премудрии светилницы явистеся, просвещающе верных: страстей темностию омраченнаго мя обновите, молитвами ваю святая к Человеколюбцу, светоносную вашу память чтуща.

Запев. Совесть имеюще к Богу неоскудно, и око сердечное взирающо к богоначалному свету, в молитвах предстояще Зосимо преподобне, и Саватие пребогате, страстей наших тму, молитвами вашими отгоните.

Слава. Храм бысте Святому Духу, и Тому душевное возложисте желание, преподобнии отцы: сего ради кротких землю наследовасте, укротите настоящую бурю сердец наших, да в тишине божественей бывше, песнословим ваша подвиги, и жизнь нескончаемую.

И ныне. Богородичен. Плотию рождьши Безплотнаго Богородице Пречистая, страсти лютыя ума моего утоли Дево, и исправи мя заблуждьшаго Мати Божия, яко да славлю Тя.

Катавасия: Избавите от бед рабы своя, преподобнии отцы Зосимо и Саватие, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

На камени мя веры утверди, разшири уста моя на враги моя, возвеселибося дух мой воспевати, несть свят яко же Бог наш, и несть праведен паче Тебе Господи.

Запев. Исполнивше сердца своя слезными потоки преподобне Саватие, и Зосимо богомудре, и плоти своя умертвивше, постом и воздержанием святии: душа же божествеными даровании просветивше, и плодоносну износяще реку чюдес ваших в явление преблажении.

Запев. Высотою смирения украшаеми преподобнии, и все убо желание ко Владыце своему простросте, ярость же на бесы богоноснии показаста изрядными делы своими, постом и молитвами.

Слава. Образ бывше своим учеником, к добродетелем и к высоте их возводяще божественаго желания, и исцеления источают безчисленая гроби ваши преподобнии отцы, и отгоняют от человек болезни телесныя, и душевныя страсти уврачуют, подвиги вашими всечестнии.

И ныне. Богородичен. Из ложесн Твоих возсия преславно великое Солнце, Христос Бог Богородице Дево, и вся земныя концы просветив, и преподобных лики честно венчал есть. Катавасия.

Седален, глас 4-й. Житейское море воздержанием без труда преплывше, и ко пристанищу тихому безстрастия радующеся доидосте, преподобнии отцы Зосимо и Саватие, богомудрии и преблаженнии, молите Христа Бога, спастися душам нашим.

Слава, и ныне. Богородичен. Девство и рожество выше естества и слова, в Тебе Богородице совокупися, яко всех Содетеля и Бога, воплотившагося породила еси, Избавителя душам нашим.
 

Песнь 4. Ирмос

Пришествовав от Девы не ходатай ни ангел, но Ты Сам Господи воплощься, и спасе всего мя человека. Тем вопию Ти, слава силе Твоей.

Запев. Землю дольную преминувше, и небесную стяжаста жизнь, и со безплотными лики смесистеся преподобнии, премудрости рачителие явистеся пребогатии: житие бо непорочно поживше, и храми Святому Духу бысте, очищени душею и телом, и землю кротких наследовасте, согласно взывающе, слава силе Твоей Господи.

Запев. Очистивше ум свой от страстныя молвы славнии, и Христову смирению подражавше преподобне Саватие, и Зосимо чюдныи, безстрастие стяжавше, и гордыню бесовскую до конца низложивше, на землю повергше, и к небурному пристанищу устремишася в морскии остров, согласно воспевающе, слава силе Твоей Господи.

Слава. Возсиявше от востока яко солнце чюдесными лучами, и ангельскому житию поревновавше, преподобнии непрестанными молитвами, земныя печали отложивше, небесныя надежды стяжати сподобистеся, усердно поюще, слава силе Твоей Господи.

И ныне. Богородичен. Блажит Тя пречистая Богородице всяк возраст, и всяка душа верных: Божие бо слово, паче ума и слова родила еси Препетая. Катавасия.
 

Песнь 5. Ирмос

Света подателю и веком Творче Господи, во свете Твоих повелении настави нас, разве бо Тебе иного Бога не знаем.

Запев. Возсия в Тебе Господь, Его же от души возжелел еси видети, преподобне Саватие, и Зосимо прехвалне: внутренима очима зрите доброту неизреченную Христа Бога нашего, и любве ради его в морскии остров вселистеся, и того славы наслаждаетеся непрестанно, и пищи неизреченныя.

Запев. Единой Христове любви присвоистеся преподобнии, и всею душею потщашася, умертвити плотьская взыграния, богоприятными вашими молитвами. И исполнители заповедем Божиим бысте, и многих чюдес обретосте благодать.

Слава. Беззлобив и кроток бысть Зосимо, вся злобы и стрелы вражия погубль: милостив же до конца явлься Саватие, милость душевную стяжавше от единаго Бога. Благодать и милость приемше, свыше нас посещайте преблаженнии.

И ныне. Богородичен. Воспойте Господеви вся земля, и пойте вси явльшемуся из чрева Девыя, неизреченно и боголепно из Неискусобрачныя, и сию верным показавшу твердая надежду и похвалу. Катавасия.
 

Песнь 6. Ирмос

В бездне греховней одержим неизследную милосердия Твоего призываю бездну, от тли Боже мя возведи.

Запев. Силою Христовою укрепляемь преподобне Саватие, вся коварства лукаваго низвергл еси на землю, священными Ти молитвами богоблаженне. И ныне Зосимо преподобне безстрастия умом очищеным, предстоиши Богу Вседержителю, от Него же знамения и чюдеса испросивше угодницы Христови, пресветли явистеся.

Запев. Богомудреными помыслы украсившеся, и яже на земли преобидесте тленная, и небесное богатство воспринята блаженная супруга Христова, Саватие премудре, и Зосимо преподобне. Иже с верою к раце мощей ваших притекающим, подаваете исцеления неоскудно, полки же прогоняюще бесовския. И ныне на небесех радующеся живете.

Слава. Божественых повелении отцы святии, нравы стяжаете, смирение и любовь, кротость же и незлобие. И сего ради лукаваго змия умертвивше священными вашими молитвами богоблаженнии, и от Христа Бога дарование богатно прияли есте, исцелении же дары требующим подаваете.

И ныне. Богородичен. Душевныя ми страсти Пречистая исцели, яже безстрастия бывши источник Мати Божия, и просвети мя рожеством Своим, преподобных молитвы приемлющи. Катавасия.

Слава, и ныне. Кондак, глас 8-й. Христовою любовию уязвившеся преподобнии, и Того крест на рамо взем понесше, божествене вооружившеся на невидимыя враги, и непрестанныя молитвы, яко копие в руку имуще, крепко победили есте бесовская ополчения: благодать Господню имеете, целити душа и телеса приходящих с верою к ракам мощей ваших, чюдес лучи испущающе всюду. Тем да зовем вам, радуйтеся преподобнии отцы Зосимо и Саватие иноком удобрение.

Икос. Услышавше Христов евангельскии глас, остависте плотьская мудрования: богатство же и славу яко прах нивочто же вмениша. И на страсти яко безплотнии подвизашася, и безплотных ликостоянием сочетастеся. Разума дарование прияли есте, еже подадите и нам в песнех пети вам сице: радуися Саватие преподобне и богоносе, небесныи человече и земныи ангеле. Радуися Зосимо пребогате, кроме мира суетнаго пустыню соделавыи в морском острове, и в нем обитель состави яко во ограде небесней, в ней же множество инок собрашася. И от них слышите сице рекущих: радуитася инокующим похвала, и спасению ходатаи. Радуитася унывающим, и печалным утешение, радуитася иноком от навет вражиих небурное пристанище. Радуитася печальным веселие, и помыслом тишина неизглаголанная. Радуитася скорбящим душею сладкое утешение, и радости божественыя податели. Радуитася наши предстатели и избавители. Радуйтеся преподобнии отцы Зосимо и Саватие иноком удобрение.
 

Песнь 7. Ирмос

О теле злате на поли Деире служимем, трие отроцы нерадиша о безбожнем велении: но посреде пламени ввержени прохлаждаеми пояху, благословен Бог отец наших.

Запев. Всех текущих и временных страстей свободися преподобне Саватие, всю бо надежду стяжав к Богу. Сего же ради прилепися воздержанием твердым своему Владыце блаженне Зосимо: действуете преславная чюдеса поющим, отец наших Боже благословен еси.

Запев. Просветивше своя сердца оружием молитв ваших, началницы бысте морскаго острова обители, учаще и наказующе дети своя, и вся возводяще к свету богоразумия, с небес приемше благодать, недуги целити, и прокаженныя очищати, и бесы изгоняти, и от морских бед избавляти, от взывающих верно, благословен Бог отец наших.

Слава. Плод духовныи, и жертву непорочную преблаженне Зосимо, житие свое Владыце принесл еси. Саватие же богомудре, плоть свою Духови повинул еси, в воздержании всяцем пожил еси, в трудех и во бдениих прехвалне, имея совесть чисту и житие непорочно, воспевая, благословен Бог отец наших.

И ныне. Богородичен. Оружие Чистая хранящее прежде врата едемская, плещи Девице всем дает, низложившим врага губителя постническими борении, и всегда впивающим верно, благословен Пречистая плод чрева Твоего. Катавасия.
 

Песнь 8. Ирмос

В пещь огнену к детем еврейским сошедшаго, и пламень на хлад преложшаго Бога, пойте вся дела Господа, и превозносите Его во веки.

Запев. Мыслию очищеною премудре Саватие, к Богу приближаяся, и всем всяк быв, да Христа приобрящеши. С похвалами же бывает память твоя преподобне Зосимо: праведен бо явися, и нищим питатель, и убогим заступник, мужества и мудрости, и целомудрия рачитель, Содетелю и Избавителю взывая, благословите вся дела Господня Господа, пойте и превозносите Его во веки.

Запев. Слез твоих капли погасиша огнь греховныи, преподобне Саватие, реку же чюдес твоих показал еси всем зрящим, и всякия страсти потопляющи, притекающим к тебе прехвалне. Невозвратно же шествовал еси путь ведущими стезями к Небеси, Зосимо досточюдне, от злых и плотьских, до конца удалился еси, поя, благословите вся дела Господня Господа, пойте и превозносите Его во веки.

Слава. Богоноснаго Зосиму похвалами вси почтем, яко благодати божественыя исполнена, и сиянии духовными просвещена изрядно. Саватие же яко веру и надежду, и любовь стяжавша неразориму, и яко пресветлу звезду сияющу, в духовных добродетелех изрядно: Содетелю и Избавителю вопиюща, дети благословите, священнии пойте, и превозносите Его во веки.

И ныне. Богородичен. Спаси мя Мати Божия, спасению начало мирови явльшися, избавляющи мя молвы нечистых страстей, и всякия противныя скорби, да славлю Тя Богородице. Катавасия.
 

Песнь 9. Ирмос

Безначална Родителя Сын Бог и Господь, воплощься от Девицы нам явися, омраченыя просветити, и собрати расточеныя. Тем всехвалную Богородицу величаем.

Запев с поклоном. Процвел еси в подвизех постнических прехвалне Саватие, яко шипок благовонен, и яко кедр благоуханен, верных сердца облагоухал еси. Струями же слез твоих преподобне Зосимо очищься, и ныне света трисолнечнаго наслаждаешися отче богомудре, троичному предстоя престолу, светозарными зарями просвещен.

Запев. Яко велие солнце провозсия нам величием подвиг страдании твоих, преподобне Зосимо, вся концы просвещая светом богоразумия: темже и умер яко жив являешися, Саватие же премудре отверзеся тебе Царствие Небесное, скончавшу ти доброе течение, видевше же ангели подвиги трудов твоих удивишася. Тем же и Христос тебе воздаяние и почести яко угоднику своему дарует. Сего ради вас преподобнии ублажаем.

Слава. Слез твоих тучами греховными огнь погасил еси, и своему Владыце Христу угодил еси преподобне Саватие, крепко сокрушил еси бесовския полки. В постнических же подвизех и трудех процвел еси блаженне Зосимо, яко шипок благоуханен, и яко кедр в Ливане, умножил еси чада твоя добродетелными чюдесы. Тем же покланяемся (поклон) раце мощей ваших, и верно ублажаем вас отцы досточюднии.

И ныне. Богородичен. Пощади мя Господи пощади, егда хощеши судити, и не осуди мене во огнь, ни яростию Твоею обличи мене: молит Тя Девая чисто рождьшая Тя Христе, и ангельстии собори, и преподобных ликове. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и преподобных отец наших Зосимы и Саватия Соловецких чюдотворцев, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги