Канон за творящих милостыню

Русская вера, 2017

Наш христианский долг - молиться Господу за людей, которые совершают нам добрые дела, подают полезные советы и назидания, утешают в скорби, проявляют сострадание, чтобы Господь подавал все благое и для наших благодетелей, а нам не остаться должниками перед ними.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 6-й

Помилуй нас Господи, помилуй нас, всякого бо ответа недоумеюще. Сию Ти молитву яко Владыце грешнии раби Твои приносим. Помилуй нас Господи, помилуй нас.

Слава. Господи помилуй нас, на Тя бо уповахом, не прогневайся на ны зело, ниже помяни беззаконии наших. Но призри на ны яко Милосерд, и избави нас от враг наших. Ты бо еси Бог наш, и мы людие Твои, и вси дела руку Твоею, и имя Твое призываем.

И ныне. Богородичен. Милосердия двери отверзи нам, благословенная Богородице Дево, надеющиися на Тя не погибнем, но да избавимся Тобою от бед. Ты бо еси спасение роду христианскому.
 

Канон, глас 6-й
 

Песнь 1. Ирмос

Яко по суху ходив Израиль, по бездне стопами, гонителя фараона видя потопляема, Богу победную песнь поя вопияше.

Запев. Милостиве Господи, помилуй раб Своих, нас питающих (поклон).

Даяи молитву молящемуся, благослови лета праведных, подаждь Владыко сердечная прошения, яже приносим о рабех Твоих.

Запев. Милости подателю, и источниче благости, молим Тя, подаждь рабом Твоим обильную Твою милость, и всякаго дарования исполни домы их.

Слава. Приими хвалу от уст наших грешных, Троице Святая, Отче и Сыне и Святыи Душе, во единой державе покланяема, мольбу приими о рабех Своих.

И ныне. Пречистеи Свои руце Владычице, милостивно воздежи к Сыну Своему и Богу, просящи отпущения грехов рабом Твоим, и житию исправление, и всякия благодати и милости сподоби.

Катавасия: Сохрани от бед раб Своих питающих нас, Милостиве, яко усердно к Тебе прибегаем, к милостивому Избавителю и всех Владыце Господу Исусу (поклон). Господи помилуй (трижды с поклонами).
 

Песнь 3. Ирмос

Несть свята яко же Ты Господи Боже мой, вознесыи рог верных си Блаже, и утверждь их на камени исповедания Ти.

Запев. Рекоша святая уста Твоя Господи, просите прежде Царствия Небеснаго, и сия вся приложатся вам. Тем же молимся, даруй рабом Твоим причастие со святыми.

Запев. Истинно верующе евангельскому гласу, еже рече Господи, просите и дастся вам, ищите, и обрящете. И мы ныне молим Тя Христе, и просим, даруй рабом Твоим благопребывание в житии, и небесных Твоих благ восприятие.

Слава. Троице Святая единосущная, сохрани рабы Твоя от противныя силы, и всякия напасти, радость творя им душевную и телесную, презря им вся согрешения.

И ныне. Услыши Пречистая моления наша, и спаси рабы Твоя Госпоже. И вся яже ко спасению прошения им подаждь, правительница им буди ко спасенному пути. Катавасия.
 

Песнь 4. Ирмос

Христос мне сила Бог и Господь, честная Церкви боголепно зовет вопиющи, от совести чисты о Господе празднующи.

Запев. Не презри твари Твоея Владыко, яже созда рукама Своима. Не даждь прельщатися суетными мира сего, но присно влагая в сердца раб Своих Дух Твой Святыи.

Запев. Иже Твоего ради Пресвятаго имене, нас посещающим и питающим, и вся яже нам потребная подавающим, подаждь им Господи вся яже ко спасению прошения, и вечных даров наслаждение.

Слава. Безначальная Троице и Живоначальная, спаси вся, и избави силою Своею, мирная лета, и пространен живот рабом Своим подаждь.

И ныне. Путь животный Дево рождьшая, нань настави рабы Твоя, творити божественая повеления Сына Твоего, да в них ходяще похоти плотския удаляемся, молитвами Твоими. Катавасия.
 

Песнь 5. Ирмос

Божиим светом Ти Блаже, утреннюющих Ти душа любовию просвети молюся, Тя ведете Слово Божие, Истиннаго Бога, от мрака греховнаго изимающа.

Запев. Боже щедрыи, милостивыи Боже и Господи, по множеству благости Твоея, призри свыше Владыко Человеколюбче на рабы Своя, и удиви милость Свою на них, и спаси уповающих на Тя, от противящихся деснице Твоей, сохрани их яко зеницу ока.

Запев. Боже Преблагии, посети нас обычным Своим человеколюбием, и молебную приими молитву от уст грешных. И помилуй Владыко на Тя надеющихся. Сохрани и помилуй рабы Своя, нас питающих, да Тя вси яко Благодателя прославляем.

Слава. Превечному Отцу, с собезначальным Сыном, и Всесвятым Духом, покланяемся (поклон) во единьстве, непостыдным явитися рабом Твоим на Страшнем Суде Твоем, молимся, деснаго стояния, и благих восприятия сподоби.

И ныне. Подвигни Чистая Ангелы и Архангелы, пророки и мученики, преподобныя и святители на молитву к Сыну Своему и Богу, в День Судныи рабом Твоим получити обетованных благ, и зде в житии исправление, и неоскудную благодать. Катавасия.
 

Песнь 6. Ирмос

Житейское море воздвизаемо зря напастей бурею, в тихо пристанище притек вопию Ти, возведи от тли живот мой, Многомилостиве.

Запев. Жития нашего дние яко сень преходят. Но Господи даровал еси Иезекии приложение лета животу, даждь и сим рабом Своим умножение лет, и в них здравие и спасение.

Запев. Жития нашего время скоро течет, и дние лет наших яко дым расходятся. Но Господи подаждь в приложение живота лет Своим рабом, яко же иногда подавыи Иезекии Твоему угоднику.

Слава. На престоле Христе херувимсте со Отцем седяи, и с Духом нераздельно, и от небесных сил неизреченно хвалу приемля. Тех молитвами, и всех безплотных, помилуй и спаси душа наша.

И ныне. Яко заступница сущим в бедах, тем же к Тебе прибегаем молящеся, спаси и ныне рабы Твоя Владычице, от всякия напасти, бед и печали избави их, молитвами Твоими пречистая Дево Богородице. Катавасия.

Слава, и ныне. Кондак, глас 6-й. Не имамы иныя помощи, не имамы иныя надежды, разве Тебе Человеколюбца Христа Бога нашего: дело рук Твоих не презри молящихся Тебе. Низпосли благих Своих даров рабом Твоим, нас назирающим. На Тебе ся надеем, и Тобою ся хвалим, Твоя бо есмы раби, да ся не постыдим.

Икос. Иже всех еси Отец Преблагии Владыко, не затвори от нас щедрот Твоих. Призри с Небесе и виждь, уповающих на безчисленное Твое человеколюбие и милосердие. Не презри нас молящихся о рабех Твоих, нас посещающих и питающих, имене ради Твоего святаго. Свободи их от всякия нужды и гнева, и пленения и скорби, и даруй им житие мирно, и безмолвно, безболезнено и не вредно, Твои бо есмы раби, да ся не постыдим.
 

Песнь 7. Ирмос

Хладодательну убо пещь сотвори Ангел, преподобным детем. Халдеи же опали велением Божиим. Мучителя увеща вопити, благословен Бог отец наших.

Запев. Паче всех приемыи две цати убогия оныя вдовицы, Ты и сие Господи приими подавание, еже к нашей худости творят, и даждь седмерицею в недра их, великую Твою милость.

Запев. С Небесе Твою милость подаждь нам Христе, надеющимся на Тя, просим грешнии и недостойнии, даруй милости Твоя богатыя, еже к нам убогим милость показующим. Стократицею тем даруй на земли благая, и в земных место небесная.

Слава. Отче и Сыне и Святыи Душе, Тебе верно покланяемся (поклон), Твоея требуем милости, рабом си подаждь нас назирающим, в земных место небесная, и вместо временных вечная благая.

И ныне. Во всех сыи грешнее есмь, на небо воззрети не смею. Но к Тебе прибегаю, и моляся вопию Ти, Владычице Мати Божия пречистая, рабы Своя Госпоже, нас питающих, избави вечнаго мучения. Катавасия.
 

Песнь 8. Ирмос

Из пламене святым росу источи, а праведнаго жертву и воду попали. Вся бо твориши Христе елика хощеши. Тем Тя превозносим Господа во веки.

Запев. Милостиве Человеколюбче Господи, всего мира грехи взимая, и сих отданию сподоби, и отпусти рабом Своим нас упокоившим, всяко прегрешение, вольное и невольное все, еже сотвориша веданием и неведанием, или словом, или помышлением.

Запев. Воззрите на птицы небесныя, еже рече Господь, яко Отец Небесныи питает я. И мы грешнии и недостойнии Владыко Твои раби, на Тя Небеснаго Отца уповаем. Хлеб наш по вся дни даждь нам, и отпусти рабом Своим нам, вся согрешения наша. И не введи нас во искушение, но избави нас от лукаваго.

Слава. Господи иже Пресвятыи Свой Дух апостолом Своим послав, Того Благии не отъими от сих раб Твоих, и обитель в них сотвори волею Твоею. Троице Святая, спаси любящия Тя верою, Твоя служители.

И ныне. Явленная от века всем христианом заступнице, и во благих ходатаице о мире Владычице, приими молитву, и донеси Сыну Своему и Богу нашему. Спаси рабы Своя любящия Тя от всякия напасти, и дияволя искушения. Катавасия.
 

Песнь 9. Ирмос

Бога человеком неудобь видети, Нань же не смеют чини ангельстии зрети. Тобою бо Пречистая явися нам Слово воплощенно, Его же величающе, с небесными вои Тя величаем.

Запев с поклоном. Множество благости Твоея долготерпеливе Господи, щедротам неодержимая пучино, помилуй раб Своих упокоивших нас и напитавших. Презри согрешения их, и от напрасных напастей скоро заступи, и душа их во освящении соблюди, молитвами пречистыя Ти Матере.

Запев. Бога плотию родила еси Владычице, и рождьши питаеши питающаго, и дающаго пищу всякой плоти. И нас питающих не лиши мзды Своея, умножи всего блага на пользу всем стократицею, и даруй им получити жизнь вечную.

Слава. О, Всемилостивая Всесвятая Троице, помилуй рабы Своя, нас милующих. Даждь им довольная по множеству милости Твоея, и храмы их наполни всякаго блага. Воздаждь им Господи, в тленных место нетленная.

И ныне. За вся христианы помолися Владычице, со всеми святыми непрестанно, о избавлении града сего, и всякаго града и страны, и иже верою живущих в них. Любящим же нас, воздаждь богатыми дарми. Катавасия.
 

Достойно есть... Затем, после Трисвятое, и по отче наш — тропарь: Помилуй нас Господи... Слава — кондак (написан по 6-й песни канона). И ныне. Богородичен: Милосердия двери... (написан в начале канона, после тропаря). Господи помилуй (40 раз).
 

Молитва за творящих милостыню:

Господи Боже наш, помяни нас грешных и недостойных раб Своих, внегда призывати нам святое и поклоняемое имя Твое. И да не посрамиши нас от чаяния милости Твоея. Но неизреченным Своим милосердием помилуй. Не имамы бо иного упования разве Тебе. Презри вся согрешенная нами. Не яко бо что сотворихом пред Тобою благо. Что же ли принесем Ти их же требуеши благих, но даждь нам Господи по благодати Твоей положити начало благо, яко же заповедал еси любити друг друга, и молитися друг за друга. И за вся во власти сущия. Сам бо рекл еси Владыко. Просите и дастся вам, ищите и обрящете, толцыте и отверзется вам. Тем же и мы грешнии просим, даждь нам нынешнее прошение: помилуй раб Своих приимших нас и напитавших, и упокоивших от дому благих своих имене ради Святаго Твоего. Исполни Господи домы их и жилища благих Твоих, и души их во освящении соблюди. И еже от них приносимое благоугодне приими от раб Своих (имена), и в вечных сокровищах положи, и даруй тем в мире Твоих благ обильно восприятие, со всеми просящими. Дателю благих, и подателю живота нашего, сохрани тех под кровом крилу Твоею. Возсияй в сердца их правду и множество мира, и удиви на них милость Свою, промышляющих и пекущихся о нас нищих, целы и невредны тех сохрани, выше всякаго навета и злобы. Тебе ся молим, и к Тебе прибегаем милостиве Человеколюбче Господи, наша мольбы человеколюбне приими. И настоящих зол, и будущия вечныя муки свободи, и Царствию Небесному тех сподоби. На Тя бо уповахом, и кроме Тебе иного бога не знаем, и еже от Тебе милости чаем. Ты бо еси Бог наш, Бог миловати и спасати. И Тебе славу возсылаем Отцу и Сыну и Святому Духу, ныне и присно и во веки веком, аминь.

Честнейшую Херувим... Слава, и ныне. Господи помилуй, Господи помилуй, Господи благослови.

Отпуст: Господи Исусе Христе Сыне Божии, молитв ради пречистыя Твоея Матере, и всех святых, помилуй и спаси нас, яко Благ и Человеколюбец. Аминь.


Обзор книги