Канон трем святителям: Василию Великому, Григорию Богослову, Иоанну Златоусту

Русская вера, 2017

Святые великие святители: Василий Великий, Григорий Богослов и Иоанн Златоуст — величайшие вселенские проповедники христианской веры и покаяния, усерднейшие молитвенники и строжайшие постники. Для нашего восхождения к Горнему миру особенно необходимо частое молитвенное общение со святителями Христовыми Василием Великим, Григорием Богословом и Иоанном Златоустом, чтобы по их благодатным молитвам Господь прощал согрешения наши и неотступно помогал в нашем шествовании ко спасению. Память трем святителям Василию Великому, Григорию Богослову, Иоанну Златоусту 30 января (12 февраля по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й

Яко апостолом единонравнии, и вселенней учителие, Владыце всех молитеся, мир вселенней даровати, и душам нашим велию милость. (Дважды).

Слава, и ныне. Богородичен. Иже от века утаенное, и ангелом несведомое таиньство, Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.
 

КАНОН, глас 2-й
 

Песнь 1. Ирмос

Грядите людие, поем песнь Христу Богу, раздельшему море, и проведшу люди, иже испусти из работы египетския, яко прославися.

Запев: Святии велиции трие святителие: Василие Великии, Григорие Богослове и Иоанне Златоусте, молите Бога о нас (поклон).

Кое воздаяние достолепно, нашим человецы принесется от нас благодателем, ими же во благобытие приводимся.

Запев. Витийстии языцы, и хитрости и коварьства, и вся словес сила, ныне в вину собрашася едину, и чтущих я да почитают.

Слава. Своего убо ничто же имуще стяжания, на земли небомудрии. Хранителе же явишася общаго и предстатели, общим песнем да сподобятся.

И ныне. Богородичен. Тебе общую любочестия Всенепорочная, нашего естества вси славим, устна едина бывше, и едино согласие свершающе.

Катавасия: Избавите от бед рабы своя, святии велиции трие святителие: Василие Великии, Григорие Богослове и Иоанне Златоусте, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

На камени мя веры утверди, разшири уста моя на враги моя. Возвеселибося дух мой воспевати, несть свята, яко же Бог наш, и несть праведна, паче Тебе Господи.

Запев. Труба великая церковная, светилник просвещаяи вселенную. Проповедник, иже вещанием приемля вся концы. Великоименитыи, сподвизает собор сей Василии.

Запев. Светел от словес и велении, ясен от жития и дел, во всех освещая всех, яко другое звездам солнце, многопетыи Богослов, днесь ублажается.

Слава. Се свет миру, мир просвещает. Се земная соль, иже землю сладит, се животу древо, беземертия плоды предлагает Златоустыи: умрети нехотящии, приидите напитаемся.

И ныне. Богородичен. Иже вся от небытия в бытие сотвори, естество дав комуждо бывших. Тоя же и чающим естества воздание, весть яко же хощет. Отнюду же слышится, и Дева рождьши, кто не дивится. Катавасия.

Седален, глас 4-й. Премудрии учителие вселенней, иже Бога славяще делы и словесы на земли, да возвеличатся днесь, яко спасению всем нам подателие.

Слава, и ныне. Богородичен. Предстательнице нератная, Богородителнице, и молитвою готовая притекающим к Тебе, от бед мя избави, не презри мене, всех заступление.
 

Песнь 4. Ирмос

Пришествовав от Девы, не ходатай ни ангел, но Ты Сам Господи воплощься, и спасе всего мя человека. Тем зову Ти, слава силе Твоей.

Запев. Разумницы от нижния мудрости бывше, набдетеле славныя от вышния стяжасте. Тем же яко рабу сию, оной премудрости покористе.

Запев. (Повторяем стих).

Слава. Любомудрии, мудрых любителе умудрити, и глаголати научитеся вси, иже словесем чудящеся, деянию испытания, и видению от онуду воздержащеся.

И ныне. Богородичен. Яко же позден дождь в последних ранен, водам вечным делатель, во чрево Твое вселися Непорочная, по временю хладну оскудевающим. Катавасия.
 

Песнь 5. Ирмос

Просвещение во тме лежащим, и спасение неначаемым Христе Спасе мой, к Тебе утренюю Царю мирныи, просвети мя сиянием си. Иного бо разве Тебе Бога не знаем.

Запев. Ты источник благодатей Своих испити весь, дал еси Человеколюбче святым, умален никако же скудостию, и мир весь напоив, иже от чресл их божествеными струями.

Запев. Что ми злато, что ми богатьство и слава и могутьство: дым расходящься по воздуху, вся обходящь пламы, вся носящь. Мне богатьство многолюбно, яже учителем троица ветующая.

Слава. Течет река наводняема, точит алчущим безсмертное брашно, жаждущим нетленное пиво, вода жива во веки, и обдержа живы поющих, вси многотекущия жизни насытитеся.

И ныне. Богородичен. Имяше крепость на ны злоба, но не в конец. Изнеможе бо по рожестве Девыя, иже крепостию силнаго, пришедша немощию плотьскою, и силнаго злобу умертвивша. Катавасия.
 

Песнь 6. Ирмос

Бездна греховная, обыде мя последняя. Но яко пророка Иону Господи, Господи возведи из истления живот мой.

Запев. Свойства в Троице трие сбогословите. Нерождение Отца, Слова рождение, Духа же исхождение единаго.

Запев. Днесь дому сему явлено спасение. Два бо и три соединеных, Христос во имя Свое четыи, посреди предста сих.

Слава. Неиспытанна на земли глубина, к небесней высоте, но от земли святыя изнесе горе небес, небесная любовь.

И ныне. Богородичен. Нов Тя источник Дево, и вину тайнам имуще трие богогласнии. Новыми прилоги ново приводят сказание. Катавасия.

Слава, и ныне. Кондак, глас 2-й. Священныя и боговещанныя проповедатели, верх учителей Твоих Господи, прият в наслаждение благих Твоих покоя. Труды бо их и болезни прият, паче всякаго приношения. Едине прославляяи святых Своих.

Икос. Кто доволен устне отверсти, и подвигнути язык, к дыхающим огнь силою Слова и Духа. Обаче толико рещи дерзаю, яко всяко преидоша человече естество трие, многими и великими благодатьми, делом и видением, обоюду светлых прешедше. Тем же великих тех сподобил еси воздании, яко верныя Своя рабы, Едине прославляяи святых Своих.
 

Песнь 7. Ирмос

Богопротивно веление, беззаконнующа мучителя, высок пламень вознесло есть. Христос же простре богочестивым детем, хлад духовныи, сыи благословен и препрославлен.

Запев. Побеждается о блаженнии, и бегает, яже прежде непостоянная ярость ересьская. Воск же тает от лица огня, инорожденно всяко веление, вашими огнедыхающими вещании, преложно является.

Запев. (Повторяем стих).

Слава. Лжу убо уклониша еллинских басней, уверением же томительство еже в человецех возлюбиша, от Него истину трие уяснивше. Сице всяк соньм верных, утвержают словесы и уверяют.

И ныне. Богородичен. В Тебе всяко проречение почи и конец прият, удивляяи глаголющих. Ис Тебе же и светлейшая, и прореченых чудеса точат Чистая, мудры являя сказатели. Катавасия.
 

Песнь 8. Ирмос

О теле злате небрегоша преславнии отроцы, неизменныи живыи Божии образ видевше, посреди пламене пояху. Осущественая пой Господа вся тварь, и превозношай Его во веки.

Запев. Познаваем благочестно, и покланяемся (поклон), равночестну Единому естеству, неприкосновенней силе. Единицу же и Троицу, яже вси сии словесы окормиша лучшими. Тако бо славити трие богословцы предаша, с ними же покланяемся Ей во веки (поклон).

Запев. (Повторяем стих).

Слава. Снидошася трие богопроповедницы, соединиша Троицу, и неразделно всем, соблюдоша Божие естество, едину от Нея приемше неразделну славу. В хвалу едину созывающия, превозносящих Ю во вся веки.

И ныне. Богородичен. Прием еже по нас, воздав Свое Благодатель, отбеже Единаго, не пострада бо Дево, боготворит же. Но в нетление тление претворяет, паче же и страждет волею. Страстию страсть решит, яко же трие отцы нас тайно водят. Катавасия.
 

Песнь 9. Ирмос

Безначалия Родителя Сын, Бог и Господь воплощься, от Девицы нам явися, омраченыя просветити, и собрати расточеныя. Тем всехвалную Богородицу величаем.

Запев с поклоном. Се ваше делание и паства, зане же велики болезни претерпесте. Во едино сошедшеся вкупе, трех вас приемше, общу имать похвалу, ваше сладкое собрание.

Запев. Не обоюду остр мечь благодать, но трегубо остр на борющих ту предлагает, един небесокованен мечь, тремя зарями наощрен присно на брань, трисияннаго Единаго Божества.

Слава. Ваше житие на небесех бяше преславнии, и плоть носяще нескверну. Иже чисто ныне живущии на земли, мы питающеся, вышняя молите, и мыслити и делати.

И ныне. Богородичен. Стесняет мя широта величии Твоих Владычице, подавляю слово отчастости, и преславно ми приходит, недоведати от благодушьства. Тем же иже толико Тя возвеличивша славим. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святых триех святителей: Василия Великаго, Григория Богослова и Иоанна Златоустаго, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги