Канон святым отцам седьмого Вселенского Собора

Русская вера, 2017

Отцы Седьмого Вселенского Собора, состоявшегося в 787 году, выступили против иконоборчества (отрицания почитания икон), восстановили иконопочитание, установили почитание икон наравне с Крестом и Евангелием. Будем молитвенно прославлять святых отцов Седьмого Вселенского Собора за их богоугодный труд по восстановлению чистоты догматического учения Церкви Христовой и просить, чтобы они просвещали наш ум светом догматов Правоверия и истинного Богопочитания. Память святым отцам Седьмого Вселенского Собора в ближайшее воскресенье к 11 октября по церковному стилю. (24 октября по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 8-й

Препрославлен еси Христе Боже наш, иже светила на земли отцы наша основавыи, и теми ко истинней вере всех нас наставил еси, Многомилостиве слава Тебе. (Дважды).

Слава, и ныне. Богородичен. Иже нас ради рождеися от Девы, и распятие претерпев Благии, испровергии смертию смерть, и воскресение явлеи яко Бог, не презри их же созда рукою Своею, яви человеколюбие Свое Милостиве, приими рождьшую Тя Богородицу молящуся за ны, и спаси Спасе наш люди согрешьшыя.
 

КАНОН, глас 8-й
 

Песнь 1. Ирмос

Вооружена фараона погрузи чюдотворяи древле, Моисейскии жезл крестообразно прорази, и раздели море, Израиля же бежаща пеша ходяща спасе, песнь Богови возсылающа.

Запев: Святии отцы, молите Бога о нас (поклон).

Песнословити седмыи Собор желающу ми ныне, седмих даждь благодать собрания Утешителя Господи, умудривша сия огнеязычно, и хульное языкобесие преставивша.

Запев. Большо от начатка число седмое, содетельства бо Божия первообразно бысть. Всяческое злобы разрушение в седмыи день ныне, и всем ересем уставление, в равночисленое собрание.

Слава. Победив богоборнаго Ария в Никеи прежде пастырьским жезлом, православно направи церковь повеленьми лик отец. И ныне вся посрами иконоборцы, яко пособник.

И ныне. Богородичен. Яко же отцы научиша благочестно исповедающе верно, девьственую утробу без болезни рождьшую с плотию Безплотнаго, кланяемся Того написующе образ, и честно лобызаем (поклон).

Катавасия: Избавите от бед рабы своя, святии отцы, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Утверждеи небеса в начатце разумом, и землю на водах основав, на камени мя Христе церковнем утверди, яко несть свят паче Тебе Человеколюбче.

Запев. Непоколебатися Христове церкви нерушиме быти, от него тайно учими божествении пастыреначальници. Сию поколебати хотящих, яко антихристовы части от благочестивых отлучиша.

Запев. Очищает от мутнаго и смраднаго потока, от источника спасенаго почерп, и жаждущия люди Христовы насыщает, учении струями отеческое собрание.

Слава. На ненавидных воистину християноглагольник стечение христолюбивых седмое, во граде светлем никейстем бысть. Ему же царие Ирина и Константин, единомудрении.

И ныне. Богородичен. Всяк да отступает нечестив, иже образа не чтет честнаго Богородицы, и Ту не проповедая Христа богомужно рождьшую, огню да отсылается сжигаемь безконечно. Катавасия.

Седален, глас 4-й. Светильницы пресветлии истины Христовы, мира просветисте учением вашим отцы богоглаголивии, погубивше ереси зловерных хулник, погасисте пламенная хулящих смущения. Тем яко святителие Христовы всех просвещаете.

Слава, и ныне. Богородичен. Дево всенепорочная, пребогатаго Бога порождьши, со безплотными Того непрестанно моли, оставление прегрешении и исправление жития дати нам прежде конца, верою и любовию поющим Тя подолгу, едина Многопетая.
 

Песнь 4. Ирмос

Ты ми Христе Господь, Ты же и сила ми, Ты ми Бог, Ты ми радование, не оставль недра отча, но милостию си нашу нищету посетив. Тем с пророком Аввакумом зову, силе Твоей слава Человеколюбче.

Запев. Глагол Божии имуще стрелу и мечь, вся купно искалают враги, образов крестных, не почитающих. Тако же изображения Христова и Богородицы, и святых всех отцы боговиднии.

Запев. Яко же седьмию труб иерихоновы стены седмым падоша обхождением. Сице седмию Соборове все ополчение на Христа возносящееся низложиша в пропасть, собранием седмым богогласных труб духовных.

Слава. Юношьское противление являя, и Божиим рвением распаляемь отеческии Собор, Илиины студныя священники умори. Тем со дерзновением Христову образу любовию покланятися повелел есть.

И ныне. Богородичен. Ты упование ми Пречистая, Ты ми пение, Ты ми пристанище, Ты ми окормление, яже Бога слова отча воплощенна не сочетанно рождьши. Тем Твоему несуменно кланяюся (поклон) образу, крепостию Твоею возмогая. Катавасия.
 

Песнь 5. Ирмос

Вскую мя отрину от лица Твоего Свете незаходяи, покрыла мя есть чужа тма окаяннаго. Но обратив мя, к свету заповедей Ти пути моя направи молютися.

Запев. Высоким разумом разсмотривше, отлучисте иконоборца яко иноплеменно мудрствующа честнии отцы. И честь Христову образу яко достойно подаяти повелесте.

Запев. (Повторяем стих).

Слава. Ныне время веселия, ныне спасения день явися. Возвеселимся сего ради, и Христови радующеся возопием, мир даждь нам Свой молитвами отец святых седмаго сонма Человеколюбче.

И ныне. Богородичен. За благоутробие милосердия, от Девы рождься Сын Божии несовратно. Чужая нося, имыи яко Своя. И зраком Своим описан видится волею, существом сыи не описан. Катавасия.
 

Песнь 6. Ирмос

Очисти мя Спасе, многа бо беззакония моя, и из глубины зол возведи мя молюся. К Тебе бо возвах и услыша мя, Боже спасения моего.

Запев. Да воскаплют горы сладость. Еретическое бо множество отгнано бысть, яд проливающих горкии. Образом святым оставления.

Запев. (Повторяем стих).

Слава. Небо и земля согласно да празднуют, Дщери Божии величество. Ибо величается, отложивши сию уничижающих.

И ныне. Богородичен. От Матере Сын Отеч без Отца, первее же без матере боголепно рождься, и породив мя. Тем Рождьшую с Рожденым вообразуя лобызаю. Катавасия.

Слава, и ныне. Кондак, глас 8-й. Апостольское проповедание, и отец учение церкви единою верою запечатле. И ризу носящи истине, исткану от вышняго богословия, исправляет и славит благочестия великое таиньство.

Икос. Высоким проповеданием Божию церковь услышим вопиющю, жаждаи да приидет ко Мне. Чашу ея же держу, чаша есть премудрости. Сие пиво истины словом растворено, воды не проливаемы пререкания, но исповедания. Юже пия нынешнии Израиль, Бога зрит вещающа, видите видите, яко Аз Сам есмь, и непременяюся. Аз Бог первыи, Аз и по сих, и паче Мене ин несть отнюд. Отсюду причащающиися насытятся, и восхвалят благочестия великое таиньство.
 

Песнь 7. Ирмос

Божия схождения огнь устыдеся в Вавилоне древле. Сего ради отроцы в пещи радованною ногою яко во свете ликоваху, поюще, благословен Бог отец наших.

Запев. Побеждаются ересей началницы повелении богоглаголивых мужей, иже честь образа Первообразному сочетавающих, и право яко же рече великии Василий благословящих Бога отец наших.

Запев. Храми украшаются светлыми образы удобряеми. Сего ради украшени в церквах, иже паче всех земных краснейшему добротою совоспевают поюще, благословен Бог отец наших.

Слава. Свет облистав, далече тме нечестивых отгнане. Сего ради всяческая света исполньшеся, светодателя Христа с веселием поют глаголюще, благословен Бог отец наших.

И ныне. Богородичен. Пречистая Владычица, нашего спасения едина надежа, страшно порождьшая Царя царем Христа, и на руку Того носящи яко младенца, и спокланяема написанно, яко же отцы рекоша. Катавасия.
 

Песнь 8. Ирмос

Седмь седмицею пещь халдейскии мучитель богочестивым люте разжже. Силою же лучшею спасеных видев, Творцу и Избавителю вопияше, дети благословите, священнии воспойте людие, и превозносите Его во веки.

Запев. Закон уставляет изящно отеческое собрание, благочестивым любезно поклонныи, и написание священнаго образа. Любочестивых же летную память яко чада совершаем благопокорива онех, и любовию икону Христову лобызаем. Поюще, дети благословите священнии, воспойте людие, и превозносите Его во веки.

Запев. Седмь седмицею прекланяху смиреных высокомудрии. И добродетелных устремлением воскращаху, ими же потворяху божественая деяния их. Но иже седмаго Собора сошедшеся ныне отцы в Никеи, гордыню тех единою исторгоша седмь седмернейше.

Слава. Стрелы младенец бывают псаломски старомудрым, младеньчество мудрствующих язвы и оранения. Божественою же силою изнемогают языцы мнози хулы глаголющих на высоту, и всяк кто Отца, Сына и Духа Бога единого невесть всех вину и единьство.

И ныне. Богородичен. Содевается младенец самовольно милости ради Содетель от чистых кровей Твоих, сохрань Тя по рожестве преочистованную всю чисту, и оскверньшиися очищает образ. Тем во иконах сообразуеттися естеством землен, Бог сый существом. Катавасия.
 

Песнь 9. Ирмос

Удивися убо о сем небо, и земли ужасошася концы, яко Бог явися человеком плотию, и чрево же Твое бысть пространнее небес. Тем Тя Богородице ангел и человек чиноначалия величаем.

Запев с поклоном. Великии в крепости и советом, иже вся содержай непостижимо, единыи Боже крепкии преначалне всех Царю, церковь утверди православием си соблюдая отец преславных мольбами, обличивших зловерных.

Запев. Великих сподобистеся почестей на земли богомудрено святии, яко Христов образ почтосте любезно. Ныне же стень отложьше и покровение плотьское, Того самолично к лицу зрите, великих сподобляеми.

Слава. Уже да накажемся все воиньством варварским безсловесием, всех Содетелю попустил еси устремление. Ты разори тех свирепство еже на ны, и христианству нашему способьствуй уповающему на Тя, благодерзновенными молитвами отец, им же совершаем память.

И ныне. Богородичен. Разумети тайны страшнаго Ти рожества николи же может землен ум, но ниже высокомысленыи ангельскии, яко Бога родила еси воплощеннаго выше естества. Тем Тя Богородицу ведуще и со онем написующе величаем. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и иже во святых и богоносных отец наших Вселенских учителей, собравшихся в Никеи второе, на потребление иконоборцев, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги