Канон святым отцам в неделю перед Рождеством Христовым

Русская вера, 2017

Ветхий Завет украшен неисчислимым сонмом святых. Бог славится во святых, а святые прославлены Богом. Великое для нас, христиан, счастье, что мы имеем возможность через молитву духовно общаться со святыми. Праведники Ветхозаветной Церкви имели непоколебимую веру в Господа, творили правду, испытывали поругания и побои, были побиваемы камнями, перепиливаемы, подвергались пыткам, испытывали узы и темницы, умирали от меча, терпели скорби и озлобление, скитались по пустыням и горам, по пещерам и ущельям земли. Будем молитвенно прославлять этих святых угодников Божиих, и за это Господь изольет на нас Свои неоскудевающие благословения, по молитвам ветхозаветных святых защитит нас от всех козней лукавого духа, сподобит нас твердо шествовать по спасительному пути. Память сим святым отцам Церковь установила в воскресенье, бываемое включительно с 18 по 24 декабря (с 31 декабря по 6 января по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 2-й

Велия веры исправления, во источнице пламенне, яко на воде покойне святии трие отроцы радовахуся. И пророк Даниил, львом пастырь яко овцам явльшеся. Тех молитвами Христе Боже помилуй нас. (Дважды).

Слава, и ныне. Богородичен. Вся паче смысла, вся преславная Твоя Богородице таиньства. Чистотою запечатленна, и девьством хранима. Мати разумеся неложна, Бога рождьши истиннаго. Того моли спастися душам нашим.
 

КАНОН, глас 6-й
 

Песнь 1. Ирмос

Волною морскою, скрывшаго древле, гонителя мучителя, под землею скрыша, спасеных дети. Но мы яко отроковица Господеви поем, славно бо прославися.

Запев: Святии отцы, молите Бога о нас (поклон).

Днесь собор божественых отец Христово рожество предпраздньствует светло. И прописует сие преславная благодать. Авраам бо образ закону, и отроцы трие были суть.

Запев. Древле приемлет Божество едино трисоставно, священный Авраам. Ныне же сопрестолное слово Отчее, божественым Духом к детем приходит, славно восхваляемо.

Запев. Числом и верою божественыя Троицы, безбожие низвергше, в пещи дети образы чювствеными, сокровенныя Божия тайны мирови проявиша.

Слава. Авраам избавися от руки неправедныя, пламене же пещнаго божествении отроцы иногда. И Даниил пророк от зверей рова спасеся. Тем же ныне рожество Христово предпразднуем.

И ныне. Богородичен. Обрадованная безневестная Мати, Дево нетленная, блажим Тя. Ибо от рода Авраамля, и племене Давыдова, процвела еси. Христа же родила еси, пророки проповеданнаго древле.

Катавасия: Избавите от бед рабы своя, святии отцы, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).
 

Песнь 3. Ирмос.

Тебе иже на водах повешьшаго землю не одержимо, тварь видевши на лобнем висяща, ужасно одержима бе. Несть свят яко же Ты Господи, взывающи.

Запев. Иже по образу славу, и по подобию Божию, верно соблюдающе, златаго образа пламень огнем духовным страдальчески угасиша отроцы. Поюще, единаго Господа знаем.

Запев. Мудростию обложени и Духа силою, отроцы, мудрецы вавилоньския пленивше посрамиша. И дерзостьне взываху, несть свят яко же Ты Господи взывающе.

Слава. Радуется и ликует с детьми и пророки закон, и пред играет Господню божественому пришествию днесь. И Авраам радуется, яко от семене его виде Господа воплощаема.

И ныне. Богородичен. Зачатие без страсти, приятие паче слова пройде, рожества Твоего Богородице. Ибо пророки проповеданное, паче естества таиньство нам явися слово Божие, сын Бог. Катавасия.

Слава, и ныне. Ипакой. Глас 8-й. Ангел детем ороси пещь, ныне же женам плачь возбраняше глаголя, что принесосте миро? Кого ищете во гробе? Воскресе Христос Бог. Есть бо Живот и Спас роду человеческому.
 

Песнь 4. Ирмос

Еже на кресте Твое божественое смирение провидя Аввакум, ужасно вопияше, Ты силных ссече державу Всеблагии. Общася адским яко Всесилен.

Запев. Отцем верховныи, Авраама Исаака и Иакова, почтем. Яко от тех семене восия Христос. Воплощься от Девы яко Всесилен.

Запев. Прописуя будущая сшествием Христовым Даниил, звери яко овца показа. Всем яве прозрев будущая, яко пророк Божии.

Слава. Греховным не привлечени ядом, от пламене избавистеся абие. Злата бо чистейше суще мудрии, в пещи лестней не опалистеся.

И ныне. Богородичен. Велегласно проповедуется чаяние языком, и спасение миру, еже паче естества рожество Твое Пречистая чистая. Его же поет отеческая память днесь. Катавасия.


Песнь 5. Ирмос.

Богоявления Ти Христе, еже к нам милостивно бывшаго, Исаиа свет видев невечернии, из нощи утренюя взывааше, воскреснут мертвии, и встанут иже во гробех. И вси иже на земли возрадуются.

Запев. Отеческое начало, яко началника закону и благодати, иже от рода Авраамля днесь Даниила божественаго почтем. Яко пророк бо Божии, провозвести Христа от Девы. И сего предьусретает божественое рождение.

Запев. Прописавше ясно, еже к нам Божие пришествие, ангеловым наитием, угасиша авраамстии отроцы пещь, и тучеросен огнь соделавше. Всем верою образа златаго славу изнуриша.

Слава. Загради уста зверем Даниил в рове Духом. Огненую же крепость угасиша авраамстии отроцы, благодатию. И спасшеся сии от тля, возвещают Христа от Девы, моляще яко Избавителя спасения нашего.

И ныне. Богородичен. Божественым Духом сказуя, еже от нас безстрастное Твое приятие, Исаиа вопияше Господи, бодрствуя законом благодати. Иже от рода убо Авраамля, от племене же Июдова по плоти, Девая без семене грядет раждающи. Катавасия.
 

Песнь 6. Ирмос.

Житейскаго моря, воздвизаема зря напастей бурею, в тихо пристанище притек вопию Ти, возведи от тля живот мой Многомилостиве.

Запев. Нрав страннолюбив, вера же высока, Авраама суща праотца. Тем же божественыя тайны прием радовашеся, пред Христом же текии ныне веселится.

Запев. Тварь повину ныне вера отроческа, даром Зиждителя. Огнь бо всеяден и безстыдныи устыдеся чтущих, огненаго Делателя Исуса Христа.

Слава. Мирское дивиее пришествием, исчитати обыче, ко смирению глубокому боголепно. Заградив уста львом Даниил пророк в рове иногда.

И ныне. Богородичен. Из ложесн родила еси девических Христа, Марие Мати безмужная. Его же пророцы видевше духовне, пред Ним ликуют отцы рожественая. Катавасия.

Слава, и ныне. Кондак, глас 6-й. Рукописаннаго образа не почетше, но не описанным существом вооружьшеся треблаженнии. В тузе огненей прославистеся, посреди же пламене непостояннаго стояще, Бога призываете. Ускори Щедрыи и потщися яко Милостив на помощь нашу, яко можеши хотяи.

Икос. Простри Свою руку, Ея же ради древле пришла искушение египтяне борющеся, и евреяне борими. Не остави нас, Да не пожрет нас смерть ждущая нас, и сатана ненавидяи нас. Но приближися нам, и пощади душа наша, яко же пощаде иногда отроки Своя, иже в Вавилоне непрестанно славящих Тя, и ввержены Тебе ради в пещь, и от сея вопиющих Ти, ускори Щедрыи и потщися яко Милостив на помощь нашу, яко можеши хотяи.
 

Песнь 7. Ирмос.

Неизреченное чюдо, иже в пещи избавивыи преподобныя отроки ис пламене, во гробе нове бездушно полагается, на спасение нам поющим, Избавителю Боже благословен еси.

Запев. Христа родив, еже по плоти верою родоначальниче отче Аврааме, явися языком Духом отец яве, во спасение нам поющим, Избавителю Боже благословен еси.

Запев. Бездушных шум, во тще восклицающи, одушевленых посрами песнь. Пещь бо огнем горящюю, плотию попирающе отроцы невредимо, Избавителю поюще, Боже благословен еси.

Слава. Видением возрев духовным, древле пророк Даниил. Христово яви Второе Пришествие, и в нем страшная провозвещает. Вопия, Избавителю Боже благословен еси.

И ныне. Богородичен. Странное чюдо, еже во пророцех словущее и отцем древле явленно, Дева чистая родити хотящи прииде. На спасение нам поющим, Избавителю Боже благословен еси. Катавасия.


Песнь 8. Ирмос.

Ужаснися и убойся небо, и да подвижатся основания земли. Се бо в мертвецех вменяется, иже в вышних живыи, во гробе мале обитает. Его же дети благословите, священнии пойте, и превозносите Его во веки.

Запев. Твое заколение пред воображая Авраам Христе, Его же роди Сына в горе повинуяся Тебе, яко же овча возведе жертву творя. Но возвратися радуяся с ним, славя и превознося Тя, Избавителя миру.

Запев. Пламенем не делателным Христе, облечену Ти яко ризою божественою, огнь святых отрок Твоих угаси зело. И роса Твоим схождением поющим шумяше. Священнии пойте, и превозносите Его во веки.

Слава. Дан бысть львом на снедь, судом неправедным, пророк Даниил. Но имяше повелением воздержание, с постники благочестно звери, во глубине ровища. Того молитвами, Авраама же и отрок, спаси в мире Христе поющыя Тя.

И ныне. Богородичен. Его же провозвестиша верно пророчестии гласи, Исуса Еммануила, в человечесте образе грядуща. Бога Отца Сына, и собезначальна Слова, от Духа Святаго, Девая Мария раждает безмужно, в Вифлееме граде. Катавасия.
 

Песнь 9. Ирмос.

Не рыдай Мене Мати моя, взирающи во гробе. Его же плотию без семене зачала еси Сына. Встану бо и славен буду, и вознесу с славою немолчно яко Бог, верою и любовию Тебе величающих.

Запев с поклоном. Иже прежде закона отец, празднество творящии, иже от них боголепно почтем Христа. Авраам бо вкупе, и Исаак и Ияков, пророком и закону явишася основание и благодати. Верою Духу проповедницы.

Запев. Иже огнем показавыи Моисеови в купине, паче ума боговидно таинство, Бог в пещь к детем сшед. Той же огнем естественым божества Его, пещныи пламень хлад показал есть.

Слава. Со Авраамом сшедшеся пресвятии дети, и Даниил дивныи пророк Божии, Исаак и Ияков, с Моисеом, и Аарон, Христови прежде рожества ликоствующе верно, молят непрестанно во еже спастися нам.

И ныне. Богородичен. Срадуется вся тварь, Твоему рожеству Девице. Ибо Едема Вифлеем отверзе нам. И се древа животнаго вси наслаждающеся верно вопием, прилежно, молитвы наша Владычице исполни. Катавасия.

Отпуст: Воскрес из мертвых Господи Исусе Христе, Сыне Божии, молитв ради пречистыя Твоея Матере, и святых отец, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги