Канон святому Иоанну Предотечи

Русская вера, 2017

Иоанн Креститель – пророк, который был прославлен Церковью и людьми в веках. Его праведность в честности, а она, как известно, – верный путь к праведной вере и вечной благодати. Молитва Иоанну Крестителю Предтече – одна из величайших в православии. В ней – любовь к Господу и праведная вера, которые дают силу и надежду каждому христианину. Она преисполнена покаяния и смирения, что ведут человека к покаянию и Божьему всепрощению.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 2-й

Память праведнику с похвалами, тебе же довлеет свидетельство Господне Предотече, явил бо ся еси воистину пророк честнейши, яко и в быстринах крестити сподобился еси проповеданнаго. Тем же и за истину пострадав, радуяся благовестил еси и во аде сущим, Бога явльшагося плотию, вземлющаго грехи мира, и подающаго нам велию милость.

Слава, и ныне. Богородичен. Вся паче смысла, вся преславная Твоя Богородице таиньства, чистотою запечатленна, и девьством хранима, Мати разумеся неложна, Бога рождьши истиннаго, Того моли спастися душям нашим.
 

Канон, глас 2-й
 

Песнь 1. Ирмос

Во глубине потопи древле, фараонитская вся воиньства, преоружена сила. Воплощьжеся Слово, преспеющыя грехи потребил есть, преславныи Господь, яко прославися.

Запев: Святыи великии Иоанне пророче и Предотече Господень, моли Бога о нас (поклон).

Крестителю и Предотече Христов, погружаемыи всегда сластьми телесными, ум мой укрепи, и волны страстей укроти, яко да в тишине божественей быв, присно славлю тя.

Запев. Недоуменным просветився просвещением, яко многосветлая звезда, мысленому востоку предтекл еси. Им же озаритися сердцу моему Крестителю моли, омраченному всеми бесовскими приложении.

Слава. В реце бездну иногда всемудре погрузив, поток содевающу благодатию всего преступления. Но молюся, потоки пребогате моих прегрешении изсуши, божественым ходатайством си.

И ныне. Богородичен. Чистыя Девы иже Бога воплотившия сродник был еси, блаженне Предотече. С Нею же тя чтем и молим, иже в небеснем храме твоем ныне живуще, храмы и нас сотвори Духу Святому.

Катавасия: Избави от бед рабы своя, снятыи великии Иоанне пророче и Предотече Господень, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

На камени мя веры утверди, разшири уста моя на враги моя. Возвеселибося дух мой воспевати, несть свята, яко же Бог наш. И несть праведна, паче Тебе Господи.

Запев. Исцели струны души моея, и ум мой омраченыи леностию, озари божественым си ходатайством, Господень Предотече, и всяких избави мя сопротивных обстоянии молюся.

Запев. Неплодьствие разрешил еси рождьшей, родився Божиим промышлением премудре пророче. Неплодное убо сердце мое, плодоносно ныне соделай ходатайством си, добродетелей приносити изращения.

Слава. Иже любовию ти создавыи божественаго храма, вышняго жития улучити моли, иже верою в храме твоем служащих. Храмы Духу Божественому сотвори, Крестителю и Предотече молитвами си.

И ныне. Богородичен. Веселяшеся Предотеча в ложеснах носим матерних, и покланяшеся Господу носиму во утробе Твоей Богорадованная. Его же моли, от всякия скорби избавити нас. Катавасия.

Седален, глас 2-й. Милосердия ради милости Блаже, спасти Свое создание Христе прииде, преклонь небеса схождением Своим. Тем же страшное смотрение Твое поюще вопием Ти, мольбами Предотечи Твоего очищение грехов подаждь нам, яко Един благоутробен.

Слава, и ныне. Богородичен. Предстательнице теплая християном, Сыну Своему молися присно Богородице, всякого злодейства и огорчения избавити нас борца. И дати нам прощение, в них же согрешихом, за милосердие щедрот, Твоими молитвами Мати Дево.
 

Песнь 4. Ирмос

Пришествовав от Девы, не ходатай ни Ангел, но Ты Сам Господи воплощься, и спасе всего мя человека. Тем вопию Ти, слава силе Твоей.

Запев. Преклоньшему небеса, и человеком примесившуся, главу преклонил еси десницею своею пребогате. Ею же мя сохрани, во смирении соблюдая сердце мое.

Запев. Пустыня тебе гражданина непроходна имяше, многоплодна бысть блаженне Предотече. Тем же вопию ти, пусту всяческих божественых деянии бывшю, душу мою сотвори плодоносну.

Запев. Закон божественыи управляя, беззаконно закалаешися. Тем же молимся ти, беззаконнующа мя всегда, и потопляема бесовьскими прельщении, исправи.

Слава. Создав сам себе храм Владыце Царю, к божественым жилищем ныне прешел еси Предотече. Их же получити моли, иже Тебе пресвятыи храм воздвигшаго.

И ныне. Богородичен. Призри на мя болящаго Всенепорочная, и разреши страсти моя лютыя, и неудобь исцельныя, яко да величаю Тя, возвеличившую все человечество. Катавасия.
 

Песнь 5. Ирмос

Просвещение во тме лежащим, и спасение неначаемым Христе Спасе мой, к Тебе утреннюю Царю мирныи, просвети мя сиянием си, иного бо разве Тебе бога не знаем.

Запев. В течениих Иорданския воды не истления Предотече крестив Христа, моли, источения страстей моих изсушити, и потоки пищныя наследовати, и праведных краснаго радования.

Запев. Уже рыдаю и сотерзаюся страхом, и недоумением всегда содержим есмь, помышляю моя деяния, и будущаго судища ужас, благоутробне Господи пощади мя, Твоего Крестителя молением.

Запев. Закон полагая людем спасеныи, в раскаянии Предотече, прегрешений бывшим, посреде закона и благодати став. Сего ради молим тя, образы покаяния нас просвети.

Слава. Даждь ми время покаяния, унынием прешедшу все, и изжившееся Благодетелю. Имея на се молящаго Тя Слове, Иоанна великаго Предотечу, и покаянию всекраснаго проповедника.

И ныне. Богородичен. Наветми и ловлении льстиваго умертвихся, Владычице всенепорочная оживи мя, рождьшая Богородице всем живот составныи, да Тя пою благочестно Всепетую. Катавасия.
 

Песнь 6. Ирмос

В бездне греховней одержимь, неизследную милосердия Твоего призываю бездну, от тли Боже мой возведи мя.

Запев. Глас Слова проповедавыи, всех гласы приимати проси, и грехов прощение даровати, иже с любовию поющим тя.

Запев. Сокрушение души моея исцели, и грехов бремя разреши, и паче надежди спаси мя, молитвами си блаженне Предотече.

Слава. Исуса Его же рукою своею крести, Предотече моли, рукою избавити мя грехи взимающа, к Вышнему руце всегда воздвизающа.

И ныне. Богородичен. Дремание леностно одержит мя, сон греховныи тяготит сердце мое, Твоим Пречистая бденным ходатайством, воздвигни и спаси мя. Катавасия.

Слава, и ныне. Кондак, глас 3-й. Неплоды днесь Христова Предотечу ражает, и той есть совершение всякаго пророчества. Его же бо пророцы проповедаша, на Том во Иордане руку положив. И явися Божию слову пророк и проповедник, вкупе и Предотеча.

Икос. Восхвалим ныне Господня Предотечу, его же священнику Елисаветь роди, из ложесн неплодныя, но не без семене. Христос бо Един вместилище пройде, не проходимо без семене. Иоанна неплоды роди. Без мужа же сего не роди. Исуса же осенением Отца и Духа Божия, Девая рода чистая. Но безсеменному явися от неплодове, пророк и проповедник вкупе и Предотеча.
 

Песнь 7. Ирмос

Богопротивно веление, беззаконнующа мучителя, высок пламень вознесло есть. Христос же простер богочестивым детем, хлад духовныи, сын благословен и препрославлен.

Запев. Корение яко секирою, твоею молитвою, посекая пострекателя страстей сердца моего, всади Предотече божественаго безстрастия страх, неразумия же моего яже к Богу, и всякия злобы отчуждая мя.

Запев. В струях Иорданских, яко крестил еси, покрывающаго водами превыспренняя Господа, Того моли, воду даровати божественаго умиления присно очима моима, славныи Предотече.

Слава. Иже миру вземлющаго грехи, Агньца Божия Предотече проповедав, Того моли от козлищ части явити мя чужда, и десным его овцам, мене счетати славне.

И ныне. Богородичен. Егда убо неплодная утроба носила Тя Дево, во утробе носившую Слово воплощенно. Его же божественым взыгранием, великии Предотеча неплодныя всесвятое прозябение познав, радуяся поклонися. Катавасия.
 

Песнь 8. Ирмос

Пещь огнена иногда в Вавилоне, детели разделяше божественым велением, халдеи опаляющи, верныя же прохлаждающи поющих, благословите вся дела Господня Господа.

Запев. Даждь десницу мне на земли лежащему, иже десницу простер Предотече, и омыл еси водами Несквернаго, и избави мя скверн телесных, всего мя очищая покаянием, и спаси мя.

Имущи душе время покаятися, лености тяжкии сон оттряси, и спешно побди, вопиющи Владыце своему, Милосерде ущедри мя, Крестителя Твоего мольбами.

Запев. Потоцы страстей, и воды злобы до души моея внидоша, блаженне Предотече, потщися скоро изяти мя, иже речными струями измыв, безстрастия тихую пучину.

Слава. Увы мне много зла сотворшему. Увы мне единому, прогневавшему Бога Преблагаго; Крестителю Христов помози ми, и подаждь прегрешением моим разрешение, и долгов ми отсечение ходатайством си.

И ныне. Богородичен. Вышняго Бога плотию Рождьшая, от гноя мя возведи страстей оскорбляющих мя, и люте всего обнищавша, и божествеными обогати мя добродетельми Пречистая, яко да пою Тя спасаем. Катавасия.
 

Песнь 9. Ирмос

Безначальна Родителя Сын, Бог и Господь, воплощься от Девицы нам явися, омрачныя просветити, и собрати расточеныя. Тем же всепетую Богородицу величаем.

Запев с поклоном. Кала мя избави греховнаго Господи, безгрешне Едине Многомилостиве, Крестителя мольбами, иже Тебе проповеда всему миру Агньца Божия, вземлющаго человеком грехи.

Запев. Яко шипок благовонен, яко благоуханныи кипарис, яко неувядаемыи крин. Яко миро честно, имею тя Господень Предотече. Моих дел злосмрадия, да избавлюся молитвами твоими, прибегая под кров твой.

Запев. Неплодьствующа мя безплодием всеблаженне, сотвори делателя добродетелей, благочадие присно приносити, чадо мя Господне творя, и причастника Божественому Царствию, и святых собор единожителя.

Слава. Нам любящим тя, и верою блажащим, и в божественем храме твоем ликующим, подаждь с небесе разрешение лютых Предотече Господень, и житию исправление.

И ныне. Богородичен. Носимому во утробе Богоматерне, иже вся носящему манием, поклонился еси пророче. С Нею же моли, смиренней спастися души моей, во многая впадающи по вся дни согрешения. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Твоея Матере, и святаго великаго пророка и Предотечи, Крестителя Господня Иоанна, и всех ради святых, помилуй и спаси нас, яко Благ и Человеколюбец. Аминь.


Обзор книги