Канон святому священномученику Аввакуму

Каноны святым, Русская вера, 2017

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й

И нравом причастник, и престолом наместник, апостолом быв. Деянии обрете богодохновенне в видениих восход. Сего ради слово истинное исправляя, и за веру пострадал еси до крове. Священномучениче Аввакуме, моли Христа Бога, спастися душам нашим.

Слава, и ныне. Богородичен. Иже от века утаенное, и Ангелом несведомое таинство, Тобою Богородице земным явися Бог в неразмесне снятии воплощаемь. И Крест волею нас ради восприим. Им же воскресив первозданнаго, и спасе от смерти душа наша.
 

Канон, глас 2-й
 

Песнь 1. Ирмос

Грядите людие поем песнь Христу Богу, раздельшему море, и проведшему люди, их же испусти из работы египетския, яко прославися.

Запев: Святыи священномучениче Аввакуме, моли Бога о нас (поклон).

Христовым светолитием просвещаемь, священномучениче славне, Аввакуме, молитвами твоими преблаженне, омрачную душю мою просвети, яко да воспеваю тя.

Запев. Просвещение спасенаго проповедания, чистому сердцу твоему, яко зерцало нескверное отче восияв, лучи всем испустил еси.

Слава. Постом своим страстная играния вся, и воздержанием желание претворил еси. И различными подвиги взятся, к безстрастней высоте.

И ныне. Богородичен. Бога из тебе воплощьшагося свемы, безсеменнаго хотения, сущаго прежде всея твари, и прежде всех век. Тем же тя сущую Богородицу воспеваем.

Катавасия: Избави от бед рабы своя, святыи священномучениче Аввакуме, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (3 раза с поклонами).
 

Песнь 3. Ирмос

Утверди нас собою Господи, древом умерщвеи прегрешения. И страх твой всади в сердца наша, яко Человеколюбец.

Запев. Всесвершену жертву живу, себе Христови принесл еси мучением. Совестию мученическою, преди пострада воздержанием.

Запев. Житие твое священно, и слово божествено. И деяния божественая приемлюще, восхождения в сердцы своем, истиннаго боговидения, его же получил еси.

Слава. Управив богоразумно преподобне ум свой, заповедьми Спасовыми, достоин явися, и вере поборник непобедимыи.

И ныне. Богородичен. От мертвости ум наш оттрясла еси, рождьши сущее безсмертие. И одежду нам изткала еси нетления Девице, рожеством Своим. Катавасия.

Седален, глас 3-й. Божиим Духом просвещен, дерзость мучительскую, дерзновением священномучениче великомудрене посрамил еси. И преплыл еси лестную пучину, и ко пристанищу божественому пристал еси. Отче преподобне, Христа Бога моли, даровати нам велию милость.

Слава, и ныне. Богородичен. Кождо идеже спасается, в правду тамо прибегает. И кое ино таково прибежище, яко Твое Богородице, покрывающее душа наша.
 

Песнь 4. Ирмос

Услышах Господи славное Твое смотрение, и прославих Милосерде непостижимую Твою силу.

Запев. Всесожжение божествено ты, и чиста жертва принесеся Спасу всех, священномучениче премудре.

Запев. Стадо Христово преподобне, наставляя к свету богоразумия, и безбожия тму отгнал еси.

Слава. Безбожия глубину, рекою твоих потов отче, яко священномученик изсушил еси.

И ныне. Богородичен. Просвети Пречистая омраченую душю мою, светом Твоим, яже Свет рождьши един составныи. Катавасия.
 

Песнь 5. Ирмос

Света подателю, и веком творче Господи, во свете Твоих повелении настави нас. Разве бо Тебе иного бога не знаем.

Запев. Богатьство и славу светлую, и долготу жизни, и живот нетленен, истинная премудрость Христос, тебе дарова блаженне, яко изрядне того возлюбльшу.

Запев. Жезлом веры отгоняеши ересем ловитвы, и союзом любве спряг стадо свое, надежею и верою сохраняеши невредно.

Слава. Отрази воздержанием пищю, накормил еси душю свою, пищю имея непрестанныя молитвы и поучение, и еже к Богу возносящее смирение.

И ныне. Богородичен. Тя заступницу Чистая, и надежу тверду и державу и покров, и стену стяжахом вси, и в Царство Небесное вводящии мост. Катавасия.
 

Песнь 6. Ирмос

В бездне греховней одержимь, не изследную милосердия Твоего призываю бездну, от тли Боже мя возведи.

Запев. Жертва и жритель быв, пожерл еси себе Богови веры ради. И соблюдаеши безсквернено тому, служительства своего свершение.

Запев. Умертвися богоглаголиве миру всему, Единому же Богу жив пребывая. Ко Христови преставися, животом нетленным обогащаемь.

Слава. Ныне в безконечную славу прешед от земли, окалянную душю мою страстьми, преподобне прилежным очищением твоея молитвы уврачуй.

И ныне. Богородичен. Вземлющаго грехи всего мира, Пречистая Христа заченши, Пренепорочная непрестай просящи, грехов прощения рабом Твоим. Катавасия.

Кондак, глас 4-й. В святителех благочестно пожив, и мучения путь прошед, идольския угасил еси жертвы, и поборник быв своему стаду богомудре. Тем же тя почитающе тайно вопием ти, от бед избави ны, присно своими мольбами отче наш, Аввакуме.

Икос. Верно любовию совокупльшеся, в память священнаго страдальца, и сего песньми восхвалим днесь, яко да благодати от него насладимся. Душы бо спасает от страстей и бед, яко мученик, и яко верен святитель, и поборник молящих его от души. Тем же вопием ему, от бед избавити ны присно своими мольбами, отче наш, Аввакуме.
 

Песнь 7. Ирмос

О теле злате на поли Деире служимем трие отроцы не радиша о безбожнем велении. Но посреди пламене ввержени, прохлажаеми пояху, благословен Бог отец наших.

Запев. Премудрости чаша явися добродетели исполнена, и созвав проповеданием высокаго жития своего стадо свое, и сие управил еси богомудре, и с ними отче взываеши, благословен Бог отец наших.

Запев. В храмы тамо сущия в жилище честно достигл еси, со ангелы водворяяся, и с ними отче ликуеши. Тем же тя чтуще преблаженне, со дерзновением зовем, благословен Бог отец наших.

Слава. Блажен еси и добро ти есть ныне водворившуся, идеже праведных воиньства. Идеже мученическая селения. Идеже премудрых апостол лицы вопиют, благословен Бог отец наших.

И ныне. Богородичен. Ты едина Богу всяческая мудростию создавшему, Мати познася не искусобрачная Дево Пречистая. Тем же Ти благочестно взывающе глаголем, благословена яже Бога плотию рождьши. Катавасия.
 

Песнь 8. Ирмос

В пещь огнену к детем еврейским сошедшаго, и пламень на хлад преложьшаго Бога, пойте вся дела Господа, и превозносите Его во веки.

Запев. Священнодействовав благочестно, Христову службу тайную словесное овча сам принесеся Ему, жертва приятна и благоугодна, всесвершаема кровию преблаженне.

Запев. Священства одежду, делы своими премудре украсив, явися целомудрию ключарь. Воздержанию пища истинная, молитвы учитель, покаянию наставник, и закон жизни.

Слава. Предложению время, покаянию плод присно предлагает, и смоковница неплодная посечением претит, душе моя проклятия убойся, восприими же Христа, благоплодие добродетельно.

И ныне. Богородичен. Непрезри заступнице страшная, глас раб Своих и от всякия беды и прещения лютаго, Дево Святая всех исхити. Прекланяет бо богоматерняя молитва Твоя. Катавасия.
 

Песнь 9. Ирмос

Иже от Бога Бога Слова, не изреченною мудростию пришедшаго обнови ти Адама, ядию тления падшаго зле, от Святыя же Девицы, неизреченно воплощаема нас ради, вернии единомудрено песньми величаем.

Запев с поклоном. Увядил еси отче различныя вражия стрелы, огнем воздержания, и чистоты углием плотьскую попалив тину, истинней тамо сущей светлости преславно сподобися.

Запев. Светоносная твоя отче восиявши память, просвещает душы благоговейно, сию свершающих досточюдне. И причастники Божия света, явлено сих свершает. Юже достойно богомудре песньми величаем.

Слава. Венец носяща тя отче, и почесть победы приимша от Божия десницы, и подвиги скончавша. И света исполньшася Божия, верующе вернии ко Христу молебника тепла тя предлагаем.

И ныне. Богородичен. Яко Богородицу Тя Девице и Матерь Слову, Ходатаицу сущую нам, присносущнаго Божия живота, и праведное солнце восиявшую нам, вернии единомудрено, песньми величаем. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе, Сыне Божии, молитв ради Пречистыя Твоея Матере, и святаго священномученика Аввакума, и всех ради святых, помилуй и спаси нас, яко Благ и Человеколюбец. Аминь.


Обзор книги