Канон Софии, Премудрости Божией

Русская вера, 2017

София — Премудрость Божия — икона, известная издревле на Руси, сводится к двум типам: Киевскому и Новгородскому. На обоих из них центральной личностью является Господь Исус Христос, как олицетворение Божественной Премудрости, о Котором в Книге Притчей Соломоновых сказано: «Премудрость построила Себе Дом, вытесала семь столбов его» (Притч. 9, 1). В этих словах премудрого Соломона содержится указание на Исуса Христа, Сына Божия, Которого св. ап. Павел именует «Божиею Премудростью» (1 Кор. 1, 30), а под словом Дом подразумевается Пресвятая Дева Мария, от Которой воплотился Сын Божий. Икона является свидетельством об исполнении этого пророчества.

Киевская икона изображает Богоматерь, окруженную архангелами. Над главой Ея — Бог Отец, а в руках — младенец Христос. Богоматерь находится под сенью, поддерживаемою семью столпами. Новгородская икона изображает Богоматерь в молитвенном стоянии перед Спасителем. Бог Отец царит над сенью, которая также на семи столпах.

Молясь канон Софии — Премудрости Божией, христианин получает благодатные дары Божии для вечного спасения души и исцеления от телесных болезней.

Тропарь, глас 4-й

Велия и неизреченная премудрости Божия сила, Софии преименитая, пречестныи храме, огнезрачныи Престоле Христа Бога нашего, в Тя бо вселися неизреченно Слово Божие, и плоть бысть, невидимыи явися, и неприкосновенныи из Тебе изыде и с человеки поживе, врага уловляя, и человеки от клятвы древния свобождая. Молимтися Владычице, отягченных нас во гресех лютых, помиловати и спасти души наши, и яко чадолюбивая и милосердая Царице, призри на люди Твоя, и умилосердися заступи от напастей и скорбей лютых, и грады наша невредимы сохрани, идеже ныне имя Твое пресвятое боголепно славящих. (Дважды).

Слава, и ныне. (Повторяем тропарь).

КАНОН, глас 4-й

Песнь 1. Ирмос

Неизреченным велением пеша пловца приял еси, и непроходимое море изсушил еси, израильтельския люди обращенныя от Египта, исходную песнь пою Тебе Господи.

Запев: Премудрость Божия София преименитая, спаси ны грешныя рабы Своя (поклон).

Аз премудрость Божия вселих рече приточник, от лица Господня мой совет и утвержение, еже есть Единородныи Сын Слово Божие. Аз рече любящия Мя люблю, и взыскающии Мене обрящут благодать.

Запев. Бог премудростию Своею землю основа, уготоваже небеса мудростию, положи облак во одеяние, и составив свет утрении, вратницы же адовы видевше тоя убояшася.

Слава. Всем сердцем взыщем премудрость Божию, от пречистыя Девы в плоть пришедшую, да не поткнутся ноги наша, и не убоимся страха нашедшаго на ны, и устремления нечестивых.

И ныне. Достойно Тя яко одушевлену небо прияша, небесная пречистая божественая селения, и предста светло украшена, яко Невеста Всенепорочная Цареви и Богу, и всей твари Владычице.

Катавасия: Сохрани от бед рабы Своя, премудрость Божия София преименитая, яко усердно к Тебе прибегаем, к милостивому Избавителю и всех Владыце Господу Исусу (поклон). Господи помилуй (трижды с поклонами).

Песнь 3. Ирмос

Утвержай гром и зиждай дух, утверди мене Господи, да пою Тя целомудрено творя волю Твою, яко несть свят яко же Бог наш.

Запев. Господь будет на всех путех наших, и утвердит ноги наша, да не поткнемся, аще стяжем премудрость Его, и обымет нас и даст главам нашим венец благословенныи.

Запев. Дар благ дает нам София премудрость Божия, и путем правым тещи наставляет нас, аще течем путем тем, не запнемся. И сохраняем себе в живот вечныи.

Слава. Егда же уныем да взыщем премудрость Божию Софию именуемую, и даст нам велию радость, и сохранит нас от всякия неприязни и покажет нам путь животныи.

И ныне. Лик богословец свыше же ангел множество, идяху к Сиону всесильным мановением достодолжно Владычице, Твоему погребению служаще, и вкупе ликующе и надгробную песнь поюще, радуися Невесто присно Девая. Катавасия.

Слава, и ныне. Ипакой, глас 8-й. Блажим Тя вси роди Богородице Дево, в Тя бо невместимыи Христос Бог наш вместитися изволи. Блажени есмы, помощницу Тя имуще. День бо и нощь молишися о нас, и державы царствия Твоими молитвами утвержаются. Тем благодаряще вопием Ти, радуися Обрадованная Господь с Тобою.

Песнь 4. Ирмос

Услышах Твое Христе смотрение преславное, яко безсмертен сыи Бог, уподобися смертным человеком. И пребысть еже бе и того ради славлю Твою силу.

Запев. Жены некия премудрость Божию взыскаша, и вослед тоя идоша, блудницы же целомудреннии быша, и тму во свет претвориша и мучителей посрамиша, и живот вечныи наследоваша.

Запев. Зело любима есть премудрость Божия, еже есть смотрения таинство всем человеком, ей же ничто же точно есть под небесем, да сохраняем ту, яко зеницу ока, и покоит нас в День Судныи.

Слава. Иже неизреченною мудростию словом составивыи всяческая Бог, еже по смотрению Софию именова, да проповемы ту на краях высоких, и тоя ради обрящем благодать и милость в День Судныи.

И ныне. В преставлении Твоем Мати Божия, пространнейшее тело Твое богоприятное, ангельская воинства священными крилы с трепетом и радостию покрываху, сице вопияху, радуися Невесто неневестная. Катавасия.

Песнь 5. Ирмос

Жалость приимет люди ненаказанныя законопреступницы июдеи, и огнь пояст супостаты Твоя Христе, яко Тя воскресша лестьца нарекоша.

Запев. Конца вселенныя и вси яже на ней и небо небесем премудрость основа, яко всех нас созда. Тою царие царствуют и сильнии держат землю, и мудрии пишут правду.

Запев. Людие земли почтите премудрость Божию Софию именуемую, во веки царствуете и живи будете. Сия бо нам исправляет путь спасения, не чтящии же тоя во дне ада обретаются.

Слава. Мерило лестно, мерзость пред Господем премудрости рачитель глаголет. Мерило же праведно приятно Ему есть, уста же благочестивых поучайтеся премудрости.

И ныне. Сосуд подобаше избранныи пением Ти удивляем Девице. Исходен весь освящен Богови, всем богоприятен и сей воистину являем Богородице всепетая. Катавасия.

Песнь 6. Ирмос

В пучине житейстей деянии моими, снидох во глубину. Но яко от кита Иона вопию Ти, из глубины зол моих возведи мя молюся Сыне Божии Слове.

Запев. Начаток премудрости стяжати веру несуменну, да тою наследим благая, не дадим сна очима, и взыщем премудрость Божию, не уклонимся ни на десно ни на шуее, да спасемся аки от тенета серна.

Запев. Очи наши да зрят премудрость Божия Матери, в ню же неизреченно Бог Слово вселися, и от тоя плоть заимовав не домысленно родися. Днесь апостольскии лик на преставление Тоя по воздуху стекается, исходную песнь поюще, благословен из Тебе рождеися Бог наш.

Слава. Почтем людие премудрость Божию, Софию именованную, да обымет нас. Пленицу грехов наших разрушит, и даст главам нашим венец, и того яко любодельная пчела попечемся, и славими всеми будем.

И ныне. Жизни бывши храм, жизнь присносущную улучила еси, смертию бо к животу преминула еси яже жизнь рождьши составную. Вопием Ти из глубины зол возведи ны, молимтися Владычице всепетая. Катавасия.

Слава, и ныне. Кондак, глас 4-й. Притецем людие и видим чюдотворную икону Пресвятыя Богоматере. Ея же именуем появлению Софию премудрость Божию, зане храм бысть одушевлен, Единороднаго Сына и Слова Божия. Сия убо светолучно сияет в пречестнем храме Своем, и сердца наша веселит приходящих с верою, и взирающих со страхом и благоговением на пречистую сию икону. Помышляюще в сердцах наших, яко воистину премудрости Божия есть селение, и таинства Его смотрение. Огнезрачная Ея зрим видение, и поклоняемся (поклон) яко истинному и пренепорочному девьству Ея в рожестве и по рожестве. Паки от Нея же изыде огнь божественыи, попаляя тленныя страсти, и просвещая душа наша и чисты сотворяя. Им же и во веки сотвори Отец, той же и мудрость слово и сила наречется, сияние славы и образ Отча ипостаси, молим убо и припадаем, облобызающе пречестную сию икону премудрости Божия Матере, и велегласно возопием: о, милосердая Владычице, спаси рабы Своя от насилия дияволя, от нахождения иноплеменнича, яко Ты еси всех благих подательница, притекающим к Тебе с верою, и просяще великия милости.

Икос. Утверди ум мой благ и помышление, Боже Отче Вседержителю. Ибо Заступницу мирови непорочную Невесту Деву воспети дерзаю. Ея же девьственую душу церковь Свою божественую нарекл еси, и воплощения ради Слова Твоего Софию премудрость Божию именовал еси, и в Тоя имя царю Устиниану церковь создати повелел еси. И преблаженному Кирилу философу по явлению Девицу избранную именем Софию, сиречь, премудрость Божию, даровал еси. Зрак лица Ея огневиден вообразил еси, от Нея же изыде огнь Божества Твоего, сиречь Единосущныи Сын Твой, попаляя страсти наша телесныя. Крыле же Той яко безплотным небесным силам даровал, венец же царскии на главу Ея возложил еси. В десницу Ея скипетр вдал еси, в шуицы же Ея недоведомая сокровенная тайна, Ея же бо непостижимо ведати и ангелом. Трости же во ушесех Ея, житие ангельско, покоище Святаго Духа Твоего являюще. Препоясание чресла Ея, старейшинство святительства. Нозе же имать на камени, яко же на нем утверди Церковь Свою. Образ же Христа Твоего главою Тоя преклонение небесем, и смотрения плотьскаго таиньства являеши, яко есть Сын прежде век Твоего Отча сияния. Той же и под леты от пренепорочныя Девы без семене родися, по всему Тоя подобию приобщися. Сего ради вопием вси, яко есть воистину премудрость Божия приятелище, и сень небесная, и всех благих Подателнице, и Покровителница притекающим к Ней с верою, и просящим велия милости.

Песнь 7. Ирмос

Юноши три в Вавилоне, веление мучителево на буйство преложиша, и посреде огня ввержени прохлаждаеми пояху, благословен еси Господи Боже отец наших.

Запев. Рука избранных удержит премудрость Божию, лучше бо есть сребра и злата на версех стен проповедуется, и во вратех силных приседит, и дерзающи глаголет: радуйтеся со мною взыскающии Мене.

Запев. Славу премудростию Божиею наследят, та бо есть долгота жития и лета жизни дарует, и мир прилагает, и вся благая исправляет, и путь жизни сохраняет нам.

Слава. Творяи правду, наследит премудрость Божию Софию именованную, яко блага, сосца ея паче вина, и воня мира ея паче всех аромат. Взыщем ту, во след ея потечем, да суд и правду дарует нам.

И ныне. Всесвященное преставление божественныя Ти и нетленныя Матере, премирная вышних сил совокуплены веселитеся с сущими на земли Тебе поющим, благословен еси Господи Боже отец наших. Катавасия.

Песнь 8. Ирмос

Всяческая Владыко, премудростию составив, землю же паки утверди, яко же веси дно, хождение постави на водах безмерных, тем же вси вопием воспевающе, благословите дела Господня непрестанно Господа.

Запев. София премудрость Божия именуемая, Самем Господем нареченная, царю Устиниану в создании чюднаго храма, ангелом откровенная, тем же вопием Ти воспевающе, благословите вся дела Господня непрестанно Господа.

Запев. Израилю повеле Господь в Силоаме скинию поткнути, и ту честно хранити, кольми паче честнейша одушевленная скиния не Веселеилом сотворенная, но Самем Богом учиненная, София нареченная. В ню же Сам Бог Слово вселися, благословите вся дела Господня непрестанно Господа.

Слава. Мысленыи виноград, храм Софии премудрости Божии, сиречь чрево пречистыя Богоматере, от Него же изыде огнь божественыи, пожигая наши душетленныя страсти. Благословите вся дела Господня непрестанно Господа.

И ныне. О, выше ума чюдес присно Девыя же и Богоматере, во гроб бо всельшися показа Рай, ему же предстояще, днесь радующеся поем и сице глаголем, благословите вся дела Господня непрестанно Господа. Катавасия.

Песнь 9. Ирмос

Тайна Божия пречистая в Тебе бывает, явьствена тайна Дево пречистая, ибо Бог из Тебе воплотися за милосердие, тем же Тя яко Богородицу величаем.

Запев с поклоном. Егда недоумевашеся царь в кое имя созиждет церковь Божию, тогда явися ангел отроку стрегущему орудия во образе каженика, глагола: кленутися во имя Софии премудрости Божии, в Ея же имя и церковь сия созиждется.

Запев. Он же видев явление радостен быв зело, и на совершение избранныя церкви Божия тщательно касается, и тоя ради вины венец премудрости облагается, и во благочестии первыи царь нарицается.

Слава. Нашего ради спасения единородныи Сын и Слово Божие храм Себе созда, в пресвятем чреве Девы Марии, и Тоя Софию именова премудрость Божию, еже есть девьственных душа. Тем же Тя яко Богородицу величаем.

И ныне. Приими от нас песнь исходную Мати Живаго Бога, и светоносною Ти и божественою благодатию осени, цареви победительная и христолюбивым людем мир, и грехов оставление, и душам подающи спасение. Тем же Тя Богородицу величаем. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятый (поклон земной). Трисвятое, и по «Отче наш». Молитва Исусова: Господи Исусе Христе, Сыне Божии, помилуй нас. Аминь. Читаем тропарь (написан в начале канона). Слава, и ныне — кондак (написан по 6-й песни канона). Господи помилуй (40 раз). Слава, и ныне.

Молитва Софии Премудрости Божией

Непостижимая и всепетая премудрость Божия София преименитая, девьственных душа. Сиречь, единородныи Сын и Слово Божие, приими молебное сие пение от недостойных и скверных уст наших. Аще и писана суть, не красна песнь во устнах грешничих, обаче же разбойник единем словом спасеся. Мытарь воздыханием оправдася, и ханааннена дщерь матерним прошением исцелися. Понеже Ты Господи Благ и Человеколюбив, грядущаго в мир просвещаеши, и грехи грешником отпущаеши, и разумом не разумных наполняеши, и буяго умудряеши, и жаждущия души благих словес учением Своим яко самаряныню водою животною напояеши. Блудника целомудрена устрояеши. Разбойнику Рай отверзаеши. Зане Ты еси всех благих податель и вразумитель, и животу хранитель, Христе Боже наш. И Тебе славу и хвалу, честь и благодарение, и славословие возсылаем, и поклонение творим, со безначальным Твоим Отцем, и с Пресвятым и Благим и Животворящим Духом, и с Пресвятою и Пренепорочною Материею Твоею Владычицею Богородицею, и присно Девою Мариею. Ныне и присно и во веки веком, аминь.

Честнейшую Херувим... Слава, и ныне. Господи помилуй (дважды), Господи благослови (с поклонами).

Отпуст: Господи Исусе Христе, Сыне Божии, молитв ради пречистыя Твоея Матере, и святыя Премудрости Божия Софии преименитыя, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги