Канон Преображению Господню

Каноны праздникам, Русская вера, 2017

Праздник Преображения Господня называют также Второй или Яблочный Спас. Этот двунадесятый праздник всегда отмечается 19 августа (6 августа по старому стилю) и имеет один день предпразднества (18 августа) и семь дней попразднества (с 20 по 26 августа). Отдание праздника совершается 26 августа. Преображение Господне всегда бывает в дни Успенского поста. Устав разрешает в этот день вкушать пищу с рыбой. В этот день верующие приносят в храм яблоки и виноград, чтобы освятить первые плоды нового урожая.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 7-й

Преобразивыися на горе Христе Боже, показав учеником Своим славу Свою, якоже можааху. Да возсияет и нам грешным свет Твой присносущныи, молитвами Богородицы, Светодавче слава Тебе.
 

Канон, глас 4-й
 

Песнь 1. Ирмос

Лицы израилевы немокреными ногами, понта чермнаго морскую глубину прошедше. Всадники тристаты враги зрящи в ней погружены, в радости пояху, поем Богу нашему, яко прославися.

Запев: Слава Господи Преображению Твоему (поклон).

Глаголы животныя другом Христос, и о божественем наказуя Царствии, рече, во Мне Отца познайте, светом яко облистая неприступным, в радости поюще, поем Богу нашему, яко прославися.

Запев. (Повторяем стих).

Слава. Силою язык облечетеся друзи и ученицы, чудни же будете в богатстве их, яко славы наполнитеся, яко явлюся светлее солнца облистая, в радости поюще, поем Богу нашему, яко прославися.

И ныне. Днесь Христос на горе Фаворстей просияв, ясно божественою зарею якоже обещася, учеником обнажая зрака. Лученосныя же наполньшеся божественыя зари, в радости пояху, поем Богу нашему, яко прославися.

Катавасия: Сохрани от бед рабы Своя Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (3 раза с поклонами).
 

Песнь 3. Ирмос

Лук сильных изнеможе, а немощнии препоясашася силою. Сего ради возвеселися о Господе сердце мое.

Запев. Во всего Адама облекся Христе, очерневшее изменив просветил еси древле естество, изменением зрака Твоего богосоделал еси.

Запев. (Повторяем стих).

Слава. Столпом огнезрачным, и облаком древле, иже в пустыни Израиля ведыи, днесь на горе Фаворстей, неизреченно во свете Христос просия.

И ныне. (Повторяем стих). Катавасия.

Слава, и ныне. Седален, глас 4-й. Человеческое пременение, еже со славою Твоею Спасе на вторем и страшнем Твоем пришествии показав, на горе Фаворстей преобразися: Илия и Моисей глаголаста с Тобою, и три от ученик спризва, и видевше славу Владыко блистания Твоего ужасошася. Иже тогда сим свет Свой осиявыи, просвети душа наша.
 

Песнь 4. Ирмос

Услышах славное смотрение Твое Христе Боже, яко родися от Девы, да от лести избавиши вопиющия Ти, слава силе Твоей Господи.

Запев. Закон в Синаи писанием воображая Христе Боже, во облаце и огни и мраце, и в вихре явился еси носим, слава силе Твоей Господи.

Запев. Да увериши славное смотрение Свое Христе Боже, яко сыи прежде век, и Той же на облаце восхождение положь, на Фаворе неизреченно просиял еси.

Слава. Соглаголюще предстояху, раболепно Тебе Владыце Христу, к ним же парою огня и мрака, и тонким хладом беседовал еси, слава силе Твоей Господи.

И ныне. Возвещаху славное Креста ради Твоего, на Фавор пришедша, иже во огни Тя и купине древле, предвиде Моисей, и взятыи на колеснице огненей Илия, Христе. Катавасия.
 

Песнь 5. Ирмос

Иже от света отгнавыи первородную пагубу, яко во свете дела поют Тя Христе Содетеля, во свете Твоем пути наша направи.

Запев. Пред лицем Ти горы уклонишася, свет бо и пред ногама, неботечныя лучи Христе Солнце прииде, зрак землен яко прияти благоволил еси.

Запев. Се Спас, вопияху Моисей и Илия учеником, на горе святей Фаворстей оглашаемым, Христос, Его же древле провозвестихом сущаго Бога.

Слава. Неизменное естество, человеческому примешься, обильно невещественаго Божества, свет изобнажив апостолом, неизреченно восия.

И ныне. Тя невещественое сияние во Отечестей славе, ученицы яко видевше восиявша Христе, Тебе вопияху, во свете Твоем пути наша направи. Катавасия.
 

Песнь 6. Ирмос

Внегда скорбети ми, возопих ко Господу, и услыша мя Бог спасения моего.

Запев. Сияния паче солнца, свет яснейшии, Спас просия на Фаворе, нас просветил есть.

Запев. (Повторяем стих).

Слава. Возшед на гору Фаворскую, преобразися Христе, и лесть всю омрачив, нас просветил еси.

И ныне. Тя Бога познавше славнии апостоли, на Фаворе же Христе удивльшеся, колени преклониша. Катавасия.

Слава, и ныне. Кондак, глас 7-й. На горе преобразися, якоже вмещаху ученицы Твои, славу Твою Христе Боже видевше. Да егда Тя узрят распинаема, страсть убо разумеют вольную, мирови же проповедят, яко Ты еси воистину Отчее сияние.

Икос. Востаните ленивии, иже всегда низу поникшии в землю, души моея помыслы, возмитеся и возвыситеся на высоту божественаго восхождения: притецем к Петру и к Зеведеовыма, и вкупе со онеми Фаворскую гору достигнем, да видим с ними славу Бога нашего, гласа же услышим, иже свыше слышаша, и проповедаша Отчее сияние.
 

Песнь 7. Ирмос

Авраамския древле в Вавилоне дети, пещныи пламень попраша, и воспевающе пояху, отец наших Боже благословен еси.

Запев. Облиставшеся светом неприступныя славы, на Фаворстей горе апостоли, Христови вопияху, отец наших Боже благословен еси.

Запев. Сиянием божественаго шума, и росодательным облаком Христе, и зарею Твоею наслаждаеми, апостоли пояху, отец наших Боже благословен еси.

Слава. В неприступне свете, яко виде Тя Петр, на Фаворстей горе облиставша Христе, возопи, отец наших Боже благословен еси.

И ныне. С начальником жизни Христом суще, дети Зеведеовы, яко испусти зрак света, возгремеша, отец наших Боже благословен еси. Катавасия.
 

Песнь 8. Ирмос

Иже в Вавилоне дети, божественою опаляеми ревностию, мучителя и пламень прещение мужески попраша, и посреди огня ввержени, орошаеми пояху, благословите вся дела Господня Господа.

Запев. Мановением вся носяи, ногама пречистыма, на гору взыде Христос, на ней же паче солнечныя лучи облиста лицем, иже закону старейшыя и благодати, показа поющия, благословите вся дела Господня Господа.

Запев. Неприступною славою, на горе явлься неизреченно Фаворстей, неодержимыи и незаходимыи Свет, Отчее сияние, тварь уяснив, человеки обожи поющия, благословите вся дела Господня Господа.

Запев. Священнолепно стояще, Моисей же и Илия на горе Фаворе, божественаго начертания ясно состав видевше Христа, во отечестей облиставша славе, воспеваху, благословите вся дела Господня Господа.

Слава. Иже во мраце божественаго ради явления, лице прославися иногда Моисеово: Христос же яко ризою светом и славою одевается. Свет бо самодетелен сыи, озаряет поющия, благословите вся дела Господня Господа.

И ныне. От светородна облака, Христа ученицы носима, зряще на Фаворе, и ницы на землю падше, ум просвещьше, со Отцем Сего пояху и Духом, благословите вся дела Господня Господа. Катавасия.
 

Песнь 9. Ирмос

Рожество Ти нетленно явися, Бог из боку Твоею пройде, плотоносец яко явися на земли, и с человеки поживе. Тем Тя Богородице вси величаем.

Запев с поклоном. Ужасни новым светолитием, внезапу ученицы освещьшеся, друг друга зряху: удивльшежеся, и к земли преклоньшеся, Тебе Владыце всех поклонишася.

Запев. Шум из облака посылашеся богогласен, извествуя чудо: Отец бо светом, Сей есть Сын возлюбленныи Мой, апостолом вопияше, Того послушайте.

Слава. Новая видевше и преславная, глас Отеческии внушивше, на Фаворе словесе слуги, от из преображения первообразнаго, Сей есть вопияху Спас наш.

И ныне. Образе непременныи сущаго, недвижима печать, неизменне Сыне, Слове, мудросте и мышце, деснице, Вышняго сило, Тя воспеваем со Отцем же и Духом. Катавасия.

Задостойник: Рожество Ти нетленно явися, Бог из боку Твоею пройде, плотоносец яко явися на земли, и с человеки поживе. Тем Тя Богородице вси величаем. (Поклон земной).

Отпуст: Преобразивыися во славу велелепную на горе Фаворстей пред ученики Своими, Господи Исусе Христе Сыне Божии, молитв ради пречистыя Твоея Матере, и святых славных и всехвальных апостол, и всех святых, помилуй и спаси нас, яко Благ и Человеколюбец. Аминь.


Обзор книги