Канон положению Ризы Господней

Русская вера, 2017

Положение честной Ризы Господа нашего Исуса Христа в Москве осуществилось в 1625 году. От этой величайшей святыни были явлены чудесные знамения над больными.

Положение Ризы Г осподней празднуем 10 июля (23 июля по гражданскому стилю).

Тропарь, глас 4-й

Днесь притецем вернии, к божественей и цельбоносней Ризе Спасителя нашего Бога, благоизволившаго сию плотию поносити, и на кресте святую Свою кровь излияти, ею же искупи нас от работы вражия. Тем благодаряще вопием Ему, спаси державу нашу и архиерея и град. И вся люди честною Своею Ризою защити. И спаси душа наша, яко Человеколюбец. (Дважды).

Слава, и ныне. (Повторяем тропарь).

 

КАНОН, глас 4-й

Песнь 1. Ирмос

Отверзу уста моя и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чюдеса.

Запев: Милостиве Господи, услыши молитву раб Своих, молящихся Тебе (поклон).

Отверзем уста человецы, и язык уясним в нарочитыи день праздника нашего, положения божественыя Ризы Христа Бога нашего светло славяще.

Запев. Сказати хотя Свою благодать Вышнии, и прият рабии образ нас ради, на уверение естества человеческаго, честную Ризу Свою верным днесь дарова.

Слава. Ризу Твою честную Христе даровал еси нам, священно ограждение. Всяко сопротивных настояние присно побеждающу, силою духовною.

И ныне. Богородичен. Воздвижена видящи, еже на кресте Твое долготерпение, рыдаше Тебе Рождьшая зовущи, како судимь видится, хотяи всем судити славе Господь.

Катавасия: Сохрани от бед рабы Своя Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (трижды с поклонами).

Песнь 3. Ирмос

Твоя певцы Богородице, живыи нетления источниче, лик Себе совокупльши духовен утверди, и в божественей Ти славе венцем славы сподоби.

Запев. Владыка сыи по существу соединився рабом плотию, и наше детельствуя различно спасение Христе, еже и ныне промышляя, Своею божественою Ризою, нам чюдодействуя.

Запев. Плотию нас ради явлеися на земли, божественыя Ризы Своея приближением, нас освятил еси, ей же поклоняющеся Христе, Тя воспеваем (поклон).

Слава. Живот составныи ныне вкуси смерти плотьския, ею же живот источил еси мертвым востанием Своим Христе. Ныне же яко животу Ходатая, Ризу Свою боготелеснаго одеяния подал еси нам.

И ныне. Богородичен. Ис Тебе Дево обновление яве явися, воистину Бог плотию раждаемь, и на крест возвышаемь, низлагая бесовы, богорадованная Владычице. Катавасия.

Слава, и ныне. Седален, глас 4-й. Сшедыи с Небесе за милосердие милости, благоутробне Спасе, плоти Своея Пресвятыя днесь божественую Ризу граду чтущему Тя, и людем христоименитым, сокровище подал еси яко твердо всеоружие. От нея же почерпающе освящение, сию верою тепле вси почитаем.

Песнь 4. Ирмос

Неизследному Божию совету, еже от Девы воплощению, Тебе Вышняго, пророк Аввакум дивяся вопияше, слава силе Твоей Господи.

Запев. Яко многоценно сокровище стяжав Христе, чтущии Тя град Москва Ризу Твою Владыко, верою облобызает, и благодать приемлет.

Запев. Видите чюдная вси людие, и духовно ныне возвеселитеся, Христа поюще, даровавшаго нам, яко многоценное богатьство, божественныя плоти Своея одеяние.

Слава. Боговидения славы древле, темно Твоих задних сподобися Моисей просив. Мы же новыи Израиль, ныне лицем в лице Твою честную Ризу Избавителя нашего видим ясно.

И ныне. Богородичен. Раздрася рукописание Адамово, копием прободену Ти Владыко, Богородица вопияаше, у креста предстоящи Господи, и болезнено восклицающи. Катавасия.

Песнь 5. Ирмос

Удивишася всяческая, о божественей славе Твоей. Ты бо браконеискусимая Девице, прият во утробе надо всеми Бога, и родила еси безлетнаго Сына, всем воспевающим Тя мир подавающа.

Запев. Просветися днесь православных сонмище, еретическии же полк да посрамится, поклоняему видя божественую Ризу Твою Владыко, плотию нам явльшагося.

Запев. Ты Владыко нам Твоим рабом даровал еси утвержение Ризу, боговочеловечения Своего, божественое ограждение, и душам спасение, и телесем исцеление.

Слава. Восплещем днесь руками, и воскликнем гласом хваления Господеви. Се бо воистину прииде и явися, вся озаряя верныя, божественыя Ризы положением.

И ныне. Богородичен. Плотию Его же родила еси Сына Богорадованная, яко виде на древе воздвижена, плачем исполнися, и долготерпению Его дивляшеся воистину. Тем же величаше Его схождение. Катавасия.

Песнь 6. Ирмос

Божественое се и всечестное совершающе празднество богомудрении Божии Матери. Приидете руками восплещем, от Нея Рождьшагося верою славяще.

Запев. Мертвым живот восия, слепым же свет пришествова, немощным люте врачевство отверзеся и всем спасение днесь приближися.

Запев. Водам Тя животекущии источник свемы Владыко, и почитаем божественую Ризу Твою, от нея же исцеления всегда вернии почерьпаем.

Слава. Странствует всяк разум, живоносныя плоти Твоея видя божественое одеяние, и просвещение источая поклоняющимся Тебе (поклон).

И ныне. Богородичен. Пристанище буди ми Всенепорочная, в пучине лютых плавающу, яже бедствующую всю тварь, рожеством Своим Богородителнице спасла еси. Катавасия.

Слава, и ныне. Кондак, глас 4-й. Одеяние нетления, спасителнаго целения, всем человеком Владыко даровал еси, Свое божественое сокровище честную Ризу, еже есть Хитон. Ею же живоносную и святую плоть вочеловечения Своего одеяти благоизволил еси. Тоя желанием приемлюще светло празднуем. Страхом же и любовию яко Благодателю воспевающе зовем Ти Христе, сохрани во смирении державу нашу и архиерея и вся люди, по велицей Своей милости.

Икос. О преславное чюдо, каково Божие дарование Русстей земли даровася, Риза ею же безгрешныи Господь одеемь, сию неблагодарнии людие от далных стран, яко дар некии в царьствующии град Москву принесоша. Тогда убо ея благоверныи царь Михаил, со отцем своим Филаретом патриархом, не яко земен дар, но яко небесную жизнь великим желанием, и со свидетельством духовным радостно прияста, и боголепным покланянием Владыце Христу Богу нашему, благодарьственая хваления воздаша, сице глаголюще: слава Ти Господи, яко премногия ради благости Твоея Русскую страну нашу назираеши. Слава Ти Владыко, яко благим сокровищем святыни Своея державу, юже дал еси нам обогащаеши. Слава Ти Святыи, яко боготелесную Свою Ризу, на спасение нам даровал еси, по велицей Своей милости.

Песнь 7. Ирмос

Непослужиша твари, богомудрении паче Зиждителя, но огненое прещение мужески поправше, радовахуся поюще. Препетыи иже отцем Господь и Бог, благословен еси.

Запев. Всяк град радуется празднуя верно с новым Сионом, царие и князи, богатии и убозии. Явльшуся днесь божественому Твоему Христе одеянию, светодательными исцелении. Чертог Божии избранныи, в честнем сем чертозе, верою Ризу Твою Владыко положену архиерейскима освященныма рукама. Юже почитаем, яко благочестивыи покров.

Запев. Обновляется всяк приступая верою, и святыи облобызая ковчег, держащии Твою Владыко Христе световидную одежду. Скверны всякия душевныя чистителна есть, Твоя Владыко Христе божественая одежда, покрывающая живоносное и пречистое тело Твое.

Слава. Священницы в правду облецытеся вси, и преподобнии возрадуйтеся светло, се бо дарова нам светилник Христос, святыя плоти Своея одежду, душам и телесем во спасение.

И ныне. Богородичен. Богородителнице Дево, Тебе чтущии град, глада и труса и озлобления всякаго спасай, и языческаго нахождения, и сопротивнаго вреда. Катавасия.

Песнь 8. Ирмос

Отроки благочестивыя в пещи, рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Совершен сыи по существу, Бог и Человек виден бысть, совершено спасая по обоему Своя воистину свойства. Яко Бог бо, Богочеловеческии образ уверяя, и божественыя плоти Своея Ризу нам, яко стену и покров даровал еси.

Запев. Вознеси рог Божии Слове, исповедающих Тя Бога и Человека, и божественей Ризе Твоей поклоняющихся (поклон), ею же исцеление всем верным даровася. И упраздни же поганьская шатания, неведущих Твоея силы божественыя.

Слава. Светится Твоя соборная и апостольская церкви, положением Ризы Твоея. Славы бо свет нам даровал еси Христе, божественыя плоти Твоея одеяние, ею же нас просвети во спасение: мы же верою и любовию ту почитаем.

И ныне. Богородичен. Видевши уснувша на древе Христа, иже всем бодрость подавающа, божественую и спасеную, Маги всенепорочная, восклицанием плакаше и взывааше: что сие новое чюдо, Оживляяи вси умирает хотя. Катавасия.

Песнь 9. Ирмос

Всяк земен да взыграется, Духом просвещаемь. Да ликоствует же безплотных умов естество, почитая святое торжество Божия Матере. И да поет, радуися преблаженная Богородице чистая присно Дево.

Запев с поклоном. Поем Богу песнь благодарную, изволившему богатство превелико нам подати, стену необориму, и неблазнено утвержение, божественыя плоти Своея одеяние, ея же чтуще вернии величаем.

Запев. О паче ума чюдес Твоих Господи, иже сотвори нам, на Тя надеющимся. Яко же бо име неизреченно рожество, тако странно всем показа, божественыя плоти Своея Ризу, ко исцелению и просвещению чтущим Тя.

Слава. Предложися ныне честная рака, держащи божественую Ризу Избавителя нашего Христа. И яко источник света, зарю исцелением испущающи, и тму недугом отгоняющи. Ея же любовию целуем.

И ныне. Богородичен. Просвети Чистая, иже любовию чтущих и величающих Тя, и разруши страсти наша. Тем Отроковице укроти бурю, и лукаваго соблазны от среды отжени, агарянская чада, Ты Богородице покори, державе нашей, молитвами си. Катавасия.

Отпуст: Благоизволивыи поносити честную, и славную и многоцелебную Ризу Свою, еже есть Хитон, и положитися ей в славном и преименитом царствующем граде Москве, Господи Исусе Христе, Сыне Божии, молитв ради пречистыя Твоея Матере, и всех святых, помилуй и спаси нас яко Благ и Человеколюбец. Аминь. Господи помилуй (трижды). Исходные поклоны.


Обзор книги