Канон святым апостолом Петру и Павлу

Каноны праздникам, Русская вера, 2017

Память святых верховных апостолов Петра и Павла — это великий праздник, совершаемый 12 июля (29 июня по старому стилю). В этот день заканчивается  Петров пост.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й

Иже апостолом первопрестольницы, и вселенней учителие, Владыку всех молите, мир вселенней даровати, и душам нашим велию милость. (2 раза).

Слава, и ныне. Богородичен. Иже от века утаенное, и Ангелом несведомое таинство, Тобою Богородице земным явися Бог в неразмесне снятии воплощаемь. И Крест волею нас ради восприим, им же воскресив первозданнаго, и спасе от смерти душа наша.
 

Канон, глас 4-й
 

Песнь 1. Ирмос

Отверзу уста моя и наполнятся Духа, и слово отрыгну Царице Матери, и явлюся светло торжествуя, и воспою радуяся тоя чудеса.

Запев: Святии славнии верховнии апостоли Петре и Павле, молите Бога о нас (поклон).

Подаждь ми Господи Пресвятаго Твоего Духа, капля дарования, слово нарочито, и возвеселюся верно похваляя, первых апостол Твоих исправления.

Запев. Оставил еси прехвальне Петре, усердно временная, и Христовым стопам последовал еси. Неверство же оставив Павле, и призвавшему тя последовал еси.

Слава. Благодать апостоли существене нашедшую вам приемше, божественаго Духа, проидосте землю всю Петре и Павле, учаще концы.

И ныне. Богородичен. Витийстии многовещаннии, и мусикийстии велегласнии языцы, Тя не могут чтити, или пети Чистая, паче человека о содеяннем на Тебе, Едина бысть божественых таин.

Катавасия: Избавите от бед рабы своя, святии славнии верховнии апостоли Петре и Павле, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (3 раза с поклонами).
 

Песнь 3. Ирмос

Твоя певцы Богородице, живыи нетления Источниче, лик Себе совокупльши духовен утверди, и в божественей Ти славе венцем славы сподоби.

Запев. Сродник Петре тебе Андрей, проявляет Месию Христа, к Нему же верою приступил еси. И ты Павле чудныи, богодетельным крещением, от Анании просветися.

Запев. Лестно иже писанием закона, падающии род израилев, просвещением благодати Петр привед, язык же стада, Павел от прелести избави.

Слава. Наги и просты, во языки послал еси Своя ученики: вместо оружия, Твое имя носяще святое, и лестную брань Христе, верою разрушиша.

И ныне. Богородичен. Исполнися, апостоли, познати Господа вся земля, иже от Девы возсиявшаго, и мира обновльша, божественым вашим проповеданием, Петре и Павле прехвальная. Катавасия.

Слава, и ныне. Ипакой, глас 5-й. Кая темница не име тебе узника; кая ли церкви не име тебе витию; Дамаск вельми мудрствует о тебе Павле, виде бо тя преодеяна светом, Рим твою кровь прием, и той играет: но Тарс множае радуется, и любит чтущи твоя пелены. Петре каменю веры, Павле похвало вселенней, от Рима сошедшеся утвердите нас.
 

Песнь 4. Ирмос

Неизследному Божию совету, еже от Девы воплощению, Тебе Вышняго, пророк Аввакум дивяся вопияше, слава силе Твоей Господи.

Запев. С крепкими убо немощнии, с витиями же невежди, соплетшеся благочестно, Петр и Павел, вземше победу Христови апостоли.

Запев. Отступника Симона волхва лютаго, яко златолюбца обличи божественыи Петр. И ныне Павел мудрыи, иже стези развращающа Христовы, Елима ослепил есть.

Слава. Невежествено рыбарь и усмарь слово имуще, но растворено божественою солию, душа любомудрых усладиша, и Христови верою приведоша.

И ныне. Богородичен. Речию богодухновенною прежде, Аввакум гору Тя часту и присенну божественыи рече, приходящаго от юга, и Тобою воплощаема Владычице, возвещая явленно. Катавасия.
 

Песнь 5. Ирмос

Удивишася всяческая, о божественей славе Твоей. Ты бо браконеискусимая Девице, прият во утробе надо всеми Бога и родила еси безлетнаго Сына, всем воспевающим Тя мир подавающа.

Запев. Яко суща тверда, Христос тя камень нарече Петре, и на тебе Церковь, ей же адова врата не одолеют. Тебе же Павле сосуд избран рече, сего понести пред языки имя.

Запев. Петр отвергся Учителя трищи, трищи еже любити обличением присвоися. Павел иже первое хулник сыи, тяжко же оскорбляя верных, послежде проповедаше, его же гоняше первее.

Слава. Нетленно звание, и славу присносущну, Петр ко Христу обрете с Павлом: ов убо ключи небесныя прием, сей же в Рай восхищься, глаголы неизреченныя навык паче человека.

И ныне. Богородичен. От божественаго Духа Исаия исполнь, рожество без Отца прорече, из Тебе Дево Рождьшагося Еммануила, иже есть с нами Бог, Его же Чистая родила еси. Тем же вси поем Тя. Катавасия.
 

Песнь 6. Ирмос

Божественое се и всечестное совершающе празднество, богомудрении Божия Матере, приидите руками восплещем, от Нея Рождьшагося верою славяще.

Запев. Светла Петрова чудеса, честна же и Павлова знамения: ибо ризы и сени их, недуги болящим исцелевают прилагаемо.

Запев. Петр воистину славныи, и Павел поистине чудныи, двоица божественая, и честнейша жилища живоначальней Троице, всеми поминается.

Слава. Болящим душа и телеса, яко божественыи врач изряден Петр исцели. Павел языки озари, и светом Господним назнамена.

И ныне. Богородичен. Пети Тя должни есмы, но воистину по достоянию не можем, тем же поем Тя молчанием, чтуще несказанное, еже на Тебе Дево содеянное таинство. Катавасия.

Слава, и ныне. Кондак, глас 2-й. Твердыя и боговещанныя проповедателя, верх ученик Твоих Господи, прият в наслаждение благих Твоих покоя. Труды бо онех и смерть прият, паче всякаго приношения, Едине сведыи сердечная.

Икос. Уясни ми язык Спасе мой, разширив ми уста, и исполнив я, умили сердце мое, да яже глаголю, последую, и яже учу, сотворю первее: всяк бо творя и уча, рече, сей велик есть, аще бо глаголя не творю, яко медь звенящая вменюся. Тем же рещи ми подобная, и творити полезная научи, Едине сведыи сердечная.
 

Песмь 7. Ирмос

Непослужиша твари, богомудрении паче Зиждителя. Но огненное прещение мужески поправше, радовахуся поюще, препетыи иже отцем Господь и Бог благословен еси.

Запев. Ублажися Петр от Христа, яко сему рекшу Сына Бога живаго. И Павел почтеся, яко сосуд благопотребен, и взываху, отцем Господь и Бог благословен еси.

Запев. Законослужебники убо Петр умудряше, якоже завещася ему, Павел же язычники: оба же благодатию Христови привождаху, и взываху, отец наших Боже благословен еси.

Слава. Яко преизряден Петр Христов пастырь, стадо прият. Церкви же Павел, учитель божествен бысть, взывающе, отец наших Боже благословен еси.

И ныне. Богородичен. Всенепорочная Марие, и изрядная святостию, яже Бога плотию Дево рождьши, неискусобрачная Чистая, Того моли, от всякаго нас избавили наведения и греха. Катавасия.
 

Песнь 8. Ирмос

Отроки благочестивыя в пещи, рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Силою укреплься Петр божественою, умершую Тавифу воскреси: Павел же Евтиха с высоты падша, и умерщвена возстави, оба взывающа, Господа воспевайте дела, и превозносите Его во веки.

Запев. Видением ужасным и чудным, Корнилия убо Петр просвети: Павел же Гаия, Криспа, и Панестия, и Стефанина крести, оба зовуще, Господа воспевайте дела, и превозносите Его во веки.

Слава. Блюдома Петра связана, Христос убо Ангелом нощию разреши. Павла же и Силу, абие молящемася, в кладе ноги твердо стягнуты изведе, и темницу потряс, темже воспоем Христа во веки.

И ныне. Богородичен. Избави страстей всепагубных, пленицы же согрешении ныне расторгни ими же кождо стяжется, вси бо согрешихом, и очищения просим, суще повиннии, еже подаждь Богородице мольбами си, превозносящим Христа во веки. Катавасия.
 

Песнь 9. Ирмос

Всяк земен да взыграется, Духом просвещаемь. Да ликовствует же безплотных умов естество, почитая святое торжество Божия Матере, и да поет, радуися Преблаженная Богородице чистая присно Дево.

Запев с поклоном. Весь всюду мир проидосте, якоже крилаты, и Евангелие коленом всем, языком и странам, Христово проповедавше, вся привлекосте к вере, Петре преблаженныи, и чудныи Павле апостоле.

Запев. Приник во глубокую старость и естества долг Петре исполняя, Учителя своего Христа подобием, крест претерпел еси. Ты же во главу твою Павле усечен быв, о, чудо страшно, вместо крове, млека источил еси потоки, и неверныя обратил еси.

Слава. О, божественая двоице, мудре вручившаяся, всего мира душам, и ко благочестию от нечестия претворше, и по смерти спасающе еще верных душа. И ныне нас помяните, и представите Христу, верховнии апостоли.

И ныне. Богородичен. Спасе благии, иже естеством Человеколюбец, и многомилосерд, препетыя Ти Матере Девыя, божествеными мольбами, Петра молитвами и Павла апостол Твоих, милость Твою и помощь с Небесе нам посли. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Твоея Матере, святых славных и всехвальных верховных апостол Петра и Павла, и всех ради святых, помилуй и спаси нас, яко Благ и Человеколюбец. Аминь.


Обзор книги