Канон Обрезанию Господню

Каноны праздникам, Русская вера, 2017

Празднование еже по плоти Обрезания Господа Бога и Спаса нашего Исуса Христа совершается 14 января (1 января по старому стилю) в память о том, что по ветхозаветной традиции на восьмой день после Своего Рожества Богомладенец был обрезан. При этом ему было наречено имя, возвещенное архангелом Гавриилом Деве Марии и Ангелом святому праведному Иосифу Обручнику — Исус.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 1-й

Иже на Престоле огнезрачнем в вышних седяи, со Отцем безначальным, и Божественым Твоим Духом, благоволив же родитися плотию от Девы неискусомужныя Исусе. Сего ради обрезася яко человек осмодневен. Слава преблагому Твоему совету. Слава благоутробию Твоему, слава еже к нам крайнему сошествию Твоему, Едине Человеколюбче.

Канон, глас 2-й
 

Песнь 1. Ирмос

Грядите людие, поем песнь Христу Богу, раздельшему море, и проведшему люди, яже испусти из работы египетския, яко прославися.

Запев: Слава Тебе Боже наш, слава Тебе (поклон).

Осмаго века нося образ будущаго, Твоею Христе просвещается и освящается вольною нищетою, в сей бо законно обрезася плотию.

Запев. (Повторяем стих).

Слава. Обрезание приемлет осмодневное Христос, Своего Рожества. И сего днесь сень опрятает, свет восияя новыя благодати.

И ныне. (Повторяем стих).

Катавасия. Сохрани от бед рабы Своя Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (3 раза с поклонами).
 

Песнь 3. Ирмос

Утверди нас Собою Господи, иже древом умерщвеи грех, и страх Твой всади в сердца наша, яко Человеколюбец.

Запев. Слово воплощься пребогатное, в восприятие закона обрезася. Исперва же божественую благодать, и жизнь нетленную нам подаде.

Запев. (Повторяем стих).

Слава. Закону исполнитель, не яко супротивен Богу сыи Христос, воплотивыися показа, и сподоби волею обрезатися осмодневно.

И ныне. (Повторяем стих). Катавасия.

Слава, и ныне. Седален, глас 4-й. Яко сыи бездна человеколюбия, одеяся Владыко в зрак рабии, и плотию обрезася, даруя всем человеком, великую Твою милость.
 

Песнь 4. Ирмос

Услышах Господи слух Твоего смотрения, и прославих Тя Едине Человеколюбче.

Запев. Обрезание преста, отнеле же Христос волею обрезася, язык множество спасая благодатию.

Запев. (Повторяем стих).

Слава. Будущую непрестанную осмаго века жизнь изображает, в ню же Владыка обрезася плотию.

И ныне. (Повторяем стих). Катавасия.
 

Песнь 5. Ирмос

Света подателю, и веком Творче Господи, во свете Твоих повелении направи нас, иного бо разве Тебе бога не знаем.

Запев. Ты от Девы Матере несказанно прошед Господи, и в человеческии не несподобися облещися образ, яко Младенец законно, закон исполнил еси.

Запев. (Повторяем стих).

Слава. Нощи уподобися, яко сень законную любящи, Израиля рождьшая, из Нея же облиставшии Свет миру, Христос явися.

И ныне. (Повторяем стих). Катавасия.
 

Песнь 6. Ирмос

Бездна согрешении обыде мя последняя, но яко из истления пророка Иону, Господи, Господи возведи живот мой.

Запев. Прият кончину закон, отнележе Христос младенствовав исполнитель закону сыи, обрезание прият, и разреши законную клятву.

Запев. (Повторяем стих).

Слава. В суботах обрезается шатание еврейское, явльшагося Христа мановением преста, испросия благодати весна.

И ныне. (Повторяем стих). Катавасия.

Слава, и ныне. Кондак, глас 3-й. Иже всяческих Господь обрезание приемлет, и человеческая прегрешения, яко Благ потребляет, дает спасение днесь миру. Радуетжеся в вышних, и Зиждителев святитель и денница, божественыи таинник Христов Василии.
 

Песнь 7. Ирмос

Телу златому премудрыя дети не послужиша, и в пламень сами поидоша, и боги их обругаша. Среди пламене возопиша, и оброси их Ангел, услышася рече уже уст ваших молитва.

Запев. Светло и пресветло Рожество Христово, и будущаго обновления подписующее таинство днесь, яко законным чином Спас обрезается: не яко Бог, но яко человек, и закону исполнение.

Запев. (Повторяем стих).

Слава. Закон исполняя, иже закону Творец, плотию днесь волею обрезается, обрезание содевая греховныя зимы, и звати даруя, благословен Бог отец наших.

И ныне. (Повторяем стих). Катавасия.
 

Песнь 8. Ирмос

Неизреченною мудростию составльшаго всяческая, Бога Слова, и от несущих в бытие приведшаго, благословите дела Господня Господа.

Запев. Во осмыи день обрезается яко младенец Владыка, Исусово же приемлет именование, яко миру есть Спас и Господь.

Запев. (Повторяем стих).

Слава. К Христову Рожеству достойно осмыи припряжеся, святителя всеславная память. Ея же почитающе верою, поем Господа, и превозносим во веки.

И ныне. (Повторяем стих). Катавасия.
 

Песнь 9. Ирмос

Яже прежде солнца светильника Бога восиявша, плотию к нам пришедша из боку Девичу,неизреченно вочеловечьшася, благословеная чистая, Тя Богородице величаем.

Запев с поклоном. Преминув пределы Христос человеческаго всего естества, паче естества от Девы раждается. И писание законное яко же повелевает, плотию обрезается, и исполнитель закону является.

Запев. (Повторяем стих).

Слава. Приидите Владыки славная Христова именования во святыни торжествуем, Исус бо боголепно наречеся днесь, с Ним же и память святителя величаем.

И ныне. (Повторяем стих). Катавасия.

Задостойник. Яже прежде солнца светильника Бога восиявша, плотию к нам пришедша из боку Девичу, неизреченно вочеловечьшася, благословеная чистая, Тя Богородице величаем. (Поклон земной).

Отпуст: Приемыи по закону осмодневное обрезание, Господи Исусе Христе Сыне Божии, молитв ради пречистыя Твоея Матере, и иже во святых отца нашего Василия Великаго, архиепископа Кесарии Каппадокийския, и всех святых, помилуй и спаси нас, яко Благ и Человеколюбец. Аминь.


Обзор книги