Канон святому мученику Внифантию

Русская вера, 2017

Святой мученик Внифантий пострадал за исповедание Христовой веры в конце III века, претерпев тяжкие страдания. Святая Церковь признает за ним благодатный дар исцелять человека от винного запоя. Память св. мученику Внифантию 19 декабря (1 января по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й

Мученик Твой Господи Внифантий, во страдании своем венец прият нетленныи, от Тебе Бога нашего. Имея бо крепость Твою непобедимую, мучащих упраздни, и разруши бесом немощная шатания. Того молитвами Христе Боже спаси душа наша. (Дважды).

Слава, и ныне. Богородичен. Иже от века утаенное, и ангелом несведомое таиньство, Тобою Богородице земным явися, Бог в неразмесне снятии воплощаемь. И крест волею нас ради восприим, им же воскресив первозданнаго, и спасе от смерти душа наша.
 

КАНОН, глас 4-й
 

Песнь 1. Ирмос

Тристаты крепкии рождеися от Девы. Безстрастия во глубине души тричастное потопи, молюся. Дати яко в тимпане во умерщвенне телеси победное пою воспевание.

Запев: Святыи мучениче Внифантие, моли Бога о нас (поклон).

Усердным помыслом, подвигом ревновав доблим страдалцем. Пострадал еси крепко. И змия умертвил еси страдании своими живоносными, страдалче Внифантие, святым ангелом собеседниче.

Запев. Видев на земли вражию лесть излиянну люте, доблии страдалче. Душу распалив желанием божественым, вшел еси в судилище небоязненым треблаженне мудрованием.

Слава. Мудростию божественою просвещаем блаженне, немудрыя враги объюродил еси. Христа возвещая, дебельством плоти уподобльшася им же явитися восхоте, Внифантие мучениче многострадальне.

И ныне. Богородичен. Гору Божию юже провиде Даниил сень мысленую, Марию чистую, славы священие. Трапезу божественыи Хлеб вмещьшую. Вси вернии единомудрено воспоем.

Катавасия: Избави от бед рабы своя, святыи мучениче Внифантие,яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Яко неплоды роди, иже от язык церкви. И многое в чадех изнеможе, соньмище. Чюдному Богу нашему поем: свят еси Господи.

Запев. Яко же возжеле славне, свободу вышнюю от госпожи работы избавляешися. Страстем честным поревновав славне, иже за милосердие раба бывшаго.

Запев. Плотьских вышьши явлься мудровании, изменением божественым внезапу, всяких прилог лютых претерпел еси радуяся, мучениче Внифантие.

Слава. Себе отверглся еси, и к подвигом и борением врага изшел еси, креста оружием укреплься. И победник быв прославися, мучениче Внифантие.

И ныне. Богородичен. Себе излия Отеческих не истощив во утробе Твоей недр пресущныи Бог, и Твой Сын бысть Всенепорочная. Спасает человечество. Катавасия.

Седален, глас 4-й. К сословию послан быв мученическому, мученик быв истинен. Пострадав по Христе крепко прехвальне. Бремя же блаженне отдан бысть верою пославшей тя, Внифантие блаженне. Но прилежно моли, прияти всем согрешением совершенное оставление.

Слава, и ныне. Богородичен. Грехолюбив сыи молю Тя, безгрешнаго Бога рождьшая, иже грехи вземлющаго миру Чистая. Многогрешную ущедрити душу мою, и грехи моя многия очистити. Грешником Сама еси очищение, и спасение верным и заступление.
 

Песнь 4. Ирмос

Любве ради Щедре Своего образа, на кресте Своем стал еси, и растаяшася языцы. Ты бо еси человеколюбче крепость моя и пение.

Запев. Ублажая страждущих терпение, подобию мучениче честных страдании. Сим уподобился еси богомудре пребогате.

Запев. Идыи верою к мученик божественому сословию блаженне, себе самого желающей бремя досточюдне богомудре отдал еси.

Слава. Очищен яко злато мучениче, язвеным горнилом чистейши явися нося Зиждителя, страстем изображение.

И ныне. Богородичен. Девством по рожестве запечатленну смотряюще Отроковице, несказанно роженнаго Слова из боку Твоею, верно величаем. Катавасия.
 

Песнь 5. Ирмос

Просвещение Твое Господи низпосли нам, и мглы нас прегрешении разреши Благии. Твой мир с Небесе даруя.

Запев. Яко светозарная восиял еси звезда от запад, и зашел еси мучениче страдания терпением, абие к западом восияеши озаряя концы.

Запев. Мученически подвизася, ногтем истерзание. Острыми мучениче тростьми сбодаем, и лукаваго жала притупил еси благодатию.

Слава. Вражия изнемогоша богомудре о тебе коварьствия, ибо еже к Богу воззрением неуклонным, плотьския раны яко же безплотен терпяше.

И ныне. Богородичен. Скверны всякия отмыи Дево души моея, вопию Ти. И спаси мя Чистая, яже истиннаго Бога Спаса на земли воплощьшая. Катавасия.
 

Песнь 6. Ирмос

Возопил, прообразуя погребение тридневно, пророк Иона в ките, Богу моляся, от тля спаси мя Исусе Царю, сыи силам.

Запев. Бием ранами плотьскими, уязвил еси безбожныя, неисцельно болящая неведением. И болящим явися врач, страдальче Внифантие.

Запев. Возвышаем к Богу блаженне пожданием подвиг, враги невидимыя разразил еси. И низверженым помощник страстотерпче был еси.

Слава. Влачим по земли яко же камень многоценен страдальче. Прелести низложил еси утвержение. Верных же сердца умножая, верою утвердил еси.

И ныне. Богородичен. Купина Тя проображаше, Всенепорочная первие, горящи и никако же опаляема, Пречистая. Ибо яко же она не опалися, Бога воплощьши. Катавасия.

Слава, и ныне. Кондак, глас 4-й. Изыде к страстотерпческим приятию мощей, и страждущих законне веры ради зря, показал еси мужески крепость свою, устремився на страсти исповеданием во Христа. И прием почесть победы твоего страдания, Внифантие, присно моли за ны.
 

Песнь 7. Ирмос

В пещи авраамския дети, персстей, любовию паче, нежели пламенем попаляеми. Вопияху: благословен Бог отец наших.

Запев. Колена не преклонив истуканным, во искушения ввержен бысть, в велику поистине мучениче пещь. В ней же орошаем благодаря Христа во веки.

Запев. Разорити крепость твоего исповедания тщася суемудреныи, во внутреняя твоя клокочущее олово немилостивно вливает. Но яве посрамися.

Слава. Посечен быв усердно в честную свою главу, врага льстиваго многокозненую главу отсекл еси, своего мужества мечем, мучениче Христов богомудре.

И ныне. Богородичен. Да гласы преподобными песнословлю Тя Отроковице, страстей мя избави мольбами Своими, бед же и скорбей, и лукавых человек, озлобити мя ищущих. Катавасия.
 

Песнь 8. Ирмос

Избавителю всех всесильне, посреде пламени веровавшая, сшед прохладил еси. И научи пети: вся дела благословите Господня Господа.

Запев. Полезное твое соделовая спасение Христос, Внифантие. Взыскающа мощей добропобедных мученик, тя укрепляет, еже верно искаше быти.

Запев. Блаженней госпожи, блаженно сокровище подадеся блаженне. Им же обогатившися пояше веселым сердцем: Господа пойте вся дела, и превозносите Его во веки.

Запев. Со тщанием славная жена воздвигши храм священен, тя в нем полагает. Сущии божественей Троице храм, страстотерпче Христов Внифантие.

Слава. Умертвився за любовь Зиждителя, умерщвяющаго страсти тлетворныя. Животворяй молитвою твоею, ясно вопиющая: вся дела благословите пойте Господа.

И ныне. Богородичен. На Тя чистую Пребожественыи сошед, яко же весть воплотися. И земленыя обожи. Поющая Дево: благословите вся дела Господня Господа. Катавасия.
 

Песнь 9. Ирмос

Евва убо недугом ослушания, клятву себе приобрела есть. Ты же Дево Богородице, прозябением прижития Твоего мирови благословение процвела еси. Тем же Тя достойно величаем.

Запев с поклоном. Видевши тя бремя священно, радовашеся. Вопиющи присно помнимая, раба послах тя блаженне. Господина истинна подъемлю, работы мя зол избавляюща. Твоими благоприятными мольбами.

Запев. Яко крин во удолиях мысленых, процвел еси мученически Внифантие. Яко финик возвысися. Яко кедр познася мироуханен. Явися яко же избранен кипарис, благоухая душа наша.

Запев. Днесь память твоя нам восия страстотерпче, яко же солнце сиянием божественых даровании, просвещающи душа поющих тя. Страстей же мглу отгоняющи, мучениче богомудре преблаженне.

Слава. Яко солнце от запад восиял еси, и восточнаго града достигл еси, идеже пострадав. И смертию зашед, к жизни восиял еси. И Рима светлаго постигнул еси, сего ограждая мольбами своими.

И ныне. Богородичен. Светом мя озари Твоим всенепорочная, иже во тме содержимаго греховней Богородице, и подаждь во дне ходити божественых повелении, Богоневесто. Яко да пою Тя Всепетую. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святаго мученика Внифантия, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги