Канон мученику (общий)

Русская вера, 2017

Великую духовную пользу получит христианин, если будет молиться каноны святым, память которых Св. Церковь вспоминает в текущий день. Для тех верующих, у кого нет канонов тем или иным святым, можно молиться данный канон мученику, подставляя в текст общего канона имя того святого, кому молишься канон. Каноны тем или иным святым можно молиться независимо от того, вспоминает ли Святая Церковь их память в данный день или нет. Если усердно молиться святым, они всегда будут нам помощниками в достижении спасения.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й

Мученик Твой Господи (имя рек), во страдании своем венец прият нетленныи, от Тебе Бога нашего. Имея бо крепость Твою непобедимую, мучащих упраздни, и разруши бесом немощная шатания. Того молитвами Христе Боже спаси душа наша. (Дважды).

Слава, и ныне. Богородичен. Иже от века утаенное, и ангелом несведомое таиньство. Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.
 

КАНОН, глас 5-й
 

Песнь 1. Ирмос

Кони и всадники в мори Чермнем сокрушаяи брани мышцею высокою, Христос истрясл есть, Израиля же спасе победную поюща.

Запев: Святыи мучениче (имя рек), моли Бога о нас (поклон).

Престолу Божию предстоя богоблаженне с дерзновением, яко страдалец непобедимь, любовию совершающих твое святое страдание, молитвами своими сохраняй.

Запев. Имея в души своей святе, воду живу пребывающу, мутныя злобныя потоки изсушил еси всеславне, благодатию Спасовою укрепляемь богоблаженне.

Слава. Силою Божиею укрепляемь богоблаженне, возможе вражия возношения сокрушити. И бысть победоносец изряден, и вышняго града гражданин.

И ныне. Богородичен. Яви милосердие Свое Госпоже пречистая, на мне окаяннем, прилежно к Сыну Своему Пресвятая молящися, да избудем огня вечнаго, Твоими молитвами.

Катавасия: Избави от бед рабы своя, святыи мучениче (имя рек), яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Утвержеи ни на чем же землю повелением си, и распространи неодержимую тяготу. На недвижимем Христе камени заповедей Твоих Церковь Свою утверди, единыи Блаже и Человеколюбче.

Запев. От кала страстей мудре удаляяся, и Богови приближаяся, божествеными чистотами; божественое прият просвещение, показающаго тя сына Свету достославне, яко дело Свету делающа.

Запев. Воиньство земное и великую славу, ни во что же вменил еси богоблаженне, тем ввоинися Христови, и ликом мученическим причтен бысть, веселяся мучениче богоносе блаженне (имя рек).

Слава. Стези шествия твоего досточюдне, направишася на путь мирен, в Царствия Божия входя, в райскую широту, и в покой вечнующии славне.

И ныне. Богородичен. Владыку и Творца всех тварей рождьши, явися Владычице чистая, Херувим и Серафим честнейши. Тем же Тя вси роди по долгу ублажаем. Катавасия.

Седален, глас 5-й. Добродетельными светлостьми просвещаемь, и мучения светом украшаемь, паче солнца премудре сияеши тверде, и просвещаеши воистину, творящих верно память твою светоносную, преславныи страстотерпче (имя рек). Покланяющихся мощем твоим спасай.

Слава, и ныне. Богородичен. Дивно чюдо зачатия, и несказанен образ рождения, на Тебе познася Чистая присно Дево. Ужасает ми ум, и удивляет ми помысл. Слава Твоя Богородице всем простреся, на спасение душам нашим.
 

Песнь 4. Ирмос

Божественое Твое разумев смотрение, дивяся Аввакум Христе, трепетно вопияше, на спасение людем си, спасти Благии Своя пришел еси.

Запев. Любовию и надежею ко Господу украшаемь премудре, мученически просветился еси преблаженне, и ангелом согражанин бысть преславне.

Запев. Бысть недвижим и непреклонен, во изгнании живыи своих си лишаемь, Владыки ради всех Бога, богоблаженне премудре.

Слава. Добре подвизався славне, добротами мученическими украшен, прейде к невидимым добротам, пожиная трудов своих почести.

И ныне. Богородичен. Иже горе со Отцем разумеваемыи, долу нас ради воплощается ис Тебе, всенепорочная Владычице, премножеством благосердия, един благии Человеколюбец. Катавасия.
 

Песнь 5. Ирмос

Одеяися светом яко и ризою, к Тебе утренюю и Тебе вопию, душу мою просвети омрачную Христе, яко милосерд.

Запев. Законы укрепляемь Вседержителевыми, советы беззаконных отразил еси, и законно пострада, нетления венец мучениче прият.

Запев. Углие льсти угасил еси премудре, кровей твоих струями. И ныне источая целебныя воды, пламень болезни отгониши Божиею благодатию.

Слава. Возмогл еси мучениче в немощи плотьстей, змия многокозненаго погубити. И сего многия прелести мудре, благодатию низвергл еси.

И ныне. Богородичен. Умертви пренепорочная Дево молю Тя, плоти моея душетленныя страсти, рождьшая плотию безстрастию источника Христа Бога. Катавасия.
 

Песнь 6. Ирмос

Волнящееся бурею душетленною, Владыко Христе, страстей моих море укроти, и из тли возведи мя яко милосерд.

Запев. Стал еси на судищи законопреступных, мучениче Христов (имя рек), и лесть всю искоренил еси. Судим бысть Христа ради, и мужемудрено обличил еси.

Запев. Украшен быв премудре мучениче Христов божествеными добротами во страдании си. Тем же тя просвети Христос, и нетленен пребысть.

Слава. Кровию землю освятил еси, небо же душею священною озарил еси преблаженне, и лики мученическия веселия исполнил еси.

И ныне. Богородичен. Научен быв Духом пророк, дверь Тя провиде. Ею же Бог пройде воплощаемь, оставль паки запечатленну Пренепорочная. Катавасия.

Слава, и ныне. Кондак, глас 2-й. Звезда светлая явися, не прелестная мирови, солнца Христа возвещающи, зарями твоими страстотерпче (имя рек), и прелесть погаси всю, нам же подаеши свет, моляся непрестанно о всех нас.

Икос. Пение ми даруй Боже мой, воспевати и глаголати, и почитати подвиги страстотерпца Твоего и мученика, яко да благосочетанно восхвалю добляго во страдании, (имя рек), победителя в страстех бывша всегда, великаго во благочестии, и в лице мученик восиявшаго. В них же поет непрестанно Христа, со множеством ангельским премудрыи, приемля свыше божественое осияние, и моля непрестанно о всех нас.
 

Песнь 7. Ирмос

Превозносимыи отцем Господь, пламень угасив, дети же прохладил есть единогласно поющыя, Боже благословен еси.

Запев. Приносяще страдалческое тело твое, народи любочестивыя, многострадалне и премудре, вопияху благодарьствено, благословен Бог отец наших.

Запев. Разорив Божиею благодатию, еллинская приношения. Разрешися блаженне соуз телесных. Мучением скончася за Христа, законно пострада.

Слава. Яко же на колесницу всел еси на кровь свою, страстотерпче достохвалне, и радуяся востече в премирная покоища.

И ныне. Богородичен. Слава всем еси Чистая и утвержение, исповедающим Тя всенепорочная Матерь Богу, прошедшему из чрева Твоего паче естества. Катавасия.
 

Песнь 8. Ирмос

Тебе Вседетелю, в пещи отроцы, всемирныи лик составльше пояху, дела всякая Господа пойте, и превозносите Его во веки.

Запев. Иеросалима вышняго наследник бысть, умер во изгнании премудре, поя непрестанно, дела всякая Господа пойте, и превозносите Его во веки.

Запев. Приложившутися печалем многим блаженне, и ныне безпечално житие прият тя, идеже зовеши, дела всякая Господа пойте, и превозносите Его во веки.

Слава. Возможе Божиею вседетелною силою, еллинския прелести, и все лукавное мудрование, мучениче погубити, и венец нетленныи от всех Владыки прияти.

И ныне. Богородичен. Плоть из Тебе Чистая восприят, всещедрое Слово, и человеком приединися. Того Пресвятая моли, плоти моея двизания умертвити, и спасти душу мою. Катавасия.
 

Песнь 9. Ирмос

Исаие ликуй, Девая бо име во чреве. Породи Сына Еммануила, Бога же и Человека, Восток имя Ему. Его же величающе, Тебе Дево ублажаем.

Запев с поклоном. Приидите сошедшеся вернии, преблаженнаго и священнаго мученика Христова (имя рек), священное торжество свершим днесь, страдалчески бо вся вражия множества, божественою силою победил есть.

Запев. Украшен бысть славне, мучения Божиими добротами, и взыде яко на огнене колеснице своею кровию веселяся. В небеса приспел еси, взирати доброту неизреченную Спаса нашего.

Слава. Воин изряден Христа Бога, и доблии показася страдалец. Тем же ныне живеши в вышнем Царствии, победным венцем увязеся преславно, страстотерпче всехвалне.

И ныне. Богородичен. Просвещение рождьши Христа сущим во тме, ослепленую душу мою просвети, и даруй ми шествовати по стезям ведущим в живот Пресвятая Наставнице всем поющым Тя. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святаго мученика (имя рек), и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги