Канон мученице (общий)

Русская вера, 2017

Великую духовную пользу получит христианин, если будет молиться каноны святым, память которых Св. Церковь вспоминает в текущий день. Для тех верующих, у кого нет канонов тем или иным святым, можно молиться данный канон мученице, подставляя в текст общего канона имя той мученицы, кому молишься канон. Каноны тем или иным святым можно молиться независимо от того, вспоминает ли Святая Церковь их память в данный день или нет. Если усердно молиться святым, они всегда будут нам помощниками в достижении спасения.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й

Агница Твоя Исусе (имя рек), зовет велиим гласом, Тебе Женише мой любящи, и ищущи стражду, и сраспинаюся и спогребаюся крещением Твоим, и стражду Тебе ради, и умираю надежду имею на Тя, яко да царьствую с Тобою, и живу у Тебе. Но яко жертву непорочну приими мя, с любовию пожершуютися. Тоя молитвами Христе Боже спаси душа наша. (Дважды).

Слава, и ныне. Богородичен. Иже от века утаенное, и ангелом несведомое таиньство. Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.
 

КАНОН, глас 8-й
 

Песнь 1. Ирмос

Поем Господеви проведшему люди Своя, сквозе Чермное море. Яко Един, славно бо прославися.

Запев: Святая мученице (имя рек), моли Бога о нас (поклон).

Влечет к пению премирная воиньства, и человеческия лики, прехвальная отроковица чюдесы своими.

Запев. Доброте вожделев прекраснаго ти сердца всехвальная, Владыка всех небеснаго чертога сподобил тя есть.

Слава. На казни и болезни, и на раны многообразныя, не устрашена мученице вместися. Поспешающю бо имаши благодать Спасову возмогающю тя.

И ныне. Богородичен. Пречистая Богородице рождьшая плотию, присносущное и преблагословенное Слово, Христа Бога, присно Девая поем Тя.

Катавасия: Избави от бед рабы своя, святая мученице (имя рек), яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Ты еси утвержение притекающим Ти Господи. Ты же свет омраченым. И поет Тя дух мой.

Запев. Явилася еси на судищи прехвальная, мужеумну имущи душу. И врага яко не храбра суща победила еси.

Запев. Порока в доброте твоей не бысть, ни скверны в души твоей. Сего ради тя Христос яко невесту, в нетленныя чертоги причта.

Слава. Исцели прехвальная души моея струпы, мученице Христова (имя рек). И утоли молитвами си живота моего молву.

И ныне. Богородичен. Тебе вси стяжахом прибежище и стену нашу христиане. Тебе славословим немолчно, Мати безневестная. Катавасия.

Седален, глас 8-й. Кровей твоих струями мученице Христова, потоки благочестия выну содеваеши прехвальная. Одождением же благодатным словесныя нивы напояеши, благодатию в них прозябаеши класы вере. Тем же преславна и по смерти явися, точащи живот мучения ради, страстотерпице прехвальная (имя рек). Моли Христа Бога, согрешением оставление даровати, чтущим любовию святую память твою.

Слава, и ныне. Богородичен. Яко Деву едину в женах, Тя без семене рождьшую Бога плотию, вси ублажаем роди человечестии. Огнь бо вселися в Тя божественыи. И яко младенца доиши Зиждителя и Господа. Тем же ангельскии собор и человеческии род, достойно славим пресвятое рожество Твое. И согласно вопием Ти, моли Христа Бога, согрешением оставление даровати, воспевающим достойно славу Твою.
 

Песнь 4. Ирмос

Услышах Господи смотрения Твоего таиньство, разумех дела Твоя, и прославих Твое Божество.

Запев. Нескверное зерцало божественых умов себе сотворши. Яко звезда прекрасная, посреди страстотерпец мученице восияла еси.

Запев. Мрачным бесом не принесла еси жертву, мученице непобедимая (имя рек). Живоносныи же возлюбила еси конец прияти благоверия ради.

Слава. Яко твердо имущи тело в страдании си, непорочная мученице. Ранами непостыдна пребысть, любве ради Божия веры.

И ныне. Богородичен. Очищение нам даруй прегрешением яко Преблаг. И умири мир Свой Боже, молитвами рождьшия Тя. Катавасия.
 

Песнь 5. Ирмос

Утренююще вопием Ти Господи спаси ны. Ты бо еси Бог наш, разве бо Тебе иного не знаем.

Запев. Дневи мира сопротивнаго разумевши, любити не восхотела еси, любоборителнаго беса.

Запев. Мнев уклонити твою божественую любовь мученице (имя рек). Смеху явися с художествы своими прелукавыи.

Слава. Подаждь ми просвещение и мир прехвалная. И разреши молитвами си, многомятежное мое нечаяние.

И ныне. Богородичен. Девою по рожестве поем Тя Богородице. Ты бо Бога Слова мирови плотию родила еси. Катавасия.
 

Песнь 6. Ирмос

Ризу ми подаждь светлу, одеяися светом яко ризою, многомилостиве Христе Боже наш.

Запев. Мужескую в женьстей плоти душевную мудрость, имущи преславная, водных зверей небрегла еси.

Запев. Победила еси мучительскую гордыню. Невреждена пребысть мученице непобедимая, и венец победы приемши.

Слава. Яко добру, и яко красну, яко честну, и яко девьства зарями сияющю, тебе Жених Господь Себе приводит преславная.

И ныне. Богородичен. Иже едина словом плотию Слова рождьшая, избави молитвами Твоими, от сетей вражиих душа наша. Катавасия.

Слава, и ныне. Кондак, глас 2-й. Храм твой всечестныи, яко цельбу душевную обретше вси вернии. И велегласно вопием ти дево мученице (имя рек), великоименитая, Христа Бога моли непрестанно о всех нас.

Икос. Уневестившуюся Христови мучением, (имя рек), сошедшеся почтем достойно, яко да тоя молитвами душетленныя пагубы избавльшеся, и губительства, труса и падежа. Житие во смирении препроводим, сподобльшеся со всеми святыми, иже от века Богу благоугодившими ходити во свете, и пети с ними. Удивил еси Спасе Своея милости, всем человеком верою хвалящим ю. Тем же зовем ей, моли непрестанно о всех нас.
 

Песнь 7. Ирмос

Иже от Июдеи дошедше отроцы в Вавилон древле, верою утвержении, пламень пещныи попраша глаголюще, отец наших Боже благословен еси.

Запев. Паче ума явишася Божия мученицы подвизания. Зиждитель бо всех, тварь повинул есть ей во страданиих зовущей, отец наших Боже благословен еси.

Запев. Хулящая мучительская уста, загражает преславная девица, и жертвы беззаконныя, Духом Святым, божествено воспевающи, отец наших Боже благословен еси.

Слава. Троица отрок преподобных, разжегших пещь древле попалиша. Ныне же мученица Живоносную Троицу поющи, слуги привлече пети, отец наших Боже благословен еси.

И ныне. Богородичен. Наше спасение яко же восхоте Спасе устроити, во чрево Девыя вселися, юже миру заступницу показа. Отец наших Боже благословен еси. Катавасия.
 

Песнь 8. Ирмос

Царя Небеснаго, Его же поют вои ангельстии, хвалите и превозносите Его во веки.

Запев. Пребогатая в женах, вышьшую благодать вместо богатьства имущи, вопияше поющи Христа во веки.

Запев. Укреплену имущи мысль, Жениховою невещественою любовию, тело свое предала еси смерти, тем живеши во веки.

Слава. Тайно Жених ко пречистей невесте в пещь пришед, духовною росою Отчим благоволением спасл есть, поющю Христа во веки.

И ныне. Богородичен. Помощи яже от Тебе требующих не презри Дево, поющих и превозносящих Христа во веки. Катавасия.
 

Песнь 9. Ирмос

Тя браконеискусимую Матерь Бога вышняго. Тя паче ума рождьшую Слово сущаго Бога, и вышьшу пречистых сил, немолчными славословении величаем.

Запев с поклоном. Избавление живоносною ти кровию, истинное знамение нетленныя жизни, тобою даровася свыше мученице преславная, и исцелением сокровище неоскудно верою почерпающим показася.

Запев. Прикоснуся тебе смерть, естеством законным богомудрая, в живоносную же мертвость безсмертно облечеся, яко души ради тело свое положивши пречестное. Тем же живеши нетленно, и послушествуют чюдеса твоя.

Слава. Яко солнечную лучю озаряющю вся. И яко невесту Христову предобру. Яко горлицу чистолюбивую, и яко маслицу. Яко кедр, яко сущую избранную голубицу хвалим тя вси, (имя рек), богоименитая.

И ныне. Богородичен. Невесто браку неискусная, сосуде благоухания, Тебе яко истинную и непорочную. И Божия света облак, приимшую небесныи дождь во чреве Твоем, Мати Дево величаем. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святыя мученицы (имя рек), и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги