Канон святой равноапостольной Марии Магдалыне

Русская вера, 2017

Святая мироносица равноапостольная Мария Магдалыня в юности вела греховную жизнь. Господь Исус Христос изгнал из нее семь бесов, после чего она стала вести праведную жизнь. Св. Мария Магдалыня присутствовала при распятии Христа, при Его погребении. Ей первой из всех людей явился Господь после Своего Воскресения, и она стала первой благовестницей Его Воскресения. Она возвещала и проповедовала о Воскресшем Христе в языческой Италии и в других странах. Великой небесной славы сподобилась эта святая угодница Божия за свою преданную любовь к Господу и за свое ревностное апостольское служение. Будем молиться св. равноапостольной Марии, имея надежду, что по ее святым молитвам Господь сподобит нас и временного благополучия, и вечного спасения. Память св. равноапостольной Марии Магдалыне 22 июля (4 августа по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 1-й

Христови иже нас ради от Девы рожденному, честная Магдалыни Марие последовала еси. Того оправдания и законы хранящи. Тем же днесь радующеся, всесвятую ти память празднуем, восхваляюще верою и любовию тя почитаем. (Дважды).

Слава, и ныне. Богородичен. Гавриилу провещавшу Ти Дево, еже радуися. И со гласом воплощашеся всех Владыка, в Тебе святем киоте, яко же рече праведныи Давыд. Явися пространнейши небес, поносивши Зиждителя Своего. Слава всельшемуся в Тя. Слава прошедшему ис Тебе. Слава свободившему нас рожеством Своим.
 

КАНОН, глас 8-й
 

Песнь 1. Ирмос

Воду прошед яко по суху, из египетска зла избежав, израильтянин вопияше, Избавителю Богу нашему поем.

Запев: Святая равноапостольная Мария Магдалыня, моли Бога о нас (поклон).

Божествеными украшена добротами, и светолитии сияющи божествеными, очерневшее ми сердце, твоими молитвами Марие озари.

Запев. Освяти тя Слово Отчее, от духов злобы, избавль яве. Ему же ученица бывши, даровании Святаго Духа исполнися.

Слава. Вод исполньшися животворных, от источника независтна, иже за милосердие на земли явльшагося Владыки, греха мутныя изсушила еси токи.

И ныне. Богородичен. Матерь иже естеством Содетеля, поем Тя Отроковице, примирившую Богови отпадшее естество человеческое, Богородителнице всенепорочная Владычице.

Катавасия: Избави от бед рабы своя, святая равноапостольная Мария Магдалыня, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Небесному кругу верхотворче Господи, и Церкви Зиждителю, Ты мене утверди в любви Своей, желанием сыи край, и верным утверждение, едине Человеколюбче.

Запев. Возлюбивши первее благим виновника, иже наше благосердно естество обоживша. Последовала еси Ему усердно Марие, Того повинувшися божественым велением.

Запев. (Повторяем стих).

Слава. Рыдающи гроба Избавителева достигла еси, первее видевши божественое отроковице воскресение. Тем же благовестница явися вопиющи: Христос востал есть, руками восплещите.

И ныне. Богородичен. Спасает мя Слово воплощьшееся Пречистая, от Твоих пречистых кровей. Богатьством благости разрешая осуждение перваго падения. Его же непрестанно моли спасти стадо Свое. Катавасия.

Седален, глас 8-й. Обнищавшему Слову премногим милосердием, Марие Магдалыни, яве яко ученица истинна послужила еси. Зрящи же Сего на кресте вознесена, и во гробе положена, рыдаше слезящи. Тем же тя почитаем, и твое совершаем верою торжество, мироносице славная. Моли Христа Бога грехов оставление подати, чтущим любовию святую память твою.

Слава, и ныне. Богородичен. Обновила еси Пречистая божественым рожеством си истлевшее страстьми земленых мертвеное существо. И воздвигла еси вся от смерти к жизни нетленней. Тем же Тя по долгу ублажаем вси, Дево препрославленая, яко же прорекла еси.
 

Песнь 4. Ирмос

Услышах Господи смотрения Твоего таиньство, разумех дела Твоя, и прославих Твое Божество.

Запев. Без смущения имыи мирьскаго суетьства мысль. Пришедшему мира всего спасти от лести, послужила еси.

Запев. Мыющися слезами, гроба животнаго достигши, ангела узрела еси возвещающа, Христово Марие воскресение.

Слава. Сердце твое непорочно, во оправданиях Христовех бысть. И Того единаго вожделела еси, краснаго добротою достославная.

И ныне. Богородичен. Дреманием лености мя сон греховныи, Отроковице постиже. Бодреною молитвою си, возстави мя к покаянию. Катавасия.
 

Песнь 5. Ирмос

Вскую мя отрину от лица Твоего Свете незаходяи, покрыла мя есть чюжа тма окаяннаго. Но обрати мя, и к свету заповедей Ти пути моя направи молютися.

Запев. Прабаба иже сию словесы прелстившаго, и изгнавша от Рая древле, зрящи ногама попираема чистых жен, нрав мужескии стяжавшими, с ними вечно радуется.

Запев. Умершаго и во гробе затворенаго, всем жизнь вдыхающаго, уязвляема любовию, сладцей Его любви приношаеши миро Магдалыни, честная Марие, и слезныя проливаеши ароматы.

Слава. По страсти божественей, по страшнем Спасове вознесении, преходиши слово всюду честное возвещающи. И многи уловляющи, прельщающыяся неведением, яко Слову ученица славная.

И ныне. Богородичен. Избавляет мя падша, к греховным многоплетеным падежем, иже из Тебе родитися благоизволивыи за безмерную милость, Пресвятая Отроковице. Его же умоли всякого вреда избавитися, верою поющим
Тя. Катавасия.
 

Песнь 6. Ирмос

Очисти мя Спасе, многа бо беззакония моя, и из глубины зол возведи мя молюся. К Тебе бо возвах и услыша мя, Боже спасения моего.

Запев. Глагол твоих орошение, печали вар отъят учеником честная. Яко же возопи, Христос востал есть, живот явися, ясное облиста солнце.

Запев. (Повторяем стих).

Слава. Се твоя светозарная память восия, просвещающи верныя, иже в ней поющыя тя, и тму отгонящи лукавых бес искушения, досточюдная.

И ныне. Богородичен. Священьство мыслено, и неприкосновенно очистилище, свещник световиден явися. И мост к Богу преводяи, исповедающыя Тя Богородицу Пренепорочная. Катавасия.

Слава, и ныне. Кондак, глас 3-й. Предстоящи преславная у креста Спасова, со инеми многими, и Матери Господни спострадающи, и слезы точащи, сие в похвалу приношаше глаголющи, что се есть странное чюдо: содержаи всю тварь пострадати изволи, слава державе Твоей Человеколюбче.

Икос. Владыка Христос и Царь созданию, не оставль Небеса сниде яко же изволи. И плоть тленную восприят волею, Его же видевши Мати непорочьная, на кресте пригвождаема, с девами честными предстоящи, и Магдалыня Мария плачющи. Той бо ту сущи, и теплейшу веру показающи присно, последоваше Христови, и гроб зряше, ожидающи и вопиющи: пострадати изволил еси, слава державе Твоей Человеколюбче.
 

Песнь 7. Ирмос

Дети еврейския в пещи, поправша пламень дерзнувше, и на росу огнь преложьше вопияху: благословен еси Господи Боже во веки.

Запев. Недуги отгнала еси различны, споспешествующаго ти Слова имущи. Ему же предстоиши ныне, вопиющи мироносице: благословен еси Господи Боже во веки.

Запев. (Повторяем стих).

Слава. Едина видела еси прежде инех живота нашего Христа воставша. Вертоградаря же Того непщевала еси вопиющи: благословен еси Господи Боже во веки.

И ныне. Богородичен. Уставила еси течение смертное, безсмертнаго Бога яко заченши, и рождьши Чистая. Ему же вси поем: благословен еси Господи Боже во веки. Катавасия.
 

Песнь 8. Ирмос

Седмь седмицею пещь, халдейскии мучитель, богочестивым люте разжже. Силою же лучшею, спасеных видев, Творцу и Избавителю вопияше: дети благословите, священнии воспойте людие, и превозносите Его во веки.

Запев. Светло явися житие твое, зарями облиста о Магдалыно, добродетелных деянии, божественая проповедания, иже к Божию мановению, и лучами еже к Зиждителю любве. Ему же поеши со ангелы: священнии пойте людие, и превозносите Его во веки.

Запев. (Повторяем стих).

Слава. У креста предстояще, зрящи неправедное славная заколение, иже Себе излиявшаго, за неизреченную милость, и стонании и слезами обливаема, что странное вопияше Марие чюдо, како умерщвяется и умирает, иже смерть умертвивыи, живот сыи естеством.

И ныне. Богородичен. Яко Божию Матерь Тя, единомудрено славим, и твари вышьши Чистая. О Тебе бо осуждение еже от Адама потребися, и отступльшее присвоися человеком существо поюще: священнии благословите людие, и превозносите Его во веки. Катавасия.
 

Песнь 9. Ирмос

Удивися убо о сем Небо, и земли ужасошася концы, яко Бог явися человеком плотию, и чрево Твое бысть пространнее небес. Тем Тя Богородице, ангел и человек чиноначалия величаем.

Запев с поклоном. К божественей приложися ныне радости, к райстей широте пространней, к мысленым и премирным обителем, идеже преподобных чинове, идеже есть глас чист светло празднующих, Марие богоносная. Тем же тя вси ублажаем.

Запев. Ничто же предпочла еси, сущих на земли паче любве Христа Бога. Но Того единаго снедаема добротами, и непременно всечестная посылаемыми лучами. Стопам Сего вопияше последующи, Тя величаю Многомилостиве.

Слава. Обожения получивши боготворная, и потока напившися благодати, и мзды болезнем приемши богоначално. И апостольским чином счетаема Магдалыни, ученице Слова, любовию чтущыя тя, твоими молитвами сохрани.

И ныне. Богородичен. Яко Мати пострадавшего за ны, душетленных страстей мя спаси. Яко милостива разреши согрешении моих пленицы. Яко блага ублажи ныне озлобленую ми душу бесовскими искушении, Дево Богородице, да пою Тя всепетую. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святой равноапостольной Марии Магдалыни, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги