Канон преподобной Марии Египетской

Русская вера, 2017

Покаянный подвиг преподобной Марии Египетской — пример того, как человек может подняться на вершину добродетели и святости из самых величайших глубин нравственного падения. В своих горячих молитвах будем просить святую угодницу Божию быть незримой помощницей в нашем покаянном делании. Тем верующим, которые в своей жизни допускали блудные грехи, услаждали или услаждают себя мыслями о блуде, особенно необходимо молиться преподобной Марии Египетской, чтобы святая умолила Господа о прощении этих очень тяжких согрешений. Память преподобной Марии Египетской 1 апреля (14 апреля по новому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 8-й

О тебе мати Мария, известен бысть спасения образ. Восприимши бо крест, последовала еси Христу. Творящи же и учащи, еже презрети плоть, преходит бо, прилежати же о души, вещи безсмертней. Тем же и со ангелы радуется преподобная дух твой. (Дважды).

Слава, и ныне. Богородичен. Иже нас ради рождеися от Девы, и распятие претерпев Благии, испровергии смертию смерть, и воскресение явль яко Бог. Не презри их же созда рукою Своею, яви человеколюбие Свое Милостиве. Приими рождьшую Тя Богородицу молящюся за ны, и спаси Спасе наш люди согрешьшия.
 

КАНОН, глас 4-й
 

Песнь 1. Ирмос

Моря Чермнаго пучину, немокрыми стопами, древле шествовав Израиль, крестообразно Моисеовыма рукама, Амаликову силу в пустыни победил есть.

Запев: Преподобная мати Марие, моли Бога о нас (поклон).

Скверну прегрешении очисти смиреныя ми души, Твоею милостию Христе. Мглу и омрачение страстем отжени, молитвами преподобныя Ти.

Запев. Страстьми плотьскими, осквернивши душевное благородие. Воздержанием паки о, честная, свой ум просветила еси, тучами слез твоих душу уяснивши.

Слава. Египта страстей отбегнула еси, яко от греховна источника, и фараона избавльшися, лютаго осквернения. Безстрастия ныне землю наследовала еси, и со ангелы ликуеши присно.

И ныне. Богородичен. Зрящи Твою икону Владычице, Богородительнице чистая, и рождьшагося Слова, от Твоея пречистыя Дево утробы, и споручницу Тя к сему, тепле просит преславная.

Катавасия: Избави от бед рабы своя, преподобная мати Марие, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Веселится о Тебе, Церкви Твоя Христе зовущи, Ты ми крепость Господи, и прибежище и утвержение.

Запев. Возсмердешася душевныя, и согнишася твоя раны, но источником слез твоих, сию омыла еси тепле.

Запев. Побеждени быша тобою, бесовьстии полцы, и страстная взыграния, слезами уранила еси.

Слава. Яко утрении облак, и яко же капля каплющи была еси, всем проливающи воды, покаяния спасенаго.

И ныне. Богородичен. Тебе Предстательницу Чистая, и спасение и крепость имущи, креста святаго древу, честная поклонилася есть. Катавасия.

Седален, глас 8-й. Взыграния вся плотьская обуздавши, болезньми воздержательными. Мужествено показала еси, души твоея мудрование. Крест бо Господень возжелевши узрети, себе приснопамятная, мирови распяла еси, отнуду же и ко рвению ангельскаго жития, усердно воздвигла еси себе преблаженная, Марие преславная. Моли Христа Бога, грехов оставление подати, чтущим любовию святую память твою.

Слава, и ныне. Богородичен. Яко Деву едину в женах Тя, без семене рождьшую Бога плотию, вси блажим роди человечестии. Огнь бо вселися в Тя божественыи, и яко младенца доиши Зиждителя и Господа. Тем же ангельскии и человеческии род, достойно славим пресвятое рожество Твое, и согласно вопием Ти, моли Христа Бога, согрешением оставление даровати, воспевающим достойно славу Твою.
 

Песнь 4. Ирмос

Воздвижена Тя, видевши Церкви на кресте, Солнца праведнаго, ста в чину своем, достойно взывающи, слава силе Твоей Господи.

Запев. Удалилася еси бежавши яже в мире, и сладких всех. Едина же Единому чисто беседовала еси, крайним воздержанием, и терпением дел твоих.

Запев. Телесная движения и разжжения, воздержанием поистине изсушила еси. Отнуду же душу украсила еси, Марие всеславная, божествеными видении и детельми.

Слава. Добродетельною ти силою, слезами и постом крайним, молитвою же и варом, зимою и наготою, приятелище бысть Святаго Духа честно.

И ныне. Богородичен. К Твоей иконе прибегши, и из Тебе рожденаго Марие Дево. Тобою ныне обрете жизнь безсмертную, в Рай ликующи. Катавасия.
 

Песнь 5. Ирмос

Ты Господи ми свет, в мир пришел еси. Свет святыи, обращая из мрачна неведения, верою воспевающия Тя.

Запев. Вслед Христа последовала еси радующися, носящи крест свой на раме Марие, и бесы уранила еси.

Запев. Показала еси нам покаяния лечбу, показала еси и стезю ведущую, паки к жизни негиблющей.

Слава. Ты буди ми честная, заступница непобедима, и избави страстей мя, болезни же всякоя, мольбами си ко Господу.

И ныне. Богородичен. На Твою Владычице чистая икону взираше, Тебе всегда молящися, страстей нападания, преподобная посрамляше. Катавасия.
 

Песнь 6. Ирмос

Пожру Ти со гласом хваления Господи, Церкви вопиет Ти. От бесовския крове очищьшися, милостию от ребр истекшею Ти кровию.

Запев. Потом греховную скверну омыла еси. К нетленней же славе, своею мыслию сматряющи, ныне обрела еси благоплодие, болезнем своим славная.

Запев. Всем грешником Марие, житие твое образ показася. Иже без меры согрешьшим в житии востати, и скверну очистити слезами.

Слава. Ущедри смиреную ми душу Человеколюбче, ея же оскверних дея нечистая хотения плоти моея, но ты мя преподобная молитвами помилуй.

И ныне. Богородичен. Всею твоею душею и сердцем, возлюбила еси иже от Девы рожденнаго, Бога Слова живаго и воплощенна, иже глас тебе преподобная принесша. Катавасия.

Слава, и ныне. Кондак, глас 4-й. Греховныя мглы отбегши, и покаяния светом озаривши свое сердце славная, приступила еси ко Христу. Сего пренепорочную и святую Матерь, ходатаицу милостивну приведши. От онуду же и согрешением обрете отложение, и со ангелы присно радуешися.

Икос. Змия иже древле во Едеме запеньшаго Евве, прелестию древа, низвергла еси в ров, древом крестным славная Марие, и отбегши сласти, чистоту возжелела еси. Отнуду же и с девами сподобися, внутрь чертога внити твоего Владыки, с сими насладитися достойно. Того убо прилежно моли, яко да многим грехом, разрешение подаст, и Своея жизни нас сподобит, со ангелы присно радоватися.
 

Песнь 7. Ирмос

В пещи авраамския си дети персидстей, любовию благоверия паче, нежели пламенем опаляеми взываху, благословен еси в Церкви славы Твоея Господи.

Запев. Скорбную и тесную шествовавши стезю яве, добротою добродетелей, уяснивши душу. Небесную достигла еси жизнь некончаемую, идеже свет безконечныи есть Христос.

Запев. Иже в мире поправши временная вся. Ныне ликуеши, со всеми воиньствы ангельскими воспевающи, благословен еси в Церкви славы Твоей Господи.

Слава. Коварьства вражия, и оружия оскудевше вся, крепким постом, и молитвою твоею преподобная и слезами. И ныне убо отгонятся, и страстей настояние, Марие честная.

И ныне. Богородичен. Неискусобрачно, яже Бога бесплотна порождьши воистину, и Дева пребывши поистинне. Твоею силою всечестная, отгна страстем и бесом воиньства. Катавасия.
 

Песнь 8. Ирмос

Руце распростер Даниил, Львова зияния в рове затче. Огненую же силу угасиша, добродетелию поясавшеся, иже благочестия любители отроцы взывающе, благословите вся дела Господня Господа.

Запев. Весь сиянием добродетелию озаривши ум, Марие славная, Богови беседовавши. Плоть бо истнивши постом мнозем. И помыслом благочестивым, пояше радующися, благословите вся дела Господня Господа.

Запев. Креста знамением себе оградивши, иорданьския ногама не мокреныма своима, воды преплувши Марие верно. И небеснаго Христа хлебу и крови Его причащьшися, ныне отпущаеши рабу Свою рекла еси.

Слава. Священник божественыи Зосима, таинник благодати, быстрину яко виде ти иорданскую славная, пришедшу немокреныма ногама, страхом и трепетом одержимь быв, радуяся пояше, благословите вся дела Господня Господа.

И ныне. Богородичен. Тобою Пренескверная, тлю и скверну всю оттрясе. И облечеся Владычице в ризу безсмертну. И Тобою Твоему Сыну преподобная вопияше, благословите вся дела Господня Господа. Катавасия.
 

Песнь 9. Ирмос

Камень нерукосечныя горы, от несекомыя Тя Девицы, краеугольный отсечеся Христос, совокупив разстоящаяся естества. Тем веселящеся, Тя Богородице величаем.

Запев с поклоном. Ныне нетленною, и божественою воистину пищею насыщаема. И светом наслаждающися мысленым и невечерним, в небесных селех, идеже ангельстии чинове, о нас Бога молят.

Запев. Славы текущия и тленныя же, возгнушася Марие, славу и жизнь наследова блаженную. Христа моли, о свершающих твою всесвятую память всегда.

Слава. Виждь ми скорбь преподобная, и стонание сердечное, виждь тесноту жизни моея. Спаси мя от греха моего, и душу мою ущедри, твоими ходатайствы ко Господу.

И ныне. Богородичен. Владычице чистая Богородице, грешником спасение, приими мольбу сию, избави мя от грех моих. Твоему Сыну прибегающа, молитвами преподобныя Ти. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и преподобныя матери Марии египтяныни, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги