Канон чудотворцам и безсребреникам Козме и Дамиану

Русская вера, 2017

Святые Козма и Дамиан (братья по плоти) жили в III веке по Р. X. в Малой Азии. Ведя праведную и непорочную жизнь, они были также искусными врачами и стяжали от Господа дар — силою молитв исцелять душевные и телесные болезни людей и лечить животных. За свой труд они никогда не брали платы, и поэтому их называют бессребрениками. Церковь Христова признает за святыми Козмой и Дамианом благодатный дар исцеления недугов человеческих, а также почитает их небесными покровителями нерушимости христианской семьи. Святые бессребреники издревле почитаются на Руси.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 8-й

Святая безсребреника и чудотворца Козмо и Дамиане, посетита нас в болезнех наших, туне прияста, туне и дадита. (Дважды).

Слава, и ныне. Богородичен. Иже нас ради рождеися от Девы, и распятие претерпев Благии, испровергии смертию смерть, и воскресение явль яко Бог, не презри их же созда рукою Своею, яви человеколюбие Свое Милостиве, приими рождьшую Тя Богородицу молящуюся за ны, и спаси Спасе наш люди согрешшыя.
 

Канон, глас 6-й
 

Песнь 1. Ирмос

Яко по суху ходив Израиль, по бездне стопами, гонителя фараона видя потопляема, Богу победную песнь, поем вопияше.

Запев: Святая чудотворца и безсребреника Козмо и Дамиане, молита Бога о нас (поклон).

Озаряема славою божественою, богосветлая безсребреника, озаряета наша душа, разоряюще страстную мглу, яко да ваю верою почитаем.

Запев. Тля творящих очищьшася первее страстей, болезней приложением. Очищаета нам лютыя недуги мудрая, и болезни душевныя облегчаета.

Запев. От всех Владыки дар прияста святая чудес дарования, нам исцелита многия и неудобь исцельныя плоти страсти, молимся.

Слава. Моление безсребреника и врача Богови принесита, яко да избавит ны искушении и скорбей многих, и трепетнаго и страшнаго тогда мучения.

И ныне. Богородичен. Закон естественых кроме рождьши Чистая, законодателя Исуса Избавителя. Его же моли избавити нас Богородице, многих беззаконии наших.

Катавасия: Избавита от бед рабы своя, святая чудотворца и безсребреника Козмо и Дамиане, яко вси по Бозе к вам прибегаем, вы бо молита о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Несть свят яко же Ты Господи Боже мой, вознесыи рог верных си Блаже, и утверждь их на камени исповедания Ти.

Запев. Мир поет ваша святая, всегда многая благодеяния и чудес множество, чудотворца и врача, Ангел всех равностоятеля.

Запев. Ваю обою светодателе молим, звезды на высоте лежащая церкве тайно, Козмо и Дамиане, сердца верных озарита.

Запев. Капли источающе присно святая исцеления, омыйта всех душевную скверну. И страстныя плоти токи вся уставита.

Слава. Се совокупившеся людие святая от всюду, ваю воспети великия дары, внутрь церкве ваю. Но всех моления исполнита.

И ныне. Богородичен. Святая Владычице чистая, Пресвятое Слово воплотившая словом, безсловесных мя страстей, поюща Тя благочестно божествеными словесы, избави Пренепорочная. Катавасия.

Седален, глас 8-й. От источника бездны Исуса, чудес струя, благолепно почерпша святая. Тайными тучами, страстей мрачныя облаки отгониста. И недугующим человеком исцеления подаста. Тем получивше здраваго веселия ваю преславная, удивляеми зовем. Богоносная безсребреника, молите Христа Бога, согрешением оставление даровати. Празднующим любовию святую память ваю.

Слава, и ныне. Богородичен. Яко всенепорочная Невесто Творцу, яко неискусомужная Мати Избавителя, приятелище яко сущи Утешителя препетая. Беззакония мя суща скверное обителище, и бесом игралище в разуме бывша. Потщися, и от тех злодействия мя избави, и светлое жилище добродетелей соверши. Светоносная нетленная, отжени облак страстей, и вышняго причастия сподоби, и света невечерняго, молитвами си.
 

Песнь 4. Ирмос

Христос мне сила, Бог и Господь, честная Церкви боголепно зовет вопиющи, от совести чисты о Господе празднующи.

Запев. Божественое рождие воистину благоплодно, винограда божественаго, тайное вино искапающе, в веселии мудрая безсребреника ублажим.

Запев. Оружие явистася устреляющо враги невидимыя. Их же и нас стрел избавите, заступающа наш живот, мудрая безсребреника.

Запев. Несть человек иже кто не стяжа благая ваю молитвеника ко Христу, святая безсребреника. Его же молите, огня вечнаго нас избавити.

Слава. Ваю блаженная иже призывает, и на земли и в мори, бед всяких отпущается. Тем избавита нас сопротивнаго обстояния.

И ныне. Богородичен. Вселився Господь Чистая посреде Тебе, вместилище святое, источник многих являет исцелении, и очищение страстей, Богородице присно Дево. Катавасия.
 

Песнь 5. Ирмос

Божиим светом Ти Блаже, утреннюющих Ти душа любовию просвети молюся, Тя ведети Слово Божие, Истиннаго Бога, от мрака греховнаго изимающа.

Запев. Божественое привлекоша просвещение, сияние источника все усердно возлюбиста. И просвещаета нас всегда, чудес зарями великоименитая.

Запев. Красно супружение суще мудрая, бразды возделавша душ богознамении присно, пожинающа страсти яко же плевелы, и здравия клас сторичьствующа.

Запев. Вжиляема крепостию Христовою, в злобе сильнаго всю крепость погубиста. Его же мучительства нас избавита, неусыпная предстателя наша безсребреника.

Слава. Шестовати стези нас правы, и творити волю Божию укрепита святая, уставляюща страсти сердец наших, и телесем недуги облегчевающа.

И ныне. Богородичен. Избави мя Владычице благая искушении врага, и геены мучения, и обдержащаго мя пленения. И не посрами мене песнословяща Тя. Катавасия.
 

Песнь 6. Ирмос

Житейскаго моря воздвизаема зря напастей бурею, в тихо пристанище притек вопию Ти, возведи от тли живот мой, Многомилостиве.

Запев. Живуща мученика радостно на Небесех, в честныи храм ваш приити потщитася, и наша недуги телесныя, и сердечныя страсти исцелита.

Запев. В божественое благолепие одеявшася красно, яко в сугубицу святая, наги нас суща добродетелей, божествено одейте, и страстей безчестия ныне обнажита.

Запев. Яко украшением чудес одеяна всегда, спасителя мирови явистася. Мирскаго убо вреда вся ны избавита святая, и страстей нечестия и мучения.

Слава. Умертвивша святая страсти вся плоти смертоносныя благодатию, животворными чудес приложеньми, оживляета страждущая, и врат смерти избавляета.

И ныне. Богородичен. Не опалив утробы Твоея огнь сыи Исус, из Тебе плотию произходит. Сего Чистая моли, огня и всяких мук избавити, верою воспевающих Тя. Катавасия.

Слава, и ныне. Кондак, глас 2-й. Благодать приемша исцелением, простираета здравие бедующим врача и чудотворца славная. Но ваю посещением и супостатом шатания низложита, мир исцеляюща чудесы.

Икос. Всякаго разума и мудрости преходит слово мудрую врачу, и всем разум подаюта, Вышняго бо благодать приемша, невидимо здравие даруюта всем. Отнюду же и моей повести благодать даровася пети, яко богоносная угодника Христова и служителя, исцелении множество подающая, болезни бо всех избавляюща, мир исцеляюта чудесы.
 

Песнь 7. Ирмос

Хладодательну убо пещь сотвори Ангел, преподобным детем, халдеи же опали велением Божиим. Мучителя увеща вопити, благословен Бог отец наших.

Запев. Впериста ум на небесная, добрых приложении, и быста общника божественых даров. Крилата суща орла, всю проходита землю, чудодействующа присно.

Запев. Просветистася яко же добросиянно безсребреника злато, божественою благодатию исцеления обогатиста множества. Тем ущедрита нас обуреваемых, лютых нахождении искушеньми.

Запев. Преложивша Господеви чисты ваша духа безсребреника, дар от Него прияста, нечистыя духи прогонити всегда. Их же злобы горькия избавита всех нас.

Слава. Уснуста праведным должным сном, мудрая безсребреника, и неусыпная молитвеника еста верным. Тем душ наших присно и телес лютыя страсти успита.

И ныне. Богородичен. Молящи не престай Человеколюбца Бога нашего Всенепорочная, яко да приимем всеконечне отпущение злых. И получим на Небесех, уготованных благ любящим Его. Катавасия.
 

Песнь 8. Ирмос

Из пламени святым росу источи, а праведнаго жертву и воду попали. Вся бо твориши Христе елика хощеши. Тем Тя превозносим Господа во веки.

Запев. Недугом всяческим суща ратника, пособием Божественаго Духа святая. Утолита наших душ недугования, и телес облегчита болезни.

Запев. Видителя Господня ныне красоты сущи воистину, присещайта сего краснаго богоносная храма вашего, и источник чудес многих совершайта.

Запев. От источника райска, исходяще яко реце две, все напояета лице земли, исцелении струями, недуг изсушающа тучи.

Запев. Блаженных надеждь приимше, от всех достойно блажитеся, яко исполнителе блаженнии Бога нашего, божественых хотении безсребреницы явльшеся.

Слава. Врачеве неисцельных страстей безсребреницы, неисцельныя страсти наша исцелита. И искушении бурю утолита, и уныния разженита облаки.

И ныне. Троичен. Со Ангелы святыми песнословим Отца и Слово и Духа Святаго, едино в трех начертаниих Божество, едино Царство и едину Власть. Катавасия.
 

Песнь 9. Ирмос

Бога человеком неудобь видети, Нань же не смеют чини ангельстии зрети. Тобою бо Пречистая явися нам Слово воплощенно. Его же величающе, с небесными вои, Тя величаем.

Запев с поклоном. Сей храм ваш чудесы всеблаголепно яко звездами светлыми украшается, и согласно веселяся всегда блажит, и честную вашу память празднует благочестно, честная безсребреника.

Запев. Яко свет, яко два велика солнца, разумную твердь украшаета безсребреника. И знамения зарями просвещаета всех верных сердца. Тем зовем, разрешита тму страстей наших, молимся.

Запев. В села вышняя вселяема святая, посреде нас быти невидимо милосердуйта, иже посреде божественаго храма вашего, песни возсылающих Вседержителю, и блажащих прилежно ваю всехвальная.

Слава. Земля с вышними веселится, в светлыи божественыи праздник ваш святая. Иже совершающих нас избавите тмы и болезней и всякия тесноты, и еже во аде лютаго, мудрая, мучения.

И ныне. Богородичен. Трепетное рождение имущи Всечистая, в страшныи день испытания молюся, страшнаго ответа избави мя, и спасаемых стояния причастника сотвори верно поюща Тя Богорадованная. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Твоея Матере, и святых чудотворцев и безсребреников Козмы и Дамиана, и всех ради святых, помилуй и спаси нас, яко Благ и Человеколюбец. Аминь.


Обзор книги