Канон преподобному Касиану Римлянину

Русская вера, 2017

Преподобный Иоанн Касиан Римлянин жил в IV–V веках. Очень много он написал бесед на духовные темы, в которых касался цели христианской жизни, борьбы с грехами, толкования Св. Писания, христианских добродетелей и т. д. Молясь канон святому угоднику Божию, будем призывать его на помощь, как для просвещения своего ума духовным познанием, так и для достижения вечного спасения. Память преподобному Касиану Римлянину 29 февраля (13 марта по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 8-й

О тебе отче Касиане известен бысть спасения образ. Восприим бо крест последовал еси Христу. Творяше же и учаше, еже презрети плоть, преходит бо, прилежати же о души вещи безсмертней. Тем же и со ангелы радуется преподобне дух твой. (Дважды).

Слава, и ныне. Богородичен. Иже нас ради рождеися от Девы, и распятие претерпев Благии, испровергии смертию смерть, и воскресение явль яко Бог. Не презри их же созда рукою Своею, яви человеколюбие Свое Милостиве. Приими рождьшую Тя Богородицу молящюся за ны, и спаси Спасе наш люди согрешьшыя.
 

КАНОН, глас 2-й
 

Песнь 1. Ирмос

Во глубине потопи древле, фараонитская вся воиньства, преоружена сила воплощьжеся Слово, преспеющыя грехи потребил есть. Преславныи Господь, яко прославися.

Запев: Преподобне отче Касиане, моли Бога о нас (поклон).

Венчав божествеными добродетельми, преподобне житие свое Касиане, к Богу отшел еси. От Него же нам проси, избавление согрешением молимся, творящим святое твое преставление.

Запев. Всеобразным мановением к Богу достославне, от страстных помышлении уклонился еси. И свет был еси, причастии невеществеными обожаемь препрославленаго Господа поя, тебе прославльшаго.

Слава. Врач был еси душам, божествеными своими учении Касиане. Услаждая помышления инокующих благодатию, и к жизни наставил еси. Сего ради тя вси любовию почитаем.

И ныне. Богородичен. Во чреве носившую Чистая вси свемы. Бога бо в плоть мертвеную облекшася паче ума родила еси, просветившаго преподобных сословие, препрославленаго Господа. Славно бо прославися.

Катавасия: Избави от бед рабы своя, преподобне отче Касиане, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Процвела есть пустыня яко крин Господи, языческа неплодящая церкви пришествием Ти. О ней же утвердися мое сердце.

Запев. Звезду тя на высоте церковней восиявшую, просвещение показа сущим во тме, Христос, прехвалне, постником украшение преподобне.

Запев. Кресту приближившемуся, и мир просвещьшему Касиане подобяся, распялся еси мирским страстем, коварствия бесом побеждь.

Слава. Мудрости исполнься твое сердце премудре, учения бездну Святым источи Духом. Иноки стада напаяющу.

И ныне. Богородичен. Исцели Пренепорочная душу мою молюся, изнемогшую страстьми, и всяцеми настоянии бесовскими, божественым ходатайством си. Катавасия.

Седален, глас 4-й. Страстное покорил еси плотьское мудрование, и горшее поработил еси лучшему, отче Касиане преславне. Сокрушил еси бесовския козни постом, восия мирови в мире яко луча солнечная сиянии твоих добродетелей. Сего ради тя воспеваем.

Слава, и ныне. Богородичен. Грехолюбив сыи молю Тя, безгрешнаго Бога рождьшую, грехи вземлющаго мирови Чистая, многогрешную ущедрити душу мою, и грехи моя многия очистити. Грешником бо еси очищение, и спасение верным и заступление.
 

Песнь 4. Ирмос

Пришествовав от Девы, не ходатай ни ангел, но Ты Сам Господи воплощься, и спасе всего мя человека. Тем вопию Ти: слава силе Твоей.

Запев. Подвиги твоими, плотьская покорил еси взыграния Духови преподобне. Священными учении твоими, вся обнажил еси коварьствия льстиваго и ловления.

Запев. Умерщвляем волею от мирския мертвости, жизни наследие приял еси, Касиане преславне. Законы же написа, иноком в наставление и совершение.

Слава. Вселися в душу твою благодать Духа, и всех вышьша плотьских мудровании, тя показа пребогате, и льстиваго сетей явленно.

И ныне. Богородичен. Безлетнаго в лето бывша родила еси, неизреченно Пренепорочная, иже преподобныя просветйвшаго верою пожившыя, и злоначалнаго змия смиривша. Катавасия.
 

Песнь 5. Ирмос

Ходатай Богу и человеком бысть Христе Боже. Тобою бо Владыко, к светоначалнику Отцу Ти, от нощи неведения, приведение обретохом.

Запев. Восхитися своими добродетельми богоприятне, носим. И радуяся достигл еси к небесным селением. Трудом почести достойно приемля.

Запев. Умом чистым, ты взирая доброту Христову, стояше непреклонен в нощи и во дни преславне, божественая явления оттуду приемля.

Слава. Слезными течении богоносне отче напояемь, яко древо высоко. Принесл еси плоды исправления, веселящыя всем божествено помышления.

И ныне. Богородичен. Ис Тебе Жизнь паче ума восиявши Девице, врага умори, всех нас уморившаго. И оживи мир непрестанно воспевающии Тя. Катавасия.
 

Песнь 6. Ирмос

В бездне греховней одержимь, неизследную милосердия Твоего призываю бездну, от тля Боже мой возведи мя.

Запев. Путем тесным отче шествовал еси, всем же словесы твоими сего познал еси. Им же добре ходящии, в райскую широту вводими бывают.

Запев. Жизнь твоя преподобна бысть, и кончина блаженна и честна, Касиане отче наш. Святым ангелом собеседниче.

Слава. Дремание уныния отвергл еси. И бдя в видениих и деяниих, ангельски пожил еси на земли, богоносне пребогате.

И ныне. Богородичен. Яко добру, яко красну возлюби Тя, добро творяи Исус Всенепорочная, из Тебе плотию раждается, и обожает мя за милосердие безмерное. Катавасия.

Слава, и ныне. Кондак, глас 4-й. Преподобен быв, Богови возложился еси, просвещаяся добрыми деянии Касиане. И яко солнце облистал еси сиянием божественых твоих учений, сердца всех чтущих тя, всегда просвещая. Но прилежно моли Христа Бога, о иже любовию тепле восхваляющих тя.
 

Песнь 7. Ирмос

Богопротивно веление беззаконнующа мучителя, высок пламень вознесло есть. Христос же простер богочестивым детем, хлад духовныи. Сыи благословен и препрославлен.

Запев. Всегда воззренми светлыми богомудре обожаемь, светилник явися незаходим. Отнюду же облистал еси слово спасителное, всех нас разумы просвещающее, восхваляющих тя.

Запев. Язык твой Духом обощрен, яве начертавшии закон спасителен, и образ положи. Ими же просвещаются свыше богоблаженне вопиющии, благословен Бог отец наших.

Слава. Разумы преподобне спасительныя и глаголы, неведение сердечное отгоняющыя, богатно источил еси отче богомудре. Тем же тя почитаем верно, всесвятую творяще память твою.

И ныне. Богородичен. Чертог бысть божественыя славы, и престол огнезрачен, на нем же почи Слово воплощенное за благостыню. Сего убо моли Чистая, ущедрити и помиловати нас. Катавасия.
 

Песнь 8. Ирмос

Пещь огнена иногда в Вавилоне, детели разделяаше, Божиим велением, халдея опаляющи, верныя же прохлаждающи поюща, благословите вся дела Господня Господа.

Запев. Сияя яко же звезда, словом и житием Касиане, просвещаеши вся земленыя концы. Неведения изимая мглы, и пети повелевая всегда, благословите вся дела Господня Господа.

Запев. Зашел еси умер яко солнце преблаженне. Яко зарю же оставил еси, незаходима словеса твоя. Просвещая душа наша, иже верою святую твою преподобне, совершающих память.

Слава. Доброты мысленыя, неизреченно наслаждаешися, оставль тленное тело, и видети сподобися, яже видят славне ангельская воиньства поюще, благословите вся дела Господня Господа.

И ныне. Богородичен. Явися небес ширши Девице. Его же бо та не вместиша, несказанно вместивши. И рождьши паче смысла, сугуба суща естеством, един же имуща боголепно состав. Катавасия.
 

Песнь 9. Ирмос

Безначална Родителя Сын Бог и Господь, воплощься от Девицы нам явися, омраченыя просветити, и собрати расточеныя, тем всехвальную Богородицу величаем.

Запев с поклоном. Крепость тебе даровася от Бога и сила, начала отгонити миродержьца. Тем же доблествовав велми, яко воистину отче богомудре, ликом причтеся преподобных радуяся.

Запев. Яко шипок благовонен, нас благоухают, богодохновеная словеса, божественаго языка твоего. Ты бо благоухание был еси, нас ради излиявшагося за милосердие, и в плоть облекшася, богоносне всечестне.

Слава. Память твоя днесь преподобно восиявши, озаряет сердца восхваляющих твое ангельское житие Касиане. В ней же молимся, согрешением прощение дароватися всем помолися.

И ныне. Богородичен. Глас Ти приносим Гавриилов, взывающе, радуися трапезо, божественыи Хлеб носившая. Радуися непроходимая двере. Радуися радосте всем спасаемым, преподобным похвало, Богородице присно Дево.
Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и преподобнаго Касиана Римлянина, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги