Канон Пресвятой Богородице, сретению ея иконы «Владимирския»

Каноны Богородице, Русская вера, 2017

По церковному преданию Владимирская икона Божией Матери написана св. апостолом Лукою. Доска, на которой она изображена, взята от того стола, который находился в жилище Иосифа и Пречистой Богородицы в отроческие годы Господа нашего Исуса Христа. В XII веке икона была перенесена из Царьграда в один из женских монастырей в предместье Киева, а оттуда в 1155 году по чудесному повелению Самой Богородицы перенесена во Владимир. Икона прославлена дарованием многих побед русским людям над врагами нашего Отечества, главным образом татарами.

Молясь канон Владимирской иконе Пресвятой Богородицы, христиане получают от Небесной Заступницы победу над врагами видимыми и невидимыми и исцеление от недугов.

Память Пресвятой Богородицы сретению Ея иконы «Владимирския» 21 мая, 23 июня, 26 августа (3 июня, 6 июля, 8 сентября по гражданскому стилю).
 

Тропарь, глас 4-й

Днесь светло красуется славнейшии град Москва, яко зарю солнечную восприемши Богородице Владычице чюдотворную Твою икону, к ней же ныне мы притекающе, и молящеся Тебе взываем сице: о пречюдная Владычице Богородице, молися из Тебе воплощенному Христу Богу нашему, да избавит град сей, и вся грады и страны християнския невредимы от всех навет вражиих, и спасет душа наша яко Милосерд. (Дважды).

Слава, и ныне (повторяем тропарь).

КАНОН, глас 4-й

Песнь 1. Ирмос

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чюдеса.

Запев: Пресвятая Госпоже Богородице, услыши молитву раб Своих, молящихся Тебе (поклон).

Просвети Владычице душа наша зарею божественною, и паче ума благодатию си, независтныи дар подаждь ми, воспети Тя, яко Помощницу человеческому существу Препетая, верное заступление, и на враги победу, державе нашей даруй.

Запев. Приидите соберитеся русстии собори, в пречестныи храм всенепорочныя Владычицы, и возопийте умильно, молящеся честному образу, взирающе к животворней иконе, Богородице безневестная хвалящих Тя спаси.

Слава. Твой Богомати всечестныи образ богогласныи Евангелия Христова списатель, пребожественыи Лука написав, Творца всех на Твою честную руку вообрази: к Нему же притекающия, напасти и печали избавляеши, и вся покрываеши Своею милостию.

И ныне. Храм прекрасныи, Содетель всех едину Тя обрет, в Тя вселися, и человеки обожи. К Нему же за ны Богородице молися, спасти нас от поганых пленения, и всякия иныя скорби находящия на ны, да Твоего днесь образа сретение всечестно празднуем.

Катавасия: Спаси от бед рабы Своя, Богородице Дево, яко вси по Бозе к Тебе прибегаем, яко к нерушимей стене и заступлению (поклон). Господи помилуй (трижды с поклонами).

Песнь 3. Ирмос

Твоя певцы Богородице, живыи нетления источниче, лик Себе совокупльши духовен утверди. И в божественей Ти славе, венцем славы сподоби.

Запев. Все помышление отвергше богомудрии, приидите в сретение прекрасней зари, держащей пресветлую лучю, вся просвещающу, и милостию весь мир обогащьшу.

Запев. Твой Богомати всечестныи образ, чюдотворную икону, русстии князи стяжавше, яко заступление крепко, и стену нерушиму, на враги победу, державе нашей даруй.

Слава. Облак светозарныи показася, росою благодати вся омывающи телесныя скверны, и души просвещающи, едина Всепетая.

И ныне. Древо многоплодно явися, пищею негиблющею вся насыщающи, душа же веселящи, Богоневесто чистая, добродеяния всем источи, и от скорбей нужных спаси. Катавасия.

Слава, и ныне. Седален, глас 4-й. Народи боголюбивии, приидите в сретение, се бо приходит Девая всех пророк превышши, честным Своим образом животу Дателя миру, на руку имеющи, град Свой сохранити страждущии, и варварскую дерзость низложити, вообразитися всем хранительница тверда, держава и ограждение верно молящимся.

Песнь 4. Ирмос

Неизследному Божию совету, еже от Девы воплощению, Тебе Вышняго, пророк Аввакум дивяся вопияше, слава силе Твоей Господи.

Запев. Гору превелию юже Даниил виде, от Нея же камень отсечеся без руки, и вся соблазны истни, и верныя просвети: истинное светозарное солнце показа, лучами просвещающи, Богородице присно Дево.

Запев. Вооружаются на люди Твоя, чистая Богородице, сынове агарян, злыи совет творяще, грады разоряюще, и верныя погубляюще. Но Ты Всепетая Своею милостию, вся низложи измаильтяны враги, и покори державе нашей.

Слава. Небо одушевлено едина Богомати, свет велии приемши, вся просвещающи, тму держащих бед разжени, и нас вышняго причастия сподоби.

И ныне. Давыд пред киотом ликовствует, леввити же воспевают, паче же пред Тобою Богородительнице чистая, Русия хвалами яко Царицу воспевает, гласы молебными прилежно Ти вопиющи: радуися Заступнице граду нашему. Катавасия.

Песнь 5. Ирмос

Удивишася всяческая, о божественей славе Твоей, Ты бо браконеискусимая Девице, прият во утробе надо всеми сущаго Бога, и родила еси безлетнаго Сына, всем воспевающим Тя мир подавающа.

Запев. Тебе Богомати великии во пророцех Исаия провиде Духом, угль имеющюю во чреве, верныя просвещающе соблазны же вся пожигающь, и спасающь род человечь.

Запев. Жезл Ааронов прозябла еси, и злобныи корень исторгнула еси, Дево Богоневестная, животу Дателя рождьши миру: Его же моли, сему граду спастися от многих напастей.

Слава. Ныне убо приступите с веселием, богоизбранное стадо русстии собори, всечестней Божии Матери, честныи Ея образ, любезно приимите: се бо благодать неизчерпаемая, воды точа божественыя неоскудно, Ея же вернии почтем, и честному образу Ея поклонимся (поклон).

И ныне. От корене Иессеова, древо возрасте всем животное: плод убо прозябе, во утробе Твоей Дево чистая, вся люди насыщающи Своею милостию. Катавасия.

Песнь 6. Ирмос

Божественое се и всечестное совершающе празднество, богомудрении Божия Матере, приидите руками восплещем, от Нея Рождьшагося верою славяще.

Запев. От Тебе Богомати истече поток сладкии, вся напаяющи люди, душам измывающи скверны, Богородице Владычице, спаси всех покланяющихся верно, честному образу Твоему (поклон).

Запев. Вси убо совокупльшеся вкупе, воспоем чистую Деву, богоизбранную лествицу Иаковлю, Гедеоново же руно, радости Ходатая, крепость и похвалу спасаемым, Богородительницу чистую.

Слава. Се ныне веселие приближается, скорбь же потребляется, вернии спасаются, яко от источника радость почерпающе, выну хвалами воспевают, радуися чистая Владычице, спасению нашему начаток, и всем верным стена и похвала.

И ныне. Подаждь нам помощь мольбами си пречистая Богородице: скорби убо находят на ны, и печали умножаются, врази ополчаются. Но Ты Пречистая представ избави, и врагом нашим шатания низложи, на враги победу даруй, да посрамятся вси являющии рабом Твоим злая. Катавасия.

Слава, и ныне. Кондак, глас 8-й. К возбранной воеводе и Заступнице Деве и Богородице, в чистей совести верою утвердившеся, русстии народи, невозвратно надежду имущи притецем, паче же к чюдотворному Ея и пресвятому образу, и возопием Ей, радуися Невесто неневестная.

Икос. Ангел предстатель, с небесе послан бысть рещи Богородице, радуися, и со безплотным гласом воплощаема Тя зря Господи, ужасашеся и стояше зовыи к Ней таковая: радуися Ея же ради радость возсияет, радуися Ея же ради клятва исчезнет. Радуися падшаго Адама возвание, радуися слез Еввин избавление. Радуися высото неудобь восходимая человеческими помыслы, радуися глубино неудобь зримая и ангельскима очима. Радуися яко еси Царево седалище, радуися яко носиши носящаго всяческая. Радуися Звездо являющая Солнце, радуися утробо божественаго воплощения. Радуися Ея же ради обновляется тварь, радуися Ея же ради поклоняемся Творцу, радуися Невесто неневестная (поклон).

Песнь 7. Ирмос

Непослужиша твари богомудрении паче Зиждителя, но огненное прещение мужески поправше. Радовахуся поюще, препетыи иже отцем Господь и Бог благословен еси.

Запев. Яко порфирою и виссом, червленою хламидою Дево Богородице Владычице, град Твой Тобою одеяся, Христа величает, и пришествие честнаго Твоего образа славит, явльшася паче луч солнечных, и немрачным светом просвещающа, велегласно хвалящих Тя.

Запев. Скрижали богописанныя перстом духовным, в ярости Моисей сокруши: но в Тебе Чистая, преславныи Творец вселився, невредну Тя сохрани, Ему же поем, отец наших Боже благословен еси.

Слава. Приими Своих раб мольбы, пречистая Дево Богородице, непостоянную бурю утиши, молитвами Твоими, и советы противных враг разжени, нападающих на стадо Твое, всенепорочная Владычице.

И ныне. Тебе едину помощницу роду человеческому Богородице Марие, Зиждитель всех рожеством Своим назнамена, и пророцы прообразиша, ов Тя дверь, ин же Тя ложницу Божию. Мы же Тя воспеваем Родительницу Божию и Ходатаицу к Богу, и Заступницу, от всех зол находящих на ны. Катавасия.

Песнь 8. Ирмос.

Отроки благочестивыя в пещи, рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Како Тя Девице по достоянию воспоем, помощь твердую. Хранительницу живота нашего, и Ходатаицу непреложну к Сыну Своему и Богу нашему; Его же воспеваем, и превозносим во веки.

Запев. Цвете прекрасныи, и воня пищная, облагоухаеши Богородице Марие вся, и спасаеши, и от недуг исцеляеши, бесы прогоняеши. Тем же Ти вопием, радуися Помощнице всем молящимся верным.

Слава. Столп явльшися Богомати, нахождения противных отгоня, Тя бо чтущим сердцем теплым, явися стена и ограждение, и спасеное прибежище.

И ныне. Давыдски воспеваем Ти песнь, гору Божию Тя именующе, пречистая Дево. Источника бо сущим приснотекущаго источи, Его же поем и превозносим во веки. Катавасия.

Песнь 9. Ирмос

Всяк земен да взыграется, Духом просвещаемы Да ликовствует же безплотных умов естество, почитая святое торжество Божия Матере, и да поют, радуися Преблаженная, Богородице чистая присно Дево.

Запев с поклоном. Радости Ходатаице, возвесели наш смысл вопити Тебе Богородице чистая, радуися хранительнице наша, держава и ограждение, и спасеное прибежище.

Запев. Да восхвалят согласно Тя Небо и земля, яко животу Дателя миру рождьши. Радуися тихое пристанище, животныя воды источниче неизчерпаемыи Владычице.

Слава. Собравшеся днесь людие, во сретение пречистыя Божия Матере, яже винограда мысленаго грезн носящу, вино источающь всегда, и веселия всех исполняющь, яко Богородицу подолгу славящих.

И ныне. Божественая река, вод животных вся удолия наполняющи, наша соблазны Богомати погрузи, и до конца потреби. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, честнаго и славнаго сретения чюдотворныя иконы Ея Владимирския, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги