Святые мученики и исповедники Гурий и Самон пострадали за ревностную проповедь христианской веры в конце II-го или в начале III-го века от Р. X. в городе Едессе. Несколькими годами позже (в 322 году) по этой же причине был осужден на сожжение св. мученик и исповедник Авив, диакон Едесской церкви. Когда огонь погас, тело святого было обретено неповрежденным. Его похоронили рядом со святыми Гурием и Самоном. Однажды один чужеземный воин, находившийся на службе в Едессе, взял в супружество благочестивую девушку Евфимию. У гробницы этих святых он поклялся ее матери, что никогда не обидит свою супругу. Но это был обман. У него на родине была жена, и когда он после окончания службы возвратился домой вместе с Евфимией, она стала претерпевать многие страдания в чужом краю. Евфимия с усердием молилась святым мученикам Гурию, Самону и Авиву, которые были свидетелями ложной клятвы. По молитве этих святых Господь чудодейственно перенес Евфимию в Едесс, избавив ее от тяжких страданий. С глубокой древности Святая Церковь признает в этих угодниках Божиих небесных покровителей честного брака. Христиане молятся им о воцарении между супругами мира и любви.
Канон, глас 4-й
Общее начало и конец всем канонам →
Порядок чтения по уставу
Тропарь, глас 5-й
Чудеса святых мученик стену неразориму нам дарова Христе Боже. Тех молитвами советы языком разори, и царствия скипетры утверди, яко Един Благ и Человеколюбец. (Дважды).
Слава, и ныне. Богородичен. Радуися двери Господня непроходимая. Радуися стено и покрове прибегающим к Тебе. Радуися заветренее пристанище, и неискусобрачная, рождьшая плотию Творца Своего и Бога. Молящи не презри о воспевающих, и кланяющихся рожеству Твоему. (Поклон).
Песнь 1. Ирмос
Моря Чермнаго пучину, немокрыми стопами древле шествовав Израиль, крестообразно Моисеовыма рукама, Амаликову силу в пустыни победил есть.
Запев: Святии мученицы и исповедницы Гурие, Самоне и Авиве, молите Бога о нас (поклон).
Троици единоначалие святии, исповедающе верно, многоначалия непостоянную мглу, удобь разрушисте. Востока, многосветлии, яко звезды восиявше.
Запев. Трие исповедницы, благодатию просвещаеми началныя Троицы явствено. Лесть многобожную, терпеливно противление являюще, потребиша.
Слава. Вас сыноположив славнии, любовию естественыи Сын, ныне Ему наследию даему яве, яко милосерд снаследники показа, и Царствию сопричастники.
И ныне. Богородичен. Премудрости вышемудростныя, приятелище бысть Пренепорочная. Свой бо храм от Твоих пречистых кровей Чистая, создати благоизволи, на спасение душам нашим.
Катавасия: Избавите от бед рабы своя, святии мученицы и исповедницы Гурие, Самоне и Авиве, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).
Песнь 3. Ирмос
Веселится о Тебе Церкви Твоя Христе, зовущи: Ты ми крепость Господи, прибежище и утвержение.
Запев. Тело казнем волею и лютым ранам, Христовы предаша исповедницы и угодницы.
Запев. Избавитися от лютых греховных помысл славнии, вашю память верою совершающым умолите.
Слава. На древе терпеливно обешени честнии свидетели, всечестно невредимо исповедание соблюдоша.
И ныне. Богородичен. Целении Тя источник в Твою утробу вшед показа, Мати Божия пречистая. Мою убо душу исцели. Катавасия.
Седален, глас 8-й. Крестом вооружившеся Христовыми, о инем мучителем всю крепость мужески низложисте, яко веры поборницы. Безбожие все идольское обличисте, и Троице святей усердно присвоистеся. Тем достойно от Нея венец победы приясте, яко законно пострадавше, страстотерпцы всехвалнии. Молите Христа Бога, грехов оставление подати, чтущим любовию святую память вашю.
Ин седален, глас 8-й. Христови поработавше мученически, поработисте лесть мучительску, не порабощену имуще душю и мудрость. Ибо троичною верою уязвившеся прехвалнии, многобожия славу неславную обличисте, тем яко звезды светло в мире блистанием сияете чюдес блаженнии, страстотерпцы всехвалнии. Молите Христа Бога, грехов оставление подати, чтущим любовию святую память вашю.
Слава, и ныне. Богородичен. Яко Деву едину в женах Тя без семене рождьшую Бога плотию, вси ублажаем роди человечестии. Огнь бо вселися в Тя Божества, и яко младенца доиши Зиждителя и Господа. Темже Ангельстии собори, и человечестии роди достойно славим пресвятое рожество Твое. И согласно вопием Ти, моли Христа Бога, грехов оставление даровати, воспевающим достойно славу Твою.
Песнь 4. Ирмос
Воздвижена Тя видевши Церкви на Кресте Солнца праведнаго, ста в чину своем, достойно взывающи: слава силе Твоей Господи.
Запев. Троице равночислении венечницы, трисиянною свещею, ныне совершающих память пресвященную тех озаряют, всем исцеления подающе.
Запев. С говением притецем, светоносней и светозарней богомудрии раце мученик. Точит бо исцеления верою зовущым: слава силе Твоей Господи.
Слава. Исповедающе божественое смотрение, и паче ума таинство, богословными языки, всю гордыню мучителей, божествении премудрии, исповедницы попраша.
И ныне. Богородичен. Паче ума родила еси о, Дево, и по рожестве явися девствующи паки. Тем немолчными гласы, радуися Тебе Владычице верою несуменною вопием. Катавасия.
Песнь 5. Ирмос
Ты Господи ми свет в мир пришел еси, в свет святых обращая из мрачна неведения, верою воспевающыя Тя.
Запев. Светлостию яве подвиг сияюще, посрамиша мучителя свирепыи нрав, веры поборницы.
Запев. Во вся явьствено вселенныя концы, чюдеса мученик проповедашася, и всех верою утвердиша.
Слава. Яко земля благая, благодатная семена приемши, житием трудолюбно богатьство блажении содеяша.
И ныне. Богородичен. Един Благии пучиною благостыня, всяческая Богомати содержаи, Твоима рукама одержатися сподоби. Катавасия.
Песнь 6. Ирмос
Пожру Ти со гласом хваления Господи, Церкви вопиет Ти, от бесовския крове очищьшися милостию от ребр истекшею Ти кровию.
Запев. Законно яко доблии воини, богомудрии удержавшеся, и добрую веру соблюдше, божественыя правды приемлете венцы.
Запев. Прежде убо Аввакум высоце возвышается, Владычним повелением. Вами же отроковица, мучима богогласнии к воспитемей возвратися.
Слава. Сияет рака мученик чюдесы, и реки источает исцеленей всем приходящым верою. И тех терпению дивимся.
И ныне. Богородичен. Тя едину посреде терния обрет яко чистыи крин, и во удолиях цвет о, Богомати, Жених разумныи в Тя вселися. Катавасия.
Слава, и ныне. Кондак, глас 2-й. От высоты божественыя мудрии благодать восприемше, сущим в напастех отрадно предстоите всехвалнии. Тем же отроковицу святии от смерти горкия избависте. Вы бо есте воистину Едесу слава, и миру радость.
Икос. Вражия мя работы избави Исусе Жизнодавче, Твоих страдалец молбами умоляемь. Яко да не порабощену стяжав от страстей душу мою и тело, восхвалю тех быструю помощь, якоже во гробе затвореная мужа лукавьствием. И сию скоро предваривше от смерти избавиша, зовущю: Едесу слава и миру радость.
Песнь 7. Ирмос
В пещи авраамския си дети персидстей, любовию благоверия паче нежели, пламенем опаляеми взываху: благословен еси в Церкви славы Твоея Господи.
Запев. Авраамския в пещи дети избавивыи, сыи, и странную отроковицу лютыя напасти спасе, ходатайством святых угодник, яко Милосерд.
Запев. Суровымь нечеловечеством муку давыи, всех зол абие истязан убиица злоименитыи, судом праведным, Слова Божия Премудрости и силы.
Слава. Укрепляема еже к вам надежею славнии, отроковица затворена во гробе с мертвыми, чаяния не погреши. Зовущи: благословен еси Господи Боже отец наших.
И ныне. Богородичен. Яко ново смешеное и светозарное пущая зерцало зарю божественаго Дево сияния, приложившотися вместила еси. Благословена Ты в женах пренепорочная Владычице. Катавасия.
Песнь 8. Ирмос
Руце распростер Даниил, лвова зияния в рове затче. Огненую же силу угасиша, добродетелию поясавшеся иже благочестия любители отроцы. Взывающе: благословите вся дела Господня Господа.
Запев. Всемирныи днесь нам наста праздник, мученик Христов озаряющь благодатию чюдес приходящих верою. И радостию духовною, и любовию зовущих: благословите вся дела Господня Господа.
Запев. Удобно исповедницы Твоего Божества, все упраздниша безбожие Владыко, мучитель не убоявшеся прещения. Яко страдалцы веры, зовуще: благословите вся дела Господня Господа.
Слава. Премудрии исповедницы предстояще божественому повелению, врагов ополчения побеждают. Мечем закалаеми, победу преславно яве сияющю показаша. Падении бо сопротивныя победиша.
И ныне. Богородичен. Естествома видима двема Христа родила еси, едину же носяща яве ипостась сложену Божества и человечества, сшедшуся естественому соединению воистину. Тем Тя благословим Марие Богоневестная. Катавасия.
Песнь 9. Ирмос
Камень нерукосечныя горы от несекомыя Тя Девицы краеугольныи отсечеся Христос, иже совокупив разстоящаяся естества. Тем веселящеся Тя Богородице величаем.
Запев с поклоном. Словесем последующе, божественых и богодухновенных Христовых заповедей. Исповедницы богосветлии, крест на рамо радующеся взясте, живоносным стопам последующе достославнии.
Запев. Всего света Троица с веселием доблии исповедницы богосветлии, Ангельския чести восприимают, безплотных чинов сподобльшеся соводворения.
Запев. Ныне незерцалом зрите блаженных надежь, исповедницы Спасовы. Истинно же паче премудрии доброты зрите, венценосцы всечестнии.
Слава. Яко пребожественыя Троицы равночислении явльшеся исповедницы богоглаголивии, тоя зарями просвещаеми. И ея ради пострадавше, живота нетленнаго ныне улучиша.
И ныне. Богородичен. Плоть прияти восхотев украсивыи вся словом, в Тя вселися едину святейшю всех обрет, и Богородицу воистину яви Матерь Деву. Катавасия.
Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.
Отпуст: Господи Исусе Христе Сыне Божии, молитв ради пречистыя Твоея Матере и святых мученик и исповедник Гуриа, Самона и Авива и всех ради святых, помилуй и спаси нас, яко Благ и Человеколюбец. Аминь.