Канон преподобному Феодосию Печерскому

Русская вера, 2017

Нет слов, чтобы описать благолепие того духовного подвига, которым украшен угодник Божий, преподобный Феодосий Печерский — один из величайших русских святых. Он жил в XI веке и подвизался в Киево-Печерском монастыре, будучи его игуменом. Преподобный имел великую любовь к каждому человеку, был необычайно милостив и сострадателен к людям. Его отличали необычное смирение и кротость. Вся его богоугодная жизнь озарялась пламенной молитвой к Господу о своем спасении и о спасении других людей.

Преподобный Феодосий стяжал великую благодать у Господа. С его именем связано благоустроение одной из самых славных иноческих обителей в Древней Руси — Киево-Печерского монастыря. Будем же молитвенно прославлять святого угодника Божия — преподобного Феодосия — и просить его заступнических молитв о себе и о ближних, чтобы святой ходатайствовал перед Господом всем нам в благоденствии пройти земное странствование и избежать нескончаемого адского пламени. Память преподобному Феодосию Печерскому 3 мая (16 мая по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 8-й

Православию наставниче, благочестия учителю и чистоте, вселенней светилниче, архиереом богодухновенное удобрение, Феодосие премудре. Учением бо твоим вся просветил еси, цевнице духовная. Моли Христа Бога, спастися душам нашим. (Дважды).

Слава, и ныне. Богородичен. Иже нас ради рождеися от Девы, и распятие претерпев Благии, испровергии смертию смерть, и воскресение явлеи яко Бог, не презри их же созда рукою Своею, яви человеколюбие Свое Милостиве, приими рождьшую Тя Богородицу молящуюся за ны, и спаси Спасе наш люди согрешьшыя.
 

КАНОН, глас 8-й
 

Песнь 1. Ирмос

Вооружена фараона погрузи, чюдотворяи древле, Моисейскии жезл крестообразно прорази, и раздели море. Израиля же бежаща, пеша ходяща спасе, песнь Богови возсылающа.

Запев: Преподобне отче Феодосие, моли Бога о нас (поклон).

Богоугодныи подвиг стяжав отче Феодосие, боговидец явися. Тем же молися Богу, Ему же угоди, отгнати мрак неведения моего. Слово же блаженное вдохнути ми, воспевати Тя.

Запев. От матерьня чрева прилепихся Богу преподобне, яко мудрыи Павел, и пророк же древле Иеремиа. Тем же Тя божественая благодать, устнама Феодосие Божия слугу нарече.

Слава. Спасовы заповеди послушав от юности мудре, жизнь сию нивочто же положив, крест возжеле Господень носити. Вся земная возненавидев, на небесная взираше.

И ныне. Богородичен. Воплощься от пречистых Ти ложесн Дево всечистая, Божие слово, всем просвети богоразумия любовь. И человеческое торжество лику ангельскому совокупи, на небесная возведе.

Катавасия: Избави от бед рабы своя, преподобне отче Феодосие, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Небесному кругу верхотворче Господи, и церкви Зиждителю, Ты мене утверди в любви Своей. Желанием сыи край, и верным утвержение, едине Человеколюбче.

Запев. Нетленными дары духовными святе, божественая ти и блаженая душа обогащена, видети возжделе гроб Господень. Но свыше бысть возбранен, божиим смотрением.

Запев. Жертва совершена, истинна и непорочна, восхотев быти, агньца вземлющаго блаженне, пречистою кровию, грехи всего мира, безкровьныя принося ему жертвы.

Слава. Уставом ты стяжатель, от версты юношески быв отче, и сим самодержец. Мирския пучины убежал еси, наставление восприем Божественаго Духа.

И ныне. Богородичен. Радуися рождьшая едина всех Господа. Радуися яже радость человеком возвестившая. Радуися сень и несекомая горо, верным утвержение, едина Всепетая. Катавасия.

Седален, глас 4-й. Паче ума человеча ты явися на земли, от утробы Божии сад бысть душевныи. Посреди Дому Господня стоя, подаеши плоды учеником си. От уст бо твоих благодать возрастил еси. Образ быв подвигом, и устав любящим Бога. Его же ныне непрестанно моли, спасти поющих тя.

Слава, и ныне. Богородичен. Иже на престоле херувимсте седяи, и в недрех Отчих пребываяи, яко на престоле седит святем своем, Владычице на лону Твоею плотию. Бог бо воистину воцарися над всеми языки, и разумно ныне поем Ему. Его же моли, спасти рабы Твоя.
 

Песнь 4. Ирмос

Ты ми Христе Господь, Ты же и сила ми, Ты ми Бог, Ты ми радование, не оставль недра Отча, но милостию си нашу нищету посетив. Тем с пророком Аввакумом зову, силе Твоей слава Человеколюбче.

Запев. Благодать духа возрасте в тебе отче, егда Рождьшую видя, плачущюся и рыдающю крепце. Ты же предстояше, струями слезы точа, непоколебимыи столп, и неподвижим сыи пребысть.

Запев. Лютыи враг и вселукавыи, тщася отлучити тя, и отторгнути от гнезда, преукрашена и желаема тобою. Но ты сего ни во что же име, полки сего прогоня молитвами, вопия, силе твоей слава Человеколюбче.

Слава. Окропляя себе дождем духовным, животочными источники, напояяся языком, наставника Антония. Клас Божественыи возрасти, и питаеши множество. Не истощаваема воистину, Иосифова житница быв.

И ныне. Богородичен. Кто изрещи достойно может, чюдес Твоих Чистая глубину. Тобою бо весь мир хвалу приносит помилован. И избавляется от бед лютых, и различных зол, враг же и напастей. И веселяся пояше, силе Твоей слава Человеколюбче. Катавасия.
 

Песнь 5. Ирмос

Вскую мя отрину от лица Твоего, Свете незаходяи. Покрыла мя есть чужа тма окаяннаго. Но обрати мя, и к свету заповедей Ти пути моя направи молютися.

Запев. Добродетельными подвиги, восия исправление твое отче. Жилище бо бывшее древле худо, пространно сотвори. Многи привед поклонники Богу, подающему сим всяк довол, твоими молитвами.

Запев. Светлыми зарями подвиг твоих, отгонимо бываше лютых бесов множество, от твоего жилища. Сшествоваше бо ти всех Творца благодать духа, и славна тя показа Феодосие.

Слава. Всещедраго Спаса, посреди церкви воспел еси. Тем же ти щедроты богатыя своя посла, оскудению разрушая печаль, и приснотекущия источая дары стаду своему.

И ныне. Богородичен. Превышьши бысть вышних сил, Богоблагодатная заченши Слово, иже всяческая манием держащаго и рождьши Сего иже от Отца прежде век рождьшася, Чистая неизреченно. Катавасия.
 

Песнь 6. Ирмос

Молитву пролию ко Господу, и Тому возвещу печаль мою. Яко зол душа моя наполнися, и живот мой аду приближися. И молюся яко Иона, от тля Боже мой возведи мя.

Запев. Молитвами и бдением, и псаломским пением непрестанно, свою душу Рай божественыи сотворив. Живоносное возрасти древо честное, яве Исуса Спаса и Господа.

Запев. Изволи тайное смирение, Владычней нищете подобяся блаженне. Волею си путь шествуя, повелением лениваго раба, вести воз к божественому месту прият. Но поклонянием от сретающих познан бысть.

Слава. Подобяся ноги умывшему, своим учеником богомудре. Воду черпати, и на раму носити изволил еси, и древом предложение. Началника трудом, себе мнихом положи.

И ныне. Богородичен. Умертвися Тобою Богородице, многокозненыи враг, иже всю тварь преже тлею насадивыи. И мертвии на жизнь взыдохом. Родила бо еси воистину Жизнь и Господа. Катавасия.

Слава, и ныне. Кондак, глас 3-й. Звезду русскую днесь почтем, от востока восиявшую, и на запад пришедшую. Всю бо страну сию чюдесы и добротою обогатившу вся ны, трудодетельством и благодатию, иноческаго устава, блаженнаго Феодосия.

Икос. Кто изрещи возможет подвиги твоя отче, или кто изочтет множество трудов твоих, и чюдес дивных. Еще бо во плоти сыи, безплотнаго виде, в плотяне образе беседующа к тебе, и дар ти приносяща, Богом посланое злато. Паче ума человеча ты явися смирением, и кротким нравом, и духовныя мудрости исполнен. Тем Духа Святаго в себе прием, блаженныи Феодосие.
 

Песнь 7. Ирмос

Иже от Июдеи дошедше отроцы в Вавилон древле, верою утвержении, пламень пещныи попраша глаголюще, отец наших Боже благословен еси.

Запев. Иже к молитвам ти блаженне, всяк прибегая верою, не постыдится никогда. Приим благодать прошения отче, паки возвращается ликуя и воспевая, отец наших Боже благословен еси.

Запев. Ты отец явися, и заступник сирым. Вдовицам надежа, болящим отче востание. Всем все бысть. Тем же пояху, отец наших Боже благословен еси.

Слава. Удобрение мнихом, и путь спасения человеком ты бысть. Обогащь бо вся своими глаголы, божественых таин, учаше глаголя, отец наших Боже благословен еси.

И ныне. Богородичен. Из девическия утробы воплощься Христе, явися на спасение наше. Тем Твою Матерь сведуще Богородицу, благодарьствующе, поем, отец наших Боже благословен еси. Катавасия.
 

Песнь 8. Ирмос

Седмь седмицею пещь, халдейскии мучитель, богочестивым люте разжже. Силою же лучшею, спасенных видев, Творцу и Избавителю вопияше, дети благословите, священнии воспойте людие, и превозносите Его во веки.

Запев. Яко же пророк божественыи провидя Феодосие, сокровенная являеши преблаженне. Повелеваеши бо Духом, принесшему к тебе, Евангельское Писание изнести. И вопияше ти исповедая чистым смыслом, принося жертву чисту Владыце.

Запев. К твоему жилищу пририща, аки елень ко источнику приснотекущия и нетленныя получити пищи, благочестныи князь, иже землю сию содержаи. Хотя убо свечеряти ему блаженне, оскудением строителю вопиющу. Повелением же твоим, весь наполнися сосуд твой.

Слава. Твоя подвиги воспеша ангельския силы Феодосие. И твое житие лик преподобных похвали, светлое и украшеное иноком радование. Тем и ныне срадуяся им, веселишися поя согласно, дети благословите, священнии пойте, людие превозносите Господа во веки.

И ныне. Богородичен. Тя пресвятая Богородице, жизни моея предлагаю хранительницу, и заступницу непобедимую. Помощница ми буди, от бед и скорбей избавляющи недостойнаго Ти раба, любовию поющаго. Дети благословите, священнии пойте, и превозносите Господа во веки. Катавасия.
 

Песнь 9. Ирмос

Устрашися всяк слух, неизреченна Божия схождения. Яко Вышнии волею сниде и воплотися от девическаго чрева быв убо человек. Тем же пречистую Богородицу вернии величаем.

Запев с поклоном. Радуися граде русскии, приим сокровище некрадомо. От Бога бо помощника велика богоблаженнаго, и заступника теплаго, божественаго Феодосия ты восприят. Иже с лики мнишескими ныне веселится.

Запев. Память твоя днесь нам, яко солнце восия преподобне. И радуемся целующе раку твою окрест стояще, яко божественыи кивот, верно воспевающе твое святое успение, с вышними чинми Феодосие.

Запев. Собрася торжество ныне, в память твою, воспевати Господа, тебе подавшаго добрыя труды, яже ты претерпе. Тем и молися Ему святе, избавитися стаду твоему, от навет вражиих, еже ты стяжа мудре, молитвами си.

Слава. Спаси мя Избавителю, иже блуднаго приемыи теплое покаяние, и мытарево Спасе воздыхание и смирение. И мне буди милостив Боже, молитвами Твоего угодника, отгоняя ми грехов множество. Да непрестанно Тя вернии величаем.

И ныне. Богородичен. Пощади мя Спасе рождеися, и сохранив Рождьшую Тя без тля паки по рожестве, егда сядеши судити дела моя, грехи моя презри, и беззакония моя, яко безгрешен сыи и милостив. Яко Благ и Человеколюбец. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и преподобнаго и богоноснаго отца нашего Феодосия Печерскаго, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги