Канон Благовещению Пресвятой Богородицы

Каноны праздникам, Русская вера, 2017

Канон празднику Благовещения Пресвятой Богородицы был составлен в VIII веке. Его написали известные православные гимнографы Иоанн Дамаскин и Феофан, митрополит Никейский. Канон построен в виде диалога между Богородицей и Архангелом Гавриилом. В каноне говорится о Божественном снисхождении к людям воплощающегося Спасителя и указывается на необычайное величие Пресвятой Девы, принявшей в себя Бога.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й.

Днесь спасению нашему начаток, и вечней тайне явление: Сын Божии, Сын Девыя бывает, и Гавриил радость благовествует. Тем и мы с ним Богородице возопием, радуися Обрадованная Господь с Тобою.
 

Канон, глас 4

Песнь 1. Ирмос

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Сея зачатие.

Запев: Пресвята́я Госпоже́ Богоро́дице, услыши молитву раб своих, молящихся тебе. (поклон).

Да поет Ти Владычице, движа свирель духовную, Давыд праотец Твой. Послушай Дщи радованна гласа от ангела, радость бо возвещает Ти неизглаголанную.

Запев. Вопию Ти веселяся, приклони ухо Твое, и вонми ми, Божие поведающу без семене зачатие. Обрете бо благодать пред Богом, ея же не обрете другая николи же, Пречистая.

Слава. Да разумею Ангеле твоих словес силу: како будет еже рече, глаголи явьственно; како зачну Девою сущи Отроковица; како же и Мати буду Зиждителю.

И ныне. Лестно мя вещати помышляеши, яко же прилучися, и радуюся зря Твое утвержение. Дерзай Владычице, Богу бо хотящу, удобь скончаются преславная.

Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон). Господи помилуй (трижды с поклонами).
 

Песнь 3. Ирмос

Твоя певцы Богородице, живыи нетления источниче, лик себе совокупльши духовен утверди, и честным Ти зачатием, венцем славы сподоби.

Запев. Оскуде князь от Июды, время настало есть уже, в неже явится языков надежда Христос. Ты же како Сего рожду Девою сущи, скажи ми.

Запев. Ищеши от мене уведети Дево, образ зачатия Твоего, но той несказанен есть, Дух же Святыи зиждительною силою, осенив Тя свершит.

Слава. Моя прабаба приемши волю змиину, пищи божественныя изгнана бысть, тем же и Аз боюся целования ти странна, стыдящися поползения.

И ныне. Божии предстатель послан есмь, Божественныи совет поведати Ти. Что ся мене боиши Пренепорочная, паче Тебе боящагося; что ми говееши Владычице, говеющему ми Тебе честно. Катавасия.

Седален, глас 4. Подобен: Удивися Иосиф. Послан бысть Гавриил к Девей Марии, принося Ей неизглаголаную радость, яко зачнеши без семене, и родиши Сына превечнаго Бога, и спасет люди от грех их. И послушествует пославыи мя вопити Тебе радость, благословенная Девою родиши, и по рожестве Девою паки пребудеши.

Слава, и ныне. Гавриил с Небесе, радуися зовет Чистей, яко зачнеши во чреве Превечнаго Бога, словом концы составльшаго. Она же к нему отвещаваше, мужа не знающи, како рожу Сына; и сказуя глаголаше Ангел Богородице Деве: Дух Святыи найдет на Тя, и сила Вышняго осенит Тя.
 

Песнь 4. Ирмос

Седяи во славе на Престоле божествене, на облаце легце, прииде Исус Пребожественыи, от Пречистыя Девы, спасе же вопиющия, слава Христе силе Твоей.

Запев. Святу некую девицу раждающу, слышах пророка древле, Еммануила прорекша. Хощу же разумети, како Божества размешение, естество человеческое претерпит.

Запев. Явила есть купина, неопальна пребывши, приемши пламень, обрадованная Препетая, Твоего таинства преславное: по рожестве бо пребудеши Чистая присно Дева.

Слава. Освещаемь сиянием Бога Вседержителя, истине проповедниче, глаголи Гаврииле истину: како нетленне бывши чистоте Моей, Слова рожу с плотию Безплотнаго.

И ныне. Со страхом Ти яко раб Госпоже предстою, с боязнию Дево, ныне смотрити стыжуся Тебе: Яко бо дождь на руно снидет на Тя Слово Отчее, яко же изволи. Катавасия.
 

Песнь 5. Ирмос

Удивишася всяческая о Божественнем зачатии Твоем, Ты бо Неискусобрачная Дево, прият во утробе надо всеми Сущаго Бога, и родила еси Безлетнаго Сына, всем воспевающим Тя мир подавающа.

Запев. Разумети не могу Твоих словес испытания, чудеса бо быша множицею, Божественою силою дивна бываемая, скрижали и законнии образы, родила Девица без мужа николиже.

Запев. Дивит Пренепорочная, странно чудо Твое, Едина бо Ты всех Царя приимеши во утробе воплощаема. И Тя прообразуют пророческая речения, гадания и законнии образи.

Слава. Иже всем Невместимыи, и всем невидимыи, како Сей может во чрево Девиче вселитися, еже Сам созда; како зачну Бога Слова, собезначальна Отцу же и Духови.

И ныне. К Твоему праотцу Давыду, обещася посадити от плода чрева, на престоле царства его: Ияковлю Тя Доброту, едину избра словесное Селение. Катавасия.
 

Песнь 6. Ирмос

Возопил прообразуя погребение тридневное, пророк Иона в ките Богу моляся. Из тли спаси мя, Исусе Царю сыи силам.

Запев. Глагол твоих Гаврииле глас радованен приемши, веселия Божественнаго исполнихся, радость бо возвещаеши неконечную.

Запев. Се Тебе дадеся радость Богомати Божия, и вся тварь вопиет Ти Богоневесто: Ты бо Едина Мати Сына Божия, пронаречеся Чистая.

Слава. Еввы Мною ныне да упразднится осуждение, Мною долг древнии, да воздан будет днесь, Мною радость древняя да дастся преисполнена.

И ныне. Обещася Бог Аврааму праотцу, благословити от семене его языки Чистая. Тобою же прехождение обет приемлет днесь. Катавасия.

Слава, и ныне. Кондак, глас 8. Взбранной Воеводе победительная, яко избавльшеся от злых, благодарственая восписуем Ти раби Твои Богородице. Но яко имущи державу не победимую, от всяких нас бед свободи, да зовем Ти, радуися Невесто неневестная.

Икос. Ангел предстатель, с Небесе послан бысть рещи Богородице, радуися, и со безплотным гласом воплощаема Тя зря Господи, ужасашеся и стояше, зовыи к Ней таковая: радуися Ея же ради радость возсияет, радуися Ея же ради клятва исчезнет. Радуися падшаго Адама востание, радуися слез Еввин избавление, радуися высото неудобь восходимая человеческими помыслы, радуися глубино неудобь зримая и Ангельскима очима. Радуися яко еси Царево седалище, радуися яко носиши носящаго всяческая. Радуися Звездо являющая Солнце, радуися Утробо божественаго воплощения. Радуися Ея же ради обновляется тварь, радуися Ея же ради поклоняемся Творцу (поклон земной), радуися Невесто неневестная. .
 

Песнь 7. Ирмос

Непослужиша твари богомудрении, паче Зиждителя: но огненное прещение мужески поправше, радовахуся поюще, препетыи иже отцем Господь и Бог благословен еси.

Запев. Свет невещественыи поведая, в веществене телеси совокупляемь, за милосердие многое, светло благовещение, божественаго проповедания, ныне взываеши ми, благословен Пречистая Плод Твоего чрева.

Запев. Радуися Владычице Дево, радуися Пречистая, радуися Приятелище Божие, радуися свещниче света, Адамово воззвание, и Еввы избавление, горо святая, и преславное Священие, и чертог безсмертия.

Слава. Душу очисти Ми, и тело освяти, церковь сотвори вместну Богу, сень Богоукрашену, одушевлен храм наитием Пресвятаго Духа, и жизни чистую Матерь.

И ныне. Яко многосветлую свещу, и богоделанен чертог, вижу Тя ныне яко злат ковчег: закону подателя приими Дево благоизволившаго человеческое избавити Тобою, тленное существо. Катавасия.
 

Песнь 8. Ирмос

Слыши Отроковице Дево Чистая, да речет убо Гавриил, совет Вышняго древле истинныи. Буди ко приятию готова Богу, Тобою бо Невместимыи с человеки поживет. Тем и радуяся вопию, да благословите вся дела Господня Господа, и превозносите Его во веки.

Запев. Ум всяк побеждается землен, отвеща Девица, ищущи яже Ми вещаеши преславная, слышах словеса твоя. Но боюся ужасающися, да не лестию Мя яко Евву далече послеши от Бога. Но обаче вопию, благословите вся дела Господня Господа, и превозносите Его во веки.

Запев. Се Тебе недоуменное разрешится, рече к сим Гавриил, добре бо рече, вещь непостижна. Словесем Твоих устен, повинующися прочее, несумнися яко льсти, яко же вещи веруй. Аз бо радуяся вопию, благословите вся дела Господня Господа, и превозносите Его во веки.

Запев. Закон сей от Бога человеком есть, Непорочная абие рече, общия любве рожество происходит, не знаю ложа сверстника отнюд. Како убо глаголеши яко рожу; боюся еда лесть глаголеши: но обаче вопию, благословите вся дела Господня Господа, и превозносите Его во веки.

Слава. Глаголы яже вещаеши Чистая, Ангел паки рече, обычай есть рожества человеком смертным: сущаго же Ти Бога обещаваю, паче слова и смысла воплощаема, яко же весть из Тебе. Тем же и радуяся вопию, благословите вся дела Господня Господа, и превозносите Его во веки.

И ныне. Являешимися истине вещатель, рече Девая: радости бо общия пришел еси благовестник. Душу очистих с телом, и по глаголу твоему буди Ми, да вселится Бог в Мя, Ему же вопию с тобою, благословите вся дела Господня Господа, и превозносите Его во веки. Катавасия.
 

Песнь 9. Ирмос

Яко о душевнем Божии киоте, не прикоснется никакоже рука неверных. Уста же верных Богородице немолчно, глас Ангела да поют, радостию вопиюще, радуися Обрадованная Господь с Тобою.

Запев с поклоном. Паче смысла заченши Бога, естества обычая утаися Отроковице, Ты бо в Рожестве матерьскаго избеже тленнаго естества. Темже достойно слышиши, радуися Обрадованная Господь с Тобою.

Запев. Како точиши млеко Дево Чистая, не может изрещи язык землен, странну бо естества показуеши вещь, законнаго рожества устав преходиши. Темже достойно слышиши, радуися Обрадованная Господь с Тобою.

Запев. Тайно во святых книгах речеся о Тебе Мати Вышняго. Лествицу бо древле, Иаков Тя прообразующу видев, рече: степень Божия сия: тем же достойно слышиши, радуися Обрадованная Господь с Тобою.

Слава. Чудно священноявленну Моисею, купина и огнь показа чудо. Искии же преход в прехождении времен, во Отроковице чистей рече зря. Ей же яко Богородице речется, радуися Обрадованная Господь с Тобою.

И ныне. Даниил Тя нарече гору мысленную. Родительницу Божию Исаия, видит же яко Руно Гедеон. Давыд же Священие глаголет, Дверь же Тя ин. Гавриил же Ти вопиет, радуися Обрадованная Господь с Тобою. Катавасия.

Задостойник: Яко о душевнем Божии киоте, не прикоснется никако же рука неверных. Уста же верных Богородице немолчно, глас Ангела да поют, радостию вопиюще, радуися Обрадованная Господь с Тобою (поклон земной).

Отпуст: Господи Исусе Христе Сыне Божии, молитв ради пречистыя Ти Матере, честнаго и славнаго Ея Благовещения, и всех святых, помилуй и спаси нас, яко Благ и Человеколюбец. Аминь.
 

Молитва Пресвятей Богородице:

Пресвятая Госпоже Богородице, спаси нас (поклон).

К Тебе пречистей Божии Матери, аз окаянныи припадая молюся, виждь Царице яко безпрестани согрешаю, и прогневаю Сына Твоего и Бога моего. И многажды аще каюся, ложь пред Богом обретаюся, и каюся трепеща. Не уже ли Господь поразит мя, и по часе паки таяжде творю. Ведущи сие Владычице моя Пресвятая Богородице, почто не помилуеши, почто не укрепиши, и что ради не подаси ми благая творити; веси убо о, Владычице, яко отнюд имам в ненависти злая моя дела, и всею мыслию люблю закон Бога моего. Но не вем Госпоже пречистая откуду яже ненавижду тая творю, а сия преступаю. Но не попущай Пресвятая воли моей свершитися, неподобна бо есть. Но да будет во мне воля Сына Твоего и Бога моего, да мя спасет и вразумит, и подаст благодать Свягаго Духа. Да бых аз от ныне престал сквернодействовати, и прочее бых пожил в повелениих Сына Твоего, истиннаго Бога моего, и Господа Исуса Христа. Ему же подобает всяка слава, честь и покланяние и велелепие, со безначальным Его Отцем, и с Пресвятым и Благим и Животворящим Духом, и ныне и присно и во веки веком, аминь. (Поклон земной).


Обзор книги