Канон святому Архангелу Михаилу

Каноны праздникам, Русская вера, 2017

Собор Архангела Миха́ила и прочих Небесных Сил бесплотных празднуется ежегодно 21 ноября (8 ноября по старому стилю). Этот праздник не относится к числу великих и двунадесятых, но всегда был почитаем на Руси. В честь него строили храмы, а также называли города и селения. Празднование Собора Архистратига Михаила и прочих Небесных сил бесплотных установлено в начале IV века.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й

Небесных воинств Архистратиже, молим тя ныне мы недостойнии. Яко да твоими молитвами покрыеши нас кровом крилу, невещественыя ти славы. Сохраняющи нас молящихся прилежно, и вопиющих, от бед избави нас, яко чиноначалник вышним силам.

Слава, и ныне. Богородичен. Иже от века утаенное, и Ангелом несведомое таинство, Тобою Богородице земным явися Бог, в неразмесне снятии воплощаемь. И Крест волею нас ради восприим, им же воскресив первозданнаго, и спасе от смерти душа наша.
 

Канон, глас 4-й
 

Песнь 1. Ирмос

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся тоя чудеса.

Запев с поклоном: Святыи Архангеле Михаиле, моли Бога о нас.

Божествеными светлостьми облистаемь всегда, ум мой отверзи пети тя, Архистратиже вышних воинств. Всем утвержение притекающим ти.

Запев. Ум пребезначальныи, премирна чиноначалника показа чином, тя преславне Архистратиже. И свет сущим в мире, и божественое украшение церкви своей.

Слава. Умовом первее небесным в дусе, долним же всеизрядне Михаиле дался еси, ограждение и утвержение, и оружие, враги закалающее, и потребляющее.

И ныне. Богородичен. Дево Всепетая, яже Ангелом благолепие, человеком помоще, Ты ми помози в мори плавающему, и в бурю греха присно впадающу и бедующу.

Катавасия: Избави от бед рабы своя, святыи Архангеле Михаиле, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (3 раза с поклонами).
 

Песнь 3. Ирмос

Не мудростию ни силою, ни богатством хвалимся, но Твоею Отчею составною мудростию Божиею. Яко несть свята паче Тебе Человеколюбче.

Запев. Силою божественою, воеводо Ангелом прехвальне, обходиши всю землю, от лютых нас изимай, призывающих твоего божественаго имене.

Запев. Яко божествен проповедник, яко предстатель верным непостыден. Заблуждьшим наставник, и наказатель был еси, Божии Архистратиже боговидче.

Слава. Божественаго сияния пречистое зерцало был еси. Явления честнаго светло прием Духа, Михаиле первыи Ангеле досточудне.

И ныне. Богородичен. Иже невещественыя умы составляяи, Своею волею, в Твое чрево вселися хотением Всенепорочная, плотию зримь невидимыи. Катавасия.

Слава, и ныне. Седален, глас 8-й. Небесным чином наставник, служитель же славы божественыя, достойно быв повелением Зиждителя. Християном еси ходатай спасеныи, невещественою си славою земных назирая. Тем же подолгу восхваляем тя вси, божественое твое днесь воспевающе торжество, Михаиле Архистратиже, моли Христа Бога грехов оставление даровати чтущим любовию, преславное чудо твое.

Другии седален, глас 1-й. Лик Ангельскии Архистратига имея, божественаго Михаила. С ним Святей Троице приношает пение. От несущих бо содетель всяческим, воиньства огнезрачных чинов, словом привел.

Слава, и ныне. Богородичен. Упование християном Пресвятая Дево, Его же родила еси Бога, паче ума и слова, непрестанно моли с вышними силами, дати оставление грехом нашим всем, и исправление житию, верою и любовию присно Тя славящим.
 

Песнь 4. Ирмос

Седяи во славе, на престоле божествене на облаце легце, прииде Исус пребожественыи, от пречистыя Девы, и спасе вопиющия, слава Христе силе Твоей.

Запев. Ум сыи первыи, составил еси божественыя умы хотением. Началника посреде сим Михаила содела, богатным причастием просвещаема, и умными богоначалии облистаема.

Запев. Пение свято со Престолы и Началы и Силами, и Властьми, и священными Господьствы возглашаеши Троицы, преславне Михаиле, спасай нас поющия тя.

Слава. Возвеличим всех Творца и Господа, иже за милосердие давшаго ограждение велие, и необориму стену, и забрало, Михаила нам светозарнаго Архистратига.

И ныне. Богородичен. Мыслено Девице Твоего рожества, преславное сказоваше древле, священноявленныи Духом, гору присенную виде Тя ясно. Из нея же святыи прииде Бог воплощаемь. Катавасия.
 

Песнь 5. Ирмос

Нечестивии не узрят славы Твоея Христе. Но мы Тя Единородне Отчо зарение славы Божия. От нощи утренююще, воспеваем Тя Милосерде.

Запев. Явился еси первее, древнему Израилю, повеленьми иже от Иакова. Человеческим дебельством, явльшуся с телом, Михаиле бесплотныи, Ангелом Архистратиже.

Запев. Невеществеными сиянии обожаемь присно, причастием богоначальным. И нам сияние светодательное подаваеши первыи Ангеле, преславно удивляемь.

Слава. Украсися благодатию божественыи твой храм. Вонь бо пришед, исцелением его пучину показал еси, Михаиле первыи Ангелом, и страстем потребителя.

И ныне. Богородичен. Мысленым Ангелом Тя показа Бог вьшшу сень, вселься в Твое чрево Чистая всенепорочное. Его же моли всегда, ущедрити поющия Тя. Катавасия.
 

Песнь 6. Ирмос

Возопил прообразуя погребение тридневно пророк Иона в ките Богу моляся. От тля спаси мя, Исусе Царю сыи силам.

Запев. Радуется верных множество, хваляще тя. И славит всевиновнаго Слова, совокупльшаго земленыя со Ангелы, Михаиле своею благостию.

Запев. Воиньства Израилева спасл еси явлься, и божественая дая повеления, Архистратиже. И враги низложил еси, и до конца тех потреби.

Слава. Яко виде тя Исус Наввин, поклонися, вопросив честнаго ти и славнаго имене, началниче Ангелом, благоговением и страхом одержимь.

И ныне. Богородичен. Блажени людие, присно блажащии Тя, Блаженная яже Бога блаженнаго рождьши, иже земленыя за милосердие, неизреченным соединением обожившаго. Катавасия.

Слава, и ныне. Кондак, глас 2-й. Архистратиже Божии, и слуго божественыя славы. Ангелом началниче, и наставниче человеком. Еже есть на пользу проси нам, и велия милости, яко бесплотным Архистратиг.

Икос. Рекл еси Человеколюбче в писаниих Своих, множеству радоватися Ангел, о человеце едином кающемся безсмертне. Тем же и мы иже в беззакониих, безгрешне Едине Сердцеведче, Тя молити всегда дерзаем, яко милостива, ущедрити и низпослати, недостойным умиление Владыко, подая нам прощение. О всех бо нас молится Тебе, бесплотным Архистратиг.
 

Песнь 7. Ирмос

Спасыи во огни, авраамския си дети. И халдея убив, яже без правды праведныя уловляше. Препетыи Господи Боже отец, благословен еси.

Запев. Усмотрив Даниил, виде стояща тя блаженне, и умудряюща того в Ховаре, видением еже виде Гаврииле молниезрачне, Михаила чиноначалника тому являюща, иже радуися Девице светло возопил еси.

Запев. Иже Ангелом наставники, боговидныя и светоносныя, Михаила и Гавриила, наша благия заступники, и предстатели, и хранители восхвалим верою велегласно.

Слава. Красен и благолепен и боговиден сыи, вождь паче ума невещественых, духов был еси, Михаиле светозарне. С ними убо о всех нас помолися.

И ныне. Богородичен. Ума великаго воистину, Слово присносущное Дево, в Тя не изглаголанно и страшно всельшася виде возопи, Гавриил Архангел. Радуися, престоле Вышняго Благословеная. Катавасия.
 

Песнь 8. Ирмос

Избавителю всех Всесильне, посреде пламене благочествовавшия, сшед оросил еси. И научи пети, всякая дела благословите Господня Господа.

Запев. Мысленых бесплотных чиноначалник, молитвеник человеком спасителен божествен, Божии служитель, Михаиле показася. Поя непрестанно, благословите Господа, и превозносите Его во веки.

Запев. Светилника два всесветлая, Михаиле и Гаврииле Архистратизи, трисветлаго Божества сияньми, тварь просвещающа, лютых мглу отгоняете.

Слава. Яко добрии окормители Архангели ко пристанищу божественыя воли, душевныи корабль мой спасайте, от бури согрешении, падшии и потопляющиися.

И ныне. Богородичен. Яко жених одеян божественыи Архангел представ, приглашаше Ти, радуися Невесто Божия безневестная, Ангелом славо, и человеком спасение и ограждение. Катавасия.
 

Песнь 9. Ирмос

Евва убо недугом ослушания, клятву вселила есть. Ты же Дево Богородице, прозябением прижития Твоего, мирови благословение процвела еси. Тем Тя вси величаем.

Запев с поклоном. Се благолепие Твоего Архангеле, божественаго храма сияющи, светозарным ти пришествием, чудес молния испущает. И тму недугов всегда отгоняет божественою благодатию.

Запев. Яко красен супруг, и лепотен суще, Владычня повеления, сущим на земли служите Ангели, от лют изимающе, и всем просвещение посылающе спасително, Божественым Духом.

Запев. Днесь радуются с нами, бесплотнии божествении уми, воспеваема видяще сего от всех, великаго и светлаго Архистратига. И любовию с нами празднуют, Жизнодавца величающе.

Слава. Божественая двоице и светозарная, Архангели, Михаиле всечестне, и Гаврииле препрославлене. Троице честней предстояще, прегрешении одержания и озлобления, хвалящия вас избавите.

И ныне. Богородичен. Глас Ти божественаго Гавриила, приносим радостно, и взываем. Радуися Раю, древо посреде животное имыи Пречистая, преславная Слову полато. Радуися Дево всенепорочная. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Ти Матере, и заступлением святаго великаго чиноначалника Архистратига Михаила, и всех святых помилуй и спаси нас, яко Благ и Человеколюбец. Аминь.


Обзор книги