Канон Архангелом и Ангелом

Каноны праздникам, Русская вера, 2017

Слово «ангел» означает «вестник». Такое наименование имеют бесплотные духи, потому что они возвещают людям волю Божию. Ангелы обитают везде, но, преимущественно на небе, вокруг Престола Божия. Сами мы не способны видеть и ощущать славу Божию – нам нужны посредники, которые так преобразуют ее, что она становится доступной и нам. Вот ангелы и являются этими посредниками, без которых мы никогда бы не смогли ощутить и воспринять, даже в малой степени, Божественный свет. Ангелы посылаются на землю для служения людям. Будем с благоговением чтить своего Ангела-Хранителя и все прочие Небесные Силы (ангелов и архангелов) и молиться, чтобы они охраняли, укрепляли нас и помогали на нашем нелегком земном пути.


------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 


Тропарь, глас 4-й

Небесных воинств Архистратизи, молим вас мы недостойнии, яко да вашими молитвами покрыете нас кровом крилу невещественныя вашея славы, сохраняюще нас молящихся прилежно, и вопиющих, от бед избавите нас, яко чиноначальницы вышним силам. (2 раза).

Слава, и ныне. Богородичен. Иже от века утаенное, и Ангелом несведомое таинство, Тобою Богородице земным явися Бог в неразмесне снятии воплощаемь. И Крест волею нас ради восприим, им же воскресив первозданнаго, и спасе от смерти душа наша.
 

Канон, глас 8-й
 

Песнь 1. Ирмос

Песнь возслем людие чудотворцу Богу, свобождьшему Израиля от работы, песнь победную поюще, и вопиюще, воспоем Тебе Единому Владыце.

Запев: Святии Архангели и Ангели, молите Бога о нас (поклон).

Вси воспоем людие, вся направляющую невещественыя лики Вышняго чиноначалия, Троицу несозданную, поюще, Свят, Свят, Свят еси Боже Вседержителю.

Запев. Положил еси тварем начаток, существо безплотное, Творче Ангелом, пречистыи Твой престол окружающа, звати Ти, Свят, Свят, Свят еси, Боже Вседержителю.

Слава. Радуися Гаврииле, Божия воплощения возвестителю, Михаиле же чином невещественым предстателю, непрестанно зовуще, Свят, Свят, Свят еси, Боже Вседержителю.

И ныне. Богородичен. Трепещу таинства Христе Твоего схождения, яко иже естеством Бог, приял еси от Девы родитися, яко человек, да спасеши мира, от работы сопротивнаго.

Катавасия: Избавите от бед рабы Своя, святии Архангели и Ангели, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (3 раза с поклонами).
 

Песнь 3. Ирмос

Страх Твой Господи всади в сердца раб Твоих, и буди нам утвержение, воистину Тя призывающим.

Запев. Крепостию уставил еси Безсмертне сильныя, совершающих пресвятое Твое хотение, Тебе в вышних всегда предстоящих.

Запев. Ходатаи Твоего вочеловечения, и честнаго востания, Ангельския чиноначальники Христе, за ны приими молящихся.

Слава. Ангелы приставил еси хранители человеком, яко благоутробен, служители же показа Христе спасению, Твоим угодником.

И ныне. Богородичен. Неизреченно рождьши Богоневесто Спаса и Господа, избавльшаго нас от тли, иже Тя воистину призывающих. Катавасия.

Седален, глас 8-й. Небесных начальниче, и первостоятелю высокопрестольных и страшных, божественыя славы, Михаиле Архистратиже, Ангелом чиноначальниче, со всеми безплотными, Ему же служиши Владыце, о всем мире непрестанно молися, и испроси оставление грехов, и милость и благодать обрести в День Судныи.

Слава, и ныне. Богородичен. В пучину люте впад уныния, от множества лукавых и беззаконных ми дел, приидох в недоумение, и отчаянием ныне одержуся, Владычице Богородице Ты мя спаси, Ты ми помози: грешным бо Ты еси очищение, и чистота спасеная.
 

Песнь 4. Ирмос

Вседе на коня, на Ангелы Своя Господи, и прият рукама си узды их, и спасение бысть еждение Твое. Верою вопиющим Ти, слава силе Твоей Господи.

Запев. Вседе на Ангелы якоже на коня Человеколюбче, и прият рукою си брозды их, и спасение бысть еждение Твое, верно Ти вопиющим, слава силе Твоей Господи.

Запев. Покрывает Ангелы, добродетель Твоя Безсмертне, и земныя исполняет концы, Твоего славнаго Безначальне божественаго хваления, с ними же Тебе вопием, слава силе Твоей Господи.

Слава. Изыде Щедре на спасение людем Своим Христе, созываеши же други силы Своя. И веселие бысть во спасении Твоем безвещным, вопиющим, слава силе Твоей Господи.

И ныне. Богородичен. Дева и Мати паче естества явися Пречистая, яко Бога Того же и Человека Христа роди, от Ангел хвалимаго, людей Твоих печаль преложи на радость, молитвами си. Катавасия.
 

Песнь 5. Ирмос

От нощи неведения, по душетленну пути присно блудящаго, светом богоразумия Твоего Господи, наставляя мя на стезю заповедей Твоих направи.

Запев. Невозвратным желанием всегда, к высоте Христе носими, крайнее всех желание, Ангельския силы непрестанно славят.

Запев. Ты разумныя по существу, нетленныя благодатию Твоею Христе поставил еси, певцы Твоему величествию, Ангелы Твоя, по образу соделав непостижиме.

Слава. Ты непреклонны на горшая, к Тебе приближением Христе, сохранил еси Своя слуги. Источник бо благости Ты еси, благотворя достойно Ти служащим.

И ныне. Богородичен. Умерщвеную ми душу страстьми мерзскими, Всенепорочная оживи, животу хранителя рождьши, и к стези вечней, и блаженному житию устреми. Катавасия.
 

Песнь 6. Ирмос

Иону в ките Господи, единаго вселил еси. Мене же связанаго во мрежах вражиих спаси, яко от тли того спасл еси.

Запев. Боголепно от несущества Господи, словом привел еси существа небесных безсмертне воинств, световидны сих соделовая.

Запев. Служители честнии Божия хваления бысте безплотнии, граждане небеснии, и божественая воистину скиния, Творцу достойно служаще.

Слава. (Повторяем тропарь).

И ныне. Богородичен. Всепетая Света порождьши, всем свет дающаго. Тму моих прегрешении Чистая отжени, Матерними Ти к Нему молитвами. Катавасия.

Слава, и ныне. Кондак, глас 2-й. Архистратизи Божии, слуги божественыя славы, Ангелом начальницы, и наставницы человеком, полезная нам просите, и велия милости, яко безплотным Архистратизи.

Икос. Рекл еси Человеколюбче в писаниих Твоих, множеству радоватися Ангел, о человеце едином кающемся безсмертне. Тем и мы в беззакониих сущии, безгрешне Едине Сердцеведче, Тя молити всегда дерзаем, яко благоутробна, ущедрити нас, и послати недостойным умиление Владыко, и подати нам прощение грехов. О всех бо нас молятся Тебе, иже безплотным Архистратизи.
 

Песнь 7. Ирмос

Дети еврейския в пещи, попраша пламень дерзнувше. И на росу огнь преложьшу вопияху, благословен еси Господи Боже во веки.

Запев. Свет явил еси Щедре, Ангел Твоих невещественое существо, неизреченнаго света исполняемы, непрестанно зовуща, благословен еси Господи Боже во веки.

Запев. Ему же предстоят непрестанно, служаще, тмы Ангельския, лица же зрети не терпят Божества, благословен еси зовуще Боже во веки.

Слава. Словом Твоим ипостасным Господи, Ангельское естество соделал еси. Освятив же божественым Духом, Троицу Тя богословяще пети, благословен еси Господи Боже во веки.

И ныне. Троичен. Три убо зряще суща составы, неописанное славим существо, Отца и Слова с Духом, вопиюще, благословен еси Господи Боже отец наших. Катавасия.
 

Песнь 8. Ирмос

Проявленнаго на горе святей, и в купине огненей, девическую Моисеови тайну явльшаго Господа, пойте и превозносите Его во веки.

Запев. Ангельскому поревнуем житию, и разум вперим к высоте, и с ними невеществено воспоем Господа, и превозносим во веки.

Запев. Ликовственицы лика небеснаго, иже престол обстояще славы о Бозе всегда обращаеми Ангели, поют и славословят во вся веки.

Слава. Невеществена огня творящей пламы, на высоте непрестанно служащих, и Ангелы духи являющей, Троице покланяемся (поклон), и славословим во вся веки.

И ныне. Богородичен. Иже во утробу всельшася Девыя, и от сея страшно и выше Слова, древняго Адама наздавша Господа, поем и славословим во веки. Катавасия.
 

Песнь 9. Ирмос

Устав прейде естества, Содетеля рождьши твари, и дверь спасения мирови бысть. Тем Тя Богородице непрестанно величаем.

Запев с поклоном. Тя неизреченно совокупившаго небесным Христе земная, и едину Церковь совершивша Ангелом и человеком, непрестанно величаем.

Запев. Ангели и Архангели, Престоли, Власти же и Господьствия, Начала и Силы, Херувими, и Серафими, с Богородицею о мире молитеся.

Слава. Троичен. Тя Троице славим, яже от небытия вся сотворившую, и чины Ангельския украсившу, и божествеными зарями просветившу концы.

И ныне. Богородичен. Радуися Святая Богоневесто, радуися Свет мирови рождьши верным. Радуися стено и покрове всех нас. Бога яко благодателя, за ны непрестанно моли. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Ти Матере, заступлением честных небесных Сил Безплотных, и всех святых, помилуй и спаси нас, яко Благ и Человеколюбец. Аминь.


Обзор книги