Канон Ангелу Хранителю великий


Канон, глас 8.


Общее начало и конец всем канонам →
Порядок чтения по уставу


Тропарь, глас 6-й

Ангельским зраком сияя, и божественою славою озаряем. Покрый мя кровом крилу твоею, и божественаго ти служения оружием, прогони вся враги моя, видимыя же и невидимыя. Тебе бо имамы крепка оружника, и молитвеника о душах наших. (Дважды).

Слава, и ныне. Богородичен. Иже благословеную нарекии Матерь Себе, прииде на страсть волею Своею, восияв на Кресте, взыскати хотя Адама. Глаголя Ангелом: срадуйтемися, яко обретеся изгибшая драхма. Иже вся мудре устроивыи, Господи слава Тебе.
  

Песнь 1. Ирмос

Воду прошед яко по суху, из египетска зла избежав, израильтянин вопияше, Избавителю Богу нашему поем.

Запев: Ангеле Христов святыи, спаси мя грешнаго раба своего (поклон).

Неусыпаемаго хранителя души моей, и предстателя животу моему, и наставника от Бога даннаго ми, пою тя Ангеле Божии, Бога Вседержителя.

Запев. Господи Исусе Христе Сыне Божии, помилуй мя грешнаго.

Хотяи всем человеком спастися, святыя Ангелы наставники и просветители, приставил еси Слове человеком, просвещая нас в страх Твой.

Запев Ангелу. Тмою нощи омрачаемаго, и мглою мрака покрываемаго страстей, светом покаяния озари мя, наставниче и заступниче и хранителю мой.

Слава. Мерзских помышлении во мне точит, наводнение тинное и мутное, и от Бога отлучает ум мой, еже посуши, о, заступниче мой.

И ныне. Богородичен. Тишина еси Владычице и пристанище, волнующимся в пучине греховней, тем притекаю ко пристанищу ти, волнуемь пенами различных страстей.

Катавасия: Избави от бед рабы своя Ангеле Христов хранителю мой святыи, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Небесному кругу, Верхотворче Господи, и Церкви Зиждителю, Ты мене утверди в любви Своей, желанием сыи край, верным утвержение Едине Человеколюбче.

Запев. Земленаго и кальнаго, и перстнаго смешения имех имение, тем земли приложихся. Но о, заступниче мой, и наставниче, и избавителю, обрати желание мое к небесным.

Запев. В нощи и во дни лукавыми делы моими прегорчеваю, и оскорбляю, и раздражаю тя. И не хотяща тя далече от мене стояти, поборника моего, сотворяю тя.

Запев. Скорбию и унынию вина ти бываю, яко непокаянен пребываю, и неисправлен. Но даждь ми покаятися чисте, и радостна творити тя хранителя моего.

Слава. Зря невидимое Божие лице, на Небесех седящаго, и призирающа на землю разумно, и трястися ей творяща, моли спасти мя, святый Ангеле.

И ныне. Богородичен. Ум и смысл и слово, дар Божии приях, яко да познав Дателя, делы почту добрыми. Аз же дар страстьми обезчестив, Спасу досадих, Владычице спаси мя. Катавасия.

Седален, глас 2-й. От любве душевныя вопию ти, хранителю души моея, всесвятыи мой Ангеле, покрый мя и соблюди, от лукаваго ловления всегда, и к жизни настави небесней, вразумляя и просвещая, и укрепляя мя.

Слава, и ныне. Богородичен. Богородице безневестная пречистая, яже без семене рождьши всех Владыку, Того со Ангелом хранителем моим моли, избавитимися всякаго недоумения, и дати умиление и свет души моей, и согрешением очищение, яже Едина вскоре заступающи.
 

Песнь 4. Ирмос

Ты ми Христе Господь, Ты же и сила ми, Ты ми Бог, Ты ми радование. Не оставль недра отча, но милостию си нашу нищету посетив, тем с пророком Аввакумом зову: силе Твоей слава Человеколюбче.

Запев. Не помышляю Страшнаго Судища Спасова, в нем же хощу трепетен предстати, и дати слово о всяком деле же и слове, ни смерти яже безвестна, во уме ни мало приемлю, и неисправлен есмь. Наставниче мой не остави мене.

Запев. Безумно вся злобы соверших измлада, и не престах тя заступника моего, делы неподобными оскорбляя, и стужая всегда. Но не разгневайся, но пожди и еще, вразумляя и просвещая и утвержая мя.

Запев. Слова Божия долготерпению подобяся, пришедша в покаяние призвати вся грешныя, и ожидающа самоволное исправление, и не понуждающа, и ты наставниче мой, на мне претерпев пребуди.

Слава. Далече от Бога грех мя отрину, и древа животнаго изгна. Но Владыка мой Исус, прият мя милостивно, и всели мя. Аз же толику отметаю Его благость, еще же и оскорбляю тебе Божии Ангеле.

И ныне. Богородичен. Яко воистину Господь воцарися, Царствие не отпадающее, и облечеся псаломски, из Тебе Богомати, в красное благолепие, плоть святую, ею же смерть прият, и разруши ея царство. Катавасия.
 

Песнь 5. Ирмос

Вскую мя отрину, от лица Твоего Свете незаходяи, покрыла мя есть чюжа тма окаяннаго. Но обрати мя, и к свету заповедей Твоих пути моя направи молютися.

Запев. Тя хранителя стяжав спребытна и сприятна, святыи Ангеле, соблюдающа, и спутьшествующа, спребывающа, и спасенная предлагающа ми непрестанно, кое прощение прииму неразумен сыи.

Запев. Мнозем дерзновением Престолу предстоя Вседержителя, и сликовствуя у Царя твари, многим ми злым подати прощение, защитителю мой помолися.

Запев. Муки вся провидя и мучения ждущая мя, и ослепление и удаление мое, и страстей омрачение, милуя стенеши, и сетуеши и дряхлуеши печалию исполнен избавителю мой.

Слава. Ни единаго часа, ни единыя черты, и тех мнее, оставих тя, благодателя моего и хранителя, о мне порадоватися и возвеселитися и взыграти, грехми всегда смешаем.

И ныне. Богородичен. Ново Младя в Тебе явися, неизследимыи и необыменныи, ставилом бездны, и горы мерилом поставль Владычице. Лики звездам исчитая, и капли дождя, и ветром дыхания меру положи. Катавасия.
 

Песнь 6. Ирмос

Молитву пролию ко Господу, и Тому возвещу печаль мою, яко зол душа моя наполнися, и живот мой аду приближися. Но молюся яко Иона, от тли Боже мой возведи мя.

Запев. Сохраняй ополчаяся окрест мене, и находы востязая лукавых бесов. И тех звериная нападания, яже на мя нападающа всегда. Не оставляй сохранниче мой, тебе бо имам тепла заступника.

Запев. Пречистое и благоуханное миро, не гнушайся моея смрадости, ни отступи от мене до конца. Но неотступен ми буди хранитель присныи. И солнце бо места смрадная преходя не оскверняется.

Запев. Капли слезоточныя источити, покрывающаго водами Слова превыспреняя Своя, благодать ми дати умоли заступниче мой, яко да теми очистится сердце мое, и узрит Бога.

Запев. Безплотен яко чист и невеществен, предстоя Чистому и Невещественому, и к Тому стяжав великое дерзновение и присвоение. Того убо моли прилежно, душу мою спасену даровати ми.

Слава. Да покрыет срам и студ, мерзская и смрадная, и темная лица вражия, егда убогая ми душа от тела разлучится. Ту же да покрыете наставниче мой, твои пресвященнеи криле.

И ныне. Святых святейши Ангел, Херувим и Серафим вышши, землеретныи ми ум, земнаго и вещнаго желания превышьши покажи, от земли к небесней любви вознесши. Катавасия.

Слава, и ныне. Кондак, глас 4-й. О, предстателю нератныи страстныя ми души, и хранителю мой, и наставниче мой, от бед мя избавити, не презри всесвятыи Ангеле.

Икос. Помышляй убо душе моя смертныи час, и хранителя Ангела своего со слезами моли, да Владыку за тя умолит: на страшнем и будущем Суде, дондеже не постигнет кончина, и смерть горкая, и лютыи ответ, возопий всегда глаголя: не презри мене всесвятыи Ангеле.
 

Песнь 7. Ирмос

Иже от Июдеи дошедше отроцы в Вавилон древле, верою утвержении, пламень пещныи попраша глаголюще: отец наших Боже благословен еси.

Запев. Тмы окрест нападающих на мя разбойник невидимых, ищущих душу мою исторгнути и восхитити, огненым си копием отгоняя державно, не оставляй помощниче мой.

Запев. Егда хощет ми судити Судия и Бог мой, и осудити мя, осужденнаго внутреним судищем, прежде Суда того. Не забуди раба твоего, сохранителю мой.

Запев. Землю имам матерь, и кал отца, праотца же персть, и сих сродство землю о всем зрю. Но даждь ми заступниче мой, воззрети когда на небесную доброту.

Запев. Яко красен сыи добротою, яко сладок и весел, и солнцеобразен ум, светел предстани ми, осклабленным лицем, и веселым воззрением, егда хощу от земли взятися, наставниче мой.

Слава. Благосердия ради милости, человеколюбия премножеством многим, твоих крыл кровом хранителю мой, покрый мя изходяща от тела, не видети мерзская лица бесовская.

И ныне. Небесная врата, и спасеная дверь, лествице мысленная, по ней же Бог сниде, и человек взыде в Небесное Царство, его же сподоби мя улучити. Катавасия.
 

Песнь 8. Ирмос

Седмь седмицею пещь, халдейскии мучитель, благочестивым люте разжже. Силою же лучшею спасеных видев, Творцу и Избавителю вопияше: дети благословите, священнии воспойте, людие превозносите Его во веки.

Запев. По Бозе тя получих от Бога заступника, и хранителя и помощника, и возбранника пресвятыи Ангеле. Тем не престай моляся, пестунствуя и наказуя, и уча подобным разумно, и просвещая ум мой, дондеже мя представиши Христу спасена.

Запев. Егда поставятся престоли, и книги разгнутся, и Ветхии деньми сядет, и судятся человецы, и Ангели предстанут, и вострепещет земля, и вся потрясутся, твое человеколюбие явль на мне тогда, избави мя геены, Христа умолив.

Запев. Ныне яко пчелы сот невидимо обыдоша мя, богомерзции бесове и убийцы, яко хищнии волцы, и яко лукавыя лисицы, окрест устрашающе. Но покрыи мя сохранниче мой, яко же покрывает орел птенцы своя.

Запев. От очию слезы непрестанно текуща, неоскудны токи даждь ми, всего мя омывающа от верху и до ногу. Яко да паче снега убелену ризу облек покаянием, в чертог Божии вниду, тя почитая заступника моего.

Запев. Христов храм бывшее сердце мое, страстьми, свиней неразумных житие соверших. Но укрепи мя помощниче души моей, очистити сие. Окропити и покадити вонями и миром, мольбою и чистотою. Да паки будет Христу храм благоуханен.

Слава. Наставниче и хранителю, заступниче и избавителю мой, неначаемыя ми души блюстителю, егда трубныи страшныи глас хощет мя воздвигнути на Суд, близ мене стани тогда тих и радостен, надеждею спасения отъемля ми страх.

И ныне. Богородичен. Премногою благостию туне мя помилуй, милосердия источник рождьши: милости бо достойно не имам что Ти принести, благих бо моих никако же требуеши, яко благодавца и Спаса миру, неизреченно заченши Обрадованная. Катавасия.
 

Песнь 9. Ирмос

Устрашися всяк слух, неизреченна Божия схождения, яко Вышнии волею сниде и до плоти, от девическаго чрева быв убо Человек. Тем же пречистую Богородицу вернии величаем.

Запев с поклоном. Видети ми тя одесную страстныя ми души предстояща, светла и тиха, заступника и сохранника ми, егда исчезает от мене дух мой нуждею, и ищуща мя объяти, горкия бесы отгоняюща.

Запев. Яко святыи Божии слуга, и творя Его божественая хотения, много богатишися к Нему дерзновением святыи Ангеле. Тем тепле о мне Того моли, яко да спасен тобою, воспеваю заступление и покров ти.

Запев. Весь живот мой во мнозе претекох суете, и к концу приближихся, и молю тя хранителя моего, буди ми защититель, и возбранник нератен, егда прехожду мытарства, лютаго миродержца.

Запев: Господи Исусе Христе Сыне Божии, помилуй мя грешнаго (поклон).

Одолей моему злу, Исусе Единородныи Преблаже милосердием си, и безчисленаго множества, Твоего безплотнаго слуги, божественными молитвами, его же ми пристави измлада, яко Человеколюбец, хранителя.

Слава. Всю мою по Бозе спасения надежду возложих на тя, хранителя моего и властеля, и заступника: общую молитву о мне ко Христу сотвори, с молебники прием Ангельския лики, и с заступники.

И ныне. Богородичен. Вознеси рог верных, и низложи варварская шатания Богородительнице Марие, необорим спасающи сей град Твой, в нем же великое Твое имя, и многославное величается, и верно славится всеми Владычице чистая. Катавасия.
 

Молитва к своему Ангелу хранителю

Ангеле Христов святыи, спаси мя грешнаго раба своего (поклон).

Святыи Ангеле предстояи бедной ми души, и окаянному ми животу, не остави мене грешнаго, ниже отступи от мене за невоздержание мое. Не даждь места лукавому бесу, еже одолети ему моей немощи, смертнаго сего телесе. Укрепи бедствующую и худую мою руку, и настави мя на путь спасения. Ей святыи Ангеле Божии, хранителю и покровителю горцей моей души и телеси, вся ми прости, елико тя оскорбих во вся дни живота моего. И аще что согреших во днешнии день, покрыи мя в настоящую нощь, и сохрани мя от всякого искушения противнаго, да ни в коем гресе прогневаю Бога. И молися за мя ко Господу, да утвердит мя во страсе Своем, и достойна покажет мя раба Своея благости, аминь. (Поклон земной).

Отпуст: Господи Исусе Христе Сыне Божии, молитв ради пречистыя Твоея Матере, и заступлением святаго Ангела хранителя моего, и всех ради святых, помилуй и спаси мя грешнаго, яко Благ и Человеколюбец. Аминь.

+

Авторизация

* *
*

Регистрация

*
*
*
*

Проверочный код Time limit exceeded. Please complete the captcha once again.


Восстановление пароля