Канон акафист Пресвятой Богородице

Русская вера, 2017

Тропарь, глас 8.

Повеленное таинство прием в разуме, в крове Иосифове гаданием предста безплотныи, глаголя неискусней браку: преклонеи схождением Небеса, вмещается неизменно весь в Тя. Его же и видя в ложеснах Твоих приемша рабии зрак, ужасаюся звати Ти: радуися Невесто неневестная.

Песнь 1. Ирмос

Отверзу уста моя, и наполнятся Духа, и слово отрыгну Царице Матери и явлюся светло торжествуя, и воспою радуяся Тоя чюдеса.

Запев: Пресвятая Госпоже Богородице, услыши молитву раб Своих, молящихся Тебе (поклон).

Запев: Христову книгу одушевлену, запечатленну Тя Духом, великии архангел Чистая зря возглашашеТи: радуися радости приятелище, Ея же ради праматерняя клятва разорится.

Запев. Адамово исправление, радуися Дево Богоневесто, адово умерщвение, радуися Всенепорочная, полато всех Царя. Радуися Престоле огненыи Вседержителя.

Слава. Цвете неувядаемыи, радуися едина прозябшая яблоко благовонное, радуися рождьшая благоухание единаго Царя. Радуися Неискусобрачная, мiрови спасение.

И ныне. Чистоты сокровище, радуися, Ею же от падения нашего востахом. Радуися сладкоуханныи крине Владычице, верных благоухая, Кадило благовонное, и миро многоценное.

Катавасия: Спаси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон).

Господи помилуй (трижды с поклонами).

Песнь 3. Ирмос

Твоя певцы Богородице, живыи не тления источниче, лик Себе совокупльши духовен, утверди в божественей Ти славе, и венцем славы сподоби.

Запев. Клас прозябшая божественыи, яко нива неоранная яве, радуися одушевленая трапезо, Хлеб животныи вмещьшая. Радуися животныя воды источниче неистощаемыи Владычице.

Запев. Юница Юнец рождьши непорочныи, радуися верным. Радуися Агнице, рождьшая Божияго Агньца, вземлющаго мiру всему прегрешения. Радуися теплое очистилище.

Слава. Утро светлейшее, радуися Едина, Солнца носящи Христа, свету жилище. Радуися тму разрушивше, и мрачныя бесы отнюд отгнавши.

И ныне. Радуися двере едина, Ею же Слово проиде едино, Яже вереи и врата аду Владычице рожеством Своим стерши. Радуися божественыи входе спасаемым Богоневесто. Катавасия.

Песнь 4. Ирмос

Седяи в славе на Престоле Божествене, на облаце легце, прииде Исус Пребожественыи, от Пречистыя Девы, и спасе вопиющыя, слава Христе силе Твоей.

Запев. Во гласех пении, верою Тебе вопием Всепетая: радуися тучная горо, и усыреная Духом. Радуися свещниче, и ручко манну носящи, услаждающи всех благочестивых чювствия.

Запев. Очистилище миру, радуися Пречистая Владычице. Радуися лествице, от земли всех возвысивши благодатию. Радуися мосте, воистину преводяи всех от смерти к животу, поющих Тя.

Запев. Небес превышшая, радуися земное основание, во Своих ложеснах Пречистая нетрудно поносивши. Радуися червленице, багряницу божественую омочивши от кровей Твоих, Цареви силам.

Слава. Законодавца рождьшая истиннаго, радуися Владычице, иже беззакония всех туне очищающаго. Недоведомая глубино, высото неизреченная, браконеискусная, Ею же мы обожихомся.

И ныне. Тя исплетшую мiрови нерукоплетен венец, песнословяще, радуися Тебе Дево зовем, хранилище всех и ограждение, и утвержение, и священное прибежище. Катавасия.

Песнь 5. Ирмос

Удивишася всяческая, о Божественней славе Твоей, Ты бо браконеискусимая Девице, прият во утробе надо всеми сущаго Бога, и родила еси безлетнаго Сына, всем воспевающим Тя мир подавающа.

Запев. Путь порождьшая жизни, радуися Пренепорочная, яже от потопа греховнаго мiр спасшая, радуися Богоневесто, слышание и глаголание страшно, радуися пребывание Владыки всея твари.

Запев. Крепость и утвержение человеком, радуися Владычице, место освящения славы, умерщвение адово, чертоже всесветлыи, радуися ангелом радость, радуися Помощнице верно молящимтися.

Запев. Огнеобразная колеснице Слову, радуися Владычице, одушевленыи Раю, животное Древо, посреде имея жизни Господа, Его же сладость оживляет верою причащающихся, и тли подклонившихся.

Слава. Укрепляеми силою Твоею, верно вопием Ти: радуися граде всех Царя, преславная и достослышанная, о Ней же глаголана быша яве: горо несекомая, радуися глубино неизмерная.

И ныне. Пространное селение Слову, радуися Пречистая, сосуде, иже Божественыи бисер произведши, радуися вседивная, всех к Богу примирение, блажащих Тя Богородице всегда. Катавасия.

Песнь 6. Ирмос

Божественое се и всечестное совершающе празднество, богомудреннии Божия Матере, приидите руками восплещем, от Нея рождьшагося верою славяще.

Запев. Чертоже Слову нескверныи, вина всех обожения, радуися Всечистая пророком оглашение, радуися апостолом удобрение.

Запев. От Тебе роса укану, пламень многобожия угасивши, тем вопием Ти: радуися руно одушевленое, еже Гедеон Дево прежде виде.

Слава. Се Тебе Дево радуися зовем, пристанище нам буди труждающимся, и отишие в пучине скорбей, и соблазнов всех сопротивника.

И ныне. Радости вина, облагодати наш помысл, еже звати Тебе, радуися неопалимая купино, и облаче всесветлыи, яже верных непрестанно осеняющии. Катавасия.

Слава, и ныне. Посем кондаки и икосы Пресвятей Богородице, Глас 8-й.

Кондак 1. Взбранной Воеводе победительная, яко избавльшеся от злых, благодарственая восписуем Ти раби Твои Богородице. Но яко имущи державу непобедимую, от всяких нас бед свободи, да зовем Ти: радуися, Невесто Неневестая.

Икос. Ангел предстатель, с Небесе послан бысть рещи Богородице: радуися, и с безплотным гласом воплощаема Тя зря Господи, ужасашеся и стояше, зовыи к Ней таковая: радуися Ея же ради радость восияет, радуися Ея же ради клятва исчезнет. Радуися падшаго Адама востание, радуися слез Еввин избавление. Радуися высото неудобь восходима человеческими помыслы, радуися глубино неудобь зримая и ангельскима очима. Радуися яко еси Царево седалище, радуися яко носиши Носящаго вся. Радуися звездо являющая Солнце, радуися утробо божественаго воплощения, радуися Ея же ради обновляется тварь, радуися Ея же ради поклоняемся Творцу (поклон), радуися Невесто неневестная.

Кондак 2. Видящи Святая Себе в чистоте, рече Гавриилу дерзостне: преславное твоего гласа, неудобь приятно Ми души является: безсеменна бо зачатия рожество предглаголеши, зовыи, аллилуиа.

Икос. Разум неразумен, разумети Девая ищущи, возопи к служащему: из боку чисту, Сыну како есть родитися мощно, рцы Ми; к Ней же он рече со страхом, обаче зовыи сице: радуися совета неизреченнаго тайно, радуися молчанием молящихся верою. Радуися чюдес Христовых начало, радуися велением Его главо. Радуися лествице Небесная по ней же сниде Бог, радуися мосте преводяи от земли на Небо. Радуися ангелом многословящее чюдо, радуися бесовом многоплачевныи струпе. Радуися иже Свет неизреченно рождьши, радуися еже како, ни единаго же научивши. Радуися премудрых превосходящи разумы, радуися верных озаряющи смыслы: радуися Невесто неневестная.

Кондак 3. Сила Вышняго осени тогда к зачатию Браконеискусную, и благоплодная Тоя ложесна, яко село показа сладко, всем хотящим жати спасение, внегда пети сице, аллилуиа.

Икос. Имущи богоприятну Девая утробу, востече к Елисавефи: младенец же оноя абие познав Сея целование, радовашеся. И играньми яко песньми, вопияше к Богородице: радуися отрасли неувядаемыя лозо, радуися плода безсмертнаго стяжание. Радуися делателя делающи Человеколюбца, радуися садителя жизни нашея порождьши. Радуися браздо растящая гобзование щедрот, радуися трапезо носящая обилие очищении. Радуися яко Рай пищныи процветаеши, радуися яко пристанище душам готовиши. Радуися приятное молитвы кадило, радуися всего мiра очищение, радуися Божие к смертным благоволение, радуися смертных к Богу дерзновение, радуися Невесто неневестная.

Кондак 4. Бурю внутрь имея помышлении неверных, целомудреныи Иосиф, смутися, прежде небрачну Тя зря, и бракоокрадовану помышляше Непорочная: уведев же Твое зачатие от Духа Свята, рече, аллилуиа.

Икос. Слышаша пастырие, ангелом поющым плотьское Христово пришествие, и текше яко к Пастырю, видевша Того яко Агньца непорочна во чреве Мариине пасшася, Юже поюще и реша: радуися Агньца и Пастыря Мати, радуися дворе словесных овец. Радуися невидимых зверей мучение, радуися райским дверем отверзение. Радуися яко небесная срадуются с земными, радуися яко земная сликовствуют небесным. Радуися апостолом немолчная уста, радуися страстотерпцем непобедимая дерзосте. Радуися твердое вере основание, радуися светлое благодати познание. Радуися Ея же ради обнажися ад, радуися Ея же ради облекохомся славою, радуися Невесто неневестная.

Кондак 5. Боготечную звезду видевше волсви, и тоя последоваша зари, и яко светилника держаще ю, тою искаху крепкаго Царя, и достигше Недостижимаго, порадовашася Ему, вопиюще, аллилуиа.

Икос. Видеша отроцы халдейстии на руку Девичю, создавшаго рукама человека, и Владыку разумевающе Его, аще и рабии взят зрак, потщашася дарми угодити Ему, и возопити Благословенней: радуися звезды незаходимыя Мати, радуися заре тайнаго дне. Радуися прелести пещь угасивши, радуися троицу ученик хранящи. Радуися мучителя немилостива изметающи от начальства, радуися Господа Человеколюбца показавши Христа. Радуися еже варварскаго избавляющи служения, радуися скверных избавляющая дел. Радуися огня поклоняние угасивши, радуися пламене страстнаго изменяющи. Радуися персом наставнице целомудрия, радуися всех родов веселие, радуися Невесто неневестная.

Кондак 6. Проповедницы богоноснии бывше волсви, возвратишася в Вавилон, скончавше Ти пророчество, и проповедавше Тя Христа всем, оставиша Ирода яко лжива, не ведуща пети, аллилуиа.

Икос. Возсия во Египте просвещение истине, отгнал еси лжи тму. Идоли бо его, Спасе не терпяще Твоея крепости, падоша. Сих же избавльшиися вопияху к Богородице: радуися исправление человеком, радуися низпадение бесом. Радуися яже прелести державу поправши, радуися идолскую лесть обличивши. Радуися яко море потопивши фараона мысленнаго, радуися каменю напоившии жаждущыя живота. Радуися огненыи столпе наставляя сущих во тме, радуися покрове мiру ширши облака. Радуися пище манны приемнице, радуися пищи святыя служителю. Радуися земле обетованная, радуися из Нея же течет мед и млеко, радуися Невесто неневестная.

Кондак 7. Хотящу Симеону от нынешняго века преставитися от прелестнаго, вдался еси яко младенец тому: но познался еси ему и Бог совершен. Тем убо удивися Твоей неизреченней премудрости, зовыи, аллилуиа.

Икос. Нову показа тварь, явлься Зиждитель нам, иже от Него бывшим, из безсеменныя прозяб утробы, и сохранив Ю яко же бе нетленна, да чюдо видяще воспоем Ей вопиюще: радуися цвете нетления, радуися венче воздержания, радуися воскресения образ облистающи, радуися ангельское житие являющи. Радуися древо благоплодовитое, от него же питаются вернии, радуися древо благосеннолиственно, им же покрываются мнози. Радуися рождьшая Наставника заблуждшим, радуися порождьшая Избавителя плененым. Радуися Судии праведнаго умоление, радуися многих согрешении прощение. Радуися одежде нагих дерзновения, радуися любы всяко желание побеждающи, радуися Невесто неневестная.

Кондак 8. Странно рожество видевше, устранимся мiра, ум на Небо преложше. Сего бо ради высокии на земли явися смирен человек, хотя привлещи к высоте, вопиющих Ему, аллилуиа.

Икос. Весь бе в нижних, и вышних никако же отступль, неописанное Слово: схождение бо божественно, неместно бысть прехождение, и рожество от Девы богоприятны слышаще сия: радуися Бога невместимаго вместилище, радуися честнаго таинства двере. Радуися неверных верное слышание, радуися верных известная похвало. Радуися колеснице Пресвятая Сущаго на Херувимех, радуися селение преславно Сущаго на Серафимех. Радуися противныя в то же собравши, радуися яже девство и рожество сочетавши. Радуися яко Тебе ради разрешися преступление, радуися яко Тебе ради отверзеся Рай. Радуися ключу Царства Христова, радуися надеже благ вечных, радуися Невесто неневестная.

Кондак 9. Всяко естество ангельское удивися, великому Твоего вочеловечения делу: неприступнаго бо яко Бога, зряху всем приступна Человека, нам убо спребывающа, и слышаща от всех, аллилуиа.

Икос. Витии многовещанны, яко рыбы безгласны видим о Тебе Богородице: недоумеют бо глаголати, како Девою пребываеши, и родити возможе; мы же таинству дивящеся, верно вопием: радуися премудрости Божия приятелище, радуися промышления Его сокровище. Радуися любомудрецы немудры являющи, радуися хитрословесники безсловесны обличивши. Радуися яко обуяша лютыя взыскатели, радуися яко увядоша баснотворцы. Радуися афинейския пленицы растерзающи, радуися рыбарем мрежи исполняющи. Радуися из глубины неведения извлачащи, радуися многих в разуме просвещающи. Радуися кораблю хотящым спастися, радуися пристанище житейских плавании, радуися Невесто неневестная.

Кондак 10. Спасти хотя мир, иже всем украситель, к сему самообетован прииде, Пастырь сыи и Бог, нас ради явися по нас подобен: подобным бо подобное призвав яко Бог, слышит от всех, аллилуиа.

Икос. Стена еси девам Богородице Дево, и всем иже к Тебе прибегающым. Ибо Небу и земли Творец устроив Тя Пречистая, вселься во утробу Твою, и научив приглашати Тебе всех: радуися тело девства, радуися двере спасения, радуися началнице мысленаго наздания, радуися подателнице Божественыя благодати, радуися Ты бо обновила еси зачатых студно, радуися, Ты бо наказала еси окраденыя умы. Радуися тлителя смыслом упражняющи, радуися сеятеля чистоте порождьши. Радуися чертоже безсеменнаго уневещения, радуися верных Господеви сочетавши. Радуися добрая младопитателнице девам, радуися душам чертожнице святых. Радуися Невесто неневестная.

Кондак 11. Пение всяко побеждается, прострети тщащеся к множеству многих щедрот Твоих: равночислены бо песка псалмы и песни, аще приносим Ти Царю Святыи, ничто же творим достойно, их же дал еси Тебе вопиющым, аллилуиа.

Икос. Светоприемную свещу, во тме сущым явльшуюся, зрим Святую Деву: невещественныи бо вжигающи огнь, наставляет к разуму Божественному всех, зарею ум просвещающи, званием же почитаемую сим: радуися луче разумнаго солнца, радуися светило незаходимаго света. Радуися молние, душы освещающи, радуися яко гром враги устрашающи. Радуися яко многосветлое возсияваеши просвещение, радуися яко многотекущую источаеши реку. Радуися купели живописующии образ, радуися греховную отьемлющи скверну. Радуися бане омывающая совесть, радуися чаше черплющая радость. Радуися обоняние Христова благоухания, радуися животе таинаго веселия, радуися Невесто неневестная.

Кондак 12. Благодать дати восхотев долгом древним, всех долгов решитель человеком Господь, прииде бо Собою ко отшедшим Того благодати, и раздрав рукописание, слышит от всех сице, аллилуиа.

Икос. Поюще Твое рожество, хвалим Тя вси, яко одушевлен храм Богородице: в Твою бо вселися утробу, содержаи вся рукою Господь, освяти и прослави, и научи вопити Тебе всех: радуися селение Бога Слова, радуися святая святых больши. Радуися ковчеже позлащенныи Духом, радуися сокровище животу неистощимое. Радуися честныи венче царем благочестивым, радуися честная похвала иереом благоговейным. Радуися Церкви непоколебимыи столпе, радуися царству нерушимая стено. Радуися Ея же ради воздвижутся победы, радуися Ея же ради низпадают врази. Радуися тела моего врачевание, радуися души моея предстателнице, радуися Невесто неневестная.

Кондак 13. О, всепетая Мати, рождьшая всех святых Святейшее Слово, нынешнее приношение приемши, от всякия напасти избави всех, и грядущия изми муки, вопиющыя Ти, аллилуиа. Глаголи сей кондак трижды с земными поклонами. Также 1-й икос: Ангел предстатель... Таже кондак 1-й: Взбранной Воеводе...

Посем молитва Пресвятей Богородице.

Приими всеблагопомощная, Пресвятая Госпоже Владычице Богородительнице, сия честныя дары, Тебе единой прикладныя, от нас недостойных раб Твоих, яже от всех родов избранная, и всех тварей небесных и земных вышши явльшися: понеже бо Тебе ради бысть Господь сил с нами, и Тобою Сына Божия познахом, и сподобихомся Святаго Тела Его и Пречистыя Крове Его. Тем же блаженна еси Ты в родех родов Богоблаженная, яже Херувим светлейши, и Серафим честнейши сущая. И ныне всепетая Пресвятая Богородице, не престай молящися о нас недостойных рабех Твоих, еже избавитися нам от всякаго навета лукаваго, и от всякаго обстояния, и сохранитися нам неврежденым от всякаго всеядовитаго прилога диавольскаго, но даже до конца молитвами Твоими неосужденных нас соблюди: яко да Твоим заступлением, и помощию спасаеми, славу и хвалу, благодарение и покланяние за вся иже в Троице Единому Богу, и всех Создателю возсылаем, ныне и присно и во веки веком, аминь (поклон земной).

Песнь 7. Ирмос

Не послужиша твари богомудрении паче Зиждителя, но огненое прещение мужески поправше, радовахуся поюще: препетыи иже отцем Господь и Бог благословен еси.

Запев. Поем Тя вопиюще, радуися колеснице солнца разумнаго, лозо истинная, грозд зрелыи возделавши, вино источающ, еже душы веселящее, верою Тя славящих.

Запев. Врача всех порождьшая, радуися Богоневесто, жезле тайныи, цвет неувядаемыи процветши. Радуися Владычице, яко Тебе ради радости наполняемся, и жизнь наследуем.

Запев. Ветующии не может язык Владычице песнословити Тя: ибо паче Серафим возвысися, рождьши Царя Христа, Его же моли, сей град Твой спасти от многих искушении.

Слава. Хвалят блажаще Тя концы, и любовию зовут Ти, радуися свитче, в нем же перстом Отчимь написася Слово Чистая. Его же моли, в книги животныя, рабом Ти написатися Богородице.

И ныне. Молим раби Твои, и преклоняем колена сердца нашего: приклони ухо Твое Чистая, и спаси рабы Твоя погружаемыя присно, и соблюди от всякаго вражия пленения Твои град Богородице. Катавасия.

Песнь 8. Ирмос

Отроки благочестивыя в пещи, рожество Богородичо спасло есть. Тогда убо образуемо, ныне же действуемо, вселенную всю воздвиже пети: Господа воспевайте дела, и превозносите Его во веки.

Запев. Ложесны Слово прияла еси, иже вся носящаго понесла еси, и млеком питала еси, манием питающаго вселенную всю Чистая: Ему же поем, Господа воспевайте дела, и превозносите Его во веки.

Запев. Моисей разуме в купине, великое таинство рожества Твоего. Отроцы же прообразиша се явствено, посреде огня стояще и неопаляеми, нетленная Чистая Дево. Тем же Тя поем, и превозносим во веки.

Запев. Иже прежде лестию обнажени бывше, в ризу нетления облекохомся рожеством Твоим. И седящии во тме прегрешении, свет видехом, свету жилище Отроковице. Тем Тя поем, и превозносим во веки.

Слава. Мертвии Тебе ради оживляются, жизнь бо составную родила еси, немии прежде, ныне благоглаголиви бывают, прокаженнии очищаются, недузи отгоняются, и духов воздушных множества побеждаются, Дево человеком спасение.

И ныне. Яже миру рождьши спасение, Его же ради от земли на высоту взяти быхом, радуися всеблагословенная, покрове и державо, стено и утвержение, поющым Чистая: Господа воспевайте дела, и превозносите Его во веки. Катавасия.

Песнь 9. Ирмос

Всяк земен да взыграется, Духом просвещаем, да ликовствует же безплотных умов естество, почитая святое торжество Божия Матере, и да поют: радуися преблаженная, Богородице чистая присно Дево.

Запев с поклоном. Да Тебе вернии радуися зовем, иже Тобою радости причастницы бывше присносущней. Спаси нас от напастей, и варварскаго пленения, и от всякия иныя раны, за множество Отроковице прегрешении, находящыя человеком согрешающым.

Запев. Явилася еси просвещение наше и утвержение. Темже вопием Ти, радуися звездо незаходимая, вводящая в мiр великое Солнце. Радуися Едем отверзшая заключенныи, Чистая. Радуися сосуде, миро неистощимое на Тя излиянное приемшии.

Запев. Станем благоговейно в дому Бога нашего, и возопием, радуися мiру Владычице. Радуися Марие Госпоже всех нас. Радуися едина Непорочная в женах и добрая. Радуися столпе огненныи, вводящии в вышнюю жизнь человечество.

Слава. Голубице яже Милостиваго родившая, радуися присно Дево. Радуися преподобных всех похвало. Радуися страдалцем венчание, радуися всех праведных божественное удобрение, и нам верным спасение.

И ныне. Пощади Боже наследия Твоего, грехи наша вся презрев ныне, на се имея молящую Тебе, яже на земли без семене рождьшую Тя, великия ради милости, восхотевша вообразитися Христе в человечество.

Таже: Достойно есть... Трисвятое, и по Отче наш. Тропарь Богородице (1 раз). Слава, и ныне. Кондак 1 Господи помилуй (40 раз). Затем молитва Пресвятей Богородице похвалы:

О, Пресвятая Госпоже Владычице Богородице, вышши еси всех ангел и архангел, и всея твари честнейши, помощнице еси обидимым, ненадеющымся надеяние, убогим заступнице, печалным утешение, алчющым кормителнице, нагим одеяние, больным исцеление, грешным спасение, християном всем поможение, и заступление: о, Всемилостивая Госпоже Дево Богородице Владычице, милостию Своею спаси и помилуй державу нашу, Церковь святую и вся православныя християны, ризою Своею честною защити, и умоли Госпоже из Тебе без семене воплотившагося Христа Бога нашего, да препояшет нас силою Своею свыше, на невидимыя и видимыя враги наша. О, всемилостивая Госпоже Владычице Богородице, воздвигни нас из глубины греховныя, и избави нас от глада и губительства, от труса и потопа, от огня и меча, от нахождения иноплеменных и междуусобныя брани, и от напрасныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь Госпоже мир и здравие рабом Своим, всем православным християном, и просвети им ум, и очи сердечнии еже ко спасению. И сподоби ны грешныя рабы Твоя, Царствию Сына Твоего Христа Бога нашего, яко держава Его благословена и препрославлена, со безначалным Его Отцем, и с Пресвятым и благим и животворящим Его Духом, ныне и присно и во веки веком, аминь.

Слава, и ныне. Честнейшую Херувим... (поклон в пояс). Слава, и ныне. Господи помилуй, Господи помилуй, Господи благослови (с поклонами).

Отпуст: Господи Исусе Христе Сыне Божии, молитв ради пречистыя Твоея Матере, честныя и славныя Ея похвалы и всех ради святых, помилуй и спаси нас, яко благ и человеколюбец. Аминь.

Господи помилуй (трижды). Исходные поклоны.


Обзор книги